{1} □ □ □ [śa]ka ’aṣṭamī ket ’āṣādha śukravāra nu mān vraḥ śāsana dhūli vraḥ
{2} [pāda dhū]lijeṅ vraḥ kaṃmrateṅ ’añ ○ ta steṅ ’añ ’ācā
{3} [ryya n]ādo nu kaṃsteṅ ’añ śrī vīrendravarmma pi pre taṃgall gi
{4} □ □ □ mratāñ śrī raṇaparākrama viṅ leṅ ru ta tel ○
{5} [vraḥ]kaṃmrateṅ ’añ śivaliṅga jeṅ vraḥ taṭāka saṃ siddhā
{6} □ nu vraḥ thkval kalpanā sruk ’aṃrek dik keḥ sruk ’aśva
{7} □ ra ○ bhājana 1 kośa 1 raṅko liḥ 2 pratidina velā tut srū
{8} □ srū je 1 chatra 1 yajña 1 dau oy nā tut srūv gi sru
{9} k sre bhūmyākara khñuṃ is paṃre ta vraḥ ○ yajamāna
{10} thv[e]pūjā vraḥ stap varttamāna ru ta tel vvaṃ ’āc ti khloñ
{11} vnaṃ nu khloñ kāryya nu devaparicāra hau ’nak vraḥ neḥ pi pre
{12} ta cañcūla phoṅ nā vraḥ thkval kalpanā yajamāna gus gi ta
{13} jā pi mān ○