Old Khmer

{6}   901 śaka pañcami ket mārggaśira candravāra nu loñ pit nu
{7}   teṅ prvātt jvan khñuṃ ta vraḥ kamrateṅ ’añ lokeśvara ○ gho kapur
{8}   tai ’gat ○ tai kañyas ○ si palek ○ cancyān 1 svok 1 vaudi 1
{9}   padigaḥ 1 ○ valvyal 1 ○ krapi dnyaṃ 1 ○ ’āśrama ○ daṃriṅ ○ jaṃnvan loñ
{10}   sem padigaḥ 1 ○ khñuṃ jaṃnvan teṅ mādhavī ○ tai kañjā //○//

{S21}   888 śaka ekādaśī ket
{S22}   vaiśākha brahaspatibāra nu chloṅ it pi pra □ □ □ ya ta gi jvan ta
{S23}   braḥ kamrateṅ ’añ śri jagannāthakeśvara sre samarāṇibartta jaṃnva
{S24}   n loñ sugata sre neḥ kulā ’amṛta ti duñ nu krapi 2 poṅ 1 thmur 3
{S25}   canlyak yau 2 ta vāp □ udāsin nu vāp gota □ □ sre lun di
{S26}   se □ k ti duñ nu srū 60 thmur 5 canlyak jña yau 5 canlya[k] □ □ nu □rakta
{S27}   pata yau 5 blaḥ □ □ □ ta vāp go nu tāñ in nu me myaṅ tāñ
{S28}   inn □ ○ sre lun laṅlaṅ vāp guṇa byar jeṅ ti duñ nu thnapp
{S29}   yau 2 ta vāp lak nu vāp dhi yatimat nu bargga phoṅ ○ sre cuṅ vi
{S30}   s pvan jeṅ ti duñ nu vaudi 2 ta vāp bhadrānanda nu vāp śrīvi
{S31}   ja yatimat nu vargga phoṅ ○ sre pura vyar jeṅ ti duñ nu padigaḥh
{S32}   ṅann jyaṅ 2 liṅ 10 ta vāp lak nu vāp dhi sot sre jeṅ canhvā
{S33}   r ñyaṅ vraḥ kamrateṅ ’añ śrī sannidhāna ti duñ nu srū thlvoṅ 10 3
{S34}   □ nuṅ durbhikṣa ka □ oḥ . sre kañyaṅ bl □ ta vāp nik nu vāp dha
{S35}   rmmapaṇḍita pre muṣṭiyuddha pi mratāñ raṇaparākrama paṅgaṃthpvoṅ ni (N:1)[ve]dana pi svaṃ braḥ karuṇaprasāda pre chloñ bhadrātiśayaduk sth[āna]
{N2}   braḥ kamrateṅ ’añ śrī jagannāthakeśvara pi jvan ta roḥ sre neḥ tabra[ḥ]
{N3}   kamrateṅ ’añ [de]pchloñ bhadrātiśaya raṃlik ta mratā
{N4}   ñ śrī kṛtajñavikhyāta ta khloñ □ □ [nā]eka man mān sre ti mra
{N5}   tāñ śrī □ □ □ svāmi jvan ta braḥ mratāñ śrī kṛrtajñavikhyāta
{N6}   pandval braḥ śāsana ta □ □ □ □ ta jmaḥ vāp śrī nu raṅvāṅ
{N7}   ta jmaḥ □ □ □ n □ □ k□ s□ □ s pi jvan ta braḥ kamrateṅ ’añ ○
{N8}   sre □ □ □ □ □ □ □ □ □ □ □ □ sre thnval stuk jairāga ti pūrvvottara
{N9}   ti steñ vidyādhipa jvan ta braḥ kamrateṅ ’añ ○ gho gavya
{N10}   si sudāsa si ’a □ □ □ □ □ □ □ □ □ pau □ □ pit
{N11}   tai kansi tai kaṃyān tai ’gat tai kanhyaṅ tai kaṃ
{N12}   vrau tai dharmma ○ krapi 5 thmur 20 vaudi 2 padigaḥ 1 kadāha 2
{N13}   kalaśa saṃrit 1 śarāva saṃrit 1 toṅ saṃrit 1 thni[ṃ]grap nu’arddhaprā
{N14}   sāda ○

{A1}   871 śaka pañcamī ket puṣya vrahaspativāra nu ’ācāryya bajrendrā
{A2}   cāryya nu vāp dhū sthāpanā vraḥ kaṃmrateṅ ’añ śrī trailokyanātha
{A3}   ’āy sruk cuṅ vis pūrvva chdiṅ ○ pi jvan khñuṃ sruk sre ’āśrama daṃmriṅ
{A4}   ta vraḥ noḥ ta puṇya dai ○ riy sre stuk veṅ ti ’ācāryya duñ ta
{A5}   steṅ ’añ vidyādhipa pi jvan ta vraḥ nu poṅ mvāy [○] kryau vyar [○] vluk
{A6}   thpvaṅ 1 ○ thnap vlaḥ piy ○ thyāy yau mvāy [○] jña vlaḥ ○ srū thlvaṅ 10
{A7}   tiṅ caṅcāṅ 1 ○ ti saṅ gol pi jvan ta vraḥ ○ sre man loñ
{A8}   ’nanta khloñ viṣaya jeṅ tarāñ sruk nāgapattana [oy ta ’ācāryyabajrendrācāryya]. ’añjeñ ’ā
{A9}   cāryya bajrendrācāryya dau coṅ it ta ti vraḥ ’āy sru
{A10}   k nāgapattana ○ ’aṃvi duk jagati lvoḥ duk pañcaśūla ○ nu man ’ā
{A11}   cāryya cāp thmo phoṅ [thv]e it noḥ pi oy ○ nu man loñ
{A12}   ’nanta pre ’ācāryya draṅ vighna vraḥ nu sruk ’aṃvi kāla vraḥ rā
{A13}   jya dhūli vraḥ pāda ta stāc dau paramaśivaloka ○ gi pi loñ ’nanta
{A14}   oy dakṣiṇā ’ācāryya nu sre neḥh ○ kāla loñ ’nanta mo
{A15}   k saṅ gol ta gi sre neḥh pi oy ta ’ācāryya jvan ta vraḥh ○ ’ācā
{A16}   ryya oy phlās loñ ’nanta ○ nu kdaṅ vār panlāy vlaḥ ○ thnap śira vlaḥ ○
{A17}   thyāy kapāla vlaḥ [○] ghaṇa yau 4 ○ jeṅ poṅ [○] caṃnvat srapāc 1 ○
{A18}   ti oy ta vāp vis thnap vlaḥ ○ srayū vnāt 1 [○] ghaṇa vlaḥ [○] ti oy tavāp
{A19}   tirtha thyāy yau 1 [○] ghaṇa vlaḥ [○] ti oy ta vāp hi pratyaya thnapvlaḥ [○] gha
{A20}   ṇa yau 1 [○] siddhi sre neḥ ta ’ācāryya ’yat ’apavada riy sre t □
{A21}   ṇā jaṃhvat 1 {B1a} nā bhāga toy khnett ○ riy khñuṃ nu upā{B2a} ya’ācāryya phoṅ man jvan ta vraḥ {B3a} noḥ ta punya dai ○ ’aṃraḥ si chnāṅ ○{B4a} si paṃnaṅ pek ○ tai kaṃvi mahānasa ○ {B5a} tai pandān mahānasa sot[○] tai ka{B6a} nteṃ patrakāra ○ tai kandai pas gandha ○ {B7a} raṅko yajñavraḥ liḥ 1 □ ’so dnāl pi{B8a} y [○] thmoy ○ ’āśramavalaya paści{B9a}[ma]bhāga toy dakṣiṇa ○ nu ’antāṃ phle {B10a} gi ○ kadāha 1 ○ paṅkāp mvāy○ {B1b} nā bhāga toy rṇnoc ○ ’aṃmraḥ si pre{B2b} thama ○ si kan’ū cāṃ pūjā○ tai cāmpa {B3b} mahānasa ○ tai kandeṅ mahānasa {B4b} sot ○ tai panheṃpatrakāra ○ k[va]{B5b} ntai panheṃ tai kañ[j]e tiṅ ○ {B6b} tai kañjā pasgandha [tai]chktiṅ ○ {B7b} tai kaṃphal tiṅ sot ○ raṅko ya{B8b} jña vraḥ liḥ 1 □’so dnāl piy thmoy {B9b} ’āśramavalaya paścimabhāga toy {B10b} uttara ○ nu’antām phle gi ○ svok chnār 1 ○
{B11}   vraḥ neḥ man ’añ sthāpanā ○ nu khñuṃ sruk sre nuv upāya ’añ coṅṅ
{B12}   syaṅ ta ’āyatta jā nai vāp dhū nu chloñ ’āryyabhadra ta kanmvāy ’añ

{1}   9□□ [śaka] pañcamī roc karttika śukravāra gi nu supratiṣṭha kaṃmrateṅjagat saṅka
{2}   rṣeśvarasvāmi vraḥ mahā □ □ □ □ ti vraḥ kaṃmrateṅ ’añ sarāmasthāpa[nā] neḥ ti thvāy ta
{3}   vraḥ pāda kaṃmrateṅ ’añ paramanirvvāṇapada dep ti prasāda takaṃmrateṅ madhyadeśa
{4}   ta kanmvāy kamrateṅ ’añ śrī vīralakṣmī ○ ta rājakula vraḥ pāda rudralokaparamarudraloka
{5}   vraḥ pāda kaṃmrateṅ ’añ śrī udayādityavarmmadeva nu vraḥ pādakaṃmrateṅ ’añ śrī
{6}   harṣavarmmadeva nu vraḥ pāda kaṃmrateṅ ’añ śrī nṛpatīndravarmma ○ta gi man kaṃvau khmāṅ ni
{7}   ter cāp viṣaya phoṅ vraḥ neḥ ti tok □ □ dau □ yok is dravya ○ dep kamra
{8}   teṅ ’añ ’so madhyadeśa ta putra vraḥ dvijendravallabha ○ vraḥ mātā tajmaḥ kaṃmrateṅ ’a
{9}   ñ deva□lakṣmī ○ vraḥ cau vraḥ pāda rudraloka paramarudraloka ○kaṃmrateṅ ’añ
{10}   śrī vīralakṣmī ta vraḥ kanmvay vraḥ pāda kaṃmrateṅ ’añ śrīudayādityavarmmadeva vraḥ
{11}   pāda kaṃmrateṅ ’añ śrī harṣavarmmadeva vraḥ pāda kaṃmrateṅ ’añ śrīnṛpatīndravarmma
{12}   nivedana svaṃ prasāda vraḥ liṅga noḥ sthāpanā viṅ ta śaka ta roḥhneḥh dep jvan dravya
{13}   viṅ dep jvan □ □ □ □ la [ta gi] [98]9 śaka ekādaśī ket □ □ □ □’ādityavāra noḥ so
{14}   t □ □ thve □ □ □ □ □ □ □ □ □ □ □ man □ □ □ noḥ □ □ □ □ □ □ □sthāpanā vraḥ kaṃmrateṅ ’añ
{15}   nārāya nu vraḥ [vra]hma nu vraḥ karuṇā vraḥ vuddha ti sthāpanā □ □ □□ □ □ □ □ [’āy] chpar
{16}   ransi dep [vraḥ] kamrateṅ ’añ nārāya □ □ □ □ □ toy □ □ □ □ □ □ □ □ □
{17}   h kalpanā [ta vraḥ] [ka]mrateṅ ’añ dvijendravallabha || [Lines18-24ruined].

{C56}   man vraḥ pāda parameśvara pratiṣṭhā kamrateṅ jagat=ta rāja ’nau nagara śrīmāhendraparvvata ○ vraḥ pāda
{C57}   parameśvara kalpanā santāna ’nak stuk ransi ○ bhadrapattana gi ta jā smiṅ nākamrateṅ jagat=ta rāja pra
{C58}   dvanna dau ○ vraḥ varaśāpa vvaṃ ’āc=ti mān ’nakka ta dai ti ta siṅ nā kamrateṅjagat=ta rāja ○ leṅ santāna ’nak noḥ
{C59}   gussa ○ neḥ gi roḥha śākha santāna noḥ ○ santāna ’aninditapura teṃ srukśatagrāma ○ kuruṅ bhavapura oy
{C60}   prasāda bhūmi ’āy viṣaya indrapura ○ santāna cat sruk jmaḥ bhadryogi ○’aṅgvay=ta gi sthāpanā vraḥ śivali
{C61}   ṅga ta gi ○ man vraḥ pāda parameśvara mok ’aṃvi javā pi kuruṅ=ni ’nau nagaraindrapura ○ steṅ ’añ śivakaivalya
{C62}   ta ’ji prājñā jā guru jā rājapurohita ta vraḥ pāda parameśvara ○ man vraḥ pādaparameśvara thleṅ mok ’aṃvi indra
{C63}   pura ○ steṅ ’añ śivakaivalya mok [jā] vraḥ kandvāra homa nā vraḥ rājakāryya ○vraḥ pre nāṃ kule ta strīpuruṣa mo
{C64}   k ukk ○ lvaḥh ’āy viṣaya pūrvvadiśa vraḥ pre oy prasāda bhūmi cat=sruk jmaḥkuti duk kule noḥ ’aṅgvay=ta gi
{C65}   man vraḥ pāda parameśvara kuruṅ=ni ’āy nagara hariharālaya ○ steṅ ’añśivakaivalya ’aṅgvay ’nau nagara
{C66}   noḥ ukk ○ gi santāna ti vraḥ pre trā dau nā kanmyaṅ paṃre ○ man vraḥ pādaparameśvara dau cat nagara ’amare
{C67}   ndrapura steṅ ’añ śivakaivalya dau ’aṅgvay ’nau nagara noḥ ukk ○ paṃre ta vraḥpāda parameśvara ○ svaṃ bhūmi ta vraḥ
{C68}   pāda parameśvara thāppa nu ’amarendrapura cat=sruk jmaḥ bhavālaya ○yok=kule khlah=ra mok ’aṃvi sruk=kuti paṅgvay=ta gi
{C69}   oy kule ta vrāhmaṇa jmaḥ gaṅgādhara ○ sthāpanā vraḥ śivaliṅga duk khñuṃ tagi ○ man vraḥ pāda parameśvara dau kuruṅ=ni
{C70}   ’āy mahendraparvvata ○ steṅ ’añ śivakaivalya dau ’aṅgvay=ta nagara noḥ ukkpaṃre ta vraḥ pāda parameśvara
{C71}   rūva noḥha ’nau ○ man vrāhmaṇa jmaḥ hiraṇyadāma prājñā siddhividyā mok’aṃvi janapada ○ pi vraḥ pāda para
{C72}   meśvara ’añjeñ thve vidhi leha leṅ kaṃ pi kamvujadeśa neḥ ’āyatta ta javā ley ○leṅ ’āc=ti kamrate
{C73}   ṅ phdai karoṃ mvāya guḥ ta jā cakravartti ○ vrāhmaṇa noḥ thve vidhi toy vraḥvināśikha ○ pratiṣṭhā kamrateṅ ja
{C74}   [ga]t ta rāja ○ vrāhmaṇa noḥ paryyan vraḥ vināśikha ○ nayottara ○ saṃmoha ○śiraścheda ○ syaṅ man svat=ta mukha cuṅ
{C75}   pi sar sir pi paryyān steṅ ’añ śivakaivalya nu gi ○ pre steṅ ’añ śivakaivalya gi tathve vidhi nā kamrate
{C76}   ṅ jagat=ta rāja ○ vraḥ pāda parameśvara nu vrāhmaṇa hiraṇyadama oyvaraśāpa pre santāna steṅ ’añ śivakai
{C77}   valya gi ta siṅ nā kamrateṅ jagat=ta rāja vvaṃ ’āc=ti mān ’nak=ta dai ti ta siṅ tanoḥha ○ steṅ ’añ śivakaivalya pu
{C78}   rohita duk=kule phoṅ siṅ man vraḥ pāda parameśvara stac viṅ mok kuruṅ=ni ’āynagara hariharālaya vraḥ
{C79}   kamrateṅ ’añ ta rāja ti nāṃ mok ukka ○ steṅ ’añ śivakaivalya nu kule phoṅ siṅ ruta tāp=ra ’nau ○ ste
{C80}   ṅ ’añ śivakaivalya slāp=ta gi rājya noḥ ○ vraḥ pāda parameśvara svarggata ’naunagara hariharālaya ○ nā kamrate
{C81}   ṅ jagat=ta rāja daiya nau ruva nagara nā kamrateṅ phdai karoṃ stac ti nāṃ dauta gi ukka ○ gi ta cāṃ rājya kamrateṅ phdai
{C82}   karoṃ pradvanna mok ○ ta gi rājya vraḥ pāda viṣṇuloka kamrateṅ jagat=ta rāja’nau hariharālaya kanmvay
{C83}   steṅ ’añ śivakaivalya mvāya jmaḥ steṅ ’añ sūkṣmavindu ○ jā purohita nākamrateṅ jagat=ta rāja ○ ku
{C84}   le phoṅ siṅ nā kamrateṅ jagat=ta rāja ukka ○ yok kule ’āy bhavālaya duk viṅmvāy ’anle ’ā
{D3}   y sruk kuti ○ steṅ ’añ rudrācāryya ta ph’van steṅ ’añ śivakaivalya dau pvās ’āyviṣaya jeṅ vnaṃ ta vnaṃ ta jmaḥ thko ○ steṅ
{D4}   ’añ rudrācāryya svaṃ noḥ nu bhūmi noḥ ta vraḥ pāda viṣṇuloka ○ cat=sruksthāpanā ta gi ○ duk jmaḥ vnaṃ noḥ jmaḥ bhadragiri ○ ta gi rājya
{D5}   vraḥ pāda īśvaraloka kamrateṅ jagat=ta rāja ’nau hariharālaya kule phoṅ [si]ṅ’nau nā kamrateṅ jagat=ta rāja ru ta tap=ra ste
{D6}   ṅ ’añ vāmaśiva cau steṅ ’añ śivakaivalya jā upādhyāya vraḥ pāda īśvaraloka ○ vraḥpāda īśvaraloka oy vraḥ pāda paramaśiva
{D7}   loka [kā]la kanmyaṅ leya pre paryyān ○ steṅ ’añ vāmaśiva jā śiṣya steṅ ’añśivasoma ta jā guru vraḥ pāda īśvaraloka ste
{D8}   ṅ ’añ śivasoma nu steṅ ’añ vāmaśiva syaṅ=ta cat śivāśrama sthāpanā vraḥ noḥ ○steṅ ’añ śivasoma ti ’nak hau kamrateṅ śivāśrama cāssa ○ steṅ ’añ vāmaśiva ti ’nak haukamrateṅ śivāśrama kanmyaṅ ○ man steṅ śivasoma slāp ○
{D9}   steṅ ’añ vāmaśiva gi nākka mān śivāśrama ○ ’nak hau kamrateṅ śi
{D10}   vāśrama roḥha noḥha ’nau ○ man vraḥ pāda paramaśivaloka [pre] vraḥkamrateṅ vāmaśiva ta jmaḥ kamrateṅ śivāśrama jā vraḥ guru paripālana upāya phoṅ nuvraḥ
{D11}   ta ti santāna sthāpanā ’aṃvi indrapura nu sruk bhavālaya ñyāṅ ’amarendrapurasruk=kuti pūrvvadiśa ○ sruk bhadragiri jeṅ vnaṃ ○ gi kule phoṅ siṅ nā kamrateṅ jagat=tarāja ru ta
{D12}   tāp=ra ’nau ○ man vraḥ pāda paramaśivaloka cat nagara śrī yaśodharapura nāṃkamrateṅ jagat=ta rāja ’aṃvi hariharālaya yok duk=ta nagara noḥ man vraḥ pādaparamaśi
{D13}   valoka sthāpanā vnaṃ kantāl ○ kamrateṅ śivāśrama sthāpanā vraḥ liṅga ’āykantāl ○ srac sthāpanā nā vraḥ rājakāryya ○ ka[mrateṅ śi]vāśrama nivedana man khmisthāpanā ukka
{D14}   svaṃ bhūmi nā nu sthāpanā ○ man steṅ ’añ rudrācāryya ta ’ji mok=saṃkamrateṅ śivāśrama pi kathā man=mān bhūmi nai varṇṇa vijaya[pattana] śūnyamūla samī
{D15}   pa nu bhadragiri ta nai steṅ ’añ rudrācāryya phoṅ pre svaṃ [bhū]mi noḥkamrateṅ śivāśrama svaṃ bhūmi noḥ ta vraḥ pāda paramaśivaloka cat=sruk jmaḥbhadrapa
{D16}   ttana nu bhadrāvāsa ○ vraḥ pāda paramaśivaloka oy vraḥ liṅga dvihastasaṃnal=ti sthāpanā ’āy vnaṃ kantāl gi [t]i sthāpanā ’āy bhadrapattana ○ vraḥ pratimā
{D17}   bhagavati 1 ti sthāpanā ta sruk bhadrāvāsa ta nai bhūmi bhadrapattana vraḥ oybhoga phoṅ daṃnep=ra gi vat khlās krayā ’arccana dravya ta dai ti phoṅ ’val=ta jā
{D18}   dakṣiṇā khñuṃ śata 2 oy sre parimāna vroḥ śata 2 ’āy gaṇeśvara pramān’amoghapura sre noḥ ti rleka oy ’āy stuk ransi ukka ○ vraḥ pāda
{D19}   śivaloka pre vraḥ paṃnvās mvāy jmaḥ steṅ ’añ śikhā ○ śiṣya kamrateṅ śivāśramajā ’nak vraḥ rājakāryya ○ vraḥ pre steṅ noḥ dau thve sruk bhadrapa
{D20}   ttana sthāpanā vraḥ pre bhūtāśa 2 ’āy jeṅ vnaṃ gi ta cat=sruk thve kāryya nāvraḥ noḥha daṃnep=ra coṅ prāsāda kaṃveṅ valabhi steṅ ’añ śikhā gi ta
{D21}   pre ’nak thve kāryya lvaḥha srac ○ oy=ta kamrateṅ śivāśrama ○ kamrateṅśivāśrama nivedana oy=sruk bhavālaya ta nai santāna nu sruk rhā nu sruk
{D22}   ryyeṅ nu nāgasundara ○ jā nai bhadrapattana ○ ti duk=ta praśasta ○ steṅ ’añhiraṇyaruci jmaḥ steṅ ’añ vnaṃ kansā ph’van kamrateṅ śivāśrama
{D23}   jā ’ācāryyapradhāna nā vraḥ pāda paramaśivaloka ukka ○ svaṃ bhūmi stuk ransi’āy=ta viṣaya ’amoghapura ta vraḥ pāda paramaśiva
{D24}   loka ukka [ca]t=sruk stuk ransi thve nā nu sthāpanā ’vyaḥ jā ○ kamrateṅśivāśrama nu steṅ ’añ vnaṃ kansā yok kanmvāy 3 strija
{D25}   na syaṅ=ta sahodara ’aṃvi sruk kuti viṣaya pūrvvadiśa ○ nāṃ dau duk vyar ’āystuk ransi mvāy ’āya bhadrapattana ○ kule ta dai ti
{D26}   ta vvaṃ ti yok mok ’aṅgvay ’nau sruk kuti ’nak=ta roḥha neḥha paṅket=santāna’āy sruk kuti ○ ’āy bhadrapattana ’āy stuk ransi kule neḥ phoṅ vvaṃ tel cek mūla syaṅ=tajā smiṅ nā kamrateṅ jagat=ta rāja ○ mān=ta jā ’ācāryyapradhāna ○ jā ’ācāryya homa siṅnā
{D28}   vraḥ kralā homa ukka ○ nau ru ta jā ’nak vraḥ rājakāryya gi nā ’āyatta kulopāya○ santāna ’nak noḥ syaṅ=ta jā ’ācāryya sappa tala vraḥ
{D29}   rājya mok ○ ta gi rājya vraḥ pāda rudraloka nu vraḥ pāda paramarudraloka kulephoṅ siṅ nā kamrateṅ jagat=ta rāja ru ta tāp=ra ’nau ○ steṅ
{D30}   ’añ kumārasvāmi ta kanmvāy kamrateṅ śivāśrama ○ jā ’ācāryyapradhāna gi tapradhāna ta kule cat=sruk parāśara ta bhūmi nai stuk ransi cāṃ caṃnāṃ
{D31}   ta dhūli vraḥ pāda ’āyatta ta kule ○ ta gi rājya vraḥ pāda paramaśivapada manvraḥ dau ’aṃvi nagara śrī yaśodharapura pi dau kuruṅ=ni ’āy cho
{D32}   k gar gyar nāṃ kamrateṅ jagat=ta rāja dau ukka ○ gi kule phoṅ siṅ nā kamrateṅjagat=ta rāja ru ta [tā]p=ra ’nau ○ steṅ ’añ īśānamūrtti ta cau ka
{D33}   mrateṅ śivāśrama jā ’ācāryyapradhāna gi ta pradhāna ta kule ’aṅgvay ’nau chokgar gyar ○ svaṃ bhūmi ’nau chok gar gyar cat=sruk jmaḥ khmvāñ duk
{D34}   khñuṃ ta gi ○ oy caṃnāṃ ta vraḥ ’āy chok gar gyar ’āyatta ta kule ○ steṅ ’añīśānamūrtti gi ta sthāpanā vraḥ liṅga noḥ ’āy stuk ransi ○ ta gi rā
{D35}   jya vraḥ pāda vrahmaloka kule phoṅ siṅ nā kamrateṅ jagat=ta rāja ru ta tāp=ra’nau ○ steṅ ’añ ’ātmaśiva ta kanmvāy steṅ ’añ īśānamūrtti ta purohi
{D36}   ta nā kamrateṅ jagat=ta rāja jā ’ācāryya homa gi ta pradhāna ta kule ○ manvraḥ pāda śivaloka viṅ mok kuruṅ=ni ’āy nagara śrī yaśodharapura nāṃ kamra
{D37}   teṅ jagat=ta rāja viṅ mok ukka ○ kule phoṅ siṅ nā kamrateṅ jagat=ta rāja ru tatāp=ra ’nau ○ steṅ ’añ ’ātmaśiva noḥ purohita nā kamrateṅ jagat=ta rā
{D38}   ja jā ’ācāryya homa pradhāna ta kule coṅ prāsāda valabhi ’āy stuk ransi cat=srukvrahmapura caṃnat [ka]tuka caṃnat śānti ’nau bhūmi stuk ransi sthāpanā
{D39}   ta gi ○ steṅ ’añ ’ātmaśiva slāp kāla vraḥ pāda paramavīraloka ○ ta gi rājya vraḥpāda paramavīraloka kule phoṅ siṅ nā kamrateṅ jagat=ta rāja ru ta tāp=ra
{D40}   ’nau ○ steṅ ’añ śivācāryya cau steṅ ’añ ’ātmaśiva jā purohita nā kamrateṅjagat=ta rāja gi ta pradhāna ta kule ○ man vraḥ pāda nirvvānapada kridā vala pi
{D41}   ’nak tok vraḥ ’āy bhadrapattana nu stuk ransi ○ man vraḥ svey rāj[y]a chnāṃ 2guḥ steṅ ’añ śivācāryya sthāpanā vraḥ noḥ ta nai santāna viṅ ○ sthāpanā vraḥ śaṅkara
{D42}   nārāyana 1 vraḥ bhagavati 1 ’nau ta sruk bhadrapattana dai ti leṅ nai santāna oykhñuṃ ta gi ○ vvaṃ dāna thve sruk nu caṃnat phoṅ=ta śūnya viṅ guḥ slāp steṅ ’añ śivā
{D43}   cāryya ○ ta gi rājya vraḥ pāda nirvvānapada kule phoṅ siṅ nā kamrateṅ jagat=tarāja ru ta tāp=ra ’nau ○ steṅ ’añ sadāśiva ta kanmvāy steṅ ’añ śivācāryya
{D44}   jā purohita nā kamrateṅ jagat=ta rāja gi ta pradhāna ta kule ○ ti vraḥ pādanirvvānapada pre phsik pi oy ph’van kamrateṅ ’añ śrī viralakṣmi ta jā ’a
{D45}   gradevi ○ oy jmaḥ kaṃsteṅ śrī jayendrapandita jā rājapurohita khloñkarmmāntara eka ○ man=sruk bhadrapattana nu sruk stuk ransi nu caṃnat noḥ phoṅ sya
{D46}   ṅ=ta śūnya kāla vraḥ pāda nirvvānapada kridā vala ○ vraḥ kamrateṅ śrījayendrapandita thve sruk noḥ phoṅ viṅ unmilita vraḥ noḥ man=ti sthāpanā viṅ ○ ta srukbhadra
{D47}   pattana sthāpanā vraḥ liṅga 1 pratimā 2 dai ti leṅ nai santāna oy=sarvvadravyata vraḥ noḥ phoṅ oy khñuṃ ○ coṅ valabhi coṅ kaṃveṅ ’leṅ thve kṣetrārāma jyak=travāṅ
{D48}   thve daṃnap ○ ta sruk bhadrāvāsa unmilita vraḥ noḥ oy=sarvvadravya ○ thvekṣetrārāma ○ jyak travāṅ ○ thve daṃnap ○ ta sruk bhadragiri unmilita vraḥ noḥ cat=sru
{D49}   k viṅ thve daṃnap thve valaya thve gośāla oy vrah go ’val=ta vraḥ noḥ ○ ta srukstuk ransi ○ unmilita vraḥ noḥ oy=sarvvadravya ○ jyak ’añcan thve ’ārā
{D50}   ma jyak travāṅ ○ thve daṃnap ○ svaṃ prasāda bhūmi ta vraḥ pādanirvvānapada ’anle 1 ’āy ’amoghapura jmaḥ caṃkā parimāna vroḥ śata mvāya ○ duñbhūmi ’anle 1 sot ti
{D51}   pūrvva vraḥ travāṅ mahāratha ’āy ’amoghapura nu vudi 1 padigaḥ 1 nu thnapcanlyak parimāna vroḥ 30 ○ duñ bhūmi ’anle 1 sot ’āy ’aṅve chdiṅ ’amoghapura jma[ḥ]
{D52}   pralāk kvan ṅe nu vudi 2 padigaḥ 2 thnap canlyak parimāna vroḥ 60 ○ bhūmi taroḥha neḥha phoṅ syaṅ ma[n o]y ta vraḥ ’āy stuk ransi nu kule ○ cat caṃna
{D53}   t ’āy ’amoghapura ta bhūmi ta jmaḥ nāgasundara nai santāna duk khñuṃ duksrū ta gi oy=ta vraḥ ’āy bhadrapattana ○ ri sre gaṇeśvara ti vraḥ pāda nirvvānapada pre
{D54}   tvar pi oy dau ta vraḥ vnvak ○ vraḥ pre oy sre vrac gi ta jā snoṅ viṅ ○ ti saṅ=golcek sre noḥ ’āy bhadrapattana ○ nu vraḥ ’āy stuk ransi ○ ta sruk
{D55}   vrahmapura sthāpanā vraḥ bhagavati 1 oy khñuṃ thve ’ārāma jyak=travāṅ thvedaṃnap ○ ’āy viṣaya pūrvvadiśa ta sruk=teṃ ’āy kuti cat=sruk noḥ viṅ=ta śūnya thvevalaya
{D56}   ’val viṅ=ta gi ○ sthāpanā vraḥ liṅga ekahasta coṅ prāsāda oy khñuṃoy=sarvvadravya ○ ri bhūmi vāhuyuddha ta śūnyamūla ’āy=ta sruk jeṅ dnāp ti svaṃprasāda ta vraḥ
{D57}   pāda paramanirvvānapada saṅ=gol simāvadhi ta gi ○ oy=ta vraḥ ’āy kuti nu kulephoṅ sruk bhavālaya ti kamrateṅ śivakaivalya [oy] ta santāna gi ta ca
{D58}   ta ’nau ’aṅve ’amarendrapura mān=ta praśasta ’nau bhadrapattana noḥ ti ’nakpidā śūnya gi sruk nu vraḥ liṅga jā vraiya [nu] devasthāna noḥ dau ○ vraḥ kamrateṅ
{D59}   ’añ śrī jayendrapandita nivedana ta vraḥ pāda kamrateṅ ’añ śrīudayādityavarmmadeva man noḥ nai santāna vraḥ pāda kamrateṅ ’añ oy noḥ
{D60}   sruk bhavālaya viṅ chkā vrai noḥ unmilita vraḥ noḥ oy pūjā viṅ ○ ti pre rok nāmān khñuṃ vraḥ noḥ ta hyat paṅgvay viṅ=ta sruk oy=ta vraḥ kalpa
{D61}   nā viṅ jā sruk nai bhadrapattana ru ta tel ○ man vraḥ kamrateṅ ’añ śrījayendrapandita jā kula pitṛ[pa]kṣa ta dhūli jeṅ vraḥ kamrateṅ ’añ śrī vāgi
{D62}   ndrapandita ta sruk siddhāyatana ’āy pūrvvadiśa gi nākka ta thvekarmmadharmma nai dhūli jeṅ vraḥ kamrateṅ ’añ śrī vāgindrapandita gi ta cat=sruksthāpanā chlo
{D63}   ṅ=travāṅ ○ vraḥ kamrateṅ ’añ śrī jayendrapandita thve ’āśrama duk khñuṃ ta gioy ta jā gurvvartha ta vraḥ nai dhūli jeṅ vraḥ kamrateṅ ’añ śrī vāgindrapandita
{D64}   ○ man vraḥ pāda kamrateṅ ’añ śrī udayādityavarmmadeva svey vraḥ rājya kulephoṅ siṅ nā kamrateṅ jagat=ta rāja ru ta tap=ra ’nau ○ vraḥ ka
{D65}   mrateṅ ’añ śrī jayendrapandita jā vraḥ guru ○ dār dhūli jeṅ vraḥ kamrateṅ ’añ śrījayendravarmma ○ vraḥ pāda kamrateṅ ’añ ryyān vidyā phoṅ daṃne
{D66}   p=ra siddhānta ○ vyākaraṇa ○ dharmmaśāstra ○ śāstra phoṅ dai ti ○ vraḥ pādakamrateṅ ’añ thve vraḥ dikṣā daṃnep=ra gi bhuvanādhva vraḥ vrahmayajña ○
{D67}   thve mahotsavapūjā toy vraḥ guhya ○ oy vraḥ dakṣiṇā nu dravya daṃnep=ra givraḥ thni[ṃ] phoṅ ○ mukuṭa ○ kuṇdala ○ keyura ○ kataka mu
{D68}   kutaveni ○ vraḥ rūpyapītha [○] vraḥ suvarṇnakalaśa ○ vraḥ cāmara ○ vraḥhemadolā triśira ○ phoṅ neḥ syaṅ=ti oy nu bhoga [ta] gi ○ oy ratna mā
{D69}   s prāk dravyagaṇa phoṅ ’val vraḥ go sahasra ○ tamrya śatadvaya ○ ’seḥ ekaśata○ ’ajamahiṣa śata oy dāsadāsi sahasra o
{D70}   y sruk 3 śaṅkaraparvvata 2 sruk mano 1 jeṅ=tarāñ vraḥ pāda kamrateṅ kaṃtvan’añ śrī udayādityavarmmadeva paripālana ’nau ta nagara ’a
{D71}   bhivādana nitya ○ pre cāra puruṣa paṃre pratidina nu kriyā paṃre tadaṃnep=ra gi vastra ’anna pāna vyañjana kramukaphala ○ syaṅ ’aṅga vraḥ kriyā paṃ
{D72}   re ’āy le [ta] dhūli jeṅ vraḥ kamrateṅ ’añ pravṛtti [ta]gi sappa thṅaiy ○ ri srukstuk rmmāṅ=ta śūnyamūla vraḥ pāda kamrateṅ ’añ oy
{D73}   sruk noḥ jā upāya ta dhūli jeṅ vraḥ kamrateṅ ’añ ○ saṃ nu sruk stuk ransi ○man dhūli jeṅ vraḥ kamrateṅ ’añ khmi sthāpanā ○ vraḥ
{D74}   pāda kamrateṅ ’añ oy vraḥ liṅga dvihasta nu dravyagaṇa phoṅ=ta jā bhoga tavraḥ noḥ nu dravyagaṇa phoṅ=ta jā dakṣiṇā ○ pre mantri dau cat
{D75}   sruk jmaḥ bhadraniketana ta bhūmi bhadrapattana ta nai dhūli jeṅ vraḥkamrateṅ ’añ dai sthāpanā vraḥ liṅga dvihasta ta gi oy=ta dhūli jeṅ vraḥ
{D76}   kamrateṅ ’añ oy dāsadāsi slik 1 ta vraḥ noḥ ○ coṅ śilāprāsāda valabhi jyak travāṅthve daṃnap thve kṣetrārāma ○
{D77}   ta gi rājya vraḥ pāda paramavīraloka gi nu vrāhmaṇa saṅkarṣa nu chloñmādhava ta kvan ’nak parade[śa] ukka duñ bhūmi pi cat caṃnat ’anreṃ
{D78}   loṅ duk khñuṃ ta gi sthāpanā vraḥ śivaliṅga jā nai loñ mādhava ○ slāp mratāñchloñ saṅkarṣa [ta gi] rājya vraḥ pāda paramavīraloka ○ chlo
{D79}   ñ mādhava ta kvan ’ras ○ lvoḥ ta rāj[y]a vraḥ pāda paramanirvvāṇapada ta gi965 śaka [nu] chloñ mādhava thvāy=saṃnvat=ta vraḥ pāda paramanirvvā
{D80}   ṇapada oy caṃnat noḥ nu khñuṃ noḥ phoṅ=ta dhūli jeṅ vraḥ kamrateṅ ’añ śrījayendravarmma siddhi ○ ti paripālana khñuṃ noḥ paṃre lvoḥ ta gi 967
{D81}   śaka ○ dep chloñ mādhava slāp man vraḥ pāda kamrateṅ ’añ śrīudayādityavarmmadeva svey rājya ta gi 971 śaka ○ lvoḥ ta gi
{D82}   974 śaka dhūli jeṅ vraḥ kamrateṅ ’añ sthāpanā kamrateṅ jagat śivaliṅga ’āybhadraniketana ○ ti nivedana ta vraḥ pāda kamrate
{D83}   ṅ ’añ śrī udayādityavarmmadeva svaṃ leṅ caṃnat noḥ nu khñuṃ noḥha jā vraḥkaruṇāprasāda so[t=ta] kamrateṅ jagat śivaliṅga ’āy bhadrani
{D84}   ketana oy prasiddhi caṃnat noḥ nu [khñuṃ] noḥha ○ ru man vraḥ pādaparamanirvvāṇapada oy ukka nu iṣṭi chloñ mādhava ta mān upāya ○ dhūli jeṅ
{D85}   vraḥ kamrateṅ ’añ kalpanā khñuṃ noḥ nu caṃnat noḥha ta paṃre ta kamrateṅjagat śivaliṅga ’āy bhadraniketana ○ śākha caṃnat ’anreṃ loṅ ○
{D86}   894 śaka pi ket puṣya vudhavāra gi nu vrāhmaṇa ta jmaḥ mratāñ chloñsaṃkarṣa nu chloñ mādhava ta kvan ’nak paradeśa duñ bhūmi ta ’nak ’anreṃ loṅ ○ va
{D87}   rṇṇa karmmāntara ○ ta jmaḥ loñ para ○ loñ dharmmapāla ○ loñ go ○ loñsarvvajña ○ steṅ śivapāda khloñ vala khloñ viṣaya khdak ○ dravya nu duñ mās li
{D88}   ṅ 2 ○ canlyak 320 ○ thnap yau 1 [○] vave 4 ○ vraḥ go 4 ○ krapi 12 ○ simāvadhibhūmi nā caṃnatta nu sre pi jeṅ ○ ti pūrvva prasap nu bhūmi dhanavāha ○ ti dakṣiṇa
{D89}   lvoḥ dnaṅ ○ ti paścima lvoḥ ta gi phlū rddeḥ thṅai luc snvāl ○ ti uttara saṃlvatkralā tut srū pat tāṅ tai viṅ ta gi thnval travāṅ ○ ti pūrvva sot lvoḥ ta vraḥ
{D90}   stau prasap bhūmi thpvaṅ rmmāṅ ○ bhūmi ta cval sot=ta caṃnat ’anreṃ loṅ ○901 śaka pi ket puṣya nu vrāhmaṇa ta jmaḥ mratāñ chloñ saṅkarṣa
{D91}   nu chloñ mādhava duñ bhūmi ta ’nak ta jo ta jmaḥ vāp īśvaravindu ○ vāp ’ājya ○vāp bhima ○ dravya nu duñ mās liṅ 2 vudi 5 dop 5 thnap thpi[r] yau 5 ○ ca
{D92}   nlyak 300 ○ simāvadhi bhūmi noḥ ○ ti pūrvva prasap ta bhūmi vraḥ thpvaṅrmmāṅ ○ ti dakṣiṇa prasappa bhūmi ’anreṃ loṅ ○ ti paścima tarāp go
{D93}   la ○ ti uttara tarāp gola sot ○ ti paścima sot tarāp vrai saṃroṅ ○ bhūmi nā bhāgasteṅ mat gnaṅ ti jau ta vraḥ sraleṅ vā
{D94}   y nuk cuṅ chdiṅ ta kule ○ ti jau ta ’nak ta jmaḥ loñ ’yak rāl nu noḥha ukka ○phsaṃ parimāna vroḥ ta bhūmi noḥ 40 ○ noḥ saṃ cval nu
{D95}   caṃnat ’anreṃ loṅ nā chloñ mādhava ○ khñuṃ ti mratāñ chloñ saṃkarṣa nuchloñ mādhava duk=ta caṃnat ’anreṃ loṅ ○ pi oy=ta vraḥ ○ bhāga
{D96}   thṅai luc nā si thpvaṅ tyak ’ji tai e dau ’aṃvi śivapura danden ○ bhāga kantālsruk sot nā si vrahmapada ’ji tai thleṃ dau
{D97}   ’aṃvi sruk vrai ’guya pramāna pūrvva ○ bhāga kantāl sruk sot ’ji tai khdep dau’aṃvi ’guy ukka pramān pūrvva ○ bhāga ka
{D98}   ntāl sruk sot nā si mat gnaṅ ’ji tai jā dau ’aṃvi saṃtāc drāy viṣaya karoṃ ○bhāga thṅai ket ’ji tai kaṃyān
{D99}   dau ’aṃvi liṅgapura ○ bhāga thṅai ket sot nā si teṃ thvit ’ji tai sraṣṭa ’nak’anreṃ loṅ t[i] oy thnvar khñuṃ ○ bhāga thṅai lu
{D100}   c sot saṃvandhi si thpvaṅ tyak ○ ’ji tai rudrāṇi dau ’aṃvi śreṣṭhapura ○ srukbhadraniketana dai ’nau ta bhūmi bhadra
{D101}   pattana ti pūrvva bhūmi bhadrapattana dai ○ ti ’agneya dau vap ta golstuk=kadamva prasap nu bhūmi sruk leṅ tvar caṃṅāy
{D102}   slik 1 80 ○ ti dakṣiṇa dau vap=ta srau sramoc prasap nu bhūmi sruk leṅ tvarcaṃṅāy 332 ○ ti naiṛtiya dau vap=ta go
{D103}   l kūpa prasap=nu bhūmi suk leṅ tvar caṃṅāy slik 1 120 ○ ti paścima dauvap=ta stuk tannot prasap nu bhūmi sruk gnaṅ ○ caṃṅā
{D104}   y slik 6 45 ○ ti vāyavya dau vap=ta gol sruk lmuṅ prasap=nu bhūmi srukcaṃnat teṅ=tvan nu chdiṅ gar gyar caṃṅāy slik 6 340 phlā
{D105}   s 8 hat 3 ○ ti uttara dau vap=ta stuk ruṅ prasap=nu bhūmi sruk cvar mo ○caṃṅāy slik 4 40 ○ ti īśāna gi bhūmi bhadrapattana hoṅ ○
{D106}   vraḥ pāda kamrateṅ ’añ śrī udayādityavarmmadeva oy sruk ta jmaḥ gnaṅcranāñ vo nu ’nak=ta gi nu phsak 151 nu bhūmi
{D107}   bhāga noḥha oy jā vraḥ jaṃnvan ta vraḥ liṅga noḥ ’āy bhadraniketana ○simāvadhi bhūmi noḥ ’āy sruk gnaṅ cranāñ
{D108}   vo ○ ti pūrvva dau vap=ta stuk tannot prasap nu bhūmi sruk bhadraniketanadai caṃṅāy slik 3 152 ○ ti ’agneya dau vap=ta go
{D109}   l prasap nu bhūmi sruk leṅ tvar caṃṅāy 4 392 ○ ti dakṣiṇa dau vap=ta golprasap nu bhūmi sruk vrai raṃvaṅ candrāya
{D110}   caṃṅāy slik 2 250 ○ ti naiṛtiya dau vap=ta gol prasap nu bhūmi srukśibapattana sramo eṃ caṃṅāy slik 4 ○ ti paścima dau
{D111}   vap=ta gol prasap nu bhūmi sruk ’anlāṅ caṃṅāy slik 3 392 ○ ti vāyavya dauvap ta gol prasap nu bhūmi sruk vajravarmma
{D112}   caṃṅāy slik 6 250 ○ ti uttara dau vap=ta gol ti uttara vnaṃ vreṅ prasap nubhūmi sruk jhe rloṃ sruk tvaṅ mvāy teṃ caṃṅāy
{D113}   khnāñ 1 slik 5 180 phlās 6 ○ ti īśāna dau vap=ta gol prasap nu bhūmi srukchdiṅ gar gyar caṃṅāy slik 5 100 ○ khñuṃ vraḥ kamrateṅ
{D114}   ’añ śivaliṅga ’āy bhadraniketana vraḥ jaṃnvan ○ sruk gnaṅ ○ pakṣa khnet ○tamrvac si 2 vargga noḥ ○ si 27 ○ tai 48 ○ pakṣa rṇnoc ○ tamrvac si 2 vargga
{D115}   noḥ si 27 ○ tai 45 ○ phsaṃ phoṅ si tai 151 ○ khñuṃ kamrateṅ jagat śivaliṅga’āy bhadraniketana ○ pakṣa khnet ta paṃre ○ tamrvac si 1 vargga noḥ ○ si 21 ○
{D116}   tai 54 ○ [pakṣa rṇnoc] khloñ ’nak si 1 ○ ’amraḥ si 2 ○ vargga noḥ ○ si 15 ○ tai50 ○ ’āśrama dakṣiṇa thnal ñyaṅ ’añcan ○ tamrvac si 1 vargga noḥ si 4 ○ tai 11 ○ ’āśramañyaṅ
{D117}   pañcoṅ ○ tamrvac si 1 vargga noḥ ○ si 7 ○ tai 13 ○ ’āśrama dakṣiṇa vraḥha ○tamrvac si 1 vargga noḥ si 4 ○ tai 16 ○ caṃnat ’anreṃ loṅ ○ tamrvac si 1 ○ vargga noḥ ○si 46 ○ tai 54
{D118}   ○ pakṣa [khnet] ○ ta paṃre ○ tamrvac si 1 ○ vargga noḥ si [20] tai 54 [pakṣarṇnoc] khloñ ’nak si 1 ’amraḥ si 2 ○ vargga noḥ si 21 ○ tai 43 ○ ’āśrama uttara thnal ○tamrvac si 1 vargga noḥ si 4 ○ tai 10 ○ ’ā
{D119}   śrama uttara vraḥha tamrvac si 1 vargga noḥ si 8 ○ tai 20 ○ ’āśrama uttaravraḥha sot tamrvac si 1 vargga noḥ si 4 tai 13 ○ caṃnat piṅ khlā ○ tamrvac si 1 ○ vargganoḥ si 4 ○ tai 13 ○

{1}   □ □ □ □ □ □ □ □ □ [tai] kaṃvrau nu kvan cau phoṅ tai bhadra
{2}   □ □ □ □ □ □ □ □ □ tai kandes nu kvan cau tai paṃ □ □ □
{3}   □ □ □ □ □ □ □ □ □ tai kaṃpit nu kvan cau tai th’yak □ □
{4}   □ □ □ □ □ □ [nu kvan] cau tai kaṃvrau sot nu kvan cau □ □
{5}   □ □ □ □ □ □ □ □ □ □ nu kvan cau tai śreṣṭhi nu kvan cau □
{6}   tai jīva nu kvan cau tai vrāma nu kvan cau tai □ nu kvan cau □ □
{7}   [nu kvan] cau tai kansān nu kvan cau tai kans□ nu [kvan cau] □ □
{8}   □ □ □ □ nu kvan cau tai kañjān nu kvan cau tai kaṃ□ □ □
{9}   □ □ □ tai kanso nu kvan cau tai kanso sot nu kvan cau tai □
{10}   □ nu kvan cau tai mān bhāgya nu kvan cau tai kañju sot nu kvan
{11}   cau [tai] □ □ nu kvan cau tai kañjes nu kvan cau gho kaṃpi
{12}   t gho k □ □ gho varuṇa gho kaṃvai gho sthān gho kaṃcon
{13}   [gho] □ pen gho caṅkās gho surāgapuṇya gho kañyuk gho sthī
{14}   [ra gho] paroṅ gho bhaktiya gho vīra gho kaṃpit sot gho hṛda
{15}   ya gho kaṃ□rai gho ’ārgha ○ devadra[vya] cancyān 1 vudī padigaḥ bhāja
{16}   na 4 prāk 4 kriyā ’ārccana phsaṃ janjyaṅ 3 vraḥ chāy 1 ○ vraḥ
{17}   go 100 40 10 8 krapi 20 5 phsaṃ tai 20 10 gho 10 8 bhūmi sruk
{18}   cvār mmo nay vraḥ kamrateṅ ’añ śivaliṅga toy purvva dau vap ta go
{19}   l ’āgneya dau vap ta gol dakṣiṇa dau vap ta gol niṛtiya dau
{20}   vap ta gol paścima dau vap ta gol vāyavya dau vap ta gol utta
{21}   ra dau vap ta gol īśāna dau vap ta gol ○ bhūmi piṅ khlā nai cvā
{22}   r mmo juṃm diśa ta 8 vap ta gol . . . (traces)

{A1}   . . . . . . . . . . . . . . . sabhācāre vyavah[āra]
{A2}   . . . . . . . . . . . . [vāp] y[ok]cāñ vraḥ laṃvāṅ khlo[ñ].
{A3}   . . . . . . . . . . . n tāñ rok gati vāp rau . . .
{A4}   . . . . . . . . . kāryya vnaṃ creṅ ○ gi roḥh man ti sabhācā[re]
{A5}   . . . . . . [tā]ñ rok vargga vijayapat[t]ana nu vāp yok cāñ vraḥ
{A6}   [laṃ]vāṅ duk ta gi ’arthi ○ man kāla ta gi vraḥ rājya dhūli vraḥ pāda dhūli jeṅ vraḥkamra[te]
{A7}   ṅ ’añ ta stāc dau vrahmaloka ○ vāp rau vijayapatta[na]yok tai kanhya
{A8}   ṅ ’pai tai kaṃpit dau phtā ta steñ vnaṃ creṅ pi yok krapi mvāy pi oy ta vāp
{A9}   nos ○ sruk pāndugāra ta khloñ srū jeṅ vnaṃ ○ man tai kanhyaṅ rat ○ vāp rau
{A10}   yok ’nak mvāy pre dau paṃre panlās tai kanhyaṅ ○ man noḥ rat vāp rau yo
{A11}   k tai kaṃpit oy paṃre ta panlās tai kanhyaṅ [vāp rau] pratiṣedha gi ’arthi ta
{A12}   roḥh neḥh ○ pi paṃvyat man dhūli vraḥ pāda ta stāc dau vrahmaloka ○ vāp rauyo
{A13}   k krapi steñ vnaṃ creṅ ○ pi oy ta vāp nos khloñ srū jeṅ vnaṃ ○ oy tai ka
{A14}   nhyaṅ rat ○ pi steñ . i. . . . ta vāk śeṣa ○ man vāp rau daśādhikṛta vija
{A15}   yapattana dau pul krapi mvāy ta steñ vnaṃ creṅ ○ oy vraḥ rājakāryya ta khlo
{A16}   ñ srū ○ vāp rau yok tai kanhyaṅ oy thlāy ta steñ vnaṃ creṅ ○ yo
{A17}   k tai kanhyaṅ jvan ta vraḥ kamrateṅ ’añ śivapattana ○ ti duk ta praśasta ○ mandi
{A18}   k ni ’aṅveṅ gus pi tai kanhyaṅ rat ○ steñ vnaṃ creṅ pre dau cāp vāp rau dār ○
{A19}   vāp rau yok tai kaṃpit oy panlās tai kanhyaṅ ○ steñ vnaṃ creṅ yo
{A20}   k tai kaṃpit jvan ta vraḥ kamrateṅ ’añ śivapattana ○ tai kaṃpit paṃre ta vraḥ
{B1}   . . . . . prāṃ gvāl mvāy rat . . . . . . . . . . . . . . . .
{B2}   . . . paṃre ta vraḥ kamrateṅ ’añ śiva[pattana] . . . . . . . . . .
{B3}   . . ’yat ’apavāda ○ ilū dep vāp yok tāñ [rok] . . . . . . . . [vāp]
{B4}   yok tāñ rok paṃvyat ’ajñāna neḥ vāk śeṣa . . . . . . . . .
{B5}   gi vyavahāra man noḥ tai kanhyaṅ ti tāñ rok kathā . . . . . . . [ste
{B6}   ñ v]n[aṃ] creṅ pi yok krapi ○ pi steñ vnaṃ creṅ duk ta praśasta . . . . . [jva]
{B7}   n ta vraḥ ○ yal man neḥ tai kanhyaṅ ti vāp rau oy thlāy krap[i] . . . .
{B8}   roḥh kathā tāñ rok ○ man neḥ tai kanhyaṅ rat ○ vāp rau yok tai k[aṃ]p[it o]
{B9}   y panlāss ○ steñ vnaṃ creṅ yok tai kaṃpit jvan ta vraḥ kamrateṅ ’añ śiva
{B10}   pattana ○ paṃre ta vraḥ lvoḥ pi ket kvan cau ta ’ampāll neḥh ○ pi ilū dep vāp
{B11}   yok tāñ rok kathā man hetu ti phtā gus thve ’apavāda kathā man vvaṃ ti oy
{B12}   panlās tai kanhyaṅ ○ soca tāñ rok vāp yok ta gi ○ nirṇnaya mukhasphā
{B13}   lana 40 10 tai kaṃpit pragalbha ta steñ . . pre paṃre ta vraḥ ruv ta tel ○ ta cā
{B14}   re ○ kaṃsteṅ ’añ śrī bhūpativarmma ○ sabhāsat loñ pitrānandana loñ ī
{B15}   loñ ’ānandana loñ paṇditācāryya ○ ta ’nau nā cāre ○ mratāñ śrī dhara
{B16}   ṇīndropakalpa ○ steṅ ’añ tejorāśī guṇadoṣadarśśi vraḥ sabhā || ○ ||

{1}   928 śaka vyar ket vaiśākha vuddhavāra bharaṇīnakṣatra nu dhūli vraḥ
{2}   pāda kaṃmrateṅ kaṃtvan ’añ śrī sūryyavarmmadeva stac vraḥ caturdvā
{3}   ra pi pandval ta mratāñ khloñ śrī vīravarmma pi pre mok cār praśasta
{4}   ta śilāstambha ’āy vnaṃ ti nā vraḥ kaṃmrateṅ ’añ śrī samaravīravarmma
{5}   svāmi vraḥ kaṃmrateṅ ’añ śrī samaravīravarmmajannanīśvarī saṃ gaṇa nukaṃmrateṅ jagat ka
{7}   nloṅ ruṅ ○ caṃnāṃ ta dau kaṃmrateṅ jagat kanloṅ ruṅ mvāy vvat mvā
{8}   y chnāṃ ta gi māgha gus śvetatandula khārikā mvāy paryyaṅ prastha 4
{9}   lṅo je 2 santek je 2 daṅ 2 vraḥ vasana yau 2 vvaṃ ’āc ti ’āyatta ta [khloñ] vrīha
{10}   viṣaya vvaṃ ’āc ti ’āyatta ta khloñ vnaṃ nu mukha gāp jnvāl phoṅ ○ thve roḥ
{11}   h kalpanā □ □ □ □ □ □ □ □ □ □ dhūli vraḥ pāda śrī sūryyavarmmadeva
{12}   teṅ ○ gho murddhnaśiva ○ gho īśānaśiva ○ gho kanhāt ○ gho khdvāt [○]
{13}   gho chke ○ gho kañyān ○ gho thṅe ○ gho hṛdayavind[u] ○ gho vrahmaśiva ○ ghokaṃvan [○]
{14}   gho saṃvār ○ gho th’yak ○ gho saṃvār sot ○ gho dharmmapāla ○ gho
{15}   kan’in ○ gho ’aṃpen ○ gho kansvar ○ gho tora ○ gho kantuṃ ○ gho kandhap ○
{16}   gho th’yak ○ gho kanhen ○ gho kanso ○ gho kan’an ○ gho hari
{17}   ya ○ gho kansrac ○ gho varmmaśiva ○ gho caṃlāk ○ tai khmau nu kvan cau [○]
{18}   tai thmās nu kvan cau ○ tai kandes nu kvan cau phoṅ ○ tai panlas ○ tai ka
{19}   nso nu kvan cau phoṅ ○ tai kansat nu kvan cau phoṅ ○ tai kanhyaṅ nu
{20}   kvan cau phoṅ ○ tai dharmma nu kvan cau phoṅ ○ tai sarac nu kvan cau phoṅ ○
{21}   tai kanhyaṅ sot nu kvan cau phoṅ ○ tai thkon nu kvan cau phoṅ ○
{22}   [tai]□ □ vi nu kvan cau phoṅ ○ tai thket nu kvan cau phoṅ ○ tai kanso
{23}   nu kvan [cau phoṅ ○] tai kaṃvit nu kvan cau phoṅ ○ tai kandeṅ nu kvan cau
{24}   phoṅ ○ tai pandān nu kvan cau phoṅ ○ tai kanso nu kvan cau phoṅ ○ tai pas
{25}   rvva nu kvan cau [○] tai vrahma nu kvan cau ○ tai cyam nu kvan cau ○ tai gandhanu kvan
{26}   cau ○ tai kansu nu kvan [○] tai kanhyaṅ [○] tai saṃ’ap nu kvan cau ○ tai paroṅ nukva
{27}   n cau ○ tai kanhyaṅ nu kvan cau ○ tai thmān nu kvan cau [○] tai kanrut nu kvan
{28}   cau [○] tai thṅe nu kvan cau ○ tai samaṅ nu kvan cau [○] tai kaṃbha nu kvan cau○ tai ga
{29}   ndha nu kvan cau ○ tai hem nu kvan cau ○ tai chneṃ nu kvan cau ○ tai thkon nukvan
{30}   cau ○ tai kansu nu kvan cau [○] tai kansāt nu kvan cau [○] tai paroṅ nu kvan cau[○]
{31}   tai kaṃvit nu kvan cau ○ tai kanhyaṅ nu kvan cau [○] tai kanhen nu kvan cau [○]
{32}   tai tīrtha nu kvan cau ○ tai kanso nu kvan cau ○ tai thgān nu kvan cau ○
{33}   tai kandes nu kvan cau ○ tai kanhyaṅ nu kvan cau [○] tai panheṃ nu kvan cau [○]
{34}   tai tīrtha nu kvan cau [○] tai kandeṅ nu kvan cau [○] tai paroṅ nu kvan cau ○ taihe
{35}   m nu kvan cau [○] tai kansvar nu kvan cau [○] tai kan’ū ○ tai kañjā [○] tai vara nukvan [○]
{36}   tai hṛdaya nu kvan cau phoṅ ○ tai khmau sot nu kvan cau [○] tai kaṃpi nu kvancau [○]
{37}   tai kandes sot nu kvan cau [○] tai thleṃ nu kvan cau [pho]ṅ phsaṃ gho
{38}   nu taiy 80 9 ○