{S1}   dvyuttaraṣatśata śakaparigraha triyodaśī roc jeṣṭha ’anurādha
{S2}   nakṣatra kuruṅ maleṅ oy tñaṃ ta vraḥ kamratāṅ ’añ śrī ke
{S3}   dāreśvara jmah ge tlaṅ | tateñ | tasā | tnit | tarā [|]
{S4}   tasir | tatāṅ | kaṃvañ | kañcai | dehv | pañcamī |
{S5}   saptamī | pūrṇṇamī | vuddhisāra | ’akāryyanipuṇa | ca
{S6}   p mān | seṅ | tmen | cap pi hau | kandat | ’me maṅ
{S7}   kon ku 4 [|] ku ’me panhe | ku kdos | ’me droṅ | kon ku 2 [|] ku srī |
{S8}   kon ku [| ku] cāhv | ku ye sāy | kon ku 3 [|] ku ye māy |
{S9}   kon ku | ku yoṅ kan | kon ku [|] ku ya ṅāhv | ku ya | kon
{S10}   ku 2 ku ya iṅ | kon ku 2 ku rmmeṅ | kon ku 2 ku saṅgo□ |
{S11}   kon ku 2 [|] ku ya ṅoy | kon ku 5 sarvvapiṇḍa savālavṛddha gitñaṃ
{S12}   40 10 8 tmur 100 daṃriṅ 1 sre man johv ta ge ci sre dañ liṅga
{S13}   ’aṃnoy vraḥ kamratāṅ ’añ ta dau śivapura oy ta vraḥ sre
{S14}   ’aṃvāṃ lec | sre oṅ drau | man ge soṅ ktiṅ | sre pnāk
{S15}   kuruṅ maleṅ dai gi neḥ sre ta roḥ gi neḥh phoṅ tel
{S16}   kuruṅ maleṅ oy ta vraḥ kamratāṅ ’añ śrī kedā
{S17}   reśvara
{N1}   vraḥ kamratāṅ ’añ śrī kedāreśvara ge ta daṅ sak gi mās vraḥ
{N2}   prak laṅgau saṃrit canlek sre daṃriṅ tmur ge ta daṅ sak gi ge ta da
{N3}   saṃ daṅ ’nak ta tve vipatti vraḥ kamratāṅ ’añ śrī kedāreśvara roḥ
{N4}   [ge] dau nirayasthāna [nu] ’ji ge ta si ge ta kantai ’me ge ’tā ge koncau ge ta
{N5}   pāṅ par [ge] mut vraḥ cau lah kantai lah kula saṃ vyavahāra lahkñuṃ ta kmi tve
{N6}   mut vraḥ lah ka ti pre ge tleṅ ’aṃvi la i mahāniraya nivandhavarṣā yu
{N7}   gala yau 8 pareṅ ’antoṅ 3 slā k k tṅai lut 2 ṅarṅo
{N8}   i svai sivut candana kaṭṭi 1 lṅo gmuṃ raṅko tloṅ 1 ’nāc gidau kañjrap
{N9}   ’me kmas | kon ku 3 [|] ’me dharmmakara | kon ku 3 [|]’me juṅ | u
{N10}   ttara [|] vai [|] yakta | panhem man col | sattra caṃren tagi tṅai vraḥ raṅko
{N11}   je kanlaḥ ge ta cam vraḥ kamratāṅ ’añ śrī kedāreśvara
{N12}   [duk] gi nivandha ge cam vraḥ kamratāṅ ’añ mully
{N13}   ta gi prak liṅ

K.451 Door jambs of Pràsàt Khtom
Other versions