{0} siddhi [svasti jaya]
{1} oṃ 901 śaka gi nu khloñ vala travāṅ vrāhmaṇa mūla
{2} kanmyaṅ paṃre duñ bhūmi ’ārāma ta vāp vis taṃrvac
{3} vraḥ chpār vāp may ’nak vraḥ chpār ○ kāla ta gi vraḥ rājya
{4} [dhū]li vraḥ pāda dhūli jeṅ vraḥ kamrateṅ ’añ śrī jaya
{5} varmmadeva ○ kāla thve ṅār vraḥ hemaśṛṅgakiri nu ṅār vraḥ
{6} mandira vraḥ yaśovatī ○ neḥ vāp vis vāp mau parihāra ○
{7} lak ta neḥ bhūmi ’ārāma ta khloñ vala travāṅ vrāhmaṇa ri thlā
{8} y bhūmi neḥ vaudi vyar mvāy ṅan jyaṅ 9 mvāy ṅan jya
{9} ṅ 5 padigaḥ vyar mvāy ṅan jyaṅ 10 mvāy ṅan jyaṅ 6 svok
{10} mvāy ṅan jyaṅ 4 ○ phsaṃ laṅgau neḥ tul mvāy jyaṅ 10 4
{11} canlyāk thyāy yau 2 canlyākk vāra panlāy yau 1 canlyāk kamva
{12} l [yau] 4 man vāp mau vāp vis lak bhūmi neḥ phoṅ pi yok
{13} dravya ta roḥh neḥ [p]i thve rājakāryya nu gi ○ khloñ vala travā
{14} ṅ vrāhmaṇa oy saṃnvat roḥ pūrvvāpara bhūmi neḥ ○ cuñ vraḥ
{15} ’ālakṣana ta mratāñ śrī pṛthivīndrapandita guṇadoṣadarśi ○ nu vraḥ
{16} sabhā phoṅ pre samakṣa nu vāp mau vāp vis ’nak vraḥ chpār
{17} [taṅtyaṅ] man neḥ bhūmi ’ārāma ti lak pi yok dravya nu thve rājakāryya
{18} pre siddhi mratāñ śrī pṛthivīndrapandita pandval vraḥ śāsana ta khlo
{19} ñ vala ta trvac paṃcāṃ ’āy kroy sruk vrai dramvaṅ jmaḥ loñ
{20} valadeva vāp paramārmānandana vyavahārādhikāri sruk calmvaṃ vāp
{21} mau dharmmādhikaraṇapāla vāp pit taṃmrvac ’amṛtakadhana vāp dha
{22} rmmācāryya taṃmrvac raṅvāṅ nā triṇī pre chvatt bhūmi neḥh jmaḥ
{23} ’ārāma hauv puruṣapradhāna grāmavṛddha ’aṃcās ’nak ta sa
{24} mipa pvān toy samakṣa saṅ gol pre oy ta khloñ vala tra
{25} vāṅ vrāhmaṇa vāp mau vāp vis nāṃ chvatt bhūmi neḥ samakṣa
{26} nu puruṣapradhāna ’āy śv[e]tadvipasmiṅ mukhya loñ yudhiṣṭhira gu
{27} he loñ śrī travāṅ kanloṅ rājadvāra loñ nārāya cuṅ □ □
{28} loñ kerthi devaparicāra vāp ’amṛta vāp ’āja □ □ □ [vā]
{29} p śinanda vāp rau sruk bhagavadvipa vāp i □ □ □ □ □ □
{30} loñ vrahmaguṇa purohita sruk □ □ □ □ □ □
{31} sruk travāṅ tannot vāp □ □ □ □ □ □ □ □ □
{32} cāṃ kravos samakṣa nu puruṣapradhāna ta roḥh neḥh saṅ gol
{33} pūrvva paścima dakṣiṇa uttara pandval vraḥ śāsana oy ta khloñ
{34} vala travāṅ vrāhmaṇa khloñ vala travāṅ vrāhmaṇa taṃ sgar juṃm
{35} bhūmi neḥ vnek ni ta puruṣapradhāna ta roḥ neḥh jvan bhūmi neḥ
{36} ta vraḥ yokk ti [ta bhūmi neḥ] duk jā ti ’ācamna nu vraḥ kamrateṅ ’añ duk
{37} jmaḥ kṣetra saṃkrānta [dep] bhūmi neḥ nā thve sre phle ’āśrama nā khlo
{38} ñ vala travāṅ vrāhmaṇa ta jmaḥ saṃkrāntapada ’āy śvetadvi
{39} pa ○ sre sthalā pravaca ti khloñ vala travāṅ vrāhmaṇa du
{40} ñ ta vāp □ t chmāṃ vraḥ kralā phdaṃ chok gargyar nu vaudi vyar
{41} ṅan jyaṅ 5 canlyak □ yau 7 srū 60 10 3 sre jeṅ daṃ
{42} nap śvetadvipa [ti]jāv nu vaudi vyar padigaḥ vyar ta ’nak vraḥ
{43} kāl thve ṅār vraḥ mandira vraḥ ’abhiramyavati 926 śakka
{44} nu khloñ vala travāṅ vrāhmaṇa duñ sre praloḥ cikcok ta vā
{45} p nāgaśarmma kanmyaṅ paṃmre vraḥ khān vāp śrīnivāsa vāp pit
{46} kanmyaṅ paṃmre nā lamak thlāy bhūmi neḥ mās chaguṇa li
{47} ṅ vyar 1 pāda 1 vaudi 1 ṅan jyaṅ 6 kadāha 1 ṅan jyaṅ 4 canlya
{48} k 20 ruṅ bhūmi neḥ sre dhārmmapura vrah 20 10 sre jnaṅ vrah 100
{49} sre drāṅ ruṅ thlās 20 khloñ vala travāṅ vrāhmaṇa samākṣa
{50} ’āy vraḥ sabhā ta ’nau nā samākṣasteṅ ’añ vidyāśra
{51} ma ’ācāryyapradhāna sabhāpati mratāñ śrī kavīndrapandita
{52} sabhāpati mratāñ śrī jayendrapandita guṇadoṣadārśi mratā
{53} ñ śrī pṛthivīndropakalpa svat vraḥ dharmmaśāstra mratāñ śrī rā
{54} jopakalpa svat vraḥ dharmmaśāstra mratāñ khloñ śrī nṛpati
{55} nrāditya trvac kanmyaṅ paṃmre sruk thpvaṅ rmmāṅ vāp dhā
{56} rmmācāryya taṃmrvac raṅvāṅ nā triṇi steṅ ’añ vidyāśra
{57} ma pandval vraḥ śāsana ta vāp varuṇa mūla kanmyaṅ pamre
{58} sruk kañjrep prasir pre dau hau puruṣapradhāna grā
{59} mavṛddhi ta samipapvan toy sruk phdeṅ panhem
{60} loñ yudhiṣṭhira purohita loñ nan paṃjuḥ loñ va
{61} ladeva paṃjuḥ pradhāna vāp mādhava taṃmrvac vāp ’a
{62} p vāp □ā loñ veda travāṅ thmo samakṣa nu pradhāna
{63} ta roḥ neḥ pandval vraḥ śāsna vāp nāgaśarmma vāp śrīn[i]
{64} vāsavāp pit nāṃ chvatt bhumi saṅ gol purvva paścima dakṣi
{65} ṇa uttara oy ta khloñ vala travāṅ vrāhmaṇa khloñ va
{66} la travāṅ vrāhmaṇa duk jmaḥ kṣetra saṃkrāntajvan ta vraḥ
{67} kaṃmrateṅ ’añ śvetadvipa yok ti ta bhumi neḥ duk
{68} jā ti ’ācamana ○ niy neḥ bhumi ta roḥh neḥh
{69} phoṅ man khloñ vala travāṅ vrāhmaṇa duñ ti jva
{70} n ta vraḥ kaṃmrateṅ ’añ śvetadvipa ’āyatta khñuṃ phle ’ā
{71} śrama ta jmaḥ saṃkrantapada ○ gi roḥ kalpanā pra
{72} tidina kra □ cyan 1 □ □ liḥ □ □ □ □ □ thloṅ □ □ □
{73} thloṅ liḥ 2 devayajña □ □ □ □ □ yajña
{74} liḥ piy □ □ □ □ □ □ □ □ □ na oy
{75} mahākāla □ □ □ □ □ □
{76} □ □ □ □ □ □ □ □ □ □ □
{77} thlvaṅ □ □ □ □ □