Bantãy Čhmàr

{1}   kamrateṅ jagat śrī tribhuvanadeva vraḥ rūpa ka
{2}   mrateṅ ’añ vraḥ jyeṣṭha . . .
{3}   staṃ kamrateṅ jagat śrī tribhuvanadeveśvarī rūpa kamrateṅ
{4}   ’añ śrī tribhuvanadevī
{5}   chvyaṅ kamrateṅ jagat . . . . . . . . . [rūpa kamrateṅ] ’añ śrī yaśodharendradevī ○

{A1}   kamrateṅ jagat śrī sūryyadeva ○
{A2}   rūpa kamrateṅ ’añ prabhākara ○
{B1}   kamrateṅ . . . . . . . . . . . .
{B2}   . . . . . . . . . vraḥ kamrateṅ ’añ . . . . . .
{C1}   vraḥ prajñāpāramitā ○
{C2}   dakṣiṇa ○ kamra[teṅ jagat]. . . . . . . .
{C3}   rūpa kamrateṅ [’añ] . . . . . . .
{C4}   uttara ○ kamra[teṅ jagat]. . . . . .
{C5}   rūpa kamrateṅ ’añ . . . . . . .

{1}   kamrateṅ jagat śrī vijayadeva ○
{2}   rūpa kamrateṅ ’añ śrī vijayavarddhana rājaputra

{1}   ta vraḥ gṛharatna ti kantāl kamrateṅ jagat śrī śrīndradeva
{2}   rūpa kamrateṅ ’añ śrī śrīndrakumāra rājaputra ○
{3}   ’āgneya kamrateṅ jagat ’arjunadeva ○
{4}   iśāna kamrateṅ jagat śrī dharadevapuradeva ○
{5}   nairṛti kamrateṅ jagat śrī devadeva ○
{6}   vāyavya kamrateṅ jagat śrī varddhanadeva syaṅ mantrī ○
{7}   nā bharata rāhu saṃ vuddhi droha ta vraḥ pāda śrī yaśovarmmade
{8}   va pi thleṅ cap vraḥ mandira is vala nagara phoṅ paṅ pitay ka
{9}   ntāl matt vā ra rat iss stac thleṅ chpaṅ ’anak sañjak ’arjuna ’ana
{10}   k sañjak śrī dharadevapura chpaṅ kar saṃtac syaṅ ta tval toy vne
{11}   k stac phjal muḥ phtval bharata rāhu caṃnyar phtyaṅ ni pre oy nāma vraḥ ka
{12}   mrateṅ ’añ śrī nṛpasiṅhavarmma ta ’anak sañjak devapura ta jā pu
{13}   tra ’anak sañjak śrī dharadevapura oy nāma ’aṃteṅ ta ’anak sañjak ta vyar
{14}   sthāpanā rūpa is kulapakṣa phoṅ stac prakop saṃpat nu krama ○ is kulapakṣaphoṅ stac prakop saṃpat nu krama ○
{15}   nā stac dau dvīpa cāmpa ta pūrvvakāla srac stac cap durgga ti kuruṅ
{16}   cāmpa ta jmoḥ śrī jayaindravarmma pre thve le vnaṃ cek katāṅ stac viṅ se
{17}   nāpati cāmpa daṃnep=ra krvay bhā yāṅ mahātāla nāṃ cāmpa velā ’aphu
{18}   y vyar dan=tap mukha vala toy skat lap kroy vañ ’anak samudā
{19}   ya ’ayatt prasam ley stac pañcyar vala phoṅ stac viṅ chpaṅ kar
{20}   lvaḥ vnaṃ trayā car le vnaṃ noḥ cāmpa coṃ juṃ oy chnvat thleṅ ’anak samudā
{21}   ya trū phsyat iss gaṅ ’anak bhay mvay tap guḥ stac chpaṅ cuḥ tal ta je
{22}   ṅ vnaṃ noḥ cāmpa sroṃ saṃtac ’ayat ’anak mvay ta ’āc chpaṅ ley ’anak sa
{23}   ñjak śrī deva ’anak sañjak śrī varddhana jā kule pratijñā syaṅ ’anak sruk
{24}   vijayapura nā spota ’avyaḥ tel mān vraḥ sarvvajña ti kroy hoṅ
{25}   gal dval mann chpaṅ paṅ khlvan toy vnek stac paṅgaṃ tiṅ cāmpa thleṅ
{26}   cren ti phtval sal taiy cāmpa poḥ nu laṃveṅ trū ta phdai syaṅ ta tval
{27}   roḥ pratijñā ○ pandval ’aṃpal rājapuṇya nā stac nāṃ ’anak khmer taṃpiṅ pvan
{28}   n chpaṅ ’anle bhai piy tap pram=piy kar gaṅ iss lvaḥ kamvujadeśa
{29}   prasāda ta ’anak sañjak ta vyar oy nāma ’aṃteṅ sthāpanā rūpa

{A1}   kamrateṅ jagat śrī jayakīrttideva vraḥ rūpa dhūli jeṅ vraḥ kamra
{A2}   teṅ ’añ śrī jayakīrttipaṇḍita vraḥ guru ○ kamrateṅ jagat śrī bhūpendradeva ○kamrateṅ jagat śrī bhūpendreśvarī ○
{D1}   kamrateṅ jagat śrī trailokyarājacūḍamaṇi
{D2}   rūpa kanloṅ vraḥ pāda kamrateṅ ’añ śrī dharaṇīndra . . .
{D3}   ○ dakṣiṇa ○ kamrateṅ jagat śrī vṛddheśvarī ○
{D4}   [u]ttara ○ kamrateṅ jagat śrī jayeśvarī ○
{E1}   kamrateṅ jagat śrī mahīddharadeva ○
{E2}   rūpa kamrateṅ ’añ ’so ○
{F1}   vraḥ kānti kamrateṅ ’añ śrī jayamahānātha ○
{F2}   dakṣiṇa ○ vraḥ bhagavatī śrī ○ vraḥ bhagavatī nārāyaṇī ○
{F3}   uttara ○ vraḥ kamrateṅ ’añ nārāyaṇa ○