{1} sruk sūrabhi ti steṅ ’añ rṅāl ta ku[la vraḥ kamrate]ṅ ’añ śrī vīrendravarmma ta ’ca
{2} s jauv ta khloñ gāp taṃmrvac vala śrī varddhamāna taṃmrya 1 mās liṅ 5 canlyak’ru
{3} ṅ 40 kadāha vyar □ □ □ □ □ṅga □ □ □ [ti cā]ṃ caṃ[nā]ṃ [ta] kamrateṅ jagat śrīvarddhamāna
{4} khñuṃ ta gi si hṛdayaśiva si 5 tai praṃ pvan gvāl 1 ○ caṃnat ’aṅga taṃmrvac valakhloñ
{5} gāp oy thlai tamrya 1 vaudi padigaḥ □ bhājana 10 ti pul ta vraḥ kaṃmrateṅ ’a
{6} ñ ’āy vrac ○ khñuṃ gi si śikhāśiva si 3 tai 3 ○ bhūmi caṃnat jeṅ ti kaṃsteṅ laṃvāṅo
{7} y thlai vaudi padigaḥ sme jyaṅ praṃ vyalti pul ta vraḥ kamrateṅ ’añ ’āy vrac
{8} kāla chloṅ vraḥ daṃnap khñuṃ ta gi si kan’ā 1 trvac si pra[ṃ] vyaltai praṃ piygvāl1 ○ bhū
{9} mi prakāśapura ti kaṃsteṅ □ □ oy thlai vaudi padigaḥ 6 sme jyaṅ praṃ vyalti pu
{10} l ta vraḥ kamrateṅ ’añ ’āy vrac kāla chloṅ vraḥ ’ārāma khñuṃ ta gi si kansān
{11} trvac si 2 tai 6 gvāl tap 2 ○ bhūmi caṃnat vrai □eṅ ti kaṃsteṅ vnur kh’vāl oy snoṅ
{12} raṅko rājakāryya ta loṅ nu vaudi padigaḥ 6 sme jyaṅ praṃ vyalti pul ta vraḥ ka
{13} mrateṅ ’añ ’āy vrac pi oy vraḥ dakṣiṇā kāla chloṅ vraḥ travāṅ khñuṃ ta gi si
{14} tamrvac si 3 tai 6 gvāl 1 ○ bhūmi caṃnat saṃmṛddhigrāma si kandaṅ trvac si 104 tai 10
{15} 6 gvāl 2 ○ caṃnat viṣṇupura si kansān trvac [si] 3 tai 5 phsam caṃnat 2 khñuṃ sitapp praṃ
{16} vyaltai 20 1 gvāl 2 ti teṅ tvan poḥ ’riṃ oy ta vraḥ kaṃmrateṅ ’añ śrī vīrendrava
{17} rmma ta ’cas man teṅ tvan poḥ ’riṃ noḥ slāp vraḥ kamrateṅ ’añ ’āy vrac jau
{18} v bhūmi noḥ ta vraḥ steṅ poḥ ’riṃ ta cau dravya nu jauv vryat nuk 1 liṅ 5taṃmrya
{19} jmol 2 srū śata mvāy ○ vrai vraḥ bhāga 1 pakṣa khnet ti mra khnar oy thlai māsliṅ 10 ti
{20} pul ta vraḥ kamrateṅ ’añ ’āy vrac khñuṃ ta gi si kaṃvis trvac tai 4 gvāl 1 ○caṃnat vra
{21} ḥ vnur kañjuḥ taroṅ ti vraḥ kamrateṅ ’añ ’āy vrac jauv ta kaṃ trvac valasiddhiparvva
{22} ta cancyān 1 liṅ 1 vaudi [padi]gaḥ 4 gadāha 1 ○ bhūmi caṃnat travāṅ jrai ti kaṃsūrabhi kaṃ marjada ta
{23} mrvac vala khloñ gāp śrī varddhamāna oy thlai taṃmrya 1 ta kaṃsteṅ dmaḥkhñuṃ ta gi si kañcā
{24} n trvac tai 4 phsok 1 ○ caṃnat danle ti kaṃ marjada taṃmrvac vala pratipakṣa oythlai vau
{25} di 2 padigaḥ 2 kadāha 1 ta vraḥ kaṃmrateṅ ’añ ’āy vrac pi oy vraḥ dakṣiṇā
{26} kāla chloṅ vraḥ prāsāda khñuṃ ta gi si kañcān trvac si 2 tai 2 phsok 1 ○ caṃnatrlā
{27} tvaṅ ti steṅ ’añ khduṅ ta ’ji vraḥ kaṃmrateṅ ’añ ’āy vrac jauv ta taṃmrvac vala
{28} śrī varddhamāna pratipakṣa nu taṃmrya mvāy khñuṃ ta gi si kandhān trvac si 5tai 10 1 gvā
{29} l 3 lap 1 phsak 1 ○ sruk teṃ ransi ti khloñ vala gaurīśapura ta kula vraḥ kamrate
{30} ṅ ’añ śrī vīrendravarmma cas jauv ta taṃmrvac vala śrī varddhamāna taṃmrya 1ti cāṃ caṃ
{31} nāṃ ta kaṃmrateṅ jagat śrī varddhamāna khñuṃ ta gi si mṛtt trvac tai 1 ○caṃnat hiramya
{32} nu caṃnat sit paryyaṅ ti kaṃ hiramya saṃm ni nu vraḥ tirthaka khmāṅ ni vraḥpāda kaṃmrate
{33} ṅ kaṃtvan ’añ śrī sūryyavarmmadeva yok caṃnat noḥ ta vyar oy prasāda ta
{34} vraḥ kaṃmrateṅ ’añ śrī vīrendravarmma ta kanmyaṅ caṃnat sit paryyaṅ khñuṃ tagi [si ka]
{35} n’ā trvac si 1 tai 3 gvāl 1 ○ hiramya si kañjun trvac si 1 tai 5 gvāl 2 ○ caṃnat
{36} svāy vradeṅ ti jauv ta teṅ tvan ta pvas nu taṃmrvac jaiparvva[t]a nu ’aṃpya
{37} l 40 raṅko 60 khñuṃ ta gi tai 1 gvāl 1 lap 1 ○ sruk khcauv ti vraḥ kamrateṅ ’añ śrī
{38} vīrendravarmma ta kanmyaṅ jauv ta kaṃsteṅ jeṅ ’añcan ta ’nak taṃrek dravya nu
{39} jauv vryat nuk 1 liṅ 6 cancyān 2 liṅ 2 taṃmrya 1 khñuṃ ta gi si mānu ’leṅ tra
{40} c si 4 tai praṃ vyal○ caṃnat kan’uk ti vraḥ kaṃmrateṅ [’añ] śrī vīrendravarmmata
{41} kanmyaṅ jauv ta kaṃmrateṅ jagat siddhiparvva[ta] svok laṅgau 2 kadāha 2khñuṃ ta gi
{42} si 2 ○ sruk stuk ’andyār ti vraḥ kaṃmrateṅ ’añ ’āy vrac jauv ta khloñ
{43} vala ja’o nu khloñ vala parājita ta jmaḥ loñ mek nu taṃrya 1 vaudi piy padi
{44} gaḥ piy sme jya[ṅ] 6 khñuṃ ta gi si pandān trvac si praṃ vyaltai 10 gvāl 1 ○ srukvraḥ pa
{45} ryyaṅ si vraḥ kakoḥ trvac si 5 tai 5 ○ sruk kansop si kaṃvut trvac si piy
{46} tai 4 phsam sruk 2 khñuṃ ta gi si 10 tai 10 ti vraḥ steṅ yodhāpati sruk kumāra o
{47} y parigraha ta vraḥ kaṃmrateṅ ’añ śrī vīrendravarmma ta ’cas kāl oy te
{48} ṅ tvan kumāra dravya man oy ukk khlās 1 jyaṅ praṃ vyalvat 1 jyaṅ 3 taṃmrya 1’so