Object type: Stele

{1}   dravya vraḥ kamrateṅ ’añ ’āy dvijendrapura makuṭa mās 1 thmo ta gi nīla 1raṇamardda
{2}   ṇa mās 1 jlvāñ mās 2 thmo ta gi nīla 2 kuṇḍala mās 2 hemakavaca vnek thmo tagi nīla 5
{3}   [t]i kroy prāk suvarṇṇavasana vnek 1 ti kroy prāk ti saṅkū śaṅkha mās 1 cakramās 1 gadā mās
{4}   1 ti kroy prāk dharaṇī mās 1 kaṭaka mās 3 kaṅkaṇa mās 1 muktī juṃ cancyān mās4 thmo ta gi
{5}   padmarāga 2 puṣyarāga 1 nīla 1 arddhaprāsāda prāk padmarāga ta gi 13 snāpprāk pi diśa curi haṇira toṅ 1
{6}   sarom prāk naupura mās 2 ○ nā vraḥ kamrateṅ ’añ bhagavatīy makuṭa mās 1raṇamarddaṇa mās 1
{7}   [jlvā]ñ mās 2 thmo vyat ta gi 2 kuṇḍala mās 2 kaṇṭhi mās 1 keyūra mās 2 śrīvatsamās 1 kaṭaka mās
{8}   □ naupura mās 2 saṃvār mās 1 khse 4 thmo ta gi 5 suvarṇṇabhājana 1bhājanadhāra 1 bhājana chmār 7
{9}   vat ’ruṅ 1 vat chmār 1 bhājana ’ruṅ 2 khlās prāk 1 vaudi prāk 1 rūpyapratigraha 1tanlāp mās 1 varddha
{10}   ṇī prāk haṇira 1 nū dik haṇira 1 marakaṭa ta gi 1 nū cok haṇira 1 tanlāp prākhaṇira 2 tanlāp
{11}   prāk ti cār chdvāl 2 tanlāp saṅkū 1 tanlāp prāk ’ruṅ 1 tanlāp prāk chmār 4 tanlāpprāk sot 3 ka
{12}   laśa prāk 2 ’arghya prāk 1 pādya prāk [1] śarāva prāk 1 yajñakośa 1 nū cok prāk1 valvyal je
{13}   ṅ prāk 1 kamaṇḍalū prāk 1 chnāp prāk 1 vraḥ sarā mās 1 nīla 1 māṅsarāga 1śivikā 1 raśmivāra prāk 2
{14}   śveta prāk 2 tāmrakaraṇḍa 2 vaudi 3 kaṭāha 5 svok 10 syaṅ tap prāṃ jaṅjyaṅpadigaḥ 4
{15}   pādali 2 khāl pañcayajña 5 garop 1 ’asthārikā padma 1 laṅgau jeṅ 1 laṅgau pa □□ □ kamaṇḍalū
{16}   laṅgau 1 kamaṇḍalū saṃrit 7 lkāṃ 1 vaudi saṃrit 1 vas saṃrit 1 praṃ vyalthpvaṅ parivāra saṃrit 4 kanaka
{17}   danda 4 dandāgra 2 cancyān tarā saṃrit □ [mayūra]chatra prāk 2 kanakadandaprāk □

{A1}   siddhi svasti
{A2}   999 śaka
{A3}   gi nu duñ bhūmi rlaṃ dyan
{A4}   ’anle mvay ta teṅ tvan rlaṃ dya
{A5}   n khloñ ta mūla rlaṃ dyan khlo
{A6}   ñ sikṣā khloñ vraḥ gośāla teṅ tva
{A7}   n kandic teṅ tvan thṅe teṅ tvan cau teṅ vai
{A8}   teṅ □k teṅ tvan ’so teṅ dhān nu dravya ta
{A9}   roḥh neḥ ’aṅgulīyaka 2 mās pāda 1 padigaḥ
{A10}   4 tula 1 jyaṅ 2 dlaḥ 4 tula 1 kuntika 4 tula 2 jyaṅ
{A11}   12 vraḥ go 3 ca[nlyak] thmi tap hat yau 5 srū thlvaṅ 1 ○ bhūmi noḥ
{A12}   nu vrai vnur mvat ’āc t[i] vroḥ śata 1 ti ’añ duk caṃnāṃ kalpanā ta gi
{A13}   989 śaka gi nu duñ bhūmi vraḥ caṃnat ’anle 1 ta khloñ teṃ mūliḥ teṅ tvan
{A14}   cau teṅ tvan co khloñ ta vera sa’āṅ pratāp nu dravya ta roḥh neḥ tanlap chnā
{A15}   ṅ saṃmrit 2 prāk liṅ 4 dlaḥ 4 jyaṅ 19 kuntikā 2 jyaṅ 10 vraḥ go □ □ 2
{A16}   ca[nlyak] thmi tap hat yo 2 bhūmi noḥ ’āc ti vroḥ bhay 2 ○ 1011 śaka gi nu vraḥ kaṃ
{A17}   mrateṅ ’añ nirvvāṇa guṇadoṣa khloñ thṅe smāñ khloñ viṣaya puruṣapradhāna
{A18}   saṃtata teṅ tvan rlaṃ dyan khloñ śikṣā nu kulegaṇa bhāga noḥ nāṃ cat bhūmi rlaṃdya
{A19}   n ti lak ta ’añ khloñ teṃ mūliḥ nu kulegaṇabhāga noḥ nāṃ cat bhūmi vraḥ caṃnat
{A20}   ti lak ta ’añ vraḥ kaṃmrateṅ ’añ guṇadoṣa yugapat sa[ṅ] gol thve ’avadhi bhūmi
{A21}   noḥ roḥ vraḥ karuṇā vraḥ pāda kaṃmrateṅ ’añ paramakaivalyapada dravya ti ’añ
{A22}   oy jā phlās karanā saṅ gol khāl prāk 1 liṅ 4 dlaḥ 2 jyaṅ 10 kuntikā 2 jyaṅ
{A23}   8 liṅ 10 ca[nlyak] thmi tap hāt yau 10 kriyā jrvak 2 vave 4 raṅko thlvaṅ 5 marīca ’var2
{A24}   1015 śaka gi nu cat sruk sthāpanā jyak danle ’āy rlaṃ dyan ta jmaḥ śrī bhadreśvarā
{A25}   śrama dravya nu cat sruk sthāpanā jyak danle duñ khñuṃ taṃmrya jmol 2 ’seḥ jmol4 thnāp 2
{A26}   prāk jyaṅ 1 liṅ 1 tanlāp chnāṅ □ □ □ k 1 liṅ 3 pāda 3 khāl prāk 4 liṅ □ □ padigaḥ
{A27}   jyaṅ 10 dlaḥ 11 tula 1 jyaṅ 8 kuntikā 12 tula 1 jyaṅ 8 liṅ 10 bhājana trapū □
{A28}   jyaṅ 12 dop 6 chnāṅ 3 ca[nlyak] thmi bhṛti slik 1 śata 1 sru slik 3 śata 3 raṅko śata 2’aṃpyal bha
{A29}   y 1 marica je 1 vraḥ go bhay 3 phsam dravya nu duñ bhūmi cat sruk sthāpanā duñkhñuṃ jyak
{A30}   danle tamrya 2 ’seḥ 4 mās pāda 2 liṅ 2 prāk jyaṅ 2 liṅ 8 pāda 2 laṅgau tula
{A31}   2 jyaṅ 8 trapu jyaṅ tap ca[nlyak] thmi bhṛti slik 1 śata 2 dop 6 thnāp 2 sru slik 3 śata
{A32}   raṅko śata 2 ’aṃpyal bhay 1 vraḥ go bhay piy 3 dravya ti jvan ta devatā karmmakarapari
{A33}   pālana kaṃmrateṅ jagat liṅ[ga]pura pakṣa khnet gho sthira gho kansat gho □ □
{A34}   gho narāya gho vrāhmaṇaśāla gho kandhān gho devakeśa gho kansaṃ gho lakṣagho ka
{A35}   p gho kansvar tai kansā tai kansan tai kanśrī tai □ □ tai śānti tai dhani tai gandha taikaṃvi tai kansaṃ tai kan □ □
{A36}   tai kanseṃ ’na[k] kansā tai □ □ si vleṅ si kanśrī ○ paksa rṇnoc gho teṃ khdiṅ ghovīra □ gho śaśi gho
{A37}   tneṅ gho kandep gho vrahma gho kansuk gho kansvar tai svasti tai kapkep taisnigdha ’nak chpar
{A38}   tai kandhi tai thṅe si svasti pratipakṣa bhay 1 tap praṃ pvan vraḥ koṣaṇa 2 jyaṅ 2 liṅ18 vraḥ uttarā
{A39}   saṅgha 1 liṅ 1 śaṅkha ’so 1 kamandalū 1 jyaṅ 3 svok 1 jyaṅ 2 kalaśa 1 vardhaṇī 1’arghya 1 pā
{A40}   dya 1 śarāva 6 ṅann jyaṅ 1 liṅ 10 puṣ[p]akaratha 1 jyaṅ 2 liṅ 10 krapi 2 kaṃ[steṅ]śrī bha
{A41}   dreśvarāśrama kaṃ[steṅ] ’nak ryyan tapovana ta śiṣya ta ’añ gi ta siṅ duk smiṅprabhutva pratipakṣa
{A42}   gi ti ’añ pre paripālana dharmma ’añ panlās śarīra ’añ gi ta gāl phgāl padamūla ta’nak sañjak ta
{A43}   trvac vraḥ rājakāryya ’āy kamrateṅ jagat liṅgapura pi oy tamrvac caṃnāṃ kalpanā’añ ta
{A44}   kaṃmrateṅ jagat sap śaka pi svat calācala ta ’āśrama ’añ bhūmi kaṃmrateṅ jagatśivaliṅga
{A45}   bhūmi kaṃmrateṅ jagat śivaliṅga nu kaṃmrateṅ ’añ nārāyana ti pūrvva vraḥ phlū’āgneya gol thmo ta [ti]
{A46}   īśāna travāṅ cho ’antās dakṣiṇa prasap bhūmi kat crās niṛtiya prasap bhūmi stukcravo
{A47}   paścima prasap bhūmi caṃnat vraḥ kaṃmrateṅ ’añ ta mūla ti vāyavya indrāpati tiuttara prasap bhūmi s□ □
{A48}   īśāna śāla thmo ta phlū rlaṃ dyan bhūmi ta roḥh noḥh ’aṃvi kantāl thnal kaṃmrateṅjagat śivaliṅga dau
{A49}   dakṣiṇa jā bhūmi pakṣa khnet ’aṃvi kantāl thnal noḥh dau uttara jā bhūmi pakṣarṇnoc chpār dadi
{A50}   ṅ paścima travāṅ ’ā[ya]tta ta pakṣa khnet ○ chpār pantoy uttara travāṅ ’āyatta tapakṣa rṇnoc n[e]ḥ gi roḥ
{A51}   kalpanā ’añ velā kaṃmrateṅ jagat stāc mok ta phalguṇa nāṃ dau vraḥ kapila raṅkothlvaṅ mvay
{A52}   canlyak yau mvay uttarāsaṅga yau mva[y] kalmvan jyaṅ mvay gmuṃ mās mvaydhūpa ’var vyar □ □
{A53}   r bhay mvay vraḥ pūjā kaṃmrateṅ ’añ śivaliṅga nu kaṃmrateṅ ’añ nārāyana raṅko jemvay
{A54}   [raṅko] saṅkrānta je mvay saṅkrānta vraḥ vleṅ ’āy vraḥ kralā homa je mvay phsamsaṅkrānta je vyar kaṃ[steṅ] bhadreśvarā
{A55}   śrama prabhutva ta pakṣa khnet kaṃ[steṅ][’nak] ryyan tapovana prabhutva pakṣarṇnoc ○ 1001 śaka gi nu sthāpanā vraḥ
{A56}   vleṅ nā tapovana śrī bhadreśvarāśrama jaṃnvan ta vraḥ vleṅ noḥ khñuṃ tai spit sikandhar taiy □ □ tai □ □ □
{A57}   si hariya si kandhan taiy svāsti taiy kaṃpañ taiy kaṃvi phsaṃ si pi taiy prām phsaṃpraṃ piy kriyā vraḥ svo
{A58}   k mvay ṅan laṅgau jyaṅ vyar vardhaṇī mvay ’arghya mvay pādya mvay kalaśa mvaysaṃrāp praṃ mvay
{A59}   ’ājyadhara vyar darvvī mvay canhvay mvay phsaṃm tap pvan ṅan laṅgau jyaṅ vyarliṅ tap □ □ □ □
{A60}   sruc śuci mvay ṅan saṃmrit □ jyaṅ mvay liṅ tap bhūmi vraḥ vleṅ noḥ ’aṃvi muṃ’āgneya danle dau va
{A61}   p ta vnāṅ dakṣiṇa viṅ paścima vap ta bhumivanaribhā bhūmi vraḥ vleṅ yajña vraḥnoḥ sru liḥ □ raṅko
{A62}   starā tapovana bhay mvay prām’āyatta ta kaṃ[steṅ] śrī bhadreśvarāśrama vvaṃ ’ācti ’āyatta ta
{A63}   kule ’añ ○ 1040 śaka nu vraḥ kaṃmrateṅ ’añ ta guru rudra jvan khñuṃ ta roḥ neḥ tavraḥ vleṅ
{A64}   si □śrava si caṃ thgoy si sulabha tai kaṃna □ tai kansaṃ tai kañcān dravya ti jvan tavraḥ
{A65}   dlaḥ 1 svok 1 kriyā vraḥ saṃrāp noḥ trvaṅ 1 samrit caṅva dhūpa 10 ○ 991 śaka
{A66}   gi nu ’añ cat tapovana ’aṣṭasiddhi ta śaka noḥ gi nu vraḥ pāda kaṃmrateṅ ’añ sadā
{A67}   śivapada pandval pre sthāpanā vraḥ śivaliṅga vraḥ kaṃmrateṅ ’añ nārāyana vraḥ
{A68}   bhagavatī ti khmāṅ tok dau ’āy stuk sramo oy dāna bhūmi dakṣiṇa sthalā
{A69}   ’āc ti vroḥ thlvaṅ tap ’añ ’añjeñ vraḥ bhagavan sralāy dau sit dik ’aṃ
{A70}   noy oy bhūmi noḥ ’añ duk caṃnāṃ ta kaṃmrateṅ jagat liṅgapura man caṃ thpa
{A71}   l thpal khval pi takk tok vraḥ noḥ dau vraḥ pāda kaṃmrateṅ ’añ paramakaivalya
{A72}   pada pandval ’aṃteṅ thṅe ’añje[ñ] ’añ sthāpanā vraḥ viṅ ta noḥh ’aṃteṅ thṅe o
{A73}   y dāna bhūmi ’anle 1 hau khvit jā dakṣiṇā ’añ nā ’añ duk thpal kalpanā ta
{A74}   kaṃmrateṅ jagat liṅgapura bhūmi noḥh saṃ nu vraiy vnur ’āc ti vroḥ bhay 1 ○ 10
{A75}   18 śaka gi nu ’aṃteṅ ta mūla vraḥ cau nu ’aṃteṅ śrī yuvarāja vraḥ cau ’añje[ñ] ’a
{A76}   ñ prāyaścita phle cuḥ □ ’aśūni ta prāsāda □ dep sit dik ta taiy oy dāna
{A77}   bhūmi man dai hau drok jā dakṣiṇā ’añ ’añ duk caṃnāṃ kalpanā [kaṃmra]teṅ jagatliṅga
{A78}   pura bhūmi noḥ ’āc ti vroḥ bha[y] mvay thlvaṅ śata bhūmi vraḥ caṃna[t] □ □ □□takaka kaṃmrate
{A79}   ṅ jagat śrī bhadreśvarāśrama sre ’aṣṭasiddhi raṅko thlvaṅ 1 yajña vraḥ dik nu bhikṣākaṃmra
{A80}   teṅ ’añ ta siṅ vera [’āy] vraḥ ’āṣṭasiddhi liḥ 2 ○ 1011 śaka gi nu khloñ □ □
{A81}   jrai dikṣā ta ’añ nu kule phoṅ yugapat oy dāna bhūmi ’anle 1 nau jeṅ vnaṃ thmo jā
{A82}   dakṣinā ’añ ’avadhi bhūmi noḥ ti pūrvva ti □ □ vraḥ tīrtha śrī yaśodharataṭāka ti dakṣi
{A83}   ṇa vraḥ □ □ ti paścima caṃnat nā □ □ vraḥ jrai □ ti uttara phlū vrai ti crās phle □ □ □□ □ vnaṃ pra
{A84}   □ □ bhūmi siddhivala ti ’añ duk caṃnāṃ kalpaṇā ta kaṃmrateṅ jagat liṅgapura
{B1}   siddhi svasti
{B2}   1000 śaka gi nu duñ
{B3}   bhūmi ’anle mvay kaṃluṅ ’a
{B4}   vadhi bhūmi vraḥ kapila ta khloñ kanmya
{B5}   ṅ steṅ dharmmātmā khloñ vraḥ kapila teṅ tvan
{B6}   thṅe rati khloñ kanmyaṅ rati teṅ tvan kandic nu dravya ta
{B7}   roḥh neḥ ’aṅgulīyaka piy mās pāda mvay sliṅ
{B8}   vyar khāl prāk pram jyaṅ mvay dlaḥ tap tula vyar jyaṅ tap prā
{B9}   m kunti tap tula vyar jyaṅ vyar liṅ tap bhāja[na] trapu piy jyaṅ tap li
{B10}   ṅ tap vraḥ go parat vyar ca[nlyak] thmi tap hat yo tap prāmvave vyar bhūmi
{B11}   noḥ nu vrai vnur mvat ’āc ti vroḥ śata mvay [t]i ’añ duk caṃnāṃ kalpanā ta gi ○
{B12}   1011 śaka gi nu vraḥ travāṅ gol vraḥ sabhā khloñ vala candanagiri khloñ viṣaya
{B13}   khloñ vala travāṅ gol khloñ bhūtāsa dau nu khloñ [sru]k daśagrāma grāmavṛddhapuruṣapradhā
{B14}   na phoṅ pi khloñ kanmyaṅ neḥ nu kulegaṇa bhāga neḥ phoṅ nāṃ cat bhūmi vraḥkapila ti lak ta ’añ
{B15}   [pi] khloñ kandic vraḥ viṣṇu nu kulegaṇabhāga noḥ nāṃ cat bhūmi □ □ ti lak ta ’añpi vraḥ sabhā yuga
{B16}   pat [p]i saṅ gol thve ’avadhi bhūmi neḥ roḥ vraḥ karuṇā vraḥ pāda ka[mra]teṅ ’añparamakaivalyapada dravya
{B17}   ti ’añ oy thlā[y] [saṅ] gol ’aṅgulīyaka mvay ṅan jyaṅ 1 khāl prāk mvay liṅ pvan dlaḥpiy jyaṅ tap
{B18}   prām kuntikā praṃ piy tula mvay jyaṅ tap liṅ tap bhājana trapu mvay jyaṅ piyca[nlyak]thmi tap hat yau ta
{B19}   p mvay vraḥ kriyā vave piy raṅko thlvaṅ prām marica liḥ piy ○ 1016 śaka trayodaśīket □ □ □ śukravāra
{B20}   nu sthāpanā cat sruk jyak danle ’āy vraḥ kapila ta jmaḥ [śrī śiva]yogīśvarāśrama
{B21}   dravya nu cat sruk sthāpanā jyak danle noḥ ’seḥ jmol mvay mās śuci □ □ □ □ piy □ □
{B22}   □ jyaṅ mvay liṅ prām tanlāp □ □ □ prāk mvay □ □ □ □ □ □ □ □ piy ṅann liṅ tap □ □ □□ □ □ □ □
{B23}   □ y [mva]y ṅann prāk jyaṅ □ □ □ □ □ □ □ □ ṅann laṅgau tula mvay jyaṅ tap prāmkuntikā □ □ □ □ □ □ □ □ □
{B24}   □ □ □ □ □ □ □ □ liṅ tap □ □ ṇa □ □ □ □ □ □ □ □ □ □ □ □ □ □ □ □ □ □ □ □ □ □ □ □ □
{B25}   □ □ □ □ □ □ □ □ canlyak bhṛti bhay piy □ □ □ □ □ □ □ □ □ □ □ □ □ □ □ □ □ □ □ □ □ □□ □ □ □ □ □ □ □ □
{B26}   □ □ □ □ □ □ □ □ mvay liṅ tap phsam dravya nu duñ bhūmi vraḥ kapila cat sruksthāpanā jyak danle noḥ □ □ □ □ □ □
{B27}   □ □ □ □ □ mvay liṅ prām □ □ □ □ □ □ □ □ vyar liṅ □ □ □ □ □ □ □ □ □ □ □ □ □ □ □ □ □□ □
{B28}   □ □ □ □ □ □ □ □ tula mvay jyaṅ praṃ vyal □ □ □ □ □ □ □ □ □ □ □ □ □ □ □ □ □ □ □ □□ □ □ □ □
{B29}   □ □ □ □ □ □ □ □ canlyak bhṛti śata mvay bhay vyar □ □ □ □ slik vyar śata □ □ □ □ □ □□ □ □ □ □ □ □ □ □ □ □
{B30}   praṃ vyalbhay mvay tap go kryav bhay piy praṃ piy marica je mvay liḥ praṃ piy □ □□ □ □ □ □ □ □ dravya ti jvan ta kaṃ
{B31}   mrateṅ jagat śivaliṅga nu vraḥ kaṃmrateṅ ’añ nārāyana taṃmrya piy khñuṃpratipakṣa ○ pakṣa khnet gho jīva gho kaṃ
{B32}   □ gho kanhyas gho svasti tai kaṃvrau tai kaṃvāṅ tai kansaṃ tai □ □ tai □ □ i taikañjā phsaṃm gho pvan tai praṃ mvay [phsam tap]
{B33}   pakṣa rṇnoc gho khdep gho kanhyas sot gho □ □ s gho □ □ □ gho kansuk tai □ □ □ □□ □ □ □ □ □ □
{B34}   tai k □ □ tai vija sot tai kañcan kvan gho śaśiy gho vallabha gho śarmma tai □ □phsaṃ gho praṃ piy [tai praṃ piy]
{B35}   phsam tap praṃ mvay phsam ta pakṣa gho nu tai bhay mvay praṃ mvay vraḥ kriyāpaṃmre kaṃpa □ vyar ṅan laṅgau □ □ □ □ □ □ □
{B36}   □ □ □ □ y noṅ laṅgau mvay ṅann jyaṅ piy vardhaṇī mvay ’arghya mvay pādya mvaysaṃrap praṃ mvay ka
{B37}   laśa mvay phsam tap ṅann laṅgau jyaṅ vyar cirā dhūpa saṃmrit jyaṅ mvay krapimvay vraḥ mahākoṣa steṅ [śrī śivayo]
{B38}   gīśvarāśrama ta śiṣya ’añ gi ta siṅ duk smiṅ prabhūtva pratipakṣa gi ti ’añ preparipālana dharmma ’añ panlas śarīra ’añ
{B39}   gāl phgāl padamūla ta ’nak sañjak ta trvac vraḥ rājakāryya ’āy kaṃmrateṅ jagatliṅgapura pi oy [tamrvac] caṃnāṃ kalpanā ’añ sa
{B40}   p śaka pi svat calācala ta ’āśrama ’añ bhūmi kaṃmrateṅ jagat śivaliṅga nukaṃmrateṅ ’añ nārāyana □ i □ kṣa □ □ □ □ □
{B41}   □ i □ i vara ti duñ ta khloñ nu sau khloñ teṃ vā khloñ saṃpūrṇna khloñ pās khmaukhloñ teṃ ransi ta saptaśūnyaśūnya □eka śaka □nakṣatra □ □
{B42}   ket vaiśākha ’ādityavāra gi nu duñ nu dravya ta roḥh [neḥh] ’aṅgulīyaka vyar ṅannmās pāda mvay khāl prāk mvay liṅ piy prāk liṅ praṃ
{B43}   mvay prāk [t]uṃ jyaṅ mvay liṅ mvay dlaḥ mvay jyaṅ praṃ vyal kuntikā prām tulamvay jyaṅ mvay liṅ tap vardhaṇī mvay ’arghya vyar śa
{B44}   rāva pram phsaṃm jyaṅ mvay bhājana trapu piy jyaṅ tap liṅ praṃ piy valvyal chlyakmvay jyaṅ prām □ □ □ □ □ □
{B45}   mvay jyaṅ piy vraḥ jñā [śira ’]āṅśuka mvay veṅ hat bhay mvay □ □ □ □ □ mvay veṅhat tap vraḥ go parat
{B46}   vyar ca[nlyak] thmi tap hat yau tap vave piy bhūmi neḥ ’āc ti vroḥ thlvaṅ tap srethpal krapās ti duñ ta khloñ somatīrtha
{B47}   khloñ teṃ ransi khloñ teṃ ’aṃvil khloñ tavau ta śūnya’ekaśūnya’eka śaka gi nu duñnu dravya ta
{B48}   roḥh neḥh khāl prāk mvay liṅ praṃ vyal ’so utta□ dlaḥ mvay jyaṅ pvan liṅ tap kuntikā
{B49}   mvay jyaṅ praṃ mvay liṅ praṃ vyal bhūmi noḥ ’āc ti vroḥ thlvaṅ tapp ○ sre jeṅ vraḥtravāṅ ti duñ ta □ □
{B50}   □ □ □ nu khloñ somatīrtha ta ’aṣṭaśūnyaśūnya’eka śaka gi nu duñ nu dravya ta roḥhneḥh svok mvay liṅ mvay vodi vyar padigaḥ
{B51}   mvay jyaṅ praṃ mvay kuntikā mvay jyaṅ praṃ mvay ca[nlyak] thmi tap hat yau vyarbhūmi neḥ ’āc ti vroḥ thlvaṅ tap sre mālatyak□na ti duñ ta khlo
{B52}   ñ teṃ ransi khloñ tavau □ral khloñ pās khmau ta śūnya’ekaśūnya’eka śaka gi nu duñnu dravya ta roḥ neḥ vraḥ khlās mvay ’seḥ □ □ □
{B53}   □ mvay □ □ □ □ dlaḥ tap prām kuntikā mvay jyaṅ prām bhūmi noḥ ’āc ti vroḥ[thlvaṅ] bhay piy ○ sre jayavarāha ti duñ ta khlo
{B54}   ñ teṃ ’aṃvil ta eka’ekaśūnya’eka śaka gi nu duñ nu dravya ta roḥh neḥ dlaḥ vyarjyaṅ tap vyar kuntikā vyar jyaṅ praṃ
{B55}   vyal ca[nlyak] thmi tap hāt yau vyar bhūmi noḥ ’āc ti vroḥ thlvaṅ tap sre vraḥ □ □ tiduñ ta khloñ padmapura khloñ thṅe khloñ
{B56}   vāra’so ta pañcaśūnyaśūnya’eka śaka gi nu duñ nu dravya ta roḥh neḥ ’aṅgulīyakamvay sliṅ vyar khāl prāk mvay
{B57}   liṅ pvan pāda vyar prāk [t]uṃvyar liṅ tap praṃ piy canhvay prāk mvay pāda vyardlaḥ vyar jyaṅ praṃ vyal kuntikā pvan
{B58}   jyaṅ tap praṃ vyal vardhaṇī mvay liṅ tap vraḥ go piy kryav mvay ca[nlyak] thmi taphāt yau tap prām □ □ □ □ □
{B59}   p bhūmi noḥ ’āc ti vroḥ thlvaṅ tap bhūmi raṃnoṃ sre loñ dhānyālaya [ta] vap ta jeṅvraḥ travāṅ □ □ □ □ □ □ va
{B60}   p bhūmi jayavarāha ta bhūmi cāṃ ta pakṣa rṇnoc sre śivarāśi ti duñ ta khloñ □ □ □ ti□ i khloñ □ □ □ □ □ □ □
{B61}   svasti bhūmi [ta] teṅ tvan lgāṅkhloñ vrahmarṣada ta eka’ekaśūnya’eka çaka gi nuduñ nu dravya ta roḥh neḥ khāl prāk mvay
{B62}   liṅ piy prāk śuci liṅ vyar dlaḥ piy jyaṅ tap piy liṅ tap kuntikā piy jyaṅ praṃ pvan liṅtap bhūmi
{B63}   noḥ ’āc ti vroḥ thlvaṅ tap sre danle ti duñ ta khloñ vraḥ cpār khloñ teṃ ransi khloñpās khmau ta navaśūnyaśūnya
{B64}   ’eka śaka gi nu duñ nu dravya ta roḥh neḥ ’aṅgulīyaka mvay mās sliṅ vyar khāl prākvyar liṅ praṃ vyal pa
{B65}   digaḥ vyar jyaṅ praṃ pvan dlaḥ piy jyaṅ praṃ pvan kuntikā mvay jyaṅ praṃ mvaysvok mvay jyaṅ piy □ □ □ □ □
{B66}   vraḥ [go] parat mvay ca[nlyak] thmi tap hāt yo prām bhūmi noḥ ’āc ti vroḥ thlvaṅtap sre vraḥ thnal ti duñ ta □ □ □ □ □ □
{B67}   □ □ □ □ khloñ somatīrtha ta ’aṣṭaśūnyaśūnya’eka śaka gi nu duñ nu dravya ta roḥ[hneḥ] kalaśa prāk
{B68}   mvay jyaṅ mvay liṅ vyar vodi vyar padigaḥ mvay jyaṅ praṃ mvay dlaḥ prām tulamvay jyaṅ pvan kuntikā pi
{B69}   y jyaṅ tap pvan liṅ tap bhājana trapū mvay jyaṅ vya[r] □ □ □ □ □ □ □ □ mvay liṅ □ □tap mva
{B70}   y □ mvay ca[nlyak] thmi tap hat yau praṃ pvan greṅ vlaḥ bhūmi noḥ ’āc ti vroḥ[thlvaṅ] bhay mvay ○ sre □ □ □ □ □ ti duñ ta
{B71}   khloñ kanmyaṅ khloñ nu sau teṅ tvan vrau teṅ tvan cau teṅ tvan snaṃ loñ teṅ tachaśūnyaśūnyaeka śaka
{B72}   gi nu duñ nu dravya ta roḥh neḥ ’arghya prāk vyar liṅ praṃ piy padigaḥ vyar jyaṅ tapkuntikā vyar jyaṅ
{B73}   piy bhūmi noḥ ’āc ti vroḥ thlvaṅ tap prām sre daṃnap svāy ti duñ ta khloñpadmapura khloñ danle ta eka
{B74}   śūnyaśūnya’eka śa[ka] gi nu duñ nu dravya ta roḥh neḥ khāl prāk vyar liṅ praṃ piydlaḥ mvay jyaṅ pvan kuntikā
{B75}   vyar jyaṅ praṃ mvay ca[nlyak] thmi tap hāt yau piy bhūmi noḥ ’āc ti vroḥ thlvaṅpraṃ vyal ○ sre saṃroṅ ti duñ ta khloñ
{B76}   dharmmālaya ta śūnya’ekaśūnya’eka śaka gi nu duñ nu dravya ta roḥh neḥ khāl prākmvay liṅ pvan □ □ □
{B77}   liṅ vyar kuntikā mvay jyaṅ piy liṅ tap bhūmi noḥ ’āc ti vroḥ thlvaṅ praṃ vyal ○ srekhlās □ □ □ □ [’a
{B78}   vadhi] bhūmi ’aṃvi travāṅ □ □ □ dau prasap bhūmi jayavarāha lvaḥ ta □ □ daupūrvva □ □ □ prasap bhūmi
{B79}   □ □ □ vāyavya lvaḥ vraḥ thnal □ □ □ □ □ □ □ ti niṛti □ □ □ □ □ □ □ □ □ □ □ □ □ bhūmi□ □ □
{C1}   1005
{C2}   śaka gi nu du
{C3}   ñ bhūmi vraḥ □ □ □ □
{C4}   ’anle mvay ta khloñ
{C5}   kandic khloñ vrahmapura
{C6}   khloñ vala ’so nu dravya ta roḥh neḥ
{C7}   khāl prāk vyar liṅ tap □m prāk vyar liṅ tap
{C8}   praṃ pvan vraḥ go vyar bhūmi noḥ ’āc ti vroḥ thlvaṅ tap gi nā jyak danle ○
{C10}   neḥ gi roḥh caṃnāṃ kalpanā ’añ ta neḥh velā kaṃmrateṅ jagat
{C11}   liṅgapura stac mok ta phalguṇa raṅko thlvaṅ prām ca[nlyak] yau mvay uttarāsaṅgayau
{C12}   mvay kalmvan jyaṅ mvay gmuṃ mās mvay dhūpa ’var vyar la □ □ bhay mvay
{C13}   vraḥ pūjā devatā tapayati ta ’āsana kamrateṅ jagat liṅgapura raṅko je mvay
{C14}   pratidina saṅkrānta dau pūrvvadvāra je mvay saṅkrānta vraḥ viṣṇu liḥ praṃ vyal ’varvyar vraḥ mahā
{C15}   koṣa prabhutva khnet steṅ śrī yogīśvarāśrama prabhutva rnnoc ○ 1009 śaka gi nusthāpanā vraḥ kaṃmrateṅ ’a
{C16}   ñ narāyana ’āy pūrvvadvāra pi jvan ta ’me kansān nu bhūmi ti hau vraḥ vleṅ ta duñta khloñ ta cāṃ sru
{C17}   ta 1009 śaka gi nu duñ nu dravya roḥh neḥh khāl prāk vyar liṅ prām dlaḥ pvan jyaṅtap liṅ tap
{D1}   ca[nlyak] thmi tap hāt
{D2}   yo pvan marica ’var vyar
{D3}   bhūmi noḥ ’āc ti vroḥ thlvaṅ tap ’ā
{D4}   yata ta gho śrīvandha ta thve vraḥ pū[jā]
{D5}   vraḥ noḥ liḥ laya liḥ vyar thve caṃnāṃ
{D6}   kamrateṅ jagat vraḥ śivaliṅga vraḥ steṅ kavīndra
{D7}   pada jā śiṣya ta ’añ sthāpanā vraḥ śivaliṅga mvay
{D8}   kaṃluṅ bhūmi caṃnāṃ saṃ nu śiva yogīśvrāśrama

{C24}   1048 śaka
{C25}   caturddaśī roc phālgu
{C26}   ṇa ’ādityavāra gi
{C27}   nu yeṅ ta jmoḥ kaṃ[steṅ]
{C28}   kavīśvara khloñ vala
{C29}   śivaspada jvan khñuṃ bhū
{C30}   mi daṃnuñ ta roḥ neḥ
{C31}   jā caṃnāṃ ta kaṃmrate
{C32}   ṅ jagat liṅgapura tai
{C33}   kandhan kvan tai kandhān
{C34}   tai kansān tai kañca
{C35}   n kvan si tīrtha tai ka
{C36}   nsaṃ phsaṃ praṃ mvay sre
{C37}   travāṅ ji □ □ n pvan
{C38}   sre taruṇī mvay gi
{C39}   sre ta roḥ neḥ nāṃ raṅko
{C40}   dau kaṃmrateṅ jaga
{C41}   t liṅgapura sap mā
{C42}   gha srādhi sme raṅko
{C43}   je vyar liḥ praṃ vyal
{C44}   ’var vyar vvaṃ ’āc ti mān
{C45}   ’nak [ta] ’āyatva khñuṃ neḥ
{C46}   gi pamre ta kaṃmrate
{C47}   ṅ jagat liṅgapura ||
{B1}   siddhi svāsti namaśśivāya duk praśasta ta roḥ neḥ
{B2}   ta 1051 śaka ○ ’añ ’aṃcas varṣa chnāṃ tap pra[ṃ] piy gi nu gā
{B2}   l ta varṇa nā vraḥ canmāt ○ ta 989 śaka ta rāj[y]a vraḥ pāda kaṃmra
{B4}   teṅ ’añ śrī udyādityavarmmadeva ○ vraḥ pāda kaṃmrateṅ ’añ
{B5}   sadāśivapada ○ vraḥ pāda kaṃmrateṅ ’añ paramakaivalyapada
{B6}   vraḥ pāda kaṃmrateṅ ’añ paramaniṣkalapada ○ vraḥ pāda kaṃmra
{B7}   teṅ ’añ śrī sūryyavarmmadeva ○ syaṅ nā srāc ta bhaktiy to
{B8}   y vraḥ dnāy prap ’ari vraḥ pāda kaṃmrateṅ ’añ ○ mān vraḥ
{B9}   karuṇāprasāda ’adhikāra sap=patala ○ nau ru dravya t[a] mān nu
{B10}   vraḥ karuṇāprasāda’ātmapuruṣakāryya ○ gāḍhe vraḥ duñ khñuṃ duñ
{B11}   bhūmi loḥ bhūmi saṅ gol thve vnāṅ semāvadhi saṅ kudya jyak ’a
{B12}   ñcan travāṅ sthāpaka nu śaka ta roḥ neḥ jvan khñuṃ bhūmi pratipa
{B13}   kṣa sre vraḥ pūjā sre kalpaṇā ta smiṅ p[u]rohita priṅ khñuṃ vraḥ
{B14}   pi leṅ ta kule ta sruk svāy pañcaka thve nu gi cyar ○ jvan khñuṃ bhūmi
{B15}   duk caṃnāṃ kalpaṇā ta devatākṣetra ta roḥ neḥ vvan thnal
{B16}   saṅ svān canloṅ ta ’ādhvā ti thvāy phala jā vraḥ rājadharmma ri pha
{B17}   la svāmibhakti gi pi prārthanā guḥ ta 1071 śaka pi ket vai
{B18}   śākha śukravāra gi nu supratiṣṭha kaṃmrateṅ jagat śivaliṅga ○
{B19}   guru sthāpaka bhagavat pāda kaṃmrateṅ ’añ ta guru laṃpeṅ jā
{B20}   ’ācāryyapradhāna ○ ta 1031 śaka pañcamī roc vaiśākha ’ā
{B21}   dityavāra gi nu supratiṣṭha vraḥ kaṃmrateṅ ’añ nārāyana vraḥ
{B22}   [bhagavatī] ○ guru sthāpaka bhagavat pāda kaṃmrateṅ ’añ ta gu
{B23}   ru rudrā laṃpeṅ jā ’ācāryyapradhāna ○ pratiṣṭhā vraḥ pūjā vraḥ
{B24}   ta piy vraḥ vleṅ raṅko liḥ praṃ vyal ’var vyar dina ○ khñuṃ ti jvan
{B25}   pakṣa khnet tai chnap kvan tai kansri si kansaṃ tai ṛddhi kvan si □ □
{B26}   tai sulambha tai kansat si kandās si pamek phsaṃ praṃ pvan ○ pakṣa
{B27}   rṇoc tai kandhi kvan si kañcān tai khdic si kansaṃ tai umā kvan si cā
{B28}   riya tai spit kvan si hṛ□ṅgi si lā □ si tamrvac phsaṃ tapp ○ phsaṃ ’nak si
{B29}   strīy savāla tapp praṃ pvan○ sre vraḥ pūjā pakṣa khnet gnvar vroḥ
{B30}   thlvaṅ tapp pvan je mvay liḥ tapp piy ’var mvay pakṣa
{B31}   rṇoc gnvar vroḥ thlvaṅ tapp pvan je mvay liḥ tapp piy ’var mvay
{B32}   phsaṃ sre vraḥ pūjā gnvar vroḥ bhay mvay praṃ piy je piy liḥ ta
{B33}   pp mvay ’var vyar ○ sre ta bhavya ta smiṅ gnvar vroḥ thlvaṅ piy je vyar
{B34}   liḥ tapp pvan ’var mvay ○ ta bhavya ta p[u]rohita gnvar vroḥ thlvaṅ piy
{B35}   liḥ praṃ ’var mvay ○ sre priṅ khñuṃ vraḥ pakṣa khnet gnvar vroḥ thlvaṅ pvan
{B36}   je mvay liḥ tapp ’var piy ○ pakṣa rṇoc gnvar vroḥ thlvaṅ pvan je
{B37}   mvay liḥ tapp ’var piy phsaṃ gnvar vroḥ thlvaṅ praṃ piy je piy liḥ
{B38}   praṃ mvay ’var vyar ○ gi sre bhūmyūpāya khñuṃ vraḥ ta roḥ neḥ phoṅ ’ā
{B39}   yatva ta kule ta jā purohita ta mān dharmma gi ta jā p[u]rohi
{B40}   ta ta vraḥ neḥ gi ta paṅgāp kāryya ta khñuṃ vraḥ neḥ gi noḥ dai [vvaṃ]
{B41}   ’āc ti lak cicāy khñuṃ bhūmi vraḥ ta roḥ neḥ nau ruv kule [’añ]
{B42}   leṅ ’nak lak [phtā] cicāy khñuṃ bhūmi vraḥ ta roḥh neḥ
{B43}   □ □ □ □ nu gana vraḥ sabhā noḥ gi ta gurudroha
{B44}   1048 saka pañcamī roc phalguṇa śu[kravāra]
{B45}   [gi nu oy] caṃnāṃ ta vraḥ ta roḥ neḥ ta kaṃmrateṅ jagat
{B46}   liṅgapura tai paroṅ kvan tai suvṛkṣa kvan tai vi □ ri
{d1}   2
{d2}   si śata
{d3}   □ □ mma ○ tai
{d4}   kansāṃ ○ phsaṃ
{d5}   praṃ sre
{d6}   pūrvva phoṅ
{d7}   gnvar vroḥ thlva
{d8}   ṅ □ j[e] vyar liḥ
{d9}   praṃ vyal ’va(10r vyar caṃnāṃ ta
{d11}   phalguṇa raṅko thlva[ṅ]
{d12}   vyar ○ ta kaṃmra
{d13}   teṅ jagat
{d14}   vnaṃ ruṅ tai gandha ○ kva
{d15}   n tai kaṃvraḥ si
{d16}   govinda phsaṃ pi
{d17}   y sre gnvar vroḥ
{d18}   thlvaṅ mvay liḥ pi
{d19}   y ’var piy caṃnāṃ
{d20}   ta phalguṇa raṅko thlva[ṅ] mvay ○ ta vraḥ kā
{d22}   nti kaṃmrateṅ ’añ
{d23}   śrī cāmpeśvara tai
{d24}   vrai lvā sre gnvar vroḥ
{d25}   thlvaṅ mvay liḥ pi
{d26}   y ’var piy ○ caṃnāṃ
{d27}   ta phalguṇa raṅko thlva
{d28}   ṅ mvay ○ ta kaṃmra
{d29}   teṅ jagat chpā ransi
{d30}   tai suvṛkṣa ○ sre gnvar
{d31}   vroḥ thlvaṅ mvay liḥ
{d32}   piy ’var piy caṃnāṃ
{d33}   ta phalguṇa raṅko thlvaṅ
{d34}   mvay ○ gi khñuṃ bhūmi caṃ
{d35}   [nāṃ] ta roḥ neḥ vvaṃ ’āc ti
{d36}   [mā]n ’nak nā ’āyatva
{d37}   daṃnep=ra kule ’añ
{d38}   [mā]n paṅgāp ’nak ta khloñ
{d39}   kṣ[e]tra ta roḥ neḥ
{d40}   [pi] caṃnāṃ kalpanā
{d41}   [ta roḥ] neḥ cāṃ kaṃmra
{d42}   [teṅ] jagat st □ □

{A1}   871 śaka pañcamī ket puṣya vrahaspativāra nu ’ācāryya bajrendrā
{A2}   cāryya nu vāp dhū sthāpanā vraḥ kaṃmrateṅ ’añ śrī trailokyanātha
{A3}   ’āy sruk cuṅ vis pūrvva chdiṅ ○ pi jvan khñuṃ sruk sre ’āśrama daṃmriṅ
{A4}   ta vraḥ noḥ ta puṇya dai ○ riy sre stuk veṅ ti ’ācāryya duñ ta
{A5}   steṅ ’añ vidyādhipa pi jvan ta vraḥ nu poṅ mvāy [○] kryau vyar [○] vluk
{A6}   thpvaṅ 1 ○ thnap vlaḥ piy ○ thyāy yau mvāy [○] jña vlaḥ ○ srū thlvaṅ 10
{A7}   tiṅ caṅcāṅ 1 ○ ti saṅ gol pi jvan ta vraḥ ○ sre man loñ
{A8}   ’nanta khloñ viṣaya jeṅ tarāñ sruk nāgapattana [oy ta ’ācāryyabajrendrācāryya]. ’añjeñ ’ā
{A9}   cāryya bajrendrācāryya dau coṅ it ta ti vraḥ ’āy sru
{A10}   k nāgapattana ○ ’aṃvi duk jagati lvoḥ duk pañcaśūla ○ nu man ’ā
{A11}   cāryya cāp thmo phoṅ [thv]e it noḥ pi oy ○ nu man loñ
{A12}   ’nanta pre ’ācāryya draṅ vighna vraḥ nu sruk ’aṃvi kāla vraḥ rā
{A13}   jya dhūli vraḥ pāda ta stāc dau paramaśivaloka ○ gi pi loñ ’nanta
{A14}   oy dakṣiṇā ’ācāryya nu sre neḥh ○ kāla loñ ’nanta mo
{A15}   k saṅ gol ta gi sre neḥh pi oy ta ’ācāryya jvan ta vraḥh ○ ’ācā
{A16}   ryya oy phlās loñ ’nanta ○ nu kdaṅ vār panlāy vlaḥ ○ thnap śira vlaḥ ○
{A17}   thyāy kapāla vlaḥ [○] ghaṇa yau 4 ○ jeṅ poṅ [○] caṃnvat srapāc 1 ○
{A18}   ti oy ta vāp vis thnap vlaḥ ○ srayū vnāt 1 [○] ghaṇa vlaḥ [○] ti oy tavāp
{A19}   tirtha thyāy yau 1 [○] ghaṇa vlaḥ [○] ti oy ta vāp hi pratyaya thnapvlaḥ [○] gha
{A20}   ṇa yau 1 [○] siddhi sre neḥ ta ’ācāryya ’yat ’apavada riy sre t □
{A21}   ṇā jaṃhvat 1 {B1a} nā bhāga toy khnett ○ riy khñuṃ nu upā{B2a} ya’ācāryya phoṅ man jvan ta vraḥ {B3a} noḥ ta punya dai ○ ’aṃraḥ si chnāṅ ○{B4a} si paṃnaṅ pek ○ tai kaṃvi mahānasa ○ {B5a} tai pandān mahānasa sot[○] tai ka{B6a} nteṃ patrakāra ○ tai kandai pas gandha ○ {B7a} raṅko yajñavraḥ liḥ 1 □ ’so dnāl pi{B8a} y [○] thmoy ○ ’āśramavalaya paści{B9a}[ma]bhāga toy dakṣiṇa ○ nu ’antāṃ phle {B10a} gi ○ kadāha 1 ○ paṅkāp mvāy○ {B1b} nā bhāga toy rṇnoc ○ ’aṃmraḥ si pre{B2b} thama ○ si kan’ū cāṃ pūjā○ tai cāmpa {B3b} mahānasa ○ tai kandeṅ mahānasa {B4b} sot ○ tai panheṃpatrakāra ○ k[va]{B5b} ntai panheṃ tai kañ[j]e tiṅ ○ {B6b} tai kañjā pasgandha [tai]chktiṅ ○ {B7b} tai kaṃphal tiṅ sot ○ raṅko ya{B8b} jña vraḥ liḥ 1 □’so dnāl piy thmoy {B9b} ’āśramavalaya paścimabhāga toy {B10b} uttara ○ nu’antām phle gi ○ svok chnār 1 ○
{B11}   vraḥ neḥ man ’añ sthāpanā ○ nu khñuṃ sruk sre nuv upāya ’añ coṅṅ
{B12}   syaṅ ta ’āyatta jā nai vāp dhū nu chloñ ’āryyabhadra ta kanmvāy ’añ

{C56}   man vraḥ pāda parameśvara pratiṣṭhā kamrateṅ jagat=ta rāja ’nau nagara śrīmāhendraparvvata ○ vraḥ pāda
{C57}   parameśvara kalpanā santāna ’nak stuk ransi ○ bhadrapattana gi ta jā smiṅ nākamrateṅ jagat=ta rāja pra
{C58}   dvanna dau ○ vraḥ varaśāpa vvaṃ ’āc=ti mān ’nakka ta dai ti ta siṅ nā kamrateṅjagat=ta rāja ○ leṅ santāna ’nak noḥ
{C59}   gussa ○ neḥ gi roḥha śākha santāna noḥ ○ santāna ’aninditapura teṃ srukśatagrāma ○ kuruṅ bhavapura oy
{C60}   prasāda bhūmi ’āy viṣaya indrapura ○ santāna cat sruk jmaḥ bhadryogi ○’aṅgvay=ta gi sthāpanā vraḥ śivali
{C61}   ṅga ta gi ○ man vraḥ pāda parameśvara mok ’aṃvi javā pi kuruṅ=ni ’nau nagaraindrapura ○ steṅ ’añ śivakaivalya
{C62}   ta ’ji prājñā jā guru jā rājapurohita ta vraḥ pāda parameśvara ○ man vraḥ pādaparameśvara thleṅ mok ’aṃvi indra
{C63}   pura ○ steṅ ’añ śivakaivalya mok [jā] vraḥ kandvāra homa nā vraḥ rājakāryya ○vraḥ pre nāṃ kule ta strīpuruṣa mo
{C64}   k ukk ○ lvaḥh ’āy viṣaya pūrvvadiśa vraḥ pre oy prasāda bhūmi cat=sruk jmaḥkuti duk kule noḥ ’aṅgvay=ta gi
{C65}   man vraḥ pāda parameśvara kuruṅ=ni ’āy nagara hariharālaya ○ steṅ ’añśivakaivalya ’aṅgvay ’nau nagara
{C66}   noḥ ukk ○ gi santāna ti vraḥ pre trā dau nā kanmyaṅ paṃre ○ man vraḥ pādaparameśvara dau cat nagara ’amare
{C67}   ndrapura steṅ ’añ śivakaivalya dau ’aṅgvay ’nau nagara noḥ ukk ○ paṃre ta vraḥpāda parameśvara ○ svaṃ bhūmi ta vraḥ
{C68}   pāda parameśvara thāppa nu ’amarendrapura cat=sruk jmaḥ bhavālaya ○yok=kule khlah=ra mok ’aṃvi sruk=kuti paṅgvay=ta gi
{C69}   oy kule ta vrāhmaṇa jmaḥ gaṅgādhara ○ sthāpanā vraḥ śivaliṅga duk khñuṃ tagi ○ man vraḥ pāda parameśvara dau kuruṅ=ni
{C70}   ’āy mahendraparvvata ○ steṅ ’añ śivakaivalya dau ’aṅgvay=ta nagara noḥ ukkpaṃre ta vraḥ pāda parameśvara
{C71}   rūva noḥha ’nau ○ man vrāhmaṇa jmaḥ hiraṇyadāma prājñā siddhividyā mok’aṃvi janapada ○ pi vraḥ pāda para
{C72}   meśvara ’añjeñ thve vidhi leha leṅ kaṃ pi kamvujadeśa neḥ ’āyatta ta javā ley ○leṅ ’āc=ti kamrate
{C73}   ṅ phdai karoṃ mvāya guḥ ta jā cakravartti ○ vrāhmaṇa noḥ thve vidhi toy vraḥvināśikha ○ pratiṣṭhā kamrateṅ ja
{C74}   [ga]t ta rāja ○ vrāhmaṇa noḥ paryyan vraḥ vināśikha ○ nayottara ○ saṃmoha ○śiraścheda ○ syaṅ man svat=ta mukha cuṅ
{C75}   pi sar sir pi paryyān steṅ ’añ śivakaivalya nu gi ○ pre steṅ ’añ śivakaivalya gi tathve vidhi nā kamrate
{C76}   ṅ jagat=ta rāja ○ vraḥ pāda parameśvara nu vrāhmaṇa hiraṇyadama oyvaraśāpa pre santāna steṅ ’añ śivakai
{C77}   valya gi ta siṅ nā kamrateṅ jagat=ta rāja vvaṃ ’āc=ti mān ’nak=ta dai ti ta siṅ tanoḥha ○ steṅ ’añ śivakaivalya pu
{C78}   rohita duk=kule phoṅ siṅ man vraḥ pāda parameśvara stac viṅ mok kuruṅ=ni ’āynagara hariharālaya vraḥ
{C79}   kamrateṅ ’añ ta rāja ti nāṃ mok ukka ○ steṅ ’añ śivakaivalya nu kule phoṅ siṅ ruta tāp=ra ’nau ○ ste
{C80}   ṅ ’añ śivakaivalya slāp=ta gi rājya noḥ ○ vraḥ pāda parameśvara svarggata ’naunagara hariharālaya ○ nā kamrate
{C81}   ṅ jagat=ta rāja daiya nau ruva nagara nā kamrateṅ phdai karoṃ stac ti nāṃ dauta gi ukka ○ gi ta cāṃ rājya kamrateṅ phdai
{C82}   karoṃ pradvanna mok ○ ta gi rājya vraḥ pāda viṣṇuloka kamrateṅ jagat=ta rāja’nau hariharālaya kanmvay
{C83}   steṅ ’añ śivakaivalya mvāya jmaḥ steṅ ’añ sūkṣmavindu ○ jā purohita nākamrateṅ jagat=ta rāja ○ ku
{C84}   le phoṅ siṅ nā kamrateṅ jagat=ta rāja ukka ○ yok kule ’āy bhavālaya duk viṅmvāy ’anle ’ā
{D3}   y sruk kuti ○ steṅ ’añ rudrācāryya ta ph’van steṅ ’añ śivakaivalya dau pvās ’āyviṣaya jeṅ vnaṃ ta vnaṃ ta jmaḥ thko ○ steṅ
{D4}   ’añ rudrācāryya svaṃ noḥ nu bhūmi noḥ ta vraḥ pāda viṣṇuloka ○ cat=sruksthāpanā ta gi ○ duk jmaḥ vnaṃ noḥ jmaḥ bhadragiri ○ ta gi rājya
{D5}   vraḥ pāda īśvaraloka kamrateṅ jagat=ta rāja ’nau hariharālaya kule phoṅ [si]ṅ’nau nā kamrateṅ jagat=ta rāja ru ta tap=ra ste
{D6}   ṅ ’añ vāmaśiva cau steṅ ’añ śivakaivalya jā upādhyāya vraḥ pāda īśvaraloka ○ vraḥpāda īśvaraloka oy vraḥ pāda paramaśiva
{D7}   loka [kā]la kanmyaṅ leya pre paryyān ○ steṅ ’añ vāmaśiva jā śiṣya steṅ ’añśivasoma ta jā guru vraḥ pāda īśvaraloka ste
{D8}   ṅ ’añ śivasoma nu steṅ ’añ vāmaśiva syaṅ=ta cat śivāśrama sthāpanā vraḥ noḥ ○steṅ ’añ śivasoma ti ’nak hau kamrateṅ śivāśrama cāssa ○ steṅ ’añ vāmaśiva ti ’nak haukamrateṅ śivāśrama kanmyaṅ ○ man steṅ śivasoma slāp ○
{D9}   steṅ ’añ vāmaśiva gi nākka mān śivāśrama ○ ’nak hau kamrateṅ śi
{D10}   vāśrama roḥha noḥha ’nau ○ man vraḥ pāda paramaśivaloka [pre] vraḥkamrateṅ vāmaśiva ta jmaḥ kamrateṅ śivāśrama jā vraḥ guru paripālana upāya phoṅ nuvraḥ
{D11}   ta ti santāna sthāpanā ’aṃvi indrapura nu sruk bhavālaya ñyāṅ ’amarendrapurasruk=kuti pūrvvadiśa ○ sruk bhadragiri jeṅ vnaṃ ○ gi kule phoṅ siṅ nā kamrateṅ jagat=tarāja ru ta
{D12}   tāp=ra ’nau ○ man vraḥ pāda paramaśivaloka cat nagara śrī yaśodharapura nāṃkamrateṅ jagat=ta rāja ’aṃvi hariharālaya yok duk=ta nagara noḥ man vraḥ pādaparamaśi
{D13}   valoka sthāpanā vnaṃ kantāl ○ kamrateṅ śivāśrama sthāpanā vraḥ liṅga ’āykantāl ○ srac sthāpanā nā vraḥ rājakāryya ○ ka[mrateṅ śi]vāśrama nivedana man khmisthāpanā ukka
{D14}   svaṃ bhūmi nā nu sthāpanā ○ man steṅ ’añ rudrācāryya ta ’ji mok=saṃkamrateṅ śivāśrama pi kathā man=mān bhūmi nai varṇṇa vijaya[pattana] śūnyamūla samī
{D15}   pa nu bhadragiri ta nai steṅ ’añ rudrācāryya phoṅ pre svaṃ [bhū]mi noḥkamrateṅ śivāśrama svaṃ bhūmi noḥ ta vraḥ pāda paramaśivaloka cat=sruk jmaḥbhadrapa
{D16}   ttana nu bhadrāvāsa ○ vraḥ pāda paramaśivaloka oy vraḥ liṅga dvihastasaṃnal=ti sthāpanā ’āy vnaṃ kantāl gi [t]i sthāpanā ’āy bhadrapattana ○ vraḥ pratimā
{D17}   bhagavati 1 ti sthāpanā ta sruk bhadrāvāsa ta nai bhūmi bhadrapattana vraḥ oybhoga phoṅ daṃnep=ra gi vat khlās krayā ’arccana dravya ta dai ti phoṅ ’val=ta jā
{D18}   dakṣiṇā khñuṃ śata 2 oy sre parimāna vroḥ śata 2 ’āy gaṇeśvara pramān’amoghapura sre noḥ ti rleka oy ’āy stuk ransi ukka ○ vraḥ pāda
{D19}   śivaloka pre vraḥ paṃnvās mvāy jmaḥ steṅ ’añ śikhā ○ śiṣya kamrateṅ śivāśramajā ’nak vraḥ rājakāryya ○ vraḥ pre steṅ noḥ dau thve sruk bhadrapa
{D20}   ttana sthāpanā vraḥ pre bhūtāśa 2 ’āy jeṅ vnaṃ gi ta cat=sruk thve kāryya nāvraḥ noḥha daṃnep=ra coṅ prāsāda kaṃveṅ valabhi steṅ ’añ śikhā gi ta
{D21}   pre ’nak thve kāryya lvaḥha srac ○ oy=ta kamrateṅ śivāśrama ○ kamrateṅśivāśrama nivedana oy=sruk bhavālaya ta nai santāna nu sruk rhā nu sruk
{D22}   ryyeṅ nu nāgasundara ○ jā nai bhadrapattana ○ ti duk=ta praśasta ○ steṅ ’añhiraṇyaruci jmaḥ steṅ ’añ vnaṃ kansā ph’van kamrateṅ śivāśrama
{D23}   jā ’ācāryyapradhāna nā vraḥ pāda paramaśivaloka ukka ○ svaṃ bhūmi stuk ransi’āy=ta viṣaya ’amoghapura ta vraḥ pāda paramaśiva
{D24}   loka ukka [ca]t=sruk stuk ransi thve nā nu sthāpanā ’vyaḥ jā ○ kamrateṅśivāśrama nu steṅ ’añ vnaṃ kansā yok kanmvāy 3 strija
{D25}   na syaṅ=ta sahodara ’aṃvi sruk kuti viṣaya pūrvvadiśa ○ nāṃ dau duk vyar ’āystuk ransi mvāy ’āya bhadrapattana ○ kule ta dai ti
{D26}   ta vvaṃ ti yok mok ’aṅgvay ’nau sruk kuti ’nak=ta roḥha neḥha paṅket=santāna’āy sruk kuti ○ ’āy bhadrapattana ’āy stuk ransi kule neḥ phoṅ vvaṃ tel cek mūla syaṅ=tajā smiṅ nā kamrateṅ jagat=ta rāja ○ mān=ta jā ’ācāryyapradhāna ○ jā ’ācāryya homa siṅnā
{D28}   vraḥ kralā homa ukka ○ nau ru ta jā ’nak vraḥ rājakāryya gi nā ’āyatta kulopāya○ santāna ’nak noḥ syaṅ=ta jā ’ācāryya sappa tala vraḥ
{D29}   rājya mok ○ ta gi rājya vraḥ pāda rudraloka nu vraḥ pāda paramarudraloka kulephoṅ siṅ nā kamrateṅ jagat=ta rāja ru ta tāp=ra ’nau ○ steṅ
{D30}   ’añ kumārasvāmi ta kanmvāy kamrateṅ śivāśrama ○ jā ’ācāryyapradhāna gi tapradhāna ta kule cat=sruk parāśara ta bhūmi nai stuk ransi cāṃ caṃnāṃ
{D31}   ta dhūli vraḥ pāda ’āyatta ta kule ○ ta gi rājya vraḥ pāda paramaśivapada manvraḥ dau ’aṃvi nagara śrī yaśodharapura pi dau kuruṅ=ni ’āy cho
{D32}   k gar gyar nāṃ kamrateṅ jagat=ta rāja dau ukka ○ gi kule phoṅ siṅ nā kamrateṅjagat=ta rāja ru ta [tā]p=ra ’nau ○ steṅ ’añ īśānamūrtti ta cau ka
{D33}   mrateṅ śivāśrama jā ’ācāryyapradhāna gi ta pradhāna ta kule ’aṅgvay ’nau chokgar gyar ○ svaṃ bhūmi ’nau chok gar gyar cat=sruk jmaḥ khmvāñ duk
{D34}   khñuṃ ta gi ○ oy caṃnāṃ ta vraḥ ’āy chok gar gyar ’āyatta ta kule ○ steṅ ’añīśānamūrtti gi ta sthāpanā vraḥ liṅga noḥ ’āy stuk ransi ○ ta gi rā
{D35}   jya vraḥ pāda vrahmaloka kule phoṅ siṅ nā kamrateṅ jagat=ta rāja ru ta tāp=ra’nau ○ steṅ ’añ ’ātmaśiva ta kanmvāy steṅ ’añ īśānamūrtti ta purohi
{D36}   ta nā kamrateṅ jagat=ta rāja jā ’ācāryya homa gi ta pradhāna ta kule ○ manvraḥ pāda śivaloka viṅ mok kuruṅ=ni ’āy nagara śrī yaśodharapura nāṃ kamra
{D37}   teṅ jagat=ta rāja viṅ mok ukka ○ kule phoṅ siṅ nā kamrateṅ jagat=ta rāja ru tatāp=ra ’nau ○ steṅ ’añ ’ātmaśiva noḥ purohita nā kamrateṅ jagat=ta rā
{D38}   ja jā ’ācāryya homa pradhāna ta kule coṅ prāsāda valabhi ’āy stuk ransi cat=srukvrahmapura caṃnat [ka]tuka caṃnat śānti ’nau bhūmi stuk ransi sthāpanā
{D39}   ta gi ○ steṅ ’añ ’ātmaśiva slāp kāla vraḥ pāda paramavīraloka ○ ta gi rājya vraḥpāda paramavīraloka kule phoṅ siṅ nā kamrateṅ jagat=ta rāja ru ta tāp=ra
{D40}   ’nau ○ steṅ ’añ śivācāryya cau steṅ ’añ ’ātmaśiva jā purohita nā kamrateṅjagat=ta rāja gi ta pradhāna ta kule ○ man vraḥ pāda nirvvānapada kridā vala pi
{D41}   ’nak tok vraḥ ’āy bhadrapattana nu stuk ransi ○ man vraḥ svey rāj[y]a chnāṃ 2guḥ steṅ ’añ śivācāryya sthāpanā vraḥ noḥ ta nai santāna viṅ ○ sthāpanā vraḥ śaṅkara
{D42}   nārāyana 1 vraḥ bhagavati 1 ’nau ta sruk bhadrapattana dai ti leṅ nai santāna oykhñuṃ ta gi ○ vvaṃ dāna thve sruk nu caṃnat phoṅ=ta śūnya viṅ guḥ slāp steṅ ’añ śivā
{D43}   cāryya ○ ta gi rājya vraḥ pāda nirvvānapada kule phoṅ siṅ nā kamrateṅ jagat=tarāja ru ta tāp=ra ’nau ○ steṅ ’añ sadāśiva ta kanmvāy steṅ ’añ śivācāryya
{D44}   jā purohita nā kamrateṅ jagat=ta rāja gi ta pradhāna ta kule ○ ti vraḥ pādanirvvānapada pre phsik pi oy ph’van kamrateṅ ’añ śrī viralakṣmi ta jā ’a
{D45}   gradevi ○ oy jmaḥ kaṃsteṅ śrī jayendrapandita jā rājapurohita khloñkarmmāntara eka ○ man=sruk bhadrapattana nu sruk stuk ransi nu caṃnat noḥ phoṅ sya
{D46}   ṅ=ta śūnya kāla vraḥ pāda nirvvānapada kridā vala ○ vraḥ kamrateṅ śrījayendrapandita thve sruk noḥ phoṅ viṅ unmilita vraḥ noḥ man=ti sthāpanā viṅ ○ ta srukbhadra
{D47}   pattana sthāpanā vraḥ liṅga 1 pratimā 2 dai ti leṅ nai santāna oy=sarvvadravyata vraḥ noḥ phoṅ oy khñuṃ ○ coṅ valabhi coṅ kaṃveṅ ’leṅ thve kṣetrārāma jyak=travāṅ
{D48}   thve daṃnap ○ ta sruk bhadrāvāsa unmilita vraḥ noḥ oy=sarvvadravya ○ thvekṣetrārāma ○ jyak travāṅ ○ thve daṃnap ○ ta sruk bhadragiri unmilita vraḥ noḥ cat=sru
{D49}   k viṅ thve daṃnap thve valaya thve gośāla oy vrah go ’val=ta vraḥ noḥ ○ ta srukstuk ransi ○ unmilita vraḥ noḥ oy=sarvvadravya ○ jyak ’añcan thve ’ārā
{D50}   ma jyak travāṅ ○ thve daṃnap ○ svaṃ prasāda bhūmi ta vraḥ pādanirvvānapada ’anle 1 ’āy ’amoghapura jmaḥ caṃkā parimāna vroḥ śata mvāya ○ duñbhūmi ’anle 1 sot ti
{D51}   pūrvva vraḥ travāṅ mahāratha ’āy ’amoghapura nu vudi 1 padigaḥ 1 nu thnapcanlyak parimāna vroḥ 30 ○ duñ bhūmi ’anle 1 sot ’āy ’aṅve chdiṅ ’amoghapura jma[ḥ]
{D52}   pralāk kvan ṅe nu vudi 2 padigaḥ 2 thnap canlyak parimāna vroḥ 60 ○ bhūmi taroḥha neḥha phoṅ syaṅ ma[n o]y ta vraḥ ’āy stuk ransi nu kule ○ cat caṃna
{D53}   t ’āy ’amoghapura ta bhūmi ta jmaḥ nāgasundara nai santāna duk khñuṃ duksrū ta gi oy=ta vraḥ ’āy bhadrapattana ○ ri sre gaṇeśvara ti vraḥ pāda nirvvānapada pre
{D54}   tvar pi oy dau ta vraḥ vnvak ○ vraḥ pre oy sre vrac gi ta jā snoṅ viṅ ○ ti saṅ=golcek sre noḥ ’āy bhadrapattana ○ nu vraḥ ’āy stuk ransi ○ ta sruk
{D55}   vrahmapura sthāpanā vraḥ bhagavati 1 oy khñuṃ thve ’ārāma jyak=travāṅ thvedaṃnap ○ ’āy viṣaya pūrvvadiśa ta sruk=teṃ ’āy kuti cat=sruk noḥ viṅ=ta śūnya thvevalaya
{D56}   ’val viṅ=ta gi ○ sthāpanā vraḥ liṅga ekahasta coṅ prāsāda oy khñuṃoy=sarvvadravya ○ ri bhūmi vāhuyuddha ta śūnyamūla ’āy=ta sruk jeṅ dnāp ti svaṃprasāda ta vraḥ
{D57}   pāda paramanirvvānapada saṅ=gol simāvadhi ta gi ○ oy=ta vraḥ ’āy kuti nu kulephoṅ sruk bhavālaya ti kamrateṅ śivakaivalya [oy] ta santāna gi ta ca
{D58}   ta ’nau ’aṅve ’amarendrapura mān=ta praśasta ’nau bhadrapattana noḥ ti ’nakpidā śūnya gi sruk nu vraḥ liṅga jā vraiya [nu] devasthāna noḥ dau ○ vraḥ kamrateṅ
{D59}   ’añ śrī jayendrapandita nivedana ta vraḥ pāda kamrateṅ ’añ śrīudayādityavarmmadeva man noḥ nai santāna vraḥ pāda kamrateṅ ’añ oy noḥ
{D60}   sruk bhavālaya viṅ chkā vrai noḥ unmilita vraḥ noḥ oy pūjā viṅ ○ ti pre rok nāmān khñuṃ vraḥ noḥ ta hyat paṅgvay viṅ=ta sruk oy=ta vraḥ kalpa
{D61}   nā viṅ jā sruk nai bhadrapattana ru ta tel ○ man vraḥ kamrateṅ ’añ śrījayendrapandita jā kula pitṛ[pa]kṣa ta dhūli jeṅ vraḥ kamrateṅ ’añ śrī vāgi
{D62}   ndrapandita ta sruk siddhāyatana ’āy pūrvvadiśa gi nākka ta thvekarmmadharmma nai dhūli jeṅ vraḥ kamrateṅ ’añ śrī vāgindrapandita gi ta cat=sruksthāpanā chlo
{D63}   ṅ=travāṅ ○ vraḥ kamrateṅ ’añ śrī jayendrapandita thve ’āśrama duk khñuṃ ta gioy ta jā gurvvartha ta vraḥ nai dhūli jeṅ vraḥ kamrateṅ ’añ śrī vāgindrapandita
{D64}   ○ man vraḥ pāda kamrateṅ ’añ śrī udayādityavarmmadeva svey vraḥ rājya kulephoṅ siṅ nā kamrateṅ jagat=ta rāja ru ta tap=ra ’nau ○ vraḥ ka
{D65}   mrateṅ ’añ śrī jayendrapandita jā vraḥ guru ○ dār dhūli jeṅ vraḥ kamrateṅ ’añ śrījayendravarmma ○ vraḥ pāda kamrateṅ ’añ ryyān vidyā phoṅ daṃne
{D66}   p=ra siddhānta ○ vyākaraṇa ○ dharmmaśāstra ○ śāstra phoṅ dai ti ○ vraḥ pādakamrateṅ ’añ thve vraḥ dikṣā daṃnep=ra gi bhuvanādhva vraḥ vrahmayajña ○
{D67}   thve mahotsavapūjā toy vraḥ guhya ○ oy vraḥ dakṣiṇā nu dravya daṃnep=ra givraḥ thni[ṃ] phoṅ ○ mukuṭa ○ kuṇdala ○ keyura ○ kataka mu
{D68}   kutaveni ○ vraḥ rūpyapītha [○] vraḥ suvarṇnakalaśa ○ vraḥ cāmara ○ vraḥhemadolā triśira ○ phoṅ neḥ syaṅ=ti oy nu bhoga [ta] gi ○ oy ratna mā
{D69}   s prāk dravyagaṇa phoṅ ’val vraḥ go sahasra ○ tamrya śatadvaya ○ ’seḥ ekaśata○ ’ajamahiṣa śata oy dāsadāsi sahasra o
{D70}   y sruk 3 śaṅkaraparvvata 2 sruk mano 1 jeṅ=tarāñ vraḥ pāda kamrateṅ kaṃtvan’añ śrī udayādityavarmmadeva paripālana ’nau ta nagara ’a
{D71}   bhivādana nitya ○ pre cāra puruṣa paṃre pratidina nu kriyā paṃre tadaṃnep=ra gi vastra ’anna pāna vyañjana kramukaphala ○ syaṅ ’aṅga vraḥ kriyā paṃ
{D72}   re ’āy le [ta] dhūli jeṅ vraḥ kamrateṅ ’añ pravṛtti [ta]gi sappa thṅaiy ○ ri srukstuk rmmāṅ=ta śūnyamūla vraḥ pāda kamrateṅ ’añ oy
{D73}   sruk noḥ jā upāya ta dhūli jeṅ vraḥ kamrateṅ ’añ ○ saṃ nu sruk stuk ransi ○man dhūli jeṅ vraḥ kamrateṅ ’añ khmi sthāpanā ○ vraḥ
{D74}   pāda kamrateṅ ’añ oy vraḥ liṅga dvihasta nu dravyagaṇa phoṅ=ta jā bhoga tavraḥ noḥ nu dravyagaṇa phoṅ=ta jā dakṣiṇā ○ pre mantri dau cat
{D75}   sruk jmaḥ bhadraniketana ta bhūmi bhadrapattana ta nai dhūli jeṅ vraḥkamrateṅ ’añ dai sthāpanā vraḥ liṅga dvihasta ta gi oy=ta dhūli jeṅ vraḥ
{D76}   kamrateṅ ’añ oy dāsadāsi slik 1 ta vraḥ noḥ ○ coṅ śilāprāsāda valabhi jyak travāṅthve daṃnap thve kṣetrārāma ○
{D77}   ta gi rājya vraḥ pāda paramavīraloka gi nu vrāhmaṇa saṅkarṣa nu chloñmādhava ta kvan ’nak parade[śa] ukka duñ bhūmi pi cat caṃnat ’anreṃ
{D78}   loṅ duk khñuṃ ta gi sthāpanā vraḥ śivaliṅga jā nai loñ mādhava ○ slāp mratāñchloñ saṅkarṣa [ta gi] rājya vraḥ pāda paramavīraloka ○ chlo
{D79}   ñ mādhava ta kvan ’ras ○ lvoḥ ta rāj[y]a vraḥ pāda paramanirvvāṇapada ta gi965 śaka [nu] chloñ mādhava thvāy=saṃnvat=ta vraḥ pāda paramanirvvā
{D80}   ṇapada oy caṃnat noḥ nu khñuṃ noḥ phoṅ=ta dhūli jeṅ vraḥ kamrateṅ ’añ śrījayendravarmma siddhi ○ ti paripālana khñuṃ noḥ paṃre lvoḥ ta gi 967
{D81}   śaka ○ dep chloñ mādhava slāp man vraḥ pāda kamrateṅ ’añ śrīudayādityavarmmadeva svey rājya ta gi 971 śaka ○ lvoḥ ta gi
{D82}   974 śaka dhūli jeṅ vraḥ kamrateṅ ’añ sthāpanā kamrateṅ jagat śivaliṅga ’āybhadraniketana ○ ti nivedana ta vraḥ pāda kamrate
{D83}   ṅ ’añ śrī udayādityavarmmadeva svaṃ leṅ caṃnat noḥ nu khñuṃ noḥha jā vraḥkaruṇāprasāda so[t=ta] kamrateṅ jagat śivaliṅga ’āy bhadrani
{D84}   ketana oy prasiddhi caṃnat noḥ nu [khñuṃ] noḥha ○ ru man vraḥ pādaparamanirvvāṇapada oy ukka nu iṣṭi chloñ mādhava ta mān upāya ○ dhūli jeṅ
{D85}   vraḥ kamrateṅ ’añ kalpanā khñuṃ noḥ nu caṃnat noḥha ta paṃre ta kamrateṅjagat śivaliṅga ’āy bhadraniketana ○ śākha caṃnat ’anreṃ loṅ ○
{D86}   894 śaka pi ket puṣya vudhavāra gi nu vrāhmaṇa ta jmaḥ mratāñ chloñsaṃkarṣa nu chloñ mādhava ta kvan ’nak paradeśa duñ bhūmi ta ’nak ’anreṃ loṅ ○ va
{D87}   rṇṇa karmmāntara ○ ta jmaḥ loñ para ○ loñ dharmmapāla ○ loñ go ○ loñsarvvajña ○ steṅ śivapāda khloñ vala khloñ viṣaya khdak ○ dravya nu duñ mās li
{D88}   ṅ 2 ○ canlyak 320 ○ thnap yau 1 [○] vave 4 ○ vraḥ go 4 ○ krapi 12 ○ simāvadhibhūmi nā caṃnatta nu sre pi jeṅ ○ ti pūrvva prasap nu bhūmi dhanavāha ○ ti dakṣiṇa
{D89}   lvoḥ dnaṅ ○ ti paścima lvoḥ ta gi phlū rddeḥ thṅai luc snvāl ○ ti uttara saṃlvatkralā tut srū pat tāṅ tai viṅ ta gi thnval travāṅ ○ ti pūrvva sot lvoḥ ta vraḥ
{D90}   stau prasap bhūmi thpvaṅ rmmāṅ ○ bhūmi ta cval sot=ta caṃnat ’anreṃ loṅ ○901 śaka pi ket puṣya nu vrāhmaṇa ta jmaḥ mratāñ chloñ saṅkarṣa
{D91}   nu chloñ mādhava duñ bhūmi ta ’nak ta jo ta jmaḥ vāp īśvaravindu ○ vāp ’ājya ○vāp bhima ○ dravya nu duñ mās liṅ 2 vudi 5 dop 5 thnap thpi[r] yau 5 ○ ca
{D92}   nlyak 300 ○ simāvadhi bhūmi noḥ ○ ti pūrvva prasap ta bhūmi vraḥ thpvaṅrmmāṅ ○ ti dakṣiṇa prasappa bhūmi ’anreṃ loṅ ○ ti paścima tarāp go
{D93}   la ○ ti uttara tarāp gola sot ○ ti paścima sot tarāp vrai saṃroṅ ○ bhūmi nā bhāgasteṅ mat gnaṅ ti jau ta vraḥ sraleṅ vā
{D94}   y nuk cuṅ chdiṅ ta kule ○ ti jau ta ’nak ta jmaḥ loñ ’yak rāl nu noḥha ukka ○phsaṃ parimāna vroḥ ta bhūmi noḥ 40 ○ noḥ saṃ cval nu
{D95}   caṃnat ’anreṃ loṅ nā chloñ mādhava ○ khñuṃ ti mratāñ chloñ saṃkarṣa nuchloñ mādhava duk=ta caṃnat ’anreṃ loṅ ○ pi oy=ta vraḥ ○ bhāga
{D96}   thṅai luc nā si thpvaṅ tyak ’ji tai e dau ’aṃvi śivapura danden ○ bhāga kantālsruk sot nā si vrahmapada ’ji tai thleṃ dau
{D97}   ’aṃvi sruk vrai ’guya pramāna pūrvva ○ bhāga kantāl sruk sot ’ji tai khdep dau’aṃvi ’guy ukka pramān pūrvva ○ bhāga ka
{D98}   ntāl sruk sot nā si mat gnaṅ ’ji tai jā dau ’aṃvi saṃtāc drāy viṣaya karoṃ ○bhāga thṅai ket ’ji tai kaṃyān
{D99}   dau ’aṃvi liṅgapura ○ bhāga thṅai ket sot nā si teṃ thvit ’ji tai sraṣṭa ’nak’anreṃ loṅ t[i] oy thnvar khñuṃ ○ bhāga thṅai lu
{D100}   c sot saṃvandhi si thpvaṅ tyak ○ ’ji tai rudrāṇi dau ’aṃvi śreṣṭhapura ○ srukbhadraniketana dai ’nau ta bhūmi bhadra
{D101}   pattana ti pūrvva bhūmi bhadrapattana dai ○ ti ’agneya dau vap ta golstuk=kadamva prasap nu bhūmi sruk leṅ tvar caṃṅāy
{D102}   slik 1 80 ○ ti dakṣiṇa dau vap=ta srau sramoc prasap nu bhūmi sruk leṅ tvarcaṃṅāy 332 ○ ti naiṛtiya dau vap=ta go
{D103}   l kūpa prasap=nu bhūmi suk leṅ tvar caṃṅāy slik 1 120 ○ ti paścima dauvap=ta stuk tannot prasap nu bhūmi sruk gnaṅ ○ caṃṅā
{D104}   y slik 6 45 ○ ti vāyavya dau vap=ta gol sruk lmuṅ prasap=nu bhūmi srukcaṃnat teṅ=tvan nu chdiṅ gar gyar caṃṅāy slik 6 340 phlā
{D105}   s 8 hat 3 ○ ti uttara dau vap=ta stuk ruṅ prasap=nu bhūmi sruk cvar mo ○caṃṅāy slik 4 40 ○ ti īśāna gi bhūmi bhadrapattana hoṅ ○
{D106}   vraḥ pāda kamrateṅ ’añ śrī udayādityavarmmadeva oy sruk ta jmaḥ gnaṅcranāñ vo nu ’nak=ta gi nu phsak 151 nu bhūmi
{D107}   bhāga noḥha oy jā vraḥ jaṃnvan ta vraḥ liṅga noḥ ’āy bhadraniketana ○simāvadhi bhūmi noḥ ’āy sruk gnaṅ cranāñ
{D108}   vo ○ ti pūrvva dau vap=ta stuk tannot prasap nu bhūmi sruk bhadraniketanadai caṃṅāy slik 3 152 ○ ti ’agneya dau vap=ta go
{D109}   l prasap nu bhūmi sruk leṅ tvar caṃṅāy 4 392 ○ ti dakṣiṇa dau vap=ta golprasap nu bhūmi sruk vrai raṃvaṅ candrāya
{D110}   caṃṅāy slik 2 250 ○ ti naiṛtiya dau vap=ta gol prasap nu bhūmi srukśibapattana sramo eṃ caṃṅāy slik 4 ○ ti paścima dau
{D111}   vap=ta gol prasap nu bhūmi sruk ’anlāṅ caṃṅāy slik 3 392 ○ ti vāyavya dauvap ta gol prasap nu bhūmi sruk vajravarmma
{D112}   caṃṅāy slik 6 250 ○ ti uttara dau vap=ta gol ti uttara vnaṃ vreṅ prasap nubhūmi sruk jhe rloṃ sruk tvaṅ mvāy teṃ caṃṅāy
{D113}   khnāñ 1 slik 5 180 phlās 6 ○ ti īśāna dau vap=ta gol prasap nu bhūmi srukchdiṅ gar gyar caṃṅāy slik 5 100 ○ khñuṃ vraḥ kamrateṅ
{D114}   ’añ śivaliṅga ’āy bhadraniketana vraḥ jaṃnvan ○ sruk gnaṅ ○ pakṣa khnet ○tamrvac si 2 vargga noḥ ○ si 27 ○ tai 48 ○ pakṣa rṇnoc ○ tamrvac si 2 vargga
{D115}   noḥ si 27 ○ tai 45 ○ phsaṃ phoṅ si tai 151 ○ khñuṃ kamrateṅ jagat śivaliṅga’āy bhadraniketana ○ pakṣa khnet ta paṃre ○ tamrvac si 1 vargga noḥ ○ si 21 ○
{D116}   tai 54 ○ [pakṣa rṇnoc] khloñ ’nak si 1 ○ ’amraḥ si 2 ○ vargga noḥ ○ si 15 ○ tai50 ○ ’āśrama dakṣiṇa thnal ñyaṅ ’añcan ○ tamrvac si 1 vargga noḥ si 4 ○ tai 11 ○ ’āśramañyaṅ
{D117}   pañcoṅ ○ tamrvac si 1 vargga noḥ ○ si 7 ○ tai 13 ○ ’āśrama dakṣiṇa vraḥha ○tamrvac si 1 vargga noḥ si 4 ○ tai 16 ○ caṃnat ’anreṃ loṅ ○ tamrvac si 1 ○ vargga noḥ ○si 46 ○ tai 54
{D118}   ○ pakṣa [khnet] ○ ta paṃre ○ tamrvac si 1 ○ vargga noḥ si [20] tai 54 [pakṣarṇnoc] khloñ ’nak si 1 ’amraḥ si 2 ○ vargga noḥ si 21 ○ tai 43 ○ ’āśrama uttara thnal ○tamrvac si 1 vargga noḥ si 4 ○ tai 10 ○ ’ā
{D119}   śrama uttara vraḥha tamrvac si 1 vargga noḥ si 8 ○ tai 20 ○ ’āśrama uttaravraḥha sot tamrvac si 1 vargga noḥ si 4 tai 13 ○ caṃnat piṅ khlā ○ tamrvac si 1 ○ vargganoḥ si 4 ○ tai 13 ○