K.276 Door jamb of Pràsàt Tà Kèv

{2}   jaṃnvan vraḥ kamrateṅ ’añ śrī yogīśvarapandita sruk vnur kaṃdvāt vi
{3}   ṣaya vyādhapura ○ ta kamrateṅ jagat liṅgapura ○ mukha vas mvāy ○ vraḥ triśū
{4}   la laṅgau mvāy bhāra ti sthāpanā ti īśāna ○ ta kanloṅ kamrateṅ ’añ ’aṅve
{5}   danle ti pratiṣṭhā vraḥ kamrateṅ ’añ śrī tripuradahaneśvara kanakāṅga stac pa
{6}   ñcotsava ’aṃval nu bhagavatī jvan hemadolā mvāy ○ ta kamrateṅ jagat va
{7}   k ek śivikā mvāy ti sthāpanā vraḥ kamrateṅ ’añ śrī nātakeśvara daśabhu
{8}   ja nu samastābharaṇa ta gi nu bhoga ta ’aṃpāll neḥ ○ hemakaraṅka mvāy jyaṅ
{9}   vyar liṅ tapp ○ khāl mās mvāy liṅ tapp ○ rupyakaraṅka mvāy jyāṅ piy liṅ tapp ○
{10}   rupyapratigraha mvāy jyaṅ tapp mvāy ○ rupyakalaśa mvāy jyaṅ pramvāy li
{11}   ṅ tapp ○ vudi prāk mvāy jyaṅ pramvāy liṅ tapp ○ rupyabhājana mvāy jyaṅ praṃ pi
{12}   y ○ rupyakamandalu mvāy liṅ tapp ○ māyūracchatra ○ gaṇā toy ’aṃpeṇa gi ta
{13}   paṃre ○ ta kamrateṅ jagat śrī cāmpeśvara ti pratiṣṭhā vraḥ kamrateṅ ’añ śrī
{14}   tribhuvanañjaya ’aṃval n[u] bhagavatī śrīy kanakāṅga stac pañcotsava ○
{15}   hemadolā mvāy [○] ’arddhalo mvāy kanakāṅga ○ sitacchatra ○ ta kamrateṅ jaga
{16}   t kaṃdvāt dik ti jau bhūmi bhadrāvidyāvīra [○] caṃ caṃnāṃ śvetatandulādiyathāvibhava ||
{17}   ta kamrateṅ jagat śrī jayakṣetra suvarṇṇabhājana mvāy [○] ’aṅguliyaka
{18}   praṃ vyal ○ vraḥ ’anroñ sarvvadanta ○ sitacchatra sarvvadanta ○ ratna tapp sūryya
{19}   kāntādi [○] vudi [○] padigaḥ pvānn ○ tamrya mvāy ○ ta kamrateṅ jagat vnaṃpūrvva ti
{20}   pratiṣṭhā vraḥ kamrateṅ ’añ śrī tribhuvanañjaya stac pañcotsava ○
{21}   ta kamrateṅ jagat chpār ransi ○ vraḥ pītha sarvvadanta ○ gangin sarvvadantasuvarṇnara
{22}   cita ○ ta kamrateṅ jagat hemaśṛṅga duk thniṃ vraḥ ’arccā ○ pañcaśūla ○ ra
{23}   ṇamarddaṇa ta rmmāṃ ○ ta kamrateṅ jagat śrī narendragrāma vraḥ srukbhīmapura man gi
{24}   ta sthāpaka jvan rupyakalaśa mvāy jyaṅ praṃ piy ○ rupyakaraṅka mvāy jyaṅ piy
{25}   sruk jāgrāma vraḥ dakṣiṇā ti jvan viṅ jā caṃnāṃ ○ ||