Object type: Stele

{1}   994 śaka ta rāj[y]a vraḥ pāda [vraḥ kaṃmrateṅ ’añ śrī harṣavarmmadeva]
{2}   gi nu taspasvi śivasthāna ta pvas ’a □ □ □ □ □ □ □ □ □ □ □ □
{3}   bhūmi muḥ thnal ta vraḥ jeṅ go sa[ṃ] nu □ □ □ □ [ṅa]
{4}   n jyaṅ pvan sme kuntikā pramvāy ṅan □ □ □ □ □
{5}   ṅ tap go bhay mvāy canlyak yau ta[p]
{6}   ta 1028 śaka conakṣatra ta rāj[y]avraḥ [pāda kamrateṅ ’añ]
{7}   śrī jayavarmmadeva ○ ’añ dau dval vraḥ karuṇaprasāda
{8}   sabhāpati ta pvan nu vraḥ kaṃmrateṅ ’a[ñ] □ □ □ □
{9}   rmma ta khloñ viṣaya vikrānta y[uga]pat pa[n]di[ta] ta jmaḥ vraḥ śivani □ □ □ □ □ □ □ □ □ □ oy [ta ’añ]
{11}   ta śa[ka] noḥ □ □ □ □ ’añ jvan bhūmi noḥ ru [dāna]
{12}   kamrateṅ jaga[t] śrī viṣvarūpa ○ pakṣa □ □ □ □ □ □
{13}   □ □ □ teṅ śra □ □ □ □ teṅ □ □ □ □ □ □ □ □ □ □

{1}   ’aṃnoy poñ siṅ yajamāna ’āy ta
{2}   kpoñ kaṃmratāṅ ’añ kñuṃ ta siy vā
{3}   salmuhan | vā tmān | □ □ □ □ □ | vā caṃ
{4}   pot | vā paroy | vā krahoṅ | kñuṃ ta ka
{5}   ntai ku clau | ku citt ’avai | ku smaṅ | ku
{6}   skāñ | ku kañcas | ku kalpit | sre ’ā
{7}   y ’āvāsa pāda kāc moy sanre
{8}   yy sre ’āy teṃ vinau tloṅ 3 sre ’ā
{9}   y tnal vihār tloṅ 2 sre ’āy stuk
{10}   loc tloṅ 3 sre ’āy stuk sgaḥ phoṅ
{11}   tloṅ 7 sre man poñ kaṃvau saṃ vyavahāra
{12}   doṅ poñ ’akṣaragupp uttarīya
{13}   poñ kaṃvau pañjau gui ta poñ yaja
{14}   māna siṅ tloṅ 1 sre ’āy vrahmavīra
{15}   pāda kāc moy sanrey sre me
{16}   heṅ ’añ tloṅ 1 sre teṃ vreṅ tloṅ □
{17}   □ □ sre teṃ saṅke tloṅ 1 je □ sarvvapi[ṇ]ḍa
{18}   [sre phoṅ] □ □ □ □ □ t[l]oṅ □ □ □

{1}   1230 śaka navamī ket puṣya ’ādityavāra ’aśv[i]nīna
{2}   kṣatra pāda vyar ti srac tṛtiya gi nu vra[ḥ] karuṇā ta paramapavi
{3}   tra ○ vraḥ pāda kamrateṅ ’añ śrī śrīndravarmmadeva ○
{4}   pre cār śīlāprasaṣṭa śāka ta gi sru[k] ’aṃcau sruk cuṅ chdi
{5}   ṅ nā jeṅ nala triṇi jau oy sruk snoṅ oy nāma sru
{6}   k śrī śrīndraratnagrāma pre kamrateṅ ’añ śrī māliniratnalakṣmī
{7}   vraḥ thniṃ saṃrac vihāra saṃniṅ jyak ’añcan danle 1230 śaka ṣṭhā
{8}   paka vraḥ vuddha kamrateṅ ’añ śrī śrīndramahādeva prasāda ta ma
{9}   hāsvāmī thera śrī śrīndramaulīdeva jā saṅkalpa paṃre ta kamrate
{10}   ṅ ’añ bhikṣusaṅgha phoṅ | sruk jaṃnvan ta paṅgan saṃrap vraḥ vu
{11}   ddhayajña sruk daṃdāṃ caṃnat gok vakula gok saṃlāñ sre
{12}   bhūmi pansaṃ noḥ paṃre dina raṅka liḥ prāṃ || sre kamrateṅ ’añ
{13}   ta siṅ pratipakṣa jaṃ praṃ pīy kaṃluṅ sruk śrī śrīndraratnagrāma | ta
{14}   caṃ’in vraḥ vuddhayajña tai lakṣmī pêḥ vṅya ya phlāṅ paṃre śī lān | ta
{15}   thve vraḥ vuddhapūjā śī gaṅgāśarmma tai sukharatna ’ātmaja śī kê ○ tai
{16}   phsāy mvay kṣīrāyata mvay ○ kīrāta groṅ phsaṃm praṃ piy ○
{17}   go canmat go kryav dnyaṃm praṃ piykrapī yī jmol dnyaṃm vyar lā
{18}   mvay ○ saṅkha sukla vyar ’arddhasaṅkha saṃrit mvay ’arghyapādya varddhiṇī phsaṃm pvan ○
{19}   kalasa sraṅ mvay teṃ phlāṅ prāk mvay kaṭaka modarī prāk saṃrap mva
{20}   y gandī trapū mvay kamandalu saṃrap mvay bhājana laṅgau mvay jeṅ pa
{21}   nsaṃ kosa trapū pvan greṅ vyar tyal vyar pan’èṅ mvay javanikā mva
{22}   y kusumbha vyar thāna ruṅ vyar sgar mvay tāla chanda pansaṃ sre bhūmi
{23}   caṅvat sruk roḥ ta ṭīkā | pūrvva prasap gol | ’āgneya prasap go
{24}   l [|] dakṣiṇa prasap gol [|] naiṛtiya prasap gol [|] paścima prasap
{25}   gol [|] vāyavya prasap gol [|] uttara prasap gol [|] īsānya prasap gol ○ neḥ sruk ’aṃcau nā vraḥ śakti kamrateṅ ’añ suvarṇnali
{27}   ṅga phtyaṅ ni pre jau nu thās cha’in liṅ piy oy sruk lun snoṅ
{28}   sot sruk daṃdāṃ caṃnat pansaṃ nā vraḥ sruk saṃṛddhipura phtyaṅ ni pre o
{29}   y sruk kabakabhāga viṅ snoṅ sruk cuṅ chdiṅ phtyaṅ ni pre oy
{30}   sruk vraḥ īt viṅ snoṅ nā thve vruḥ raṅka ta gi . . .
{31}   śi khdit sot phsaṃ . . .

{1}   □ □ □ □nd□vrāla ti uttara gi nā □ □ □ □ □ □ □ □ □ □ □ □ □ □ □ □ □ □ [vraḥ]
{2}   [kaṃsteṅ] vāgindrapandita chkā vrai thve devasthāna cat sruk duk [kh]ñu[ṃ] [ta gi] □ □ □ □ □ □ □ □
{3}   □ □ ta viṣṇu yathāvidhi thve tapovaṇa cāṃ varṣā tapasvi ta gi ○ duk jmaḥ vā[gindrapattana]
{4}   □ □ nā bhūmi vraḥ ’aṃvil phoṅṅ ○ man tapasvi vraḥ ’aṃvil thvāy saṃnvat oy ta [vraḥ kaṃ]
{5}   steṅ śrī vāgindrapandita ○ pi mān vraḥ karuṇā roḥh neḥh ○ pandval ta sabhāpati □ [vraḥ]
{6}   [aṃ]vil thvāy saṃnvat pi oy vraḥ noḥ nu bhūmi noḥh ta vraḥ kaṃsteṅ śrī vāg[indrapandita]
{7}   dau śodhe ’amruṅṅ bhūmi noḥ saṅ gol oy ta vraḥ kaṃsteṅ śrī vāgindrapandita [toy iṣṭi ta]
{8}   tapasvi vraḥ ’aṃvil ○ ti oy śapatha puruṣapradhāna noḥ phoṅ ta kāla noḥ ukk [puruṣapra]
{9}   dhāna phoṅ syaṅ ta śapatha vol caṅvātt bhūmi vraḥ ’aṃvil nāṃ vraḥ sabhā dau saṅ gol □ □ □ □
{10}   oy ta vraḥ kamrateṅ ’añ śrī vāgindrapandita roḥh vraḥ ’ālakṣaṇa

{A3}   ta gi rājya vraḥ kamratāṅ ’añ ta dau svarga śivapura kāla gi sre tel
{A4}   jāhv sre ’aṃvi ta dharmmaj[ñ]āna kvuṅ tvaḥ bhadracan tpāp īśvaraśānti kloñ
{A5}   sruk hastipādarakṣa dau ukk daṅ kumāraśīla ktāṃ ktoc □ □ s ge
{A6}   sanme ni pañjāhv gi sre ai teṃ hvar pareṅ teṃ mahānavamīy jnāhv gi
{A7}   srū mūlya gi prak taṃliṅ 10 sre ai ñeṅ travaṅ devaśīla jnāhv gi mū
{A8}   lya prak taṃliṅ 5 yugala yau 1 dep ge crip ti ple jon ta vraḥ kamratāṅ
{A9}   ’añ śrī bhogeśvara daṅ gi sre ñeṅ travaṅ padmodbhava tel ge pañjāhv
{A10}   teṃ kāryya saṃpol strī jnāhv gi srū mulya prak taṃliṅ 5 dep ge jo
{A11}   n gi ta vraḥ sot sre ’aṃvi ta yuddhāpramukha candradeva kmau kaṃmnat [da]ṅ ge
{A12}   pādamūla ta pañjāhv gi teṃ satra vraḥh mulya gi taṃliṅ 4 sre
{A13}   ’aṃvi ta kumāraśaṃbhu makara sumitrā tvar tel ge pādamūla pañjāhv nu pto
{A14}   c ’ājyaśeṣa ta vraḥ tel ’nak loc nusru jnāhv gi mūlya prak taṃli
{A15}   ṅ 5 sre ai ñeṅ stuk trāc ’aṃvi ta bhadrakīrtti bhadraśānti bhadracan
{A16}   mādhava tvaḥ kumāranan kvuṅ dharmmavira ge sanme ni pañjāhv gi oy satra
{A17}   vraḥ kloñ ge sru jnāhv gi mūlya prak taṃliṅ 1 sre ai ñeṅ travaṅ tmaṅ ma
{A18}   n ge pādamūla pañjāhv teṃ satra vraḥh jmahge kandes kulabhakti kula
{A19}   □□ bhavarakṣa viśeṣagup vāladat valaśakti candrasena bhā śakti ge
{A20}   . . . . . . . . . . . . . . . . [taṃ]liṅ 10 □ yugala yau
{B1}   sre ai canhor tāṅ ci vrau ’aṃvi ta poñ □□□p□□□□□□
{B2}   datta kandān kloñ dra ta’aṅ ge saṃ ni pañjāhv gi te[ṃ] □□□□□□
{B3}   srū jnāhv gi mūlya prak taṃliṅ □ [sre] ’aṃvi ta □□□□□□
{B4}   śvara kloñ kcan ge saṃ ni pañjāhv gi teṃ satra vraḥ [sru jnāhv]
{B5}   gi prak taṃliṅ 4 sre ’aṃvi ta poñ vidyācann daṅ poñ □□□□□
{B6}   pta ge saṃ ni pañjāhv gi sru 40 1 yugala yau 1 sre ’aṃvi [ta] □ □ □
{B7}   ñ dharmma □ □ sru jnāhv gi mūlya prak taṃliṅ 4 yugala yau 1 □ □ [sre]
{B8}   ’aṃvi ta poñ īśānagupta vid[yā]acan vinayaśānti kloñ daṃ vinayagu[pta]
{B9}   pravaranan kantāṅ ge saṃ ni pañjāhv gi srū 100 tloṅ 7 yugala yau 1 □ □
{B10}   ’aṃval yau 1 santān je 2 dep ge dau crip ti ta gi ple jon ta vraḥ po[ñ] jnā
{B11}   hv gi karoṃ tnal sruk ’aṃval yau 3 sre ai kaṃvṛs jnāhv gi sru 80 ’aṃ
{B12}   val yau 3 yugala yau 10 1 tmur jmol pandan 1 sre ai muṃ tnal srū jnāhv
{B13}   gi tloṅ 10 5 yugala yau 2 sre ai ñeṅ travaṅ damī jnāhv yugala yau 1
{B14}   sr[ū] t[l]oṅ 10 1 sre ai kaṃvaṅ ’cās srū jnāhv gi 80 tloṅ 10 3 yugala yau
{B15}   □□□□□□□□□ poñ īśānagupta vinayaśānti vid □□□□□
{C1}   sre [ai] hañ rmmeṅ ’aṃvi ta bhā puruṣaśīlacan p □
{C2}   ma □ □ r □ rudravin kansuṃ ge saṃ ni pañjāhv gi
{C3}   teṃ satra vraḥ svayaṃbhu srū mūlya gi prak taṃliṅ 10 2
{C4}   yugala yau 1 sre ai kaṃvaṅ īśānaśarmma ’aṃvi ta
{C5}   bhadrakīrtti kumāranan stuk dharmmavīra mādhava bhadra
{C6}   śānti prasahya durmmada □□□□□□□□ ge saṃ ni
{C7}   pañjāhv gi teṃ kāryya [kñuṃ] ple jnāhv gi mūlya gi
{C8}   srū prak taṃliṅ 10 2 kñuṃ vnāk poñ yajamāna
{C9}   dai klaḥ ra tel oy ta ’āśrama klaḥ ra tel oy
{C10}   [ta] vraḥ jmaḥ ge vā viśeṣananta | vā trayodaśī |
{C11}   vā tpit | vā tvin | ku kaṃ□hv | ku ’nāda | ku kaṃ□
{C12}   p | ku □□k | gi tel oy ta ge kon ta ’nak
{C13}   mī nu caṃ ta vraḥ kamratāṅ ’añ śrī bhoge
{C14}   śvara kñuṃ vnāk kloñ yajamāna ni□ ku psap |
{C15}   ku kandāp | ku śi□□rmma | ku ’ras [| ku] □□□
{C16}   ñ | vā navamī | vā daśamī | vā □□□□□□□□
{C17}   …..

{B1}   cār caṅvatt is bhūmi sruk t □
{B2}   877 śaka nu cau tāñ steñ [’añ]
{B3}   [i]ndralakṣmī ta jmaḥ vāp śaṅkarātmā
{B4}   [nu] rāma vāp śrī kanmyaṅ paṃre neḥ [syaṅ]
{B5}   [ku]le ekodarī sanme ni [duñ]bhū
{B6}   [mi ta]vāp vrau nu kule vāp [vrau] □ □
{B7}   hau pi cat sruk vrahma □ □ □ [oy]
{B8}   kalpanā raṅko thlvaṅ □ [’avadhi ti]
{B9}   pūrvva dau vap ta vnur bhatdrā □ □ □ □
{B10}   □ travāṅ ’leṅ nu cdval □ □ [nairṛ]
{B11}   tiya dakṣina paści[ma] □ □ [tra]
{B12}   vāṅ jrai daṃnap vraḥ vāya[vya] □ □
{B13}   □k tammrya uttarā prasa[p] □ □ □
{B14}   chau ○ 877 śaka nu vāp śa[ṅkarātmā]
{B15}   □ □ □ duñ bhūmi ta vāp ’van □ □ □ □
{B16}   [vnur] bhatdrā pi cat sruk vrai trapek
{B17}   [cāṃ]caṃnāṃ kālpanā raṅko kadāha [’ava]
{B18}   [dhi] pūrvva dau vap ta travāṅ □ □ □ □
{B19}   □ □ □p travāṅ kralā □ □ □ □
{B20}   [thṅāy] ket dakṣina iss □ □ □
{B21}   □ □ □ bhirā śālya uttara lvaḥ □ □
{B22}   □□□ [śa]kanu vāp śaṅkarātmā nu [rāma]
{B23}   duñ bhūmi ta vāp □ n □ □ □ □ [pi]
{B24}   cat sruk vnaṃ ti chok veṅ [cāṃ caṃnāṃ kā]
{B25}   lpanā raṅko thlvaṅ 4 ○ bhūmi □ □ □ □
{B26}   travāṅ tannot rlaṃ ’aṅgañ dakṣina vrai □ □ □
{B27}   □h canhvar ’leṅ nu ’aṃvil kra □ □ □ □
{B28}   □ laṅlaṅ cakk uttara lvaḥ vrai caṃnat □ □ □
{B29}   ñcana pi vāp śaṅkarātmā du ph’van [cāṃ caṃnāṃ]
{B30}   īss kālpanā sruk neḥ ta 4 □ □ □
{B31}   □y pi steṅ ’añ cyar khāl nāya □ □ □
{B32}   pi nivedana ta vraḥ pāda stāc [dau ta] □
{B33}   □ loka leṅ jā vraḥ kālpanā [dau ta] [kamra]
{B34}   teṅjagat liṅgapura vraḥ □ □ □ □ □
{C1}   □ □ □ □ □ □ □ □ □ □ □ □
{C2}   □ □ □ □ □ □ □ □ āṇḍi □
{C3}   □ □ □ □ □ □ □ ṅ dau saṅ gol pra □
{C4}   □ □ □ □ vna[ṃ] t[i]chok veṅ nu sre □ □
{C5}   □ □ ta vāp sadāśiva nu kule □ □
{C6}   □ v siddhi lvaḥ mahāsaṅhāra ○ 92□
{C7}   nu vāp savāda ○ sruk chok veṅ [ti]
{C8}   [stap] vyavahāra cuḥ vraḥ ’ālakṣana ta
{C9}   kaṃsteṅ kavīśvaravarmma samayuga nu mra
{C10}   [tā]ñ khloñ gunadoṣa vraḥ sabhā pho[ṅ]
{C11}   pre ṇirnaiya vāp sa ta ph’van □
{C12}   □ āja pādahāstaccheda pre kule
{C13}   phoṅ thve kālpanā ru ta tel
{C14}   924 śaka nu mān vraḥ karuṇā ta pa
{C15}   ramapavitra pi pre khloñ vala khloñ saṃta
{C16}   p śuddhānta nu pratihārapāla nā eka dau
{C17}   saṅ praśasta ta sruk chok veṅ o
{C18}   y ta vāp śaṅkarātmā nu vāp sadāśiva
{C19}   siddhi tarāp candrāditya mān ley
{C20}   928 śaka nu vāp sadāśiva sanme
{C21}   ni nu teṅ tvan ta janaṇīy pi o
{C22}   y daṃnap laṅloṅ veṅ mvay toy ka
{C23}   roṃ phoṅ jā parigraha ta kvan vāp sa
{C24}   dāśiva ta jmaḥ tāñ vrahma nu tāñ umā
{C25}   □ka pi oy kālpanā sru thlvaṅ 2 nu
{C26}   vraḥ paryyaṅ ’nau vnaṃ ti jā yajña cat[ur]
{C27}   māsa ’yat cañcula ta dai ti ○ dravya [nu] du
{C28}   [ñ]bhūmi vnaṃ ti chok veṅ laṅloṅ veṅ sre
{C29}   snaṅ mās liṅ 3 vaudi 2 padigaḥ 4
{C30}   [s]vok 3 krapi 6 poṅ 1 rdd[e]ḥ jeṅ 1 sray[ū]
{C31}   [vnā]t 3 kryav 3 thmur 10 6 vave 2 sr□
{C32}   □ 2 canlyak yau 10 5 prāk liṅ □
{C33}   □ 10
{D1}   prāk □ □ □ □ □ □ □ □ □ □
{D2}   8 laṅgau s □ □ □ □ □ □ □ □
{D3}   ṅ 2 srayu vnāt 2 □ □ □ □ □
{D4}   4 khdyac 2 jmol parat □ □ □ □
{D5}   n 2 canlyak yau 6 hāli □ □
{D6}   □ vave 2 canmāt 2 kañje chnāṅ □
{D7}   □ 2 sru 10 4 ○ dravya [nu]du]n bhūmi
{D8}   [’āy] vrai trapek mās liṅ 1 vaudi □
{D9}   padigaḥ 2 kadāha 2 ○
{D10}   phsaṃ kālpanā phley □ □ □
{D11}   40 10 6 kadāha 1 ○ velā nu dār □ □
{D12}   neḥh dār nu dāl ta pañca □ □ □

{1}   815 śaka pi ket vaiśākha nu vraḥ ’ājñā dhūli jeṅ vraḥ kamrateṅ ’añ śrī yaśovarmmadeva jvan mās prak ’nak ple
{2}   y vraḥ kuṭī man jvan ta vraḥ kamrateṅ ’añ ta parameśvara vraḥ spai pyaḥ ’anroṃ mās jeṅ mās 1 gāyatrīya mās vnak 1 gāyatrī
{3}   ya prak vnak 1 śveta 1 vraḥ gadā 1 nū vat hir 1 ’āyoga 1 cnap 1 canhvay 1 vodī caṃdoṅ prak 1 vodī sraḥ 4 sbok 6 gadāha 5 jeṅ tripāda 2
{4}   jeṅ parass 2 jeṅ dyān 2 tmo pi pas 2 ○ vnvak ta gi sruk saṃroṅ ’aṃraḥ saṃ’ap | gho manyāra | gho jaṅver | gho cpoṅ | gho jīva | gho kaṃvai | gvāl pa
{5}   lvah | gvāl kan’in | gvāl krau | tai tgun | tai rat kaṃprvat | lap panlas | tai ’a tmyaṅ | tai ’a laṅgāy | lap vñau | si rat kansaṃ | tai krau | gho kañjir | gvāl kaṃvrau [|]
{6}   gvāl nārāyana | lap pnos | tai kaṃpur | lap paṃye | tai kñuṃ | piṇḍa ’aṃraḥ 1 nu ’aṃraḥh gho [6] gvāl 5 tai 4 lap 4 si rat 1 tai rat 1 tai ’a 2 psaṃm 20 4 ○ vnvak ta gi
{7}   sruk ’abhinavagrāma pramān jeṅ tarāñ ’aṃraḥ ’anrok | gho tgap | gho viṣṇubhava | gho ’gat | gho kaṃvrau | gho cancān | gho harabhāva | gho kanleṅ | gho pa
{8}   ndan | gho kandvac | gho daluḥ | tai jvik | gvāl kñuṃ | gho kan’añ | tai jaṃ’ar | tai pau ptal | tai rat kaṃprvat | lap ’vyāk | tai kaṃvai | gvāl saṃ’ap | gvāl kañcū | tai kṛṣṇāvatī | si ra
{9}   t kaṃpañ | si pau kan’as | si rat taṅku | lap ’nap | lap kanso | tai vraḥ śrīya | si pau kan’as | tai rat cmyat | lap vicitra | lap kapkep | psaṃ 20 10 2 ○ ’aṃraḥ vra
{10}   hey | gho pansvaṃ | gvāl kse | tai kaṃpaṅ | tai pau kan’ak | lap kan’aṃ | tai kanhī | tai kan’oy | tai kaṃphāc | tai pau kan’as | lap tkyap | tai laṅgāy |
{11}   tai pau tgal | si rat krau | tai kanhik | tai caṃhep | si rat ’nāśraya | tai santāpa | tai pau cmyat | si rat kañjā | tai ’gat | tai vraḥ dharmma | tai saṅkāv | tai kanruk | tai knit | tai va
{12}   ra | tai rat pandan | tai smau | si rat saṃ’ap | si pau ’aṃvil | psaṃ 20 10 ○ ’aṃraḥ sugaṭagarbha | gho kañcū | gho saṃ’ap | gho cpoṅ | tai kañcū | si pau mañ | tai pau caṃpeṅ | tai
{13}   rat kan’aṃ | lap tkan | lap kaṃvai | gvāl kanloñ | tai nāṅ | si pau siddhivara | tai kanteṅ | tai panlas | si pau śivarucī | tai ’a devaśrīya | tai rat kanduḥ | tai ’a saṃtoḥ | tai ’a
{14}   kulaśrīya | tai rat nāvatī | tai kandhi | tai ’a kanleṅ | lap kañcan | tai dār pa’is | tai ’a rāgadeva | tai kan’ak | psaṃ 20 7 ○ piṇḍa ’aṃraḥ 3 nu ’aṃraḥh gho 10 [4] gvāl 6 tai 20 8 lap 10 si rat 6 tai
{15}   rat 5 si pau 6 tai pau 6 tai ’a 5 psaṃ 80 9 ○ ’nak ple sruk saṃroṅ sot gho dhanāgra | gho kanso | tai utpala | gvāl kanteṅ | ○ psaṃ ’nak vraḥ kuṭi toy uttara ple sruk ’anle 2
{16}   ’aṃraḥ 4 nu ’aṃraḥh gho 20 4 gvāl 10 1 tai 20 10 2 lap 10 4 si rat 7 tai rat 6 si po 6 tai po 6 tai ’a 7 psaṃ 100 10 3 ○ vraḥ kuṭi toy dakṣiṇa man jvan ta vraḥ kaṃmrateṅ ’añ
{17}   śrī pṛthivīndreśvara vraḥ spai pyah | gāyatriya mās vnak | gāyatriya prak vnak | śveta | vraḥ gadā | vat hir | ’āyoga | cnap | canhvāy | vodi caṃdoṅ prak | vodi sraḥ 4 gadā
{18}   ha 5 sbok 6 jeṅ tripāda 2 jeṅ parass | jeṅ dyān | tmo pi pas 2 ○ vnvak ta gi sruk taṃpal pramān malyāṅ ’aṃraḥ kandās | gho piros | gho subhikṣa | gho cke | gho krau | tai kaṃ
{19}   pur | tai cancān | gvāl dapdip | si rat kanhey | tai laṅkaḥ | tai rat kaṃvi | tai kaṃpaṅ | gvāl cke | si pau kañjā | tai krau | gvāl kañcū | lap kaṃvai | gvāl tgap | tai rat pnos | tai rat saṃ
{20}   ’ap | tai pau kan’as | tai taṅker | tai sam=rapū | gvāl kaṅvyān | si pau kanthok | tai sbok| si pau taṅku | tai kansū | si rat pandan | si pau kantvah| tai krau sot | tai rat ’gat | tai rat pandan |
{21}   gho kan’as | tai kanlāṅ | gvāl śrī | tai ’anrok | piṇḍa ’aṃraḥ | nu ’aṃraḥh gho 6 gvāl 6 tai 10 2 lap 1 si rat 2 tai rat 5 si pau 4 tai pau 1 psaṃ 20 10 7 ○ vnvak ta gi sruk vīrendrapaṭṭana
{22}   pramān jeṅ vnaṃ ’aṃraḥ mahendra | gho śivarucī | gho kaṃpit | gho śrī | gvāl harī | gvāl dyac kaṃvis | tai sujana | tai śaciya | tai rat śrīdeva | tai sarasvatī | lap pandan | si pau matirā
{23}   ja | gvāl kanteṅ | gvāl tgap | tai subhadrā | tai rat kan’as | tai kañjuṅ | lap ’diti | tai rat kandvac | tai pau kandhī | tai jmas | gvāl dyāc kdeṅ | si pau nilā | gho dāmoda | gho mānu psaṃ 20 5 ○
{24}   ’amraḥ makaraddhvaja | si ’a kaṃvāl | gho krau | gho veda | gho cpoṅ | gho tmai | gho pnos | tai ’a lakṣmīdeva | tai kaṃpit | tai mat | tai pau kanteṅ | tai kansu | tai ’a rudatī | tai kalaśa | gvāl kañjā |
{25}   tai jaṃ’yal | tai kaṃvī | tai panheṃ | gvāl pandan | si rat kaṃpit | tai vikramadeva | tai jvik | lap phaladeva | gvāl jaṅver | tai ’gat | tai ptal | lap kanren | gvāl kañcī | si rat cke duḥkha | si pau kañcū |
{26}   tai dharmma | lap krau | tai dakṣiṇādeva | tai paṃnaṅ | tai kañjes | tai sandharuṃ | gvāl harisūdana | psaṃ 20 10 7 ○ piṇḍa ’aṃraḥ 2 nu ’aṃraḥh gho 10 2 gvāl 8 gvāl dyac 2 tai 20 2 lap 5 si rat 2 tai rat 3
{27}   si pau 3 tai pau 2 si ’a 1 tai ’a 2 psaṃ 60 2 ○ vnvak ta gi sruk stuk kandel pramān śreṣṭhapura ’aṃraḥ rajanikara | gho kanso | gho candrabhāva | gho kandha | gho śivabhāva | gho pnos | gho rucibhāva | gho
{28}   rājadhara | gho laṃṅāc | gho laṅkaḥ | gho jaṃnan | gho mahendrabhāva | tai kañjai | tai kañjoṅ | tai śravadeva | tai nāṅ | tai pnos | [tai] kaṃpas | tai kandhi | tai nāṅ sot | tai kaṃprvat | tai kaṃpit |
{29}   gvāl kañcū | lap kan’ak | si rat panlas | tai mṛga | lap kan’as | lap kaṃpaṅ | tai kansat | gvāl kanloñ | lap kaṃpat | piṇḍa ’aṃraḥ 1 nu ’aṃraḥh gho 10 2 gvāl 2 tai 10 2 lap 4 si rat 1
{30}   psaṃ 20 10 1 ○ psaṃm ’nak vraḥ kuṭī toy dakṣiṇa ple sruk ’anle 3 ’aṃraḥ 4 nu ’aṃraḥh gho 20 10 gvāl 10 6 gvāl dyac 2 tai 40 6 lap 10 si rat 5 tai rat 8 si pau 7 tai pau 3 si ’a 1 tai
{31}   ’a 2 psaṃ 100 20 10 ○ cpar 1 ti bhāga ta vraḥ kuṭī ’anle 2 ○

{A1}   . . . . . . . . . . . . . . vraḥ kralā . . . . . . .
{A2}   . . .marasiṅha mratāñ śrī . . . . . . . . .
{A3}   vijaya vāp sata vāp pañcagavya . . . . . .
{A4}   vraḥ pāñjiya . . . . . . . . . . . . . . . . . . .
{B1}   . . . . . . . . . . . . . . . . . . . . . . . . . . . . . . . . . . .
{B2}   . . . . . . . . . . lik ta tamrvac viṣaya dep . . . . . . . . .
{B3}   . . . . . . . lik ta [tamrvac] viṣaya man mān . . . . .
{B4}   . . . . . . . cval . . . .t chlaṅ khloñ . . . . . . . . . . .
{B5}   . . . . . .y . t . . . . .rtha vāp . . . . . .
{B6}   . . .ñ . . . . .y pre

{3}   946 śaka nu steṅ ’añ jaṅghāla thvāy saṃnvat ta vraḥ pāda kamrateṅ kaṃtvan ’añ śrī sūryyavarmmadeva □ □ □ □
{4}   santāna nu śāka bhūmi sruk siddhipura man t[i] dār vraḥ karuṇāprasāda t[a] cat sruk sthāpanā vraḥ piy jyak travāṅ □ □ □ □ □ □ □ □
{5}   vraḥ śāsana pre jmaḥ steṅ ’añ śrī lakṣmīndrapandita sruk jmaḥ lakṣmīndrapada travāṅ jmaḥ lakṣmīndratatāka pre khloñ □ □ □
{6}   phoṅ jā sākṣi nā caṅvat bhūmi man ti oy prasāda nu man ti jvan ta vraḥ kamrateṅ ’añ śrī bhadreśvara nu vraḥ parameśvara nu vraḥ sarasvatī
{7}   nā bhūmi ti jvan ta vraḥ ’aṃvi ta jeṅ kaṃveṅ vraḥ ti dakṣiṇa lvaḥ travaṅ taladharmma dep viṅ lvaḥ travaṅ vadarā prasap □ □ ’āgneya [lvaḥ] tra
{8}   vaṅ surananda ’aṃvi ta jeṅ kaṃveṅ vraḥ ti uttara lvaḥ vraḥ siddhipura viṅ lvaḥ ta travaṅ vraḥ noḥh ti dakṣiṇa viṅ [lvaḥ ta gi] sre □ □ □ le
{9}   ṅ noḥ ta roḥ ta caṅvatt gi pi santāna thve rājakāryya nu gi || sre 2 naiṛti travaṅ ulloka ta □ n □ paś[ci]ma travaṅ noḥ
{10}   ta mahānasa vyar uttara travaṅ noḥh ta patrakāra vyar pūrvva travaṅ noḥh ta tūryya □ dakṣiṇa □ □ □ □ nā ta travaṅ noḥ
{11}   nu teṃ jranyaṅ ta rmmāṃ caṃmryaṅ vyar kaṃluṅ caṅvat ñyāṅ jranyaṅ ta pamek ’nak ta paripāla □ □ □ stuk □ □ phju da
{12}   kṣiṇa noḥh trimukha dakṣiṇa noḥh kralā saṅvey dakṣiṇa noḥh kralā homa □ □ □ □ jā ta □ bha □ □
{13}   nā khñuṃ man jvan ta vraḥh tai kansān tai kansān sot tai thgaṅ tai thgaṅ sot tai □ □ □ □ tai kansān
{14}   sot tai tīrtha tai tīrtha sot tai nimitta tai kañyas tai rudra tai kandes tai kanso tai kaṃvin tai ka
{15}   ndrā tai śraddhā tai kambhār tai kandes tai vrahma tai kaṃvañ tai sṅvan tai k □ □ □ □ □ n sot tai kaṃ
{16}   prvat sī paroṅ sī kandhan si khas si kaṃvit si kanthok

{2}   neḥ gi roḥ śākha pi ’añ ta jmaḥ loñ myaṅ sruk chok valval □ □ □
{3}   bhūmi vikranta dharmmapura prahāra man vraḥ pāda kaṃmrateṅ ’añ svey vraḥ rā
{4}   jya chnāṃ vyar pre ’añ loñ viṣaya dharmapura prahāra pre oy □ □
{5}   □ □r mās prāk sarvadravya pi thvāy ta rājakula phoṅ vāp si□ □ □
{6}   vāp □ □ vāp □ □ nu vāp nā□ neḥ ’nak viṣaya syaṅ ta paripāla□ □ □
{7}   □ □ □ □ □ ri □ □ danhuṃ 1 trayvaṅ=gaṃ 5 kundaka mās liṅ 1 □ □ jyaṅ 1
{8}   □ □ 10 kra□y 1 vnuk 10 □ □ 1 canlyak □ □3 neḥ taṅvāy ti ’nak viṣa
{9}   ya dharmmapura oy [ta] ’añ dār dravya ta roḥ neḥ steṅ guṇādhyakṣa o[y]
{10}   ’añ paṅgaṃ thpvaṅ nivedana vraḥ karuṇāprasāda dār man vvaṃ ’āc ti oy dravya ta ’aṃ
{11}   pāl neḥ khmi oy bhūmi [nu] dravya [n]oḥ phoṅ ’añ paṅgaṃ thpvaṅ nivedana vraḥ karuṇā
{12}   pre ’añ yok □ thvāy saṃnvat khmi oy dharmapura nu prahāra vraḥ karuṇā dār bhū
{13}   mi man ’añ [daṃ]nuk yok [nu] taṅvāy mān pandval ta □ □ □ nā catvā
{14}   ri pre oy raṅvāṅ nu vraḥ sabhā hau thve caṅvat bhūmi dharmmapura prahāra pre
{15}   oy gnā [nu] dravya ’añ ta ’aṃpāl neḥ siddhi vvaṃ ’āc ti mān vāda bhūmi neḥ ma
{16}   n kamrateṅ ’añ śrī nilakantha daṃnuk vrāhma śūnya dau ’añ paṅgaṃ thpvaṅ ni
{17}   vedana vraḥ karuṇā oy prasāda bhūmi dharmmapura prahāra ta ’añ [dep]
{18}   [’añ] cat sruk dharmapura viṅ ’añ u[nmīlita] kamrateṅ jagat nilakantha kamrateṅ
{19}   jagat śivaliṅga ti [sthāpanā] nu rūpa ’me ’añ [man] duk jā ’āsna cat sruk prahāra chvat caṃnat
{20}   chok valval □āṅ purvvapaścimadakṣiṇottara oy ta teṅ sārassvati ta kva
{21}   n ’añ kaṃsteṅ □ □ vraiy sruk vikrāntapura ta jā saṃvandhi ta ’añ nu kvan
{22}   [phoṅ] neḥ loñ A□mnañ loñ rudraśānti teṅ candra teṅ pavitra loñ paramā
{23}   □ □ gi nā ’añ oy sruk deśa neḥ phoṅ nu vraḥ pūjā □ □ □ □ □
{24}   □ □ □ ta rūpa ’me ’añ [kvan] ’añ teṅ sārasvati paripā
{25}   la caṃ pradvān vvaṃ ’āc ti mān nāk ta ’amāryyāda ta pari□ □
{26}   □ □ ’nak ta lap kalpanā ’añ ta jana svey □pa□
{27}   □ □ □ svey na□ □ □ □
{28}   candrāditya □ □