Person: RAS SIDDHAM Team

{1}   kamrateṅ jagat śrī tribhuvanadeva ○

{1}   kamrateṅ jagat śrī raṇadivyalokeśvara
{2}   rūpa ’nak sañjak harisoma chveṅ ○

{1}   [9]4[8] śaka [pūr]ṇamī ket caitra vṛhaspativāra khāl na[kṣatra] nu □□□□□□ jau bhūmi stuk khliṅ t[a] lohendrapuri n
{3}   □□□□□□□□[tamrva]c vala nā kamrateṅ jagat vi
{4}   □□□□□□□□□□□□kṣīṇāc ○ paras ti jvan ta kamra
{5}   [teṅ] [jagat vnaṃ] vrāhma[ṇa] pi jau bhūmi neḥ prāk khnvat mvāy
{6}   □□□□□□ mvāy ṅan jya[ṅ] prām bhājana trapu vyar sme ṅan
{7}   jyaṅ □□□ dik mvāy □□□□□yaka mvāy ta jau tamra trvac va
{8}   [la] vraḥ □□□□□□□□□ srū thlvaṅ praṃ piy □□□ dik vlaḥ
{9}   □□□□□vaṅ bhay mvāy krauv khlāṅ □□□ (10-27: illegible).
{28}   □□□□□□□□□□□□□□□□□□□□□□□ ta kamrateṅ
{29}   □□□□□□□□□□□□□□□□□□□□□□□□ ta kamrateṅ jagat
{30}   □□□□□□□□□□□□□□□□vnaṃ vrāhmaṇa kāla neḥ bhū
{31}   □□□□□□□ teṅ tvan vvan khloñ vala vvat cāṃ caṃṇāṃ neḥ ○ ta
{32}   □□□□□ pratigraha trapu 1 ṅan tulā 1 oṅkara 1 ta[ṃ]rek trapu 1 trayvaṅ 1
{33}   □□□aṅga canlyak deśa vraḥ jnān vlaḥ phnāṅ deśa vlaḥ kaṃpyat kan□□
{34}   laṃveṅ śira 2 khān 1 jvan khñuṃ ta jmaḥ tai □□k tvan v[r]aḥ go 10 ○ □□
{35}   □□□ vyar ta kamrateṅ jagat vnaṃ vrāhmaṇa paras ti oy dāna vraḥ go 10
{36}   □□□ jeṅ canlyak srū raṅko lṅau santek doḥ niy dravya ta noḥh ti jauv bhūmi
{37}   ’anle ta vyar pi cāṃ caṃnāṃ nu paras ta ’aṃpall neḥ ti jvan ta kamrateṅ jagat
{38}   t vnaṃ vrāhmaṇa ti thvāy jā vraḥ rājadharmma vraḥ pāda kamrateṅ kaṃtvan ’añ śrī sū
{39}   ryyavarmmadeva vraḥ karuṇā pandval pre oy bhūmi ta roḥh neḥh jā vraḥ karunā
{40}   prasāda ta kaṃsteṅ vrek kamrateṅ kaṃtvan ’añ pre vraḥ sabhā pratīhārapāla dau
{41}   niyama puruṣapradhāna pvan toy nu ’aṃcās ’nak pvan toy nu tamrvac vala pratipa
{42}   kṣa ’aṃcās ’nak pādamūla pratipakṣa samayuga nāṃ caṅvat bhūmi ta roḥh neḥ
{43}   h oy saṃnaṅ gol roḥ caṅvat neḥh vraḥ karuṇā pandval pre thve caṃnāṃ kalpa
{44}   nā roḥh iṣṭi ○ thve thnal śata mvāy bhay vyar phlās piy coṅ vraṅ pleṅ vrai ti
{45}   chkā lok ṛs jā phlu chloṅ oy dāna paras ’val ○ bhūmi ta roḥh neḥh phoṅ ti
{46}   ’añ oy ta kan mvāy ’añ ta jmaḥ loñ śrī ta paripālana ○

{1}   śrī [svasti] □ □ □ □ □ □ □ □ □ □ □ □ vallabha khloñ
{2}   mukha □ □ □ □ □ □ □ □ □ □ □ □ □ □ □ □ □ □
{3}   ṇā ti □ □ □ □ □ □ □ □ □ □ □ □ □ □ [dhūli vraḥ]
{4}   pāda kamrateṅ ’añ śrī sūryyavarmmadeva □ □ □ □ □
{5}   kat cāṃ vraḥ pāñjīy pre tak vraḥ pāñjī[y] □ □ □ □ □
{6}   pragalbha thve vraḥ rājakāryya nu vraḥ kaṃsteṅ śrī saṃ □ □
{7}   vraḥ kaṃsteṅ jau bhūmi nu cancyān vraḥ karu[ṇā] □ □ □
{8}   kulapati nu tamrvac khloñ ’nak phoṅ ti thve ’ā[śrama] □ □ □ [daṃri]
{9}   n slā khnar ’antāṃ phoṅ jyak travāṅ ti jau bhūmi nā thve [vraḥ] [’ā]
{10}   śrama neḥ nu padigaḥ mvāy ṅan jyaṅ praṃ vyal ti vraḥ [kaṃ]steṅ
{11}   □ □ jeṅ sabhāpati nā dau yugapat saṅ=gol=ta gi ○ ri khñuṃ vraḥ vnaṃ
{12}   vrāhmaṇa ti ’nak lak cāy kroy ti vraḥ kaṃsteṅ loḥ viṅ
{13}   gho kan’ā gho ————————– tai m——– yau ta —— lā
{14}   vlaḥ yau —————————- tai kandeṅ [tra]vaṅ ti paṅ
{15}   n ta paro ———– kalpanā . . . . . . . . . . . . . . vyar pra
{16}   tidina raṅko . . . . . . . . . . . . . . . . . . ta saṅkrānta vrai śira mvāy
{17}   phoṅ bhūmi . . . . . . . . . . . . . . ti duk ta ’āśrama neḥ
{18}   ti oy ta kamrateṅ . . . . . . . . . . . . . . . . . ti pre śiṣya pari
{19}   pāla . . . . . . . . . . . . . . . . . sruk vidyāvāsa śi
{20}   ṣya vraḥ . . . . . . . . . . . . . . . . . . . . . . .
{21}   bhūmi noḥ . . . . . . . . . . . . . . . . . . . . . . . . . . . . .
{22}   jau bhūmi nā . . . . . . . . . . . . . . nā nu sve . . . . . . . . .
{23}   vraḥ kaṃsteṅ sabhāpati saṅ=gol=ta. . . . . . . . . . . loḥ . . . . . . . . . [pa]
{24}   digaḥ mvāy ṅan jyaṅ prām dop mvāy vedanā ta . . . . . . . . . . . . .
{25}   prām ○ kalpanā caru li[ḥ] ——- pratidina ————-
{26}   ḥ mimvāy saṅkrānta ———————————–
{27}   h noḥh ti duk ta ’āśrama neḥ —————————————
{28}   śivaliṅga vnaṃ vrāhmaṇa ti pre śiṣya —————————
{29}   tai bhavya kvan gho kansān gho khdep gho samā ————-
{30}   pi thā tai kantai gho tīrtha krapiy 4 ○

{1}   . . . ku ○ ku (’a)ra[s] . . . . . . . . .
{2}   . . . ñc[a]p pau tai . . . . . . . . .
{3}   . . . ○ ku ’a[m]e . . . . . . . . .
{4}   . . . (sra)gam ○ (k)[u] . . . . . . . . .
{5}   . . . n ○ ko(n) [ku] . . . . . . . . .
{6}   . . . n rok . . . . . . . . .
{7}   . . . . . . . . . . . . . . . . . .

{1}   t□mma . . .
{2}   . . . taḥ . □ □ . ku
{3}   □ □ □ □ □ □ □ □ □ □ [’]adra . va krakara . kñuṃ vraḥ kamratāṅ ’añ □ □ □ □ [’ā]y □
{4}   □ [man] vraḥ kamratāṅ ’añ śrī bhavavarmma oy . ku vau . ku □ □viḥ . ku vraḥ ’añ . kon ku
{5}   □ □ □ □ □ vā maleṅ . ku ’aras=tamrū . ku kloñ . ku jaṃ . ku mah . ku din . ku ’aṅ . va ’avek
{6}   □ □ yā vraḥ . va ’aṃduḥ . vā sal mar ’añ mān . vā saṃ’uy . vā kañjau . vā tpun . vā klapit . va kdet .
{7}   ku tāṅ uṅ . ku ’me draṅ vot . ku draṅ vot . ku vaḥ meṅ . ku klapit . ku ’anroka . ku ’anaṅ ci .
{8}   ku saṃvok . ku smaṅ . ku yi rāṅ . ku tmaṅ . ku ’at . kon=ku pau sī . ku tmi . kon=ku va klaṅ ’aras . va tanlaṅ .
{9}   ku ya māy . kon=ku pau . ku tvau . kon=ku miḥ jmaḥ . ku ’me kanyo□ . ku san loy . kon=ku ku navaka . va kumār . ku kantāṅ
{10}   kñuṃ vraḥ kamratāṅ ’añ mucalinda . man vraḥ kamratāṅ ’añ oy vrau . vā [t]loṅ . va tlāy . va ’adoṅ . va kañ
{11}   col . vā tpaṅ . va tnāṅ . ku saṅ . ku slā . ku ya col . ku leḥ . ku proṅ . ku lvāṅ . ku koti . ku yi
{12}   [d]in . ku slā . ku pṛ . ku plak taṃkik . vā col . vā dvādaśī . vā tpun . va kañcuhv . ku ta’āya . ku
{13}   □□□l pāṅ . ku ’aras . ku vlaj=jaṃnā . ku loṅ . vā kañ joṅ . vā ’aṃval . vā kman . va □m□
{14}   vā soṅ . ku tpoñ . ku vrai rloṃ . ku raṅ kon=ku paṅket . ku klapit . va cak cek . ’me dvika
{15}   ku mar vai vai . ku gān=ro . ku pa’oc ple toy . ku dves . ku raṅ . va kavan . ku poñ . ku juṅ
{16}   ku slā vrai kon=ku pau tai . ’ame va vamī . va vamī . ku ’ame kañjā . va titāy . ’me ’tau □ □ vā kra
{17}   hvāṅ . ku yiṅ . ku vrau . kon=ku tau urañ . ku tau dmet . ta kmer . ku ’assarū . ku yi voñ . va ta’ul .
{18}   vā tloṅ . ku yāṅ . kon ku can=der sī . ku gumī . ku cat . tmur moy slikka . krapi praṃ bhai
{19}   ya . sre ’āriṅo 10 daṃmriṅ ||| sre ’āy jeṅ 20 7 sre ’āyimo □
{20}   10

{1}   845 śaka gi nu phsaṃ siddhāya[tana] nu [v]ra[ḥ kamrateṅ]
{2}   ’añ liṅgapūra raṅko kalamva tand[u]lakhāri 2 [gho]
{3}   kaṃpur gho ryyū gho kaṃvrau gho ’a □ □ □ □
{4}   hari gho kansat gho kañyac gho īśvara □ □ □ □
{5}   □ □p gho khñuṃ vraḥ gho thleṃ tai kanlaṅ tai □ □ □
{6}   □ □ □ai tai laṅgāy tai dharmma tai thleṃ tai kaṃ □ □ □
{7}   □ □ □ □ □ □ tai kaṃpit tai gandha ○ ’nak teṃ □ □ □ □
{8}   □ □ □ □ □ □ gho kan □ □ □ □ □ □ ta vraḥ gho ka □ □ □ □
{9}   □ □ □ □ □ gho mandirapāla gho kandeṅ gho □ □ □ □
{10}   □ □ □ □ n cān gho chpoṅ gho kan □ □ □ □
{11}   □ □ □ □ □ vāra gho s. eh □ □ □ □ □ □ □ □ □

{1}   . . . . . . . . . . . . . . . . k □ tarāp bhūmy . . . . . . . . . . . . . . . . .
{2}   . . . . . . . . . . . . . . [da]kṣiṇa iss hluṃ paścima iss . . . . . .
{3}   . . . . . . . . . . . . . . . . ra

{B1}   928 śaka pi ket jyeṣṭha śukravāra ’āradanakṣatra nu dhūli vraḥ pāda dhūli jeṅ vraḥ kamrateṅ ’añ śrī [ja]
{B2}   yavīravarmmadeva ta svey vraḥ rājya nu śaka catvāri do nava ○ stac vraḥ śilātatāka yaśodharapurī pi
{B3}   mratāñ khloñ śrī kavīndrapaṇḍita sruk vnaṃ vvaṅ tri □ □ pura nivedana śloka pi svaṃ bhūmi vraḥ karuṇāprasāda leṅ
{B4}   jā vraḥ dāna pi jvan=ta vraḥ kamrateṅ ’añ nārāyana man mratāñ khloñ sthāpanā ta sruk vrai karaṅ ta ti ’ji mra
{B5}   tāñ khloñ toy mātṛpakṣa dār vraḥ karuṇāprasādata gi vraḥ rājya vraḥ pāda parameśvara ○ vraḥ karuṇā ta mra
{B6}   tāñ khloñ taṅtyaṅ ruva bhūmi pi khmi mratāñ khloñ paṅgaṃ thpvaṅ nivedana man mān bhūmi ’aninditapura ta nirmūla
{B7}   pi ’āyatta ta vāp jnvāl gus toy pūrvva sruk vrai karaṅ ○ pi samīpa nu vraḥ mratāñ khloñ noḥ gi pi mratāñ
{B8}   khloñ svaṃ leṅ jā vraḥ dāna pi jvan ta vraḥ ’āy vrai karaṅ ta puṇya nai vraḥ karuṇā ta mratāñ khloñ oy pra
{B9}   [sāda] bhūmi noḥ jā vraḥ dāna ○ ’nak sañjak ta seva ta noḥh nā vraḥ oy prasāda bhūmi ta mratāñ khloñ ○
{B10}   [mratā]ñ khloñ śrī pṛthivīndravarmma ○ mratāñ khloñ śrī vāgīśvaravarmma ○ steṅ ’añ tarañ vyaṅ ○ mratāñ khlo
{B11}   [ñ śrī ka]vīndravijaya syaṅ=ta guṇadoṣadarśśi [○] steṅ ’añ danle jrai ’ācāryyapradhāna sabhāsat ○ mratāñ khloñ śrī rā
{B12}   jopakalpa smvat vraḥ dharmmaśāstra ○ mratāñ khloñ śrī kṣitīndravarmma khloñ glāṅ eka ○ mratāñ khloñ śrī nṛpatīndrava
{B13}   rmma khloñ glāṅ do [○] mratāñ khloñ śrī kṣitīndravarmma khloñ glāṅ trīṇi [○] mratāñ śrī narendrapaṇḍita cāṃ vraḥ pañjiy
{B14}   vraḥ pandval steṅ ’añ danle jrai pre dau oy bhūmi noḥ ta mratāñ khloñ jā vraḥ dāna vraḥ pandval pre steṅ
{B15}   ’añ danle jrai nu guṇadoṣadarśśi phoṅ syaṅ=ta cuñ kathā ta kamrateṅ ’añ vraḥ guru man oy vraḥ karuṇāprasā
{B16}   da bhūmi ta mratāñ khloñ śrī kavīndrapaṇḍita pre samakṣa nu vraḥ sabhā phoṅṅ ’āy vraḥ sabhā ○ steṅ ’añ danle jrai
{B17}   nu guṇadoṣadarśśi phoṅ syaṅ ta cuñ kathā roḥh vraḥ śāsana ta kamrateṅ ’añ vraḥ guru kamrateṅ ’añ vraḥ guru pandva
{B18}   l vraḥ śāsana ta loñ śrīdhara bhāgavata paṃre vraḥ kralā sroṅ ta khloñ saṃtāp nu vāp yok siṅ vyavahārādhi
{B19}   kāri nu vāp rāc daśadhita ta raṅvāṅ eka pre dau nu steṅ ’añ danle jrai pre thve gho[ṣaṇā] vraḥ śāsana steṅ ’añ danle jrai
{B20}   nu vraḥ sabhā nu raṅvāṅ dau lvoḥ ta gi sruk vrai karaṅ ○ steṅ ’añ danle jrai pre raṅvāṅ dau hau grāmavṛddha puruṣapradhāna ta
{B21}   samīpa nu sruk vrai karaṅ juṃ pvān toy [sruk] pan dval vraḥ śāsana pre syaṅ ta yugapat nā saṅ=gol ta bhūmi
{B22}   noḥ pi oy ta mratāñ khloñ śrī kavīndrapaṇḍita ta gi daśamī rṇṇoc jyeṣṭha noḥ sauravāra revatīnakṣatra steṅ
{B23}   danle jrai nu vraḥ sabhā saṅ=gol ta bhūmi noḥ oy jā vraḥ dāna ta mratāñ khloñ roha vraḥ śāsana ○ mra
{B24}   tāñ khloñ jvan=ta vraḥ kamrateṅ ’añ nārāyaṇa ’āy vrai karaṅ ○ grāmavṛddha ta jā sākṣi nā saṅ=gol ○ khloñ
{B25}   vala thvāñ treḥ velā ○ vāp daśagrāma sruk ’adhvājita ○ vāp hi sruk travāṅ guru ○ vāp bhima pradhāna sruk
{B26}   kaṃluṅ laṃvāṅ ○ vāp sur daśagrāma sruk kaṃluṅ sot ○ mratāñ vraḥ dūk le gho narāyana khñuṃ vraḥ
{B27}   thkval cās sruk vrai karaṅ ○ si hṛdayavindu khñuṃ kaṃsteṅ parājita sruk=kantāl vala vāp vrau grāmavṛddha steñ pra
{B28}   tyaya sruk samara vvac ○ vāp pa daśagrāma sruk dānyakatika vāp śivavrāhmaṇa vāp pra vāp dān vāp em vā
{B29}   p vidyāmaya khloñ jnvāl ’nin ○ vāp pit me ’yak me ṅaṃ ○ me des ○me sān me dvat ○ neḥ syaṅ sruk ’amarāla
{B30}   ya man steṅ ’añ danle jrai viṅ ’aṃvi saṅ=gol ta bhūmi pi oy ta mratāñ khloñ ○ vraḥ stāc ’āy vraḥ caturdvāra
{B31}   nā mel vraḥ vnaṃm ta ti pre thve nirmmāṇa ○ mratāñ khloñ śrī kavīndrapaṇḍita svat śloka nā vraḥ viṣṇudharmma paṅgaṃ thpvaṅ
{B32}   nivedana roḥh phala phley oy dāna bhūmi ○ steṅ ’añ danle jrai paṅgaṃ thpvaṅ nivedana man mān bhūmi ta ti khloñ jnvā
{B33}   l ’anin lak phtā ’nak ta cval kaṃluṅ caṅvat gol noḥ pi ’nak vol vāda ○ vraḥ śāsana pre dau sveṅ pi tyaṅ
{B34}   nā mān bhūmi ta nirmūla pre oy snoṅ ○ steṅ ’añ danle jrai nu mratāñ khloñ pṛthivīndravarmma nu guṇado
{B35}   ṣadarśśi phoṅ cuñ kathā roḥh vraḥ śāsana ta kamrateṅ ’añ vraḥ guru ○ kamrateṅ ’añ vraḥ guru pandval vraḥ
{B36}   śāsana ta loñ vrahma bhāgavata paṃre ta khloñ saṃtāp nu mratāñ śrī śrutabhaktigarjita khloñ saṃtāp nu ra
{B37}   ṅvāṅ eka pre dau thve roha vraḥ śāsana ○ vraḥ sabhā ta roḥh neḥh dau lvoḥ ta sruk vrai karaṅṅ pre raṅvāṅ
{B38}   hau grāmavṛddha pvān=toy srukk pandval vraḥ śāsana oy śapatha taṅ tyaṅ daha mān bhūmi varṇṇāśrama ta ni
{B39}   rmūla ○ grāmavṛddha syaṅ=ta śapatha kathā ruva bhūmi ’anin ta nirmūla toy krau gol ○ vraḥ sabhā vās ’aṃruṅ bhūmi ta mān
{B40}   ’apavāda kaṃluṅ gol dep vās ’aṃruṅ bhūmi ta nu jā snoṅ mvāy ’aṃruṅ saṅ=gol samakṣa nu grāmavṛddha puruṣapra
{B41}   dhāna phoṅ [pandva]l vraḥ śāsana ta vāp bhima tūryya sruk kaṃluṇ laṃvāṅ nu bhikṣu vraḥ sramo ta mān bhūmi ta cva
{B42}   l kaṃl[uṅ gol] [oy] [bhū]mi noḥ snoṅ man vraḥ stāc nā vraḥ [śi]lātatāk nā vraṃ dik ta vraḥ dāna pi oy ta
{B43}   vraḥ paṃ[. . . . mratā]ñ khloñ śrī kavīndrapaṇḍita paṅgaṃ thpvaṅ nivedana man bhūmi srāc ti vraḥ sabhā dau
{B44}   oy snoṅ. . . . phoṅ ○ vraḥ śāsana pre siddhi bhūmi noḥ man oy dāna ta mratāñ khloñ tarāp phdai karoṃ
{B45}   noḥ mān . . . . . . . . [mratāñ khlo]ñ paṅgaṃ thpvaṅ nivedana sot leṅ ’āc=ti duk=ta vraḥ rikta ’āy vraḥ sabhā leṅ ’ā
{B46}   c=ti cār ta śilā[stambha] vraḥ vrāhmaśāla leṅ ’āc=ti duk=ta phnat nā paṃre vraḥ kralā sroṅ leṅ ’āc=ti duk=ta
{B47}   praśasta ta . . . . . . [sru]k vrai karaṅ leṅ vvaṃ āc=ti kulasantāna mratāñ khloñ yok bhūmi neḥ pi lak phtā
{B48}   ta ’nak ○ vra[ḥ] – – – – duk=ta ’avadhi ’ampāl neḥh roḥh iṣṭi mratāñ khloñ ○ bhūmi vraḥ dāna ta diṅ thṅā
{B49}   y . . . . pi ta diṅ thṅāy pūrvva śata vyar bhai pi 19 pantoy thṅāy slik 1 śata . . . . . [pv]ān
{B50}   bhūmi . . . . . . lvoḥ gol uttara teṃ vinauva slik 1 śata vyar 16 pantoy [thṅāy]. . . . . . vyar 5 ○
{B51}   kvan mra[tāñ khloñ śrī kavī]ndrapaṇḍita ta jmaḥ loñ nārāyaṇa dār jmaḥ mratāñ śrī kavī[ndravijaya . . . .] kanmya
{B52}   ṅ paṃre vraḥ kralā sroṅ jā rājapurohita ukk ru mratāñ khloñ vapā ○ mratāñ paṅgaṃ thpvaṅ
{B53}   nivedana kule mratāñ śrī kavīndravijaya mvāy mūl nu kule mratāñ khloñ nā bhāgavata paṃmre ○ daha ku
{B54}   le mratāñ khloñ mūl ta kule mratāñ śrī kavīndravijaya ’āc daha kule mratāñ śrī kavīndravija
{B55}   ya mūl ta kule mratāñ khloñ ’āc ○ riy bhāga nā vraḥ kamrateṅ ’añ nārāyaṇa nu bhūmyāka[ra] khñuṃ
{B56}   phley noḥ ’āyatta ta kula mratāñ śrī kavīndravijaya nā bhāga vraḥ kamrateṅ ’añ śivaliṅga nu
{B57}   khñuṃ bhūmyākaraphley noḥ ’āyatta ta kvan mratāñ khloñ toy bhāga kule steṅ nandikācāryya ’ā
{B58}   cāryya homa pi cāṃ ta saṃ mūla nu mratāñ khloñ phle nā bhāgavata paṃre ○ neḥ kalpanā ta roḥh nehḥ ○
{B59}   nau ru kula mratāñ khloñ kula ’nak neḥ ta vyar loḥ ta mān bhakti paripālana leṅ roḥh neḥh pi vvaṃ ’ā
{B60}   c=ti pan hyat ○ daha mān=ta pan hyat kalpanā neḥ cañ gati vyavahāra kaṃmrateṅ phdai karoṃ nirṇṇaya ○ ta pa
{B61}   raloka vraḥ yama yātanā ta naraka ta daṃnep=ra ’avīci lvaḥ saṅsāra ○ nā bhūmibhāga ○ bhūmi uttara nu
{B62}   bhūmi vraḥ dāna ti mratāñ khloñ jvan=ta vraḥ kaṃmrateṅ ’añ nārāyaṇa bhūmi ti dakṣiṇa nu sre vraḥ dāna pi . . . . .
{B63}   ti mratāñ khloñ jvan ta vraḥ kaṃmrateṅ ’añ śivaliṅga ○ {C1a} vraḥ kamrateṅ ’añ nārāyaṇa {C2a} khñuṃ toy khnet {C3a} gho thke {C4a} gho kanrau {C5a} gho kansān {C6a} gho sa’ap {C7a} gho palek {C8a} gho taṃ’us {C9a} tai kapur {C10a} tai kansu {C11a} tai khñuṃ {C12a} tai dharmma {C13a} tai saṃrac {C14a} tai sṅvan {C15a} tai pada {C1b} rṇnoc {C2b} gho kan’ā {C3b} gho kaṃvit {C4b} gho saṃrac {C5b} gho vira {C6b} gho kandeṅ {C7b} gho kanloñ {C8b} tai kansan {C9b} tai kaṃvrau {C10b} tai panpau {C11b} tai kavi {C12b} tai kan’ū {C13b} tai samṛddhi {C14b} tai tandhi {C15b} tai panlas
{D1}   khñuṃ vraḥ kamrateṅ ’añ śivaliṅga {D2a} bhāga khnet {D3a} gho kaṃvraḥ {D4a} gho kantin {D5a} gho …day {D6a} tai kanrau {D7a} tai kansān {D8a} tai pandān {D9a} tai campa {D10a} tai kanlaḥ {D11a} tai thṅe {D12a} . . . . . . . . . . . {D2b} bhāga rṇnoc {D3b} gho saṃrāc {D4b} gho vīra {D5b} gho pamek {D6b} gho kansān {D7b} tai kaṃprat {D8b} tai nirvāṇa {D9b} tai kanthun {D10b} tai thṅe {D11b} tai kantai {D12b} tai laṅgāy

{1}   □ □ □ □ □ □ □ mān vraḥ śāsa[na] □ □ □ □ □ □ □ □
{2}   □ □ □ □ □ śrī vikramavalla[bha]□ □ □ □ □ □
{3}   □ □ □ □ □ śrī vikramavijaya □ □ □ □ □ □ □ □
{4}   □ □ □ □ □ śrī nṛpendravīra mra□ □ □ □ □
{5}   □ □ □ □ □ śrī jayāyuddha □ □ □ □ □ □ □
{6}   □ □ □ □ □ kroṃ ta mrateñ śrī □ □ □ □
{7}   □ □ □ □ □ toy iṣṭi sre pramān □ □ □ □ □
{8}   □ □ □ [’a]moghapuratoy □ □ □ □ □ □
{9}   □ □ □ □ □ □ dau toy □ drane□ □ □ □ □ □ □
{10}   □ □ □ □ □ □ do ma □ pra□ □ □ □ □ □ □
{11}   □ □ □ □ □ □ñca ta gi □ □ □ □ □ □ □
{12}   □ □ □ □y tap ce□ □ □ □ □ □ □ □ □
{13}   □ □ □ □ □ śrī pā□ □ □ □ □ □ □ □ □
{14}   □ □ □ □ □s ta □ □ □ □ □ □ □ □ □ □ □
{15}   □ □ □ □ □p vidyā □ □ □ □ □ □ □ □ □
{16}   □ □ □ □ □ □ □ □ □ □ □ □ □ □ □ □ □ □