{1} hai vraḥ mahāvodhi ○ hai ta mān teṃ ta gi vraḥ vrahma
{2} hai ta mān khlvan ta gi vraḥ īśvara ○ hai ta mān mek ta
{3} gi vraḥ viṣṇu ○ hai ta nitya ○ hai ta jā kuruṅ ta vṛkṣa pho
{4} ṅ ○ hai ta bhāgya veg ○ hai ta jā ’āśraya ta jagat pho
{5} ṅ ○ hai ta oy phala cya thmā ○ kaṃ pi randaḥ pañ kamrateṅ
{6} ’añ kaṃ pi trū tiṅ kaṃ pi vraḥ vāyu kac kaṃ pi vraḥ
{7} vleṅ tut ○ kaṃ pi kamrateṅ phdai karoṃ paṃpat kaṃ pi
{8} tamrya krodha pi vrac nau kamrek vnek yeṅ ta
{9} ’asaru [○] nau kamrek caṃceṃ ta ’asaru ○ nau svapna ta ’a
{10} saru ○ nau cintā ta ’asaru ○ nau maḥ ta ’asaru pho
{11} ṅ ta mān ta svargga ta manuṣya loḥ cura paṃpat noḥ ○