{1} 924 śaka nu vraḥ kamrateṅ ’añ bhagavan ṇāma vraḥ kamrateṅ ’añ śrī prathi
{2} vindrapandita sruk ’āy ramani thvāy śrī bhadreśvarāśrama ○ ta vraḥ pādakamrateṅ kaṃtvan
{3} ’añ śrī sūryyavarmmadeva ○ kalpanā ta dau liṅgapūra liṅgaśodhana ○ ti vī 10 2gomaya vī 10
{4} 2 lṅo je 1 santek je 2 svai je 1 vacā jyaṅ 1 vraḥ curu liḥ 2 pratidina khñuṃ 5bhūmi man
{5} jauv nu padigaḥ jyaṅ 5 bhājana jyaṅ 5 mvāy śata vroḥh prāk 6 nu dukliṅgaśodhana
{6} bhājana nu dut mvāy ○ prāk nu duk kruc mārgga 1 svok 1 kathor 1 neḥ kalpanā’āy kamra
{7} teṅ ’añ liṅgapūra ○ kalpanā ’āy kamrateṅ jagat śrī jalāṅgeśvara ○ vraḥ curu pūrvvā
{8} ḥhna liḥ 1 maddhyāhna vraḥ curu liḥ 2 ti taṃtāṃ nu cat sneha ○ vraḥ yajña liḥ 4’aparāhna vraḥ caru
{9} liḥ 1 saṅkrānta je 1 bhikṣā ’ācāryya ta ’aṅgvay ta ’āśrama liḥ 1 vraḥ vleṅ liḥ 1sarassuti li[ḥ] 1 vraḥ
{10} bhikṣā caturmmāsa liḥ 1 ○ bhūmi jaigrāma ti duñ nu vaudi piy padigaḥ vyar taloñ sat mūla paṃcāṃ
{11} bhūmi thkval it ti khloñ vala kaṃluṅ kaṃveṅ ta jmaḥ loñ bhīma oy dakṣiṇāsthāpaka ○ bhūmi travā
{12} ṅ rek ti khloñ vala kaṃluṅ kaṃveṅ oy dakṣiṇā phle yajña teṅ tvan kaṃluṅkaṃveṅ ○ bhūmi ca
{13} ndranan ti teṅ tvan vraḥ ’aṅkoñ oy dakṣiṇā man nāṃ cval ’āy liṅgapūra ○ bhūmivijayeśvara ti vraḥ pā
{14} da kaṃmrateṅ kaṃtvan ’añ śrī sūryyavarmmadeva oy vraḥ karuṇāprasāda presthāpaka vraḥ viṅ ○ saṃ gaṇa nu
{15} kaṃmrateṅ jagat liṅgapūra ○ neḥ vijayeśvara punya vraḥ kaṃmrateṅ ’añ śrīvijayendravarmma ta gurujana vraḥ
{16} pāda sūryyāga śivapada ○ ta pandval pi oy prasāda vraḥ kaṃ[mra]teṅ ’añ śrīsamarādhipativarmma ta pratyaya
{17} mratāñ khloñ bhavapūra ○ bhūmi bhavasthāna ti oy dakṣiṇā sthāpakat[a] duñbhūmi noḥ sot nu pa
{18} padigaḥ jyaṅ 5 ta loñ sān bhavasthāna ○ tai kansoḥ ti duñ nu canlyak yau 10prāk liṅ 4
{19} ti duñ ta loñ śaktiśiva paṃcāṃ kraloṅ ○ tai sralit ti khloñ vala trvac paṃcāṃ sruk’āy
{20} kaṅke gi ta oy ○ tai gañjū [ti] loñ vās vīragrāma paṃcāṃ daśādhikṛtta oy ○ taikañjā
{21} nu gho kansrāc ti khloñ vala khloñ srū oy ○ tai kaṃvai ti duñ nu padigaḥ jyaṅ 5ta teṅ
{22} tvan dvāravati ti jmaḥ teṅ dharmma ○ tai kaṃprvat ti teṅ tvan dvāravati oydakṣiṇā sthāpa
{23} ka vraḥ kaṃmrateṅ ’añ parameśvara ○ tai kaṃvai ti duñ nu padigaḥ jyaṅ 6 ta loñ
{24} ’ap dvāravatī ○ tai gaṃprvat sot ti loñ vās salā oy dakṣiṇā thve yajña teṅ
{25} tvan vnur jās ○ tai paṅhāṅ ti teṅ tvan vnur jās oy dakṣiṇā phle thve yajña
{26} khloñ vala parohita ○ tai ulikk ti loñ ’ap o[y] dakṣiṇā sthāpaka nā vi
{27} dyāvīraloka ti oy viṅ ta vraḥ noḥ ○ kvan noḥ mvāy jmaḥ kan’in ti
{28} pre res raṅko ’āy vnaṃ ○ ’me kaṃvis nu kaṃviss ti duñ nu vaudi 1 jyaṅ 5 kadā
{29} ha mvāy jyaṅ 5 ta yā loñ jū ramyāgrāma ○
K.89 Stele of Práḥ Ṇan