Community: Khmer epigraphy

{1}   hai vraḥ mahāvodhi | hai ta mān teṃ ta gi vraḥ vrahma |
{2}   hai ta mān khlvan ta gi vraḥ īśvara | hai ta mān mek ta
{3}   gi vraḥ viṣṇu | hai ta nitya | hai ta jā kuruṅ ta vṛkṣa pho
{4}   ṅ | hai ta bhāgya veg | hai ta jā ’āśraya ta jagat pho
{5}   ṅ | hai ta oy phala cyar thmā | kaṃ pi randaḥ pañ kamrateṅ
{6}   ’añ | kaṃ pi trū tiṅ | kaṃ pi vraḥ vāyu kac | kaṃ pi vraḥ
{7}   vleṅ tut | kaṃ pi kaṃrateṅ phdai karoṃ paṃpat | kaṃ pi
{8}   tamrya krodha pi vrac | nau kamrek vnek yeṅ ta
{9}   ’asaru nau kamrek caṃceṃ ta ’asaru nau svapna ta ’a
{10}   saru nau cintā ta ’asaru nau maḥ ta ’asaru pho
{11}   ṅ ta mān ta svargga ta manuṣya loh cura paṃpat noḥ ||

{1}   vraḥ ’anaṅgasenā

{A1}   kamrateṅ jagat śrī vīrendradeva ○ rūpa vraḥ kamra
{A2}   teṅ ’añ śrī vīrendravarmma ○
{A3}   dakṣiṇa ○ kamrateṅ jagat śrī dharāpatīndradeva [○]
{A4}   rūpa vraḥ kamrateṅ ’añ śrī dharāpatīndravarmma [○]
{A5}   uttara ○ kamrateṅ jagat śrī rājapatīndradeva [○ rūpa]
{A6}   vraḥ kamrateṅ ’añ śrī rājapatīndravarmma
{A7}   ○ uttara phoṅ ○ kamrateṅ jagat śrī mahīpatīndradeva [○] rūpavraḥ kamrateṅ ’añ śrī mahīpatīndra[varmma] ○
{B1}   kamrateṅ jagat vimaya . . .
{C1}   kamrateṅ ’añ śrī jaya
{C2}   cāmpe[śvara]
{C2}   kamrateṅ ’añ śrī jayanta ○
{D1}   śakti kamrateṅ ’añ śrī . . . kanloṅ
{D2}   . . . kamrateṅ ’añ
{E1}   . . . kamrateṅ ’añ śrī jayavarmma . . .
{E2}   l . . . vraḥ kamrateṅ ’añ . . .
{E3}   . . . tt . . .
{E4}   . . . ’ā
{E5}   dhi . . . thvāy paṅgaṃ . . . ra
{E6}   ri . . .
{F1}   vraḥ bhaga[vatī pā]rvvatī ○
{G1}   kamrateṅ jagat śrī vrahmanendradeva ○
{H1}   [kamra]teṅ ’añ śrī kamvujeśvara ○
{I1}   kamrateṅ jagat śrī rājendradevī ○ vraḥ rūpa kamrateṅ ’añ sthiralakṣmī ○
{J1}   [kamrate]ṅ jagat śrī vīreśvara ○
{K1}   vraḥ rūpa kamrateṅ ’añ snaṅ ○
{K2}   kamrateṅ jagat śrī jayadeva ○ [ruined].
{M1}   [kamra]teṅ jagat śrī rājadeva [○] vraḥ rūpa kamrateṅ ’añ
{M2}   . . . svi [ruined].
{O1}   kamrateṅ jagat śrī māhendreśvarī [○] vraḥ rūpa kamra
{O2}   teṅ ’añ śrī māhendralakṣmī ○
{P1}   kamrateṅ jagat śrī devātideva ○
{Q1}   vraḥ bhagavatī dharaṇī ○

{1}   ’ācāryya malyāṅ

{1}   kamrateṅ jagat śrī dharmmeśvara ○
{2}   kamrateṅ jagat śrī dharmmeśvarī
{3}   kamrateṅ jagat śrī dharmmadeva ○
{4}   vraḥ kamrateṅ ’añ śrī dharmmasenāpatīndrapaṇḍita gi ta sthāpa ○

{1}   kamrateṅ jagat śrī rājaśilpīndreśvara
{2}   kamrateṅ jagat śrī candreśvara
{3}   kamrateṅ jagat śrī śāntīśvarī
{4}   ti vraḥ ’aṃteṅ rājaśilpi sthāpanā ○

{5}   1039 śaka ta rāj[y]a vraḥ pāda kamrateṅ ’añ śrī sūryyavarmmadeva □ □ nakṣatra pvān roc vaisākha ravivāra □ □ dik 1 □ 2 □ □ □ gi nu ’añ ta
{6}   jmoḥ vraḥ tapasvi vidyāvāsa sthāpanā vraḥ śivaliṅgatraya nā vnaṃ thṅe □ □ □ □ □ □ □ □tadartha ○ jvan □i□le ○ gi karmmāntara ○ śivāma □ □ ○ bhūmibhāga teṅ tvan
{7}   □ □ □ □ te □ nasurendra khloñ vala ’so □ □ t sruk □ n □ □ □ □ □ □ khloñ bhūtāśa □ □ □ □ vraḥ śivaliṅga vnaṃ thṅe ○ yajña vraḥ śivaliṅga dvi □ raṅko liḥ 2 □
{8}   □ □ thvāy ta vraḥ [pāda kamrateṅ ’añ śrī sūryyavarmmadeva] □ □ □ □ □ tapasvi □ □ □ □ neḥ ’nak yācanā ’āy ta śrī s □ □ □ praṃ vyal □ ne □ □ □ □ □ □ □ (9-10: traces peu distinctes).

{A30}   □ □ □ kudya ta liṅga madhyasthaḥ tai kaṃvau ○ tai sliṣṭa nu 3 (I) nā khñuṃ vraḥ neḥ phoṅ ta nu mān ta vraḥ [kamrateṅ ta] tapasvi bhagavat pāda vraḥ kamrateṅ ’añ ta guru jvan bhūmi 3 vā □ □ □ □ □ □ (II)ntara ○ mūla ○ caṃnyar noḥ vraḥ □ □ □ □ □ □ □ □ □ □ □ □ □ □ □ vraḥ kamrateṅ ’añ ta guru jvan □ □ □ □ □ □ (III) tai valli ○ tai rudrāni ○ caṃnyar noḥ [sot] □ □ □ □ □ □ □ □ □ □ □ □ □ □ □ □ □ □ □ □ □ □ (1-14: ruined).
{B15}   □ □ □ □ □ □ sre caṃkā vraḥ noḥ ○ nā □ □ □ □ □ □ □ □ □ □
{B16}   □ □ □ □ □ □ □ □ □ □ ○ chmāṃ sa □ □ vnaṃ ○ si □ □ □ □ □ □ □ □
{B17}   □ □ □ □ □ □ tai kaṃpit ○ phsaṃ □ ○ jaṃnvan vraḥ guru □ □ □ □ □ □
{B18}   □ □ □ □ □ □ □ □ n ○ tai □ □ □ □ □ □ □ □ □ □ □ □ □ □ □
{B19}   □ □ □ ○ tai kaṃpit ○ tai kansyāṃ ○ phsaṃ □ ○ phsaṃ si nu tai □ □ □ □ □
{B20}   □ □ □ □ khloñ sruk danden □ □ ○ vraḥ sre thlvaṅ □ □ □ □ □ □
{B21}   khloñ vala vnaṃ thṅe ○ teṅ tvan nal □ □ □ □ □ □ □ □ □ □ □ □
{B22}   □ □ ○ vraḥ rūpa noḥ ’aṅguliyaka thpvaṅ ’amrakaṭa □ □ □ □ □ □
{B23}   □ □ □ □ □ □ □ varmma lakk □ □ □ □ □ ○ nā ’antāṃ □ □ □ □ □ □
{B24}   □ □ □ □ neḥ phoṅ gi nu chmaṃ upāya vraḥ □ □ □ □ □ □ [raṅko]
{B25}   liḥ 4 pratidina ta vraḥ madhyastha nu □ □ □ □ vraḥ □ □ □
{B26}   □ □ □ sru liḥ 1 ’var yajñaśeṣa ta smiṅ liḥ 1 ta □ □ □ □ □ □ □ □
{B27}   □ □ □ ○ ta khñuṃ vraḥ liḥ 3 ’var ○ nā smiṅ bhāga 3 smiṅ jā ’nak □ □ □ □ □
{B28}   □ □ □ ta nivandha ta kalpanā ○ sre vraḥ thlvaṅ 1 tvaṅ 1 teṃ □ □ □
{B29}   □ □ □ teṃ uttama slā 8 teṃ ○ smiṅ ta vyar sre nivandha vraḥ thlvaṅ 2 □ □ □
{B30}   □ teṃ □ v 1 teṃ slā 4 teṃ neḥ sme ’nak ta nu pravāñ va paṃpat □ □
{B31}   □ □ vraḥ noḥ ○ ri ’nak ta nu pravāñ va vināśa bhūmi vraḥ noḥ ○ ri ’nak ta nu
{B32}   pravāñ va ’antāṃ noḥ phoṅ pi vvaṃ thve hita vraḥ noḥ nu gi ○ ri ’nak ta nu (1-16: illegible).
{C17}   ’āgama ○ neḥ śāpānugraha ’añ
{C18}   ta sme vrahmaśāsana sphuta ri ta tṛ
{C19}   ṣṇā ta man ta bhakti kaṃ pi mān ta lmes
{C20}   noḥ nirvvaḥh ○ man ’añ jā vrahma
{C21}   rṣiy nau ru kaṃmrateṅ phdai karoṃ
{C22}   ta svey rājya ta nagara śrī ya
{C23}   śodharapura gi nā ’añ phye vraḥ
{C24}   noḥ leṅ ti sralāñ tyaṅ vartta
{C25}   māna pālana devatā neḥ leṅ
{C26}   vraḥ pāda kaṃmrateṅ ’añ svey
{C27}   vraḥ rājyadharmma leṅ niskāntaka
{C28}   leṅ ’avaddhya ta parapakṣa
{C29}   roga jvāra vyādha phoṅ leṅ
{C30}   jagat phoṅ saṃṛddhi sapp □
{D1}   1040 śaka □ □ □ □ □ □ □ □ ○ [tapa]
{D2}   svi t[a] neḥh [oy khñuṃ 2] tai □ □ tai kaṃ
{D3}   □vau ○ caṃnyar noḥ □ □ □ tai kandrā
{D4}   ti duñ ta khloñ □ vapura laṅgau
{D5}   tula 1 ○ caṃnyar noḥ sot man
{D6}   khloñ vala chok phlāṅ ’aṃvi lā
{D7}   śarira pi nu divaṅgata jvan khñuṃ ta pva
{D8}   n sot ri drāvya ta śeṣa le
{D9}   y nu go srū drāvya ta dai ti yathā
{D10}   śakti ta daṃnep=ra kṣe ’aneka ti
{D11}   prakāśe ta vraḥ śivaliṅga ○ nā
{D12}   khñuṃ neḥ phoṅ ti khloñ vala chok
{D13}   phlāṅ thā ta ’añ man syaṅ khñuṃ suhita
{D14}   □ṇḍa khñuṃ santāna ○ nā khloñ vala chak
{D15}   phlāṅ dā □ kṣā vrahmayajña ryyan vraḥ
{D16}   kaṃmrateṅ ’añ ta guru ryyan ’añ
{D17}   saṅ khñuṃ jmaḥ khdic ’añ jvan ta vraḥ śi
{D18}   valiṅga ○ [nā] khñuṃ vraḥ neḥ phoṅ ta dai
{D19}   y ti leṅ □ □ vraḥ tapasvi bhagava
{D20}   t pāda vraḥ kaṃmrateṅ ’añ ta
{D21}   guru jvan kāla sthāpaka syaṅ [ta] co
{D22}   dita ’añ ta jmaḥ vraḥ tapasvi vidyā
{D23}   spada gi pi mān ta upakal[pa]ka jvā
{D24}   n ta vraḥ śivaliṅga vnaṃ thṅe ti pratiṣṭhā
{D25}   jā jaṃnvan bhagavat pāda vraḥ kaṃ
{D26}   mrateṅ ’añ ta guru vidyāvāsa
{D27}   ta vraḥ śivaliṅga vnaṃ thṅe ’aṃval
{D28}   nu śāpānugrahamūla

{S1}   772 śaka gi nu vraḥ pāda śrī jaivarmmadeva stāc dau viṣṇuloka ta rājaputra
{S2}   vraḥ pāda parameśvara vraḥ □ □ i □ vrai slā ’nin sve[y] rāj[y]a chnāṃ tap pra
{S3}   mvāy cāp taṃmrya duk □ □ □ □ □ lāṅ mann taṃryya rat cval ta vrai
{S4}   neḥ ta jmaḥ viṣṇugrāṃma yap phdaṃ ta gi svaṃ pratyādeśa yol kaṃ
{S5}   mrateṅ ’añ vaiṣṇava mvāy pandval ta vraḥ pāda viṣṇuloka thā da
{S6}   ha ñyāṅ vi □ □ □ □ pi sthāpa rūpa ’añ bhaktiy ’añ oy taṃmrya
{S7}   noḥ viṅ udaiya guḥ ’aṃpān taṃmrya noḥ ta vrai neḥ pandval
{S8}   pre chgā ta neḥ sthāpanā rūppa kaṃmrateṅ ’añ śakavrāhmaṇa di
{S9}   kṣā jmaḥ viṣṇugrāṃma jvan bhūmi trey jnaṅ prāṅ ’ji ’añ khñuṃ paṃcyāṃ
{S10}   mvāy jmaḥ teṅ hyaṅ jā svāmiy loñ las jā vraḥ khlaiy to
{S11}   y vraḥ dnāy mok jvan ta vraḥ neḥ pre paṃmre panlas vraḥ śarira ○
{S12}   teṅ hyaṅ nu loñ las paṅgaṃ thpvaṅ nivedana svaṃ bhūmi n[oḥ] yeṅ khñuṃ
{S13}   paṃcyam paṃmre ta jā caṃmryeṅ [dep] vraḥ pāda kamrateṅ ’añ karuṇāpra
{S14}   sāda bhūmi sot ’āy □ □ □ ’moghapūra caṃna[t] vyar ṇnivāsacaṃna
{S15}   t dūk chloṅ ○
{N1}   lvaḥ ta rāj[y]avraḥ pāda paramanirvvānapada man neḥ bhūmya rājadrāvya [ti] yok prasā
{N2}   da dau ta kaṃmrateṅ ’añ śrī vīralakṣmī ’ji ’añ mvāy toy mātṛpakṣa jmaḥ loñ jun jā taṃmrvac kaṃmrateṅ ’añ vīralakṣmī raṃlik ta kaṃmrate
{N4}   ṅ ’añ śrī vīralakṣmī leṅ mān gol ’aṃvi ’āy lvaḥ bhūmya jnaṅ prāṅ
{N5}   leṅ kaṃ pi mān uppavāda caṃnyar kaṃmrateṅ ’añ śrī vīralakṣmī paṅgam
{N6}   thpvaṅ nivedana svaṃ sabhā pandval pre sabhāpati ta pvan ta jmaḥ vraḥ yanapa[ti]
{N7}   cās vraḥ kuti ruṅ cās vraḥ mok cās vraḥ vnur cās raṅvāṅ ta pvan vraḥ mada
{N8}   śiṅhavraḥ srau vraḥ pañcom rāṅgapura se[nā]pati ta pvan vraḥ īśvaranivāsa vraḥ
{N9}   thpal khvas cās vraḥ nā do vraḥ svāy nu sarvvādhikāri ta jmaḥ vraḥ pukaṇaka cās sya
{N10}   ṅ ta cuḥ mok saṅ gol ta bhūmya ’āy viṣṇugrāṃma nu sruk ta cval ta kaṃmrateṅ ’añ
{N11}   śrī vīralakṣmī phoṅ ○ t[i] pūrvva prasap ta ’v□ □ dakṣiṇa □ □ □ paścima prasa
{N12}   p sāra uttara prasap vnaṃ kantāl bhūmya jnaṅ [prāṅ pūrvva prasap] □ grama paści
{N13}   ma prasap phdeṅ panheṃ uttara vīragrāma □ □ □ □ □ □ □ □ pūrvva prasap
{N14}   bhūmya vraḥ rūpa paścima prasap □ □ □ □ □ □ □ □ □ □ ta vyar
{N15}   bhay piy tap prām ti pūrvva 10 □ □ □ □ □ □ □ □ □ □ gol thmo 1
{N16}   gol jhe 1

{1}   neḥ gol sī
{2}   māvadhi bhūmi ka
{3}   mrateṅ ’añ rā
{4}   japutra kaṃpaṅ=tvaṅ