{S1} dvyuttaraṣatśata śakaparigraha triyodaśī roc jeṣṭha ’anurādha
{S2} nakṣatra kuruṅ maleṅ oy tñaṃ ta vraḥ kamratāṅ ’añ śrī ke
{S3} dāreśvara jmah ge vā tlaṅ | vā tateñ | vā tasā | vā tnit | vā tarā [|]
{S4} vā tasir | vā tatāṅ | vā kaṃvañ | vā kañcai | vā dehv | vā pañcamī |
{S5} vā saptamī | vā pūrṇṇamī | vā vuddhisāra | vā ’akāryyanipuṇa | vā ca
{S6} p mān | vā seṅ | vā tmen | vā cap pi hau | vā kandat | ’me maṅ
{S7} kon ku 4 [|] ku ’me panhe | ku kdos | ’me droṅ | kon ku 2 [|] ku srī |
{S8} kon ku [| ku] cāhv | ku ye sāy | kon ku 3 [|] ku ye māy |
{S9} kon ku | ku yoṅ kan | kon ku [|] ku ya ṅāhv | ku ya mā | kon
{S10} ku 2 ku ya iṅ | kon ku 2 ku rmmeṅ | kon ku 2 ku saṅgo□ |
{S11} kon ku 2 [|] ku ya ṅoy | kon ku 5 ○ sarvvapiṇḍa savālavṛddha gitñaṃ
{S12} 40 10 8 tmur 100 daṃriṅ 1 sre man johv ta ge ci sre dañ liṅga
{S13} ’aṃnoy vraḥ kamratāṅ ’añ ta dau śivapura oy ta vraḥ sre
{S14} ’aṃvāṃ lec | sre oṅ drau | man ge soṅ ktiṅ | sre pnāk
{S15} kuruṅ maleṅ dai gi neḥ sre ta roḥ gi neḥh phoṅ tel
{S16} kuruṅ maleṅ oy ta vraḥ kamratāṅ ’añ śrī kedā
{S17} reśvara
{N1} vraḥ kamratāṅ ’añ śrī kedāreśvara ge ta daṅ sak gi mās vraḥ
{N2} prak laṅgau saṃrit canlek sre daṃriṅ tmur ge ta daṅ sak gi ge ta da
{N3} ṅ saṃ daṅ ’nak ta tve vipatti vraḥ kamratāṅ ’añ śrī kedāreśvara roḥ
{N4} [ge] dau nirayasthāna [nu] ’ji ge ta si ge ta kantai ’me ge ’tā ge koncau ○ ge ta
{N5} pāṅ par [ge] mut vraḥ cau lah kantai lah kula saṃ vyavahāra lahkñuṃ ta kmi tve
{N6} mut vraḥ lah ka ti pre ge tleṅ ’aṃvi la □ □ i mahāniraya ○ nivandhavarṣā yu
{N7} gala yau 8 pareṅ ’antoṅ 3 slā k □ k □ □ □ □ tṅai lut 2 ṅarṅo
{N8} □ □ □ □ □ i svai sivut candana kaṭṭi 1 lṅo gmuṃ raṅko tloṅ 1 ’nāc gidau kañjrap
{N9} □ □ □ □ ’me kmas | kon ku 3 [|] ’me vā dharmmakara | kon ku 3 [|]’me juṅ | u
{N10} ttara [|] □ □ vai [|] □ yakta | vā panhem man col | sattra caṃren tagi tṅai vraḥ raṅko
{N11} je kanlaḥ ge ta jā cam vraḥ kamratāṅ ’añ śrī kedāreśvara
{N12} [duk] gi nivandha ge cam vraḥ kamratāṅ ’añ mully □ □ □ □ □ □ □
{N13} □ □ ta gi prak liṅ □