K.397E/1 Door jamb of Pˀimai

{1}   1030 śaka ’aṣṭamī roc puṣya ’ādityavāra nu vraḥ kaṃmrateṅ ’añ śrīvīrendrādhipativarmma sruk chok vakula sthāpanā kaṃmrateṅ jagat senāpati trai
{2}   lokyavijaya jā senāpati kaṃmrateṅ jagat vimāya ○ jvan khñuṃ ta roḥ n[e]ḥh taipandān kvan tai chke si mūla si kamvṛk tai kantū kvan
{3}   □ □ḥ kvan tai sambhap tai kaṃñān tai khdiṅ si gandha phsaṃ 10 jvan bhūmi valayajaṃnau ’āgneya mat ta haraṇasthāna thmo jyak travāṅ □ □
{4}   □ □ paṅgvay khñuṃ noḥ ta gi ○ jvan bhūmi jamnau ’anle mvay pūrvva sruk khvyavsaṅ gol thve simāvadhi juṃ ○ kalpanā vraḥ pure raṅko je mvay
{5}   liḥ prām pratidina [saṃ]khyā [bhūmi] ’amvi gol śilā muṃ īśāna dau dakṣiṇa chloṅchdiṅ khvyav lvaḥ tal ta gol śilā ’āgneya slik
{6}   pvan śata piy bhay pvan tap prām piy ○ ’aṃvi gol śilā ’āgneya noḥh dau paścimalvaḥ tal ta gol śilā nairṛti slik
{7}   mvay bhay piy ○ ’aṃvi gol śilā nairṛti noḥ dau uttara lvaḥ tal ta gol śilā □ . ilpaścima śata vyar bhay pvan □ □
{8}   □ ○ ’aṃvi gol śilā noḥ gi paścima dau uttara lvaḥ tal ta gol śilā ta thnval chdiṅkhvyav ti dakṣiṇa śata piy bhay vyar ○ ’aṃvi go
{9}   l śilā noḥh dau pūrvveśāna chloṅ chdiṅ lvaḥ tal ta gol śilā uttara thnval chdiṅ śatavyar bhay vyar tap ○ ’aṃvi gol śilā noḥh
{10}   ti uttara thnval chdiṅ dau uttara lvaḥ tal ta gol śilā muṃ vāyavya slik piy śatamvay bhay pvan tap ○ ’aṃvi gol śilā muṃ vāyavya
{11}   noḥh dau pūrvva lvaḥ tal viṅ ta gol śilā muṃ īśāna śata vyar bhay vyar mvāyphsaṃ gol śilā praṃ vyal ti chlāk vraḥ □ □ □ □
{12}   vyar sme ○ saṃkhyā bhūmi neḥ juṃ □ □ □ ○ [k]hnañ mvāy slik vyar śata mvāybhay vyar || 1031 śaka ṣaṣṭhi roc mārggaśira vu[dhavāra] gi nu
{13}   thve saṃvatsarapūrṇamī jvan khñuṃ ta roḥh neḥh sot □ tai □ □ □ kvan taikansyāṃ kvan tai ka □ tai □ □ □ □ □ □ si gandha
{14}   tai kanryyap kvan tai □ □ si ’ali tai chke kvan tai □ □ □ tai □ □ □ □ tai kaṃvāṅ simūla si □ □ □ si ka □ □ □ phsaṃ tap praṃ
{15}   mvāy ○ phsaṃ khñuṃ ti j[va]n dina vyar bhay mvāy praṃ mvāy [khñuṃ neḥ jvanta] ’āśrama noḥ ti jmaḥ śrī vīrendrāśrama □ □ □ || 1031
{16}   śaka pañcamī ket puṣya vudhavāra gi nu cat sruk ta bhūmi daṃne □ noḥ [ta nai]śrī vīrendrāśrama lek valaya [ta] bhūmi noḥh [o]y ta khñuṃ □
{17}   □□□ pāñjiya noḥ phoṅ ○ pre pamre pratipakṣa ta kaṃmrateṅ ’añ senāpatitrailokyavijaya [’āy] śrī vīrendrāśrama noḥ
{18}   thve caṃnāṃ kalpanā ta roḥh neḥh || 1031 śaka jaṃnvan vraḥ kaṃmrateṅ ’añ śrīvīravarmma □ rvak □ □ ta kaṃmrateṅ jagat
{19}   senāpati trailokavijaya ○ tai kher caṃnāṃ raṅko tai □ □ □ na ○ phsaṃ savālakhñuṃ bhay mvāy praṃ vyal ○ neḥ pakṣa khne
{20}   t ○ si mūla si khdep si kanśrī tai kan’ūn tai □ □ tai saṃbhap tai kaṃñān tai chke □tai kansat tai kañon tai kaṃvāṅ tai
{21}   kher ○ phsaṃ tap vyar ○ pakṣa ranoc si kaṃvṛk si mūla si kansat si ’ali tai pandānrā tai chke tai khdiṅ tai sārasvatī rā tai kansyāṃ
{22}   tai kanśrīpau tai kaṃvṛk tai vāma [tai] □ □ □ □ □ pau tai kanryyan tai viṅ pauphsaṃ tap prām || thvāy phala noḥ ta vraḥ
{23}   pāda kaṃmrateṅ ’añ śrī dharaṇīndravarmmadeva ||