{1} 933 śaka navamī ket bhadrapada ’ādityavāra ○ neḥ gi roḥ vaddha
{2} pratijñā ○ yeṅ ta ’aṃpāl neḥ nā bhāga tamrvāc eka
{3} syaṅ ta śapathavelā kāt tai thvāy ’āyuḥ nu kṛtajñabhakti
{4} yeṅ ta śuddha ta dhūli vraḥ pāda kamrateṅ kaṃtvan ’añ śrī sūryya
{5} varmmadeva ta sakala svey vraḥ dharmmarājya nu 924 śaka vnek
{6} ni ta vraḥ vleṅ vraḥ ratna nu vrāhmaṇācāryya ○ yeṅ vvaṃ paṅgaṃ
{7} ta kaṃrateṅ phdai karoṃ ta dai ti ley vvaṃ khmāṅ ni vvaṃ saṃ
{8} nu khmāṅ vvaṃ thve drohaprakāra phoṅ ○ nau ’aṃpāl ’aṃve phala
{9} kṛtajñabhakti ta dhūli vraḥ pāda kamrateṅ kaṃtvan ’añ śrī sūryya
{10} varmmadeva noḥ gi pi yeṅ udyoga thve ○ daha mān caṃpāṅ yeṅ
{11} udyoga chpāṅ nu sarvvātmaṇā vvaṃ sṅvan ta ’āyuḥ hetu bhakti
{12} vvaṃ rat leṅ caṃpāṅ ○ daha ’yat caṃpāṅ pi yeṅ slāp nu svayaṃ
{13} vyādhi muh ni leṅ phala ’nak ta svāmibhakti mān ta yeṅ ○ daha
{14} ’āyuḥ yeṅ ’āc dan ta vraḥ rājakāryya velā lvoḥ ta kāla nau prakāra
{15} leha yeṅ slāp hetu bhakti gi pi yeṅ thve ○ daha mān vraḥ rājakāryya
{16} nā kamrateṅ kaṃtvan ’añ pandval pi pre yeṅ dau nā ta chṅāy pi
{17} mān varttamāna ta ḷ sveṅ pi tyaṅ vastu ta vyakta thve roḥ vaddha
{18} pratijñā didai ra ○ daha yeṅ ta ’aṃpāl neḥ mān ta nu vvaṃ thve roḥ
{19} vaddhapratijñā neḥ riya kamrateṅ phdai karoṃ ta svey vraḥ dharm
{20} marājya caṃnyar svaṃ leṅ oy rājabhaya ta yeṅ vvaṃ mvāy prakāra
{21} ○ daha yeṅ mān ta kapata pi vvaṃ phgat roḥ pratijñā ta roḥ neḥ
{22} leṅ yeṅ jā ta dvātriṃśanaraka tarāp vraḥ candrāditya mān ley ○
{23} daha yeṅ thve roḥ vaddhapratijñā neḥ ta śuddha leṅ kamrateṅ
{24} phdai karoṃ pre paripālana vraḥ punya sruk deśa yeṅ saṃpūraṇa
{25} ’nau ta kule yeṅ hetu yeṅ svāmibhakti ta dhūli vraḥ pāda kamrateṅ
{26} kaṃtvan ’añ śrī sūryyavarmmadeva ta sakala svey vraḥ dharmma
{27} rājya nu 924 śaka ○ riya phala ’nak ta svāmibhakti leṅ mān ta yeṅ ’aṃviihaloka dau lvoḥ paraloka ○