K.659 Door jamb of Pràsàt Ó Roṃduol

{1}   802 śaka ○ gi nū sthāpanā vraḥ kamrateṅ ’añ
{2}   śivaliṅga ○ 890 śaka mvāy ket bhādrapada toy ca
{3}   ndramāsa vuddhavāra pūrvvaphālgūṇinakṣatra nū mān vraḥ śā
{4}   sana dhūli vraḥ pāda dhūli jeṅ vraḥ kamrateṅ ’añ śrī jayavarmma
{5}   deva ta kaṃsteṅ ’añ rājakulamahāmantri ta kaṃsteṅ ’añ
{6}   vraḥ guru pi pre dau sthāpanā praśasta ta gi srūk sre bhūmyā
{7}   kara vrai thṅās ta ti vāp paramācāryya jauv ta cok svāy
{8}   pi svaṃ vraḥ karuṇāprasāda pi sthāpanā śivaliṅga sthāpanā vraḥ
{9}   paryyaṅ saṃ gaṇa nū kamrateṅ jagat liṅgapūra nāṃ vraḥ pa
{10}   ryyaṅ dau mvāy vatt mvāy chnāṃ thvāy vraḥ bhoga vvaṃ jā svatantra
{11}   ta vrīha vvaṃ jā pi svatantra ta kandvār craṃlo vvaṃ jā pi svatantra ta
{12}   bhūtāśa ta cañcūli phoṅ vvaṃ jā pi ’āyatta ta kule kva
{13}   n cau ta paṃnvās nī pi tyaṅ dhārmma pi paripāla gi dharmma gi ta ’āc mā
{14}   n gūs neḥ gi roḥ ka[lpa]nā yajamāna raṅko ta jā yajña je 1
{15}   pratidina kriyā sroṅ pratidina pañcagavya ghṛta madhū dadhi kṣīra
{16}   gūda nārikela ○ gandhā nū lepana ○ dīpa dhūpa tambūla kramūkaphala ○
{17}   tūryya tiṅ toṅ rāṃ cryaṅ gandharvva hūdūka śikharā ○ nivandha vraḥ paṃ
{18}   nvas smiṅ steñ purohita sru thlvaṅ 6 canlyāk yau 1 tvaṅ
{19}   teṃ 1 slā teṃ 2 steṅ ta pūjā ta vyar ○ ’aṃpal steṅta p[u]rohitaukk mī
{20}   mvāy ’nāk steñ kāri ta vyar canlyāk vlaḥ 1 sru thlvaṅ 2 je 2 mīmvāy
{21}   ’nāk sre varaḥ thlvaṅ 2 je 2 mīmvāy smiṅ ○ ta gi utsava phoṅ caṃre
{22}   n raṅko je 2 kriyā homa phoṅ ○ devadravya ○ mās prāk svok
{23}   vaudi padigaḥ kadāha kamandalū paṅkap thmur krapī taṃryya khñuṃ ta paṃ
{24}   re daṃnep=ra pamek mahānasa patrakāra ’aṃraḥ ’nak sre phsaṃm
{25}   khñuṃ phoṅ 40 10 8 bhūmya ti pūrvva prasap ’agrandhasāra ti dakṣiṇa
{26}   prasap vrai sūbheta thmā gol ti paścima prasap jarmmala thmā phlū
{27}   ta diṅṅ ○ ti uttara thmā gol prasap cok svāy ○ neḥ gi roḥ va
{28}   raśāpa vrāhma ’ācāryya pandita yajamāna nau sādhu ta ’ā
{29}   c varddheya neḥ pūnya neḥ ge mān svargga ○ nau ge ta lope
{30}   pūnya neḥ ge mān pāpa