{1} 890śakka nu mān vraḥ śāsana dhulī vraḥ pāda dhulī jeṅ vra[ḥ kaṃ]
{2} mrateṅ ’añ śrī jayavarmmadeva oy sruk thkvāl joṅ ta kaṃ[mrateṅ]
{3} jagat vak ek nā thve vraḥ caṃnāṃ śvetatandula je mvāy pratidina [nu pa]
{4} ryyaṅdīpa nu paryyaṅ vraḥ go [ta] gi nu kñuṃ ta dau [saṅ gol] ta gi bhūmi pi oy[ta]
{5} kaṃmrateṅ jagat □ □ □ □ □ na taṃmrvāc vraḥ kralā phdaṃ nu mratāñ śrī nṛpendrā
{6} yuddha ○ ta dau dār bhūmi steñ ’añ vnaṃ vak ek steñ ’añ ’ācāryyapuro
{7} hita nu kulapatiy nu guṇadoṣadarśiy nu devaparicāra nu kramapāla nu taṃmrvā[c]
{8} nu chmāṃ glāṅ ○ neḥ syaṅ ta dau dār bhūmi nā thve vraḥ caṃnāṃ ○ □ □ □ □ □ □ṅ vargga vairāta
{9} dau raṃlik ta khloñ vala ta vyāpāra kathā man bhūmi □ □ □ n tāñ nāṅ āc cañ
{10} vyavahāra ○ khloñ vala vraḥ kṣora paṅgaṃ thpvaṅ nivedana man bhūmi thkvāljoṅ gi ta o
{11} y vraḥ caṃnāṃ ○ pre mratāñ śrī narendrasiṅha senāpati vraḥ mukhadvāra dau
{12} saṅ gol ta gi bhūmi ○ sthāpanā praśasta ’āy vak ek siddha gi bhūmi ta kaṃmrate
{13} ṅ jagat vak ek ○ gi śākha gi bhūmi nai varga vyādhapura manvarga vyādhapura tidhulī vraḥ pā
{14} da dhulī jeṅ vraḥ kaṃmrateṅ ’añ ta stac dau parameśvara pre yok pi dau duk
{15} ’āy ’moghapura ○ vraḥ śāsana pre thve pra □ □ □ □ ta gi sruk thkvāl [jo]
{16} ṅdau jā rājadravya lvoḥ ta gi rājya dhulī vraḥ pāda dhulī jeṅ vraḥ kaṃmrateṅ
{17} ’añ ta stac dau paramaśivaloka ti oy ta kaṃmrateṅ jagat vak ek ○
{18} [lvoḥ] ta gi rājya dhulī vraḥ pāda dhulī jeṅ vraḥ kaṃmrateṅ ’añ ta stac dau
{19} rudraloka ○ vāp kṣetrajña vraḥ kralā phdaṃ srukk ’āy kantāl sre dau
{20} cat sruk ta gi bhūmi thkvāl joṅ ○ man ḷ ta steñ īśvaravyāpi khloñ
{21} □ □ □ □ [puru]ṣapradhānaphoṅ nu khloñ ’nak phoṅ □ □ □ bhūmi □
{22} □ □ □ □ □ □ bhūmi thkvāl joṅ ○ vāp kṣetrajña ta □ □ □ □ □ □ □
{23} □ □ □ □ □ □ □ caṃnāṃ nā kaṃrateṅ jagat vak ek □ □ □ □ □ □
{24} □ □ □ □ □ □ k yajña liḥ 2 dep □ □ khloñ □ □ □ □ □ □
{25} □ □ □ □ □ □ □ □ □ □ [paṅgaṃ]thpvaṅ nivedana □ □ □ □ □ □ □ □ □
{26} □ □ □ □ □ □ □ □ □ □ □ □ □ □ bhūmi □ □ □