Community: Khmer epigraphy

{1}   933 śaka ekādaśī rṇoc caitra ’ādityavāra . . . .
{2}   vraḥ pāda kamrateṅ ’añ śrī sūryyavarmmadeva pandval
{3}   ta mratāñ khloñ sindura pre cār praśastha
{4}   roḥh kalpanā mratāñ khloñ sindura krapi vya
{5}   r ti jvan ta vraḥ kamrateṅ ’añ śrī tribhuvana
{6}   maheśvara pajov bhūmi chak kantol [vrau] ..
{7}   .. cāṃ camnāṃ kriya raṅko liḥ…. pratidina
{8}   vvaṃ hāc ti mān caṃnol dai ti leṅ oy camnāṃ
{9}   noḥ [gī] nā mratāñ khloñ samāpe bhū
{10}   mi noḥ ta kule ta jmaḥ vāp vraḥ prasāda
{11}   nu chloñ paravrahma nu kule kvan cau noḥ
{12}   tāl pradvann gi na….. y ta bhūmi noḥ ||
{14}   . . . . . . . . sī ryyūḥ tai paroṅ kvan pān neḥ . . . neḥ syaṅ
{15}   . . . . . . . toy khe katha pradhāna sī . . . . . . yatta taṃ
{1}   . . . ’nak vraḥ vvaṃ ’āc ti pre nā jaṃras cval
{2}   . . thve devakāryya gus | neḥ khñuṃ ta ’aṃpal neḥh . . . . . jvan ta vraḥ
{3}   ’añ jva nā ’āgama nai . . . gu se ||

{1}   parigraha ta mrateñ kulapati ○ vraḥ ’anrāy jamro ’nak paṃre mvāy
{2}   srū bhai mvāy tapp mok īśvarapura raṅko bhai vyār ○ vraḥ ’anrāy kan=hyaṅ
{3}   khvauv ’nak paṃre mvāy raṅko thlvaṅ pramvāy ○ vraḥ ’anrāy dhvār bhagavat ra
{4}   ṅko thlvaṅ pramvāy ○ vras ’anrāy vnaṃ tī raṅko thlvaṅ pramvāy ○ vraḥ ’anrāy canpvār
{5}   raṃcyāk ’nak paṃre mvāy raṅko thlvaṅ pramvāy ○ vraḥ ’anrāy ’antvaṅ raṅko thlvaṅ pramvā
{6}   y ○ vraḥ ’anrāy chok tannot raṅko thlvaṅ pramvāy ○ vraḥ ’anrāy sre vleṅ raṅko
{7}   thlvaṅ pramvāy ○ mok īśvarapura ghṛdha ’antvaṅ vyar ○ vraḥ ’anrāy ralmās raṅko thlvaṅ
{8}   pramvāy ○ vraḥ ’anrāy ’aṅgaṇa raṅko thlvaṅ pramvāy ○ vraḥ ’anrāy piṇdagiri ra
{9}   ṅko thlvaṅ pramvāy ○ vraḥ ’anrāy vaṃnaṃ ’nak paṃre mvāy raṅko thlvaṅ pramvāy ○ vraḥ
{10}   ’anrāy vnaṃ tī sot ’nak paṃre mvāy ○ srū bhai mvāy tapp ○ ’nak vraḥ kuṭi vyar ○ phsaṃ
{11}   m ’nak pamre praṃ vyāl ○ phsaṃm raṅko bhai piy thlvaṅ pramvāy ○ srū bhai piy || pari
{12}   graha ta ’ācāryya purohita ’nak paṃre vyar ○ sruk parigraha ○ vraḥ ’anrāy vnaṃ vrā
{13}   hmaṇa ’nak paṃre vyar ○ srū bhai mvāy thlvaṅ pvān ○ ta mok īśvarapura srū śata mvāy ○ vraḥ
{14}   ’anrāy caṃmriḥ ’nak paṃre mvāy srū thlvaṅ tapp vyar ○ mok īśvarapura lṅo thlvaṅ mvā
{15}   y je vyar || parigraha ta ’ācāryya ’adhyāpaka ’nak paṃre vyar ○ vraḥ ’anrā
{16}   y vrāc ’nak paṃre mvāy srū bhai mvāy thlvaṅ pvān ○ ta mok īśvarapura srū śata
{17}   mvāy duk ’anrāy ○ ghṛdha ’antvaṅ pramvāy nāṃ mok īśvarapura ○ vraḥ ’anrāy ga
{18}   japāla ’nak paṃre mvāy srū bhai mvāy pvān ○ ta mok īśvarapura santek bhai mvāy ta
{19}   ppghṛdha’antvaṅ pramvāy || parigraha ta paṃnvās yājaka toy khnet ’nak paṃre vyar ○
{20}   vraḥ ’anrāy vallapura ’nak paṃre mvāy srū bhai mvāy thlvaṅ pvān || parigraha ta paṃ
{21}   nvās yājaka rṇoc ’nak paṃre vyar ○ vraḥ ’āy thpeṅ daṅ=deṅ ’nak paṃre mvāy srū
{22}   bhai mvāy thlvaṅ pvān || parigraha ta rājadvāra khnet ’nak paṃre mvāy ○ vraḥ ’āy saṃlu
{23}   t ’nak paṃre mvāy srū bhai mvāy thlvaṅ pvān || parigraha ta rājadvāra rṇoc ’nak paṃre mvāy ○
{24}   vraḥ ’āy tanmar ’nak paṃre mvāy srū bhai mvāy thlvaṅ pvān || parigraha ta khloñ
{25}   kāryya khnet vraḥ ’āy śivaparvvata ’nak paṃre mvāy srū bhai mvāy thlvaṅ pvān ○ mo
{26}   k ta īśvarapura srū śata mvāy ○ vraḥ ’anrāy loṅ cū ’nak paṃre mvāy srū thlvaṅ tapp vya
{27}   r || parigraha ta khloñ kāryya rṇoc ○ vraḥ ’anrāy vrai mvas ’nak paṃre mvāy [srū]
{28}   bhai mvāy thlvaṅ pvān ○ ta mok īśvarapura ghṛdha’antvaṅ pramvāy santek bhai vyar ○
{29}   vraḥ ’anrāy nagarabhada ’nak paṃre mvāy srū thlvaṅ tapp vyar ○ ta mok īśvarapura [ghṛ]
{30}   dha ’antvaṅ pramvāy || parigraha paṃnvās ta oy thṅāy ’nak paṃre mvāy vraḥ [’anrāy]
{31}   śrī gaṇita ’nak paṃre mvāy srū bhai mvāy thlvaṅ pvān ○ ta mok īśvarapura [gṛdha ’antva]
{32}   ṅ pramvāy ta yājaka dakṣiṇa vyar ○ uttara vyar ○ smat vyar ○ —-
{33}   vraḥ caru vyar ○ sme ○ ’nak paṃre mvāy vraḥ …………
{34}   [s]rū sv.. tap vyar phsaṃ ’nak paṃre tap ○ srū śata …..

{1}   933 śaka ekādaśī rṇoc caitra ’ādityavāra [vraḥ pāda kamra]
{2}   teṅ ’añ śrī sūryyavarmmadeva pandval ta khloñ vala si
{3}   ndura khloñ mukha patrakāra pre cār ta praśasta roh kalpa
{4}   nā jvan krapī vyar jauv bhūmi chok kantol vrau ta cāṃ caṃ
{5}   nāṃ raṅko liḥ vyar pratidiṇata vraḥ kamrateṅ ’añ
{6}   śrī tribhuvanamaheśvara thve…
{7}   īśvarapura vvaṃ hāc ti mān cor .. .. .. ..
{8}   …… oy caṃnāṃ ta [roḥ] noḥ gī nā khloñ vala sindura
{9}   samāpe bhūmi neḥ ta kule ta jmaḥ vāp vraḥ prasāda chlo
{10}   ñ paravrahma nu kvan cau noḥ tāl pradvān ||

{1}   vraḥ pāda kamrateṅ ’añ śrī śrīndravarmmadeva vraḥ sruk spota śreṣṭhavarmmā
{2}   nvaya nu vraḥ sruk śrī śrīndrarājapura kṛtajñapura ta rājya vraḥ pāda kamrateṅ ’añ
{3}   śrī jayavarmmadeva parameśvarapada vraḥ sruk vraḥ thma pramāna ldau ’abhiṣeka jā
{4}   yuvarāja prakop vraḥ bhagavatī kamrateṅ ’añ śrī śrīndrabhūpeśvaracūdā ’agra
{5}   mahiśī ’agrarājaputrī saṃ tak daṃṅan phdai karoṃ caṃnyar ’abhiṣeka prakop rājavi
{6}   bhava phye vrāhmaṇācāryya mantrī rāṣṭra phoṅ vraḥ kamrateṅ ’añ śrī madhurendra
{7}   rājapaṇḍita sruk śrī madhurendragrāma ’anvaya vraḥ guru kamrateṅ ’añ yajñavarā
{8}   ha cāṃ saṃnvat bhūtāsa eka ta rājya vraḥ pāda kamrateṅ ’añ parameśvarapada kāryyastha
{9}   nu paṅgan svat man ta rājya vraḥ pāda kamrateṅ ’añ mahāparamasaugatapada khloñ
{10}   vala tripaṭāka [ta] chmvañ nā vraḥ glāṅ ruṅ paṅgan tak laṅgau nā vraḥ glāṅ duñ us
{11}   phtal nā vraḥ dakṣ[i]ṇa [d]au de[va]vyāpāra vraḥ śakti kamrateṅ ’añ śrī tribhuvana
{12}   maheśvara ’āy īśvarapura nu khnar grāṅ sruk pādamūla ’nak varṇṇa nā vraḥ kamrateṅ
{13}   ’añ kat us phtal vvaṃ tak laṅgau ley phtyaṅ ni pre vicāranā saṃnvar satyā
{14}   satya roḥ ta taṃnip vraḥ kamrateṅ ’añ śrī rājendrapaṇḍita sabhāpati vraḥ
{15}   kamrateṅ ’añ guṇadoṣa caturbhūtāsa kamrateṅ ’añ paṇḍita vṛddhā
{16}   cāryya phoṅ sarvvābhimata paṅgap nu vraḥ dharmmaśāstra pre lek us noḥ cek
{17}   phgan ta ’nak nā vraḥ vnvak tak cis gi ta phtal sruk pādamūla ’nak varṇṇa khnar graṅ nā vraḥ
{18}   kamrateṅ ’añ pre paṃre ta vraḥ kamrateṅ ’añ ru devatākṣetra sap ’anle
{19}   nu sāra śloka praśasta vraḥ pāñjīy kṣetropacāra 1228 śaka daśamī
{20}   roc śrāvaṇa vṛhaspativāra mṛgaśiranakṣatra nu vraḥ pāda kamrateṅ ’añ
{21}   śrī śrīndravarmmadevapand[va]l ta vraḥ kamrateṅ ’añ śrī dharaṇīndrapaṇḍita
{22}   cāṃ saṃnvat mukhya vraḥ kamrateṅ ’añ śrī yaśodharapaṇḍita samūha sarvvā
{23}   dhikārī pre lek us noḥ cek ta ’anak nā vraḥ vnvak tak cis caturbhūtāsa gi ta kat
{24}   phtal viṅ thve roḥ taṃrā paṅgap ○ gi rah leha vraḥ pāda kamrateṅ ’añ śrī
{25}   śrīndravarmmadevavraḥ bhagavatī kamrateṅ ’añ śrī śrīndrabhūpeśvaracūdā
{26}   ’agramahiśī prajāpālana parapuṇyānupālana nu vraḥ dharmmaśāstra

{A1}   □ □ □ śaka pañcamī ket [’āśvayujya] vuddhavāra nu mratāñ rājendrasiṅ
{A2}   ha khloñ jnval ’a□ □ □ □ □ paṅgaṃ thpvaṅ nivedana [riy] bhūmi vrai caṃ
{A3}   kā paṃnvass nuv sre [tarāñ] vāp vrahma cāñ pranidhāna oy vāp
{A4}   jū daśādhikṛta □ □ □ □ □ □ ’ācāryya kīrttiyogi □ □ □ □ □ □
{A5}   y □ □ nu kule □ □ □ □ □ □ □ □ □ □ □ □ □ □ □ □ □ □
{A6}   ha pre nāṃ vāp vrahma □ □ □ □ □ □ □ □ □ □ □ □ □ □ □ □ □ □
{A7}   y vraḥ sabhā □ □ □ □ □ □ □ □ □ □ □ □ □ □ □ □ □ □ □ □
{A8}   sabhā nu praśasta □ □ □ □ □ □ □ □ □ □ □ □ □ □ □ □ □ [ta]
{A9}   ṅtyaṅ ’aṃ[ruṅ] □ □ □ □ □ □ □ □ □ □ □ □ □ □ □ □ □ □ □
{A10}   bhūmi cāmpa lkai □ □ □ □ □ □ □ □ □ □ □ □ □ □ □ □ □ dhūli
{A11}   jeṅ vraḥ kamrateṅ ’añ □ □ □ □ □ □ □ □ □ □ □ vraḥ □ □ □ □ □ □
{A12}   ñ īśānaśiva khloñ mukha khol □ □ □ □ □ □ nivedana pi oy vāp
{A13}   vrahma ○ vraḥ śāsana ta mratāñ khloñ □ □ □ □ndrādhipativarmma pre dār raṅvā
{A14}   ṅ pratyaya pre dau saṅ gol oy ta vāp vrahma ○ riy sre [dai] sre nirmūla
{A15}   vvaṃ tel mān kaṃmrateṅ nu thve ley ○ ’v□ □ □ □ □ śūnya hoṅ ○ vāp vra
{A16}   hma raṃlik □ □ □ □ □ □ □ □ □ □ □ □ □ □ □ nuv □ □ kaṃsteṅ pandval
{A17}   vraḥ śāsana □ □ □ □ □ □ □ □ □ □ pre dau hau grāmavṛ
{A18}   ddha pandval □ □ □ □ □ □ □ □ □ □ □ □ neḥ ○ daha ’yat
{A19}   kamrateṅ thve □ □ □ □ □ □ □ □ □ □ □ vāp jinendrā
{A20}   nanda dau śodhe □ □ □ □ □ □ □ □ □ □ leṅ taṅtyaṅ
{B1}   pi grāmavṛddha kathā man sre nirmūla vyat ○ vāp jinendrānanda pandval vraḥ śāsana
{B2}   ta vāp vrahma roḥh man ti kaṃsteṅ pandval oy sre neḥ ta vāp vrahma siddhi vvaṃ
{B3}   tel mān ’apavāda ○ neḥ bhūmiśākha ta roḥh neḥh gi pi vāp vrahma oy ta vāp
{B4}   jū nu ’ācāryya kīrttiyogi nu kule vāp jū phoṅṅ ○ man tāñ ṅā ta kanmvay vāp jū
{B5}   jā ’nak khloñ ta vāp vrahma pi vāp jū nu ’ācāryya kīrttiyogi oy vaudī mvā
{B6}   y ṅann jyaṅ prām khāl prāk mvāy ṅann liṅ prām ta vāp vrahma ○ pi khmi cāt
{B7}   sruk thve sre ta gi bhūmi neḥ ○ vāp vrahma oy roḥh man mratāñ śrī rājendra
{B8}   siṅha paṅgaṃ thpvaṅ nivedana ○ gi caṅvātt bhūmi vrai caṃkā paṃnvas ○ pūrvva prasap nu
{B9}   sre rpes dakṣiṇa prasap nu vraḥ rāṅṅ paścima prasap ta chdiṅ jairāga uttara prasap nu
{B10}   bhūmi cāmpa lkai ta dau ta mratāñ śrī bhadraparākrama ○ bhūmi sre tarāñ ○ pūrvva pra
{B11}   sap nu sre ta ti vāp vrahma □āñ vraḥ laṃvāṅ oy ta vāp gaṇādhirāja raṅvāṅ dakṣi
{B12}   ṇa prasap nu sre mratāñ śrī bhadraparākrama sot paścima prasap nu sre cāmpa
{B13}   ta dau ta mratāñ śrī bhadraparākrama sot uttara prasap nu sre khol ○ vraḥ sa
{B14}   bhā phdāy toy kathā vāp vrahma pi yugapat roḥh neḥh ○ siddhi gi bhūmi vrai
{B15}   caṃkā paṃnvas nu sre tarāñ [ta] vāp jū nu ’ācāryya kīrttiyogi nu kule vāp
{B16}   jū phoṅ ○ praluṅ caṅvātt bhūmi ta ti vāp vrahma oy ○ [sākṣi ta] samakṣa
{B17}   kaṃsteṅ ’añ śrī bhūpativarmma ○ mratāñ □ □ □ □ □ □ □ □ [vraḥ kamrateṅ ’a]
{B18}   ñ guṇadoṣadarśi vraḥ sabhā ○ sa□ □ □ □ □ □ □ □ □ □ □ □ □ □ □
{B19}   ñ ī ○ loñ paramārthānanda ○ □ □ □ □ □ □ □ □ □ □ □
{B20}   tīndrārimaṭha pandval vraḥ śāsana ta vāp □ □ □ □ □ □ □ □ □ □ □ □
{B21}   k caṃpok pi pre dau saṅ gol praśas[ta ta gi bhūmi vrai caṃkā] paṃnvas
{B22}   nu sre tarāñ pi oy ta vāp jū nu ’ācāryya kīrttiyogi nu ku[le vāp]
{B23}   jū phoṅṅ ○

{3}   ’aṃnoy poñ yajamāṇa ta vraḥ jmaḥ ge kñuṃ vā kdas [|]
{4}   vā dharmmāśraya | vā kandharvvagita | ta kantaiy [|] ku sugarbhā | ku sulocanā [|]
{5}   ku trel | ku jhāk | ku vlac | ku kjuṅ | kon ku 2 sre tloṅ 10 mās 2
{6}   cpar ’aṃruṅ gi mās 3 ka’ol 2 toṅ 40 10 [|] slā 200 tmur dneṃ 7
{7}   vraḥ kaṃmratāṅ ’añ nārāyaṇa ta ’acas saṃ miśrabhoga doṅ
{8}   vraḥ kaṃmratāṅ ’añ śrī kapilavāsudeva doṅ kñuṃmm doṅ sre
{9}   ’aṃnoy poñ nideśotsāha doṅ klo[ñ] gottra ai ta vraḥ
{10}   kaṃmratāṅ ’añ nārāyana ’acas jmaḥ ge kñuṃ ku kjal [|]
{11}   ku kdāy [|] ku kañcan | vā kaṃbhaṅ | vā spom | poñ
{12}   sāpekṣa ta ge [kñuṃ] paṃre kanloṅ panlas poñ ni
{13}   deśotsāha

{1}   ’aṃnoy mratāñ maheśvarasvāmi doṅ ge kloñ yajamāna phoṅṅ vnāk tnaḥ cāturvvidy
{2}   ’āy ta vraḥ kaṃmratāṅ [’añ] śrī bhīmeśvara kantai kloñ ta tel oy kloñ ’amogha kon |
{3}   kñuṃ ta siy vā ’aṃraḥ galū | vā cī kandin | vā ’ās rval | vā kumār | vā samadhara | vā bhavi
{4}   tavya | vā bhānotha | vā klāṅ | vā klāṅ ’aras | vā ekādaśī | kñuṃ ta kantaiy ku salona | kon ku 3
{5}   ku prāṇa | kon ku | ku kanteṅ | kon | ku subhadra | kon ku 2 ku surabhī [|] kon ku | ku vasantī | ku ’aṃduḥ [|]
{6}   ku nayanacandra | ku tvañ | kon ku 3 [|] ku vilāsantī | kon ku 2 [|] ku uy [|]kon ku 7 cau 2 [|] ku kantāp | kon 8 [|]
{7}   ku □ ṅā | ku vartti | ku candrasena | ku kmau | kon ku | ku kantek | ku dradās | ku kanser | ku sa’ot | ku tgan |
{8}   ku vrau | sarvvapiṇḍa gan kñuṃ savālavṛddha phoṅ 60 2 krapi dmeṃ 7 tmur jmol 20 3 tmur ye □ □
{9}   vave 20 sre sare 5 [Addendum] ku saṃtoḥ [|]kon ku | ku □ □ ’aras | vā crake |
{10}   vā goda | ku malinī | ku □ □ āṅ [|] ku vin [|] ku □ gadra [|]kon ku 2 ku ṅraṅo[r]|
{11}   ku san ’asaru [|] ku prāp [|] ku rudra | ku rnnoc | ku □ salī [|] kon ku | ku lamaṅgi [|] kon ku |
{12}   ku kandaṃ [|] kon ku | ku śatru ’nak [|] kon ku 3 ku du □ śrī [|] ku cpay ’avi [|] kon ku 3 ku k □ au |
{13}   kon ku 2 [|] ku latui [|] kon ku | ku jāyasi | ku kakkuli [|] kon ku | ku saniddha [|] kon ku 5 [|] ku ’antrok [|] ku nakkhi [|]
{14}   ku saṃpok [|] ku □ □ [|] kon ku 3 [|] ku pik [|] ku vāy [|] ku kho □ i [|] ku taṅku [|] kon ku 4 [|] ku voṃ jāpissup [|] ku ka
{15}   ñcañ [|] kon ku 3 [|] [ku]cancān | kon ku 2 [|] ku tvañ | [ku]daśā □ [|] ku lolī [|] kon ku 2 vā
{16}   kumāradat | pa’on vā | vā rgāl vā pa □ iṅ vā vṛddhi vā kantaṅ vā kdās vā kaṃpit
{17}   vā thgut vā kre vā dhanakara vā ka □ vā kaṃ □ □ □ □ □ □ □ vā ci ’a □ ñ
{18}   □ vā pañcamī ku vṅā [|] kon ku 3 [|] ku devasena [|]kon ku 3 [|] ku kanha [|] kon ku 5 [|]
{19}   ku klyānn [|] ku kanteṅ [|] kon ku 2 [|] ku svāṅ [|] kon ku 2 [|] ku capi ho □ ni □ □ vā vyuha vā kno □
{20}   ku kyel | gaṇa mratāñ yajamāna daṅ dau daśa gi ve□ mratāñ doṅ kloñ loñ
{21}   oy phoṅ ge kñuṃ ta vraḥ doṅ sre doṅ ka’oll doṅ kralā doṅ daṃriṅ doṅ cpar doṅ
{22}   tmur doṅ krapi ta □ h gana ’aṃras phoṅ is tel oy ta vraḥ kamratāṅ ’añ śrī
{23}   bhīmeśvara
{24}   bhūmi vraḥ neḥ pūrvveśana travāṅ nāga dakṣiṇa grāmapāla paścinairṛti śrī □ vā
{25}   yavyottara revati ’āc 10 2 nai gaṅgāpura vrāhma□

{7}   satra nivandha ple tdaiy ’āy ta vraḥ kaṃmratāṅ ’añ śrī khaṇḍaliṅga man poñ bhava
{8}   candra oy sa ’ākra raṅko liḥ 1 vanli liḥ 3 si ple liḥ 2 satra paṃnos liḥ 2 satra
{9}   vñau liḥ 1 satra pitṛ liḥ 1 canlek ple vagṛṣā yogalla yau 4 ’aṃval yau 1 canlek pitṛ
{10}   ’aṃvlaḥ 1 satra kloñ mṛta raṅko liḥ 1 canlek ’aṃval vlaḥ satra kloñ trasauk
{11}   raṅko liḥ 1 canlek vlaḥ satra pauñ jānavin ta vraḥ kamratāṅ ’añ śrī khaṇḍa
{12}   liṅga raṅkau liḥ 1 canlek ’aṃval vlaḥ 1 satra poñ jānaprakāśa raṅko liḥ 1 canlek
{13}   ’aṃval vlaḥ 1 satra kloñ tāñ raṅkau liḥ 1 canlek ’aṃval vlaḥ 1 satra poñ vidyādharade
{14}   va raṅkau liḥ 1 canlek ’aṃval vlaḥ 1 jīvana saṃpol raṅkau thloṅ 5 canlek yo 1 kñuṃ 1 ’aṃruṅ
{15}   sre vraḥ kaṃmratāṅ ’añ śrī khaṇḍaliṅga ’aṃvi travaṅ [dha]rmma[k]īrtti loḥ travaṅ poñ bhā śānti loḥ
{16}   travaṅ poñ dharmmadeva loḥ tel ta travaṅ hvacc loḥ travaṅ poñ kdatt tarap gi jaṃnan
{17}   kurāk danle krohv lo[ḥ]travaṅ ’alāṅṅ loḥ travaṅ poñ devādhivāss loḥ travaṅ
{18}   mratāñ dharmme loḥ travaṅ poñ vinita loḥ travaṅ poñ siddhikīrtti loḥ travaṅ poñ
{19}   candrānan loḥ travaṅ ku kañcann loḥ travaṅ kloñ khe loḥ ta gi sre pradāna poñ kaṃvinn
{20}   ta ’āy vrai tlann gi ’aṃruṅ gi sre vraḥ kaṃmratāṅ ’añ ś[r]īkhaṇḍaliṅga ge ta
{21}   sak [ta] gui ge ta kmi ta gui ge dau ’avīcinarakk dauṅ ge pitṛ ge dauṅ ge kull ge ta daṅ
{22}   ket sinn daṃkop vraḥ kaṃmratāṅ ’añ tel kap pātra ge kule poñ
{23}   bhavacandra sanme ni dauṅ poññ ge oy kñau[ṃ]bhaiy 1 jamaḥ gui kñuṃ va kan | ku pu | ku
{24}   kan’as [|] ku saṃ’ap | vā kan=soṃ | vā tnak | vā tkes | ku tvāy | ku vreṅ | vā sraṅe | vā
{25}   dha[r]mmadat| vā saṃvara | ku syer | ku chāñ | ku krohv | vā yacjadat| ku cak=cek [|]vā dha
{26}   rmmacan | ’aṃraḥ vā teṅ | vā śveta kñuṃ ta man kloñ ’aṃmṛta oy ta vraḥ ku au | vā dharmmarakṣa | vā kan
{27}   saṃ | vā tyon | ku vrohv | vā caṃpeṅ | kñuṃ man poñ candrānna oy ta pitṛ ku kaṃput | kñuṃ man
{28}   kloñ trasok oy ta vraḥ vā sunīti | ku kandai kñuṃ ta man poñ jānaprakāśa oy ta vraḥ ku karuṃ vā
{29}   koc vā saṃvar kñuṃ ta ma[n]poñ vinduśakti pradāna ta vraḥ kamratāṅ ’añ śrī khaṇḍaliṅga ku ’nāda |
{30}   ku laṃnāṅ | vā subhava [|] vā karon | ku jani’el | kñuṃ ta man mratāñ jānavin oy ta vraḥ kaṃmratāṅ ’añ
{31}   śrī khaṇḍaliṅga vā tmar | ku karoṃ kñuṃ ta man kloñ tāñ oy ta vraḥ ku tṅoh | kñuṃ ’aṃ
{32}   noy poñ bhavacandra ta vraḥ kaṃmratāṅ ’añ śrī khandaliṅga ku tpit | ku kanso [|] ku narek [|]
{33}   vā dhanarakṣa | ku masi | ge tel poñ bhavacandra pre tve sre saṃpol pre caṃ ka’ol saṃpol pre caṃ poṣa
{34}   saṃpol ge diḥ paṃre ta vraḥ sin gui kañjrap ta man varta nā vraḥ kaṃmratāṅ ’añ śrī kai
{35}   lāsovara tel poñ vidyākumāra psaṃ paribhoga ta vraḥ kaṃmratāṅ ’añ śrī khandali
{36}   ṅga ’aṃruṅ sre ta dai gui kañjrap tloṅ 1 kñuṃ 1 jaṃnon ’ākara ta vraḥ kaṃmratāṅ ’añ śrī khandaliṅga raṅko tloṅ 1
{37}   caṅlek’aṃval vlaḥ 1 pratisaṃvatsara ~ ku saṃ’ap □ □ □ k gui kañjrap
{38}   kñuṃ man poñ jānaprakāśa oy ’antyanti sot ta vraḥ [kaṃmratāṅ ’añ śr]īkhaṇḍaliṅga
{39}   ku chāñ | ku drahāy | kon ku ku krahvāñ | k □ □ □ □ □ psaṃ nu gui
{40}   ’aṃ□ □ □ □ □ □ ge sanme ni camm raṅko ta □ □ □ □ □ [’aṃ]valvlaḥ 1
{41}   ye □ □ □ □ satra ta roḥ □ □ □ □ □ ge tel
{42}   □ □

{1}   ’aṃnoy poñ vajrabheda ’āy ta vraḥ kaṃmratāṅ ’a[ñ]
{2}   maṇiśiva lkāṃ 1 klas laṅgau 1 carā danhuṃ 1 ka’ol 1 kñuṃ ghoda vā □
{3}   davi | vā ’agat | vā tgar | vā kmau | vā ci vau | vā treṅ | vā poy | vā □
{4}   y | vā coṅ | vā dvādaśī | vā vrau stac | vā ceṅ | vā sā | vā hitaṅka[ra |]
{5}   vā karit | ge 10 7 kñuṃ ta kantaiy ’me sra’ip | ku sra’ip | [ku]
{6}   tyas | ku tmeṅ | ku vnaṃ | ku □ṅ | ku □ □ | ku tkaḥ | kon ku | me va□ □
{7}   | ku vaṅ | ku yul | kon ku | ku cehv kan | kon ku [| ku] □ □
{8}   bhadra | kon ku | [ku] □ □ [|] ku stau | ku seṅ daiva | ku kañce [| ku]
{9}   vṅā | kon ku | savālavṛddha ge 20 10 1 sre vnāk sruk [’āy]
{10}   trasek sre travaṅ ’āvāsa sre bhramāraśila sre □ □
{11}   sre kaṃluṅ tnal sre pās kandoñ sre vnur ’aṃvol [tmu]
{10}   [r] 10 krapi dneṃ 1 toṅ teṃ 10 slā teṃ slik 1 □ □ □ □ □

{1}   ’aṃnoy poñ vajrabheda ’āy ta vraḥ kaṃmratāṅ ’a[ñ]
{2}   maṇiśiva lkāṃ 1 klas laṅgau 1 carā danhuṃ 1 ka’ol 1 kñuṃ ghoda vā □
{3}   davi | vā ’agat | vā tgar | vā kmau | vā ci vau | vā treṅ | vā poy | vā □
{4}   y | vā coṅ | vā dvādaśī | vā vrau stac | vā ceṅ | vā sā | vā hitaṅka[ra |]
{5}   vā karit | ge 10 7 kñuṃ ta kantaiy ’me sra’ip | ku sra’ip | [ku]
{6}   tyas | ku tmeṅ | ku vnaṃ | ku □ṅ | ku □ □ | ku tkaḥ | kon ku | me va□ □
{7}   | ku vaṅ | ku yul | kon ku | ku cehv kan | kon ku [| ku] □ □
{8}   bhadra | kon ku | [ku] □ □ [|] ku stau | ku seṅ daiva | ku kañce [| ku]
{9}   vṅā | kon ku | savālavṛddha ge 20 10 1 sre vnāk sruk [’āy]
{10}   trasek sre travaṅ ’āvāsa sre bhramāraśila sre □ □
{11}   sre kaṃluṅ tnal sre pās kandoñ sre vnur ’aṃvol [tmu]
{10}   [r] 10 krapi dneṃ 1 toṅ teṃ 10 slā teṃ slik 1 □ □ □ □ □