{1} 934 śaka nu dhūli vraḥ pāda kamrateṅ kaṃtvan ’añ śrī sūryyavarmmadeva
{2} oy prasāda sruk kamrañiṅ ta vraḥ kamrateṅ ’añ tapasvīndrapandita
{3} man mān vraḥ karuṇā pi saṃnāhita veśa ta gi pūjā devatākṣetra vrasāja
{4} punya punya sādhakācāryya phoṅ ri ta śūnya ti pandval pre varddhe viṅ pi vra
{5} ḥ kamrateṅ ’añ tapasvīndrapandita taṃgal sre vraḥ viṅ ru ta tel ○ bhā
{6} ga khnet daṃnap thmī śata 1 kanhyaṅ sdāṅ śata 1 trau voṃ śata 1 tīt tut 20 10 khol
{7} 40 daṃnap thku 20 10 ○ bhāga rṇnoc jrai kari śata 1 kanhyaṅ sdāṅ karoṃ śata 1
{8} trau voṃ śata 1 tīt tut 20 10 haranātha 40 daṃnap me pit 20 10 phsaṃ pratipa
{9} kṣa srū slik 2 nau ge ta nu thve pi dai ti leṅ kalpanā ta roḥh neḥh ge
{10} svey naraka ’aṃval nu vṛnda phoṅ tarāp candrāditya ri ta ’āc paripāla
{11} na ge svey divyaloka ’aṃval nu gaṇa phoṅ ○ oṃ namaś śivāya ○