Object type: Stele

{A1}   925 śaka pī ket ’āśvayuja śukravāra ’anurādhanakṣatra nu dhūli vraḥ pāda dhūli jeṅvraḥ kaṃmrateṅ ’añ śrī jayavīrava
{A2}   rmmadeva stāc ’āy vraḥ caturdvāra vraḥ śrī jayendranagarī pi mratāñ khloñ śrīpṛthivindrapandita guṇadoṣadaṛśi nu vraḥ sabhā phoṅ paṅgaṃ thpva
{A3}   ṅ nivedana śloka neḥ tem śākha bhūmi kha’val pek raṅgap lāc rmmāṅ cārvār sre vrainai vāp sah chmāṃ vraḥ pāñjī ti vāp ’ap vāp pañ
{A4}   vāp gadākeśa steñ kṣirāhāra me ’yak kanmyaṅ paṃre nu vāp īśānaśiva ’nin thve’apavāda pi srac vyavahāra ○ mān vraḥ śāsana dhūli vraḥ
{A5}   pāda dhūli jeṅ vraḥ kaṃmrateṅ ’añ śrī jayavīravarmmadeva pre cār śloka neḥ tapraśasta ○ oy bhūmi ta roḥh neḥh jā vraḥ karuṇāprasāda ta vāp
{A6}   sah roḥh cāre vraḥ sabhā ○
{B14}   925 śaka pi ket ’āśvayuja śukravāra ’anurādhanakṣatra nu dhūli vraḥ pāda dhūli jeṅvraḥ kaṃmrateṅ ’añ śrī jayavīravarmmadeva stāc
{B15}   ’āy vraḥ gṛha chloṅ vraḥ kralā phdaṃ paścima pi vāp sah chmāṃ vraḥ pāñjīpaṅgaṃ thpvaṅ nivedana man vāp loñ chmāṃ vraḥ pāñjī vāp dān pratyaya
{B16}   glāṅ ta ’ji vāp sah ○ svaṃ vraḥ karuṇāprasāda ○ bhūmi svasti ○ kuṣṭhena ○ krajaṃgaṅga ○ pṛ ○ bhadre travāṅ jvik ○ daṃnap ruṅ ○ khlāñ cravā dramaseṅ laṅlaṅ ’a
{B17}   ṅgañ ○ lāc gaṅgroṅ lveṅ vryaṅ ○ rlaṃ ta gi vraḥ rājya kaṃmraten ’añ ta stāc dauparameśvara ○ man lvoḥ ta gi vraḥ rājya kaṃmrateṅ ’añ
{B18}   ta stāc dau paramaśivapada vāp dās ta ’ji vāp sah ○ duñ sre rlāp ta vāp yactaṃmrvac glāṅ kan[t]āl vala ○ vaudi 1 padigaḥ 2 ○ kadāha
{B19}   □ srū 20 ○ duñ sre sthalā kracap ta dalmāk ○ nu vaudi 1 padigaḥ 1 mās pāda 2 srū20 ○ sre stuk sno ○ pak rvāt [○] travāṅ krasāṅ ○ cho
{B20}   k rhvit ti vāp yo rlaṃ pañjal lak sre neḥ ta me neṃ ta ’ji vāp sah chmāṃ vraḥ pāñjīyok taṃmrya 1 ○ khāl prak 1 liṅ 5 ○ vaudi 1 jyaṅ 6 ○
{B21}   tāmrakaraṇḍa 1 jyaṅ 7 jñaśira yo 1 vlaḥ ○ siddhi sre ta roḥh neḥh man vāp yo rlaṃpañjal slāp ○ dep vāp sat ○ vāp hi ○ vāp ’an ○ vāp ṛṣi ○
{B22}   ta kvan cau vāp yo rlaṃ pañjal thve ’apavāda khmī dravya sot ○ vāp sah nu kulevāp sah ○ oy srū 200 padigaḥ 5 ○ ’nak ta roḥh neḥh ○ nāṃ
{B23}   raṅvāṅ pratyaya dau jānn bhūmi neḥ ○ saṅ gol oy siddhi ta vāp sah nu kule vāp sah○ bhūmi poṃ [○] pik krave ○ ti vāp sah duñ ta vāp va
{B24}   jrapaṇḍita nu vāp paramārthavairoca taṃmrvac taṅvāy ○ vāp jinendrācāryya jeṅvnaṃ chmāṃ vraḥ kralā phdaṃ svāy glok ○ ta gi vraḥ rājya kaṃ
{B25}   mrateṅ ’añ ta stac dau paramavīraloka ○ thlāy bhūmi sre poṃ ○ vaudi 3 ṅan jyaṅ 18liṅ 10 ○ padigaḥ 4 ṅan tula 1 ○ tāmrakaraṇda 1 ṅan jya
{B26}   ṅ 7 ○ jleṅ śata 1 [○] tiṅ śata 1 ○ srū śata 1 ○ raṅko thlvaṅ 2 [○] kañje chnāṅtaṃpvaṅ 1 ○ thlāy bhūmi sre pik krave vaudī 5 ṅan tul 1 jyaṅ 10 padigaḥ 5 ṅan
{B27}   tul 1 jyaṅ 5 ○ svok 2 ṅan jyaṅ 6 liṅ 10 ○ khāl prak 1 liṅ 5 ○ srū śata 3 ○ raṅkothlvaṅ 1 [○] canlyak yo 3 ○ jleṅ śata 3 ○ tiṅ slik 1 śata 1 60 10 ○ rddeḥ
{B28}   ruṅ 1 ○ rddeḥ jeṅ 1 [○] jmol parat 1 [○] thmar 3 [○] jeṅ parass 4 ○ tek paṅgan 2 ○gi caṅvatt bhūmi poṃ nu pik krave ○ ti pūrvva prasap chok gaṅgroṅ ○ dakṣiṇa da
{B29}   lleṅ ○ paścima phlu rddeḥ cval vrai cas ○ uttara prasap kh’val pek sre vrai ○ manpūrvvāpara ta roḥh neḥh svaṃ leṅ vraḥ karuṇāprasāda ○ pi saṅ go
{B30}   l praśasta ○ mān vraḥ śāsana dhūlī vraḥ pāda dhūli jeṅ vraḥ kaṃmrateṅ ’añ ○ jāroḥh kanmī vāp sah ○ vraḥ pandval pre vraḥ sabhā dau saṅ gol
{B31}   praśasta ○ oy ta vāp sah ○ gi caṅvātt bhūmi sruk pṛ ○ ti pūrvva travāṅ vinau prasapchdiṅ ruṅ ○ dakṣiṇa ta rāṃ khlā ○ paścima gaṅgā ○ uttara prasap cuṅ
{B32}   sthalā ○ neḥh sruk devīgrāma nu bhūmi caṅvātt n[o]ḥh nu sruk pṛ nu bhūmicaṅvātt noḥh ○ nu poṃ [○] pik krave ○ pak rvvat [○] stuk sno [○] chok rhvit [○] travā
{B33}   ṅ krasāṅ nu upāya vāp sah hoṅ ○ ti oy ta vāp tapaḥśānti ○ vāp vraḥ prasāda ○ vāpnāgapāla ○ vāp pavitra ○ me ’yak ○ me dān □
{B34}   □ □ prvat ○ vāp ’yak vraḥ paryyaṅ ○ vāp ’yak travāṅ trāc [○] me surendralakṣmī ○thve pūjā vraḥ paryyaṅ ta dau vraḥ kaṃmrateṅ jagat
{C1}   liṅgapura ○ nu chpār ransī ○ nu vraḥ
{C2}   rūpa kaṃmrateṅ jagatt ○ nu vraḥ
{C3}   kaṃmrateṅ ’añ lokeśvara
{C4}   ta praśasta ○ bhūmi ta roḥh neḥ
{C5}   h ’āyatva ta vāp sān thve
{C6}   pūjā vraḥ nu kule ta roḥh
{C7}   neḥh thve rājakāryya nu
{C8}   gi ○ ta gi vraḥ rājya kaṃmrateṅ kaṃ
{C9}   tvan ’añ ta stac dau paramaśi
{C10}   valoka me neṃ ta ’ji vāp sa
{C11}   h duñ tai kanteṃ ’āy vraḥ
{C12}   phtyak ta vāp varmmaśiva vargga śreṣṭha
{C13}   pura ○ thlāy tai kanteṃ ○ jñaśira yo
{C14}   1 ’aṃval yo 2 raṅko thlvaṅ 1 [si]
{C15}   ddhi tai kanteṃ lvoḥ slāp [nu kva]
{C16}   ncau tai kanteṃ phoṅ
{C17}   922 śaka mvāy ket
{C18}   ’āśvayuja candravāra nu mratā
{C19}   ñ śrī raṇakesari khloñ
{C20}   glāṅ nā do ○ paṅgaṃ thpvaṅ niveda
{C21}   na ta dhūlī vraḥ pāda dhūli jeṅ
{C22}   vraḥ kamrateṅ ’añ śrī jaya
{C23}   varmmadeva man vāp nan khlo
{C24}   ñ vrīha ○ vāp videśvara taṃmrva
{C25}   c vrīha nu ’nak vrīha phoṅ
{C26}   samakṣa nu khloñ srū śivapā
{C27}   da pūrvva ’āy kh’val ○ nu steñ
{C28}   pratyaya thvoṅ ○ yok padi
{C29}   gaḥ pvan ○ tiṅ śata 1 ○ jleṅ śata 1 ○
{C30}   vave 1 nai vāp sah ○ ti o
{C31}   y rājakāryya kār ’nak vrī
{C31}   ha phoṅ ○ khloñ vrīha
{D1}   nu ’nak vrīha phoṅ oy rāja
{D2}   kāryya vrīha ○ panlās mūla vā
{D3}   p sah vāp deṅ ○ mān vraḥ śā
{D4}   sana dhūlī vraḥ pāda dhūlī jeṅ
{D5}   vraḥ kaṃmrateṅ ’añ vvaṃ ’āc ti mā
{D6}   n vrīha viṣaya kandvār nu cañcū
{D7}   la phoṅ ○ ta sruk gaṅgā devīgrāma pṛ ○ man lvoḥ ta gi pañca do
{D9}   nava śaka pī ket ’āśvayuja śu
{D10}   kravāra ’anurādhanakṣatra ○ vāp
{D11}   sah paṅgaṃ thpvaṅ nivedana dhū
{D12}   lī vraḥ pāda dhūlī jeṅ vraḥ
{D13}   kaṃmrateṅ ’añ śrī jayavīra
{D14}   varmmadeva ○ roḥh pūrvvāpara neḥ
{D15}   mān vraḥ karuṇā ta paramapavi
{D16}   tra pandval pre jā roḥh noḥ
{D17}   h ○ pre cār cval ta praśasta ○ vā
{D18}   p so ’āyatta bhūmi ta roḥh
{D19}   neḥh ukk thve pūjā vraḥ neḥ
{D20}   nu kule ta mān ta praśasta ○ ta
{D21}   seva ’nau nā paṅgaṃ thpvaṅ niveda
{D22}   na ○ kaṃsteṅ śrī vīrendravarmma ○
{D23}   mratāñ khloñ śrī pṛthivī
{D24}   ndrapandita ○ mratāñ khloñ
{D25}   śrī lakṣmīndravarmma ○ mratāñ
{D26}   khloñ śrī parākramavīra ○
{D27}   khloñ vala khloñ glāṅ nā
{D28}   eka ’āy khsup ○ khloñ va
{D29}   la khloñ gāp mālākāra [○]
{D30}   khloñ vala purāñ ○ vāp
{D31}   muktiśiba galgul [○] mratāñ śrī
{D32}   dharaṇīndravallabha [○] vāp dān [○]
{D33}   vāp roṇa ○ ta srasir praśas[ta]
{D34}   [’ācā]ryyapandita vāp rac □ □
{D35}   □ □ ○

{c1}   □ □ □
{c2}   si □ □ {c3-5} □ □ □ □ □ □
{c6}   tai kandha
{c7}   tai kaṃvai
{c8}   si kansat
{c9}   si narāy
{c10}   si □ □
{c11}   tai □ □ {c12-19} □ □ □
{c20}   tai kanso
{c21}   tai kan □ □
{d1}   tai cīn
{d2}   tai th’yak □
{d3}   tai □ □
{d4}   tai □ □
{d5}   si mandira
{d6}   tai rāga
{d7}   tai śrādhi
{d8}   tai kaṃvrau
{d9}   tai jātivel[ā]
{d10}   tai chke
{d11}   tai mālatī
{d12}   si prāna
{d13}   tai panlās
{d14}   tai kaṃpit
{d15}   tai saṃ’ap
{d16}   □ māgha
{d17}   tai raṅga
{d18}   tai kandeṅ
{d19}   tai kan’ā
{d20}   tai ’āja
{d21}   tai saṃmṛddhi
{d22}   tai kansrāc
{d23}   tai chpoṅ
{d24}   neḥ paṃre □ (A: 15) □ □ n kanmvāy □ □ti loñ ti jvan ta vraḥ ○

{A1}   yāte ṣadbhūtaṣacchata śakaparigraha
{A2}   navamī roc jeṣṭha candradivasavāra uttarabhadra
{A3}   nakṣatra nu mratāñ devasvāmi dīrgghasatra vraḥ
{A4}   kamratāṅ ’añ śrī kedāreśvara puṇya mra
{A5}   tāñ raṅko pi lih canlek yau 1 vlaḥ 1 saṃlo vnāk
{A6}   vera kñuṃ man oy ta vraḥ vā kañyoc vā siddhiyā
{A7}   tra ku kṛs kon ku piti ku harini kon ku piti
{A8}   tmur sre tloṅ 10 1 sru slik 4 gi neḥ tel mra
{A9}   tāñ oy ta poñ saṅkarṣaṇa nu cam ta vraḥ
{A10}   ’āy haṅsapura sabhā ta mār ta tāṅ gi mratā
{A11}   ñ puruṣapāla bhāga[vata] mratāñ sudaraśana bhāgavata
{A12}   mratāñ bhavāditya paṃjuḥ poñ śaṅkaragaṇa
{A13}   poñ śaṅkarabhakti poñ bhāviśāra poñ vi
{A14}   śeṣanan ge ’daḥ teṃ tāṅ cnot vrac ruṅ poñ
{A15}   śruta ratnagana dharmmarakṣa narāya viśevin jānamit
{A16}   pādamūla vā vidagdha vā dāruna nau ge ta voṃ oy gi
{A17}   ge ta dap gi [ge] ta sag gi saptamātā saptapitā niraya ’ati
{A18}   raura mahāraurava ge dau ta gi vrahmatyā ge mān gi
{B1}   mratāñ devasvāmi dīrgghasattra vraḥ kaṃmratāṅ
{B2}   ’añ śrī kedāreśvara puṇya mratāñ dai raṅko
{B3}   liḥ 2 saṃlo vnāk 1 canlek yohv 1 tmur sre pcār pinda gi sre phoṅ 20 kñuṃ tel oy tavraḥ ku vainā kon
{B5}   ku piti ku syāṃ kon ku piti gi tel mratāñ devasvāmi
{B6}   oy ta poñ śruta nu camta vraḥ kaṃmratāṅ ’añ
{B7}   śrī kedāreśvara paṃnos pajuḥ ta gi noḥ kāla mratāñ bhavāditya
{B8}   sabhā ta mār ta teṅ gi mratāñ puruṣapāla sudaraśana
{B9}   saṅkarṣaṇa tāṅ krahap tāṅ cnot candraśila sukṛtavarddha
{B10}   ṇa kyok śaṅkragup sthānugana devaśarmma dharmmāditya kumāravi
{B11}   śeṣa viśeṣavin viśeṣagana utdyama dharmmarakṣa ratnagana candraga
{B12}   na jādharagana ’vai si sabhā ’val sin nau ge ta voṃ oy gi
{B13}   ge ta dap gi ta sak gi saptamātā saptapitā ge dau ta gi niraya
{B14}   ’atiraura mahāraurava vrahmatyāphala ge mān gi

{1}   śrī svasti jaya
{2}   874 śaka vṛhaspativāra nu vraḥ pāda ta stāc dau śivaloka stāc ’ā
{3}   y vraḥ □ □ pi mratāñ śrī saṅgrāmadāruṇa paṅgaṃ thpvaṅ nivedana ○
{4}   svaṃ vraḥ karuṇāprasāda bhūmi ta śūnyamūla pi oy ta kamrate
{5}   ṅ jagat liṅgapura ○ nu kanloṅ kamrateṅ ’añ ’aṅve danle ○
{6}   man bhūmi vrai raṃtyaṅ śūnyamūla ○ vraḥ śāsana pre loñ res
{7}   loñ rājadāsa mūla kanmyaṅ paṃre ○ nu raṅvāṅ ta jmaḥ vāp got nu vāp
{8}   □ dau saṅ gol ta bhūmi vrai raṃtyaṅ ta śūnyamūla oy ta kamrateṅ
{9}   jagat liṅgapura nu kanloṅ kamrateṅ ’añ ’aṅve danle ○ pra
{10}   galbha ta vāp vū nu steñ paramaśivācāryya duk saṅvey kamra
{11}   teṅ jagat liṅgapura nu kanloṅ kamrateṅ ’añ ’aṅve danley
{12}   899 śaka nu kamrateṅ ’añ vraḥ guru paṅgaṃ thpvaṅ niveda
{13}   na ta vraḥ pāda ta stāc dau paramavīraloka man steñ paramaśivā
{14}   cāryya teṅ nau vāp vijaya sanme ni riy bhūmi vrai raṃtyaṅ ta vvaṃ i
{15}   s man vraḥ pāda ta stāc dau śivaloka pre saṅ gol ○
{16}   vraḥ pāda ta stāc dau paramavīraloka pre loñ hitagata vi
{17}   ṣaya śreṣṭhapura khloñ sru dau chvat bhūmi noḥ sot
{18}   saṅ gol oy ta kamrateṅ jagat liṅgapura nu kanlo
{19}   ṅ kamrateṅ ’añ ’aṅve danley pre sthāpanā ’ā
{20}   sana kamrateṅ jagat liṅgapura nu ’āsana kamra
{21}   teṅ ’añ ’aṅve danley pragalbha ta steñ paramaśi
{22}   vācāryya ○ steñ paramaśivācāryya dai khloñ vnaṃ thkval śrī ka
{23}   pāla ○ khloñ vnaṃ candanagiri ○ khloñ bhūtāśa nā sthāpanā vraḥ he
{24}   ma[śri]ṅgagiri khloñ kāryya vraḥ he[ma]śriṅgagiri khñuṃ vraḥ gho vara
{25}   gho kanlyek gho ’āditya gho kandeṅ gho kaṃvit tai saṃ’āp ’ji tai
{26}   chke tai gandha tai □ □ kvann tai kansān tai kaṃvai tai kaṃprvat
{27}   tai kandeṅ tai jvik tai panlāc○ phsaṃ khñuṃ vraḥ 20 5 thmur krapi ○

{B14}   □ □ □ □ □ □ □ □ nu kamrateṅ ’añ □ □ □ □ □ vraḥ guru
{B15}   paṅgaṃ thpvaṅ nivedana ta dhūli vraḥ pāda dhūli jeṅ vraḥ kamrate
{B16}   ṅ ’añ śrī jayavīravarmmadeva pi sthāpanā praśasta neḥ
{B17}   pre vrāhmaṇācāryya oy vara ’nak ta vardheya oy śāpa ’na
{B18}   k yok bhūmi vrai raṃtyaṅ pi thve vakra pi vvaṃ thve roḥh
{B19}   kalpanā kamrateṅ phdai karom ○ vrāhmaṇa ta o
{B20}   y varaśāpa ○ rājapurohita ○ mratāñ khloñ viṣṇu ta vyar
{B21}   mratāñ khloñ □ □ □ □ ○ mratāñ khloñ □make
{B22}   śa ○ kamrateṅ ’añ vraḥ guru ○ kaṃsteṅ ’añ rājani
{B23}   vāsa khloñ saṃtāp ○ steṅ ’añ dharmmāvāsa ’ācāryya homa
{B24}   vraḥ paṃnvās bhāgavata ’val syaṅ ta oy vara ’nak ta vardheya oy
{B25}   śāpa ’nak ta thve vakra pi thve kṣaya bhūmi vrai raṃtya[ṅ] leṅ dau narakk ○
{C1}   tai kaṃprvā[t]kva[n]3
{C2}   ti duñ nu srū
{C3}   nu khñuṃ nu dvak
{C4}   tai khñuṃ
{C5}   tai kaṃvai
{C6}   tai kandeṅ
{C7}   tai kanteṃ
{C8}   gho bhakti
{C9}   gho caṃvuḥ
{C10}   gho hṛdaiśiva
{C11}   gho thgāp
{C12}   gho kansān
{C13}   gho svasti
{C14}   gho kaṃvrauv
{C15}   man khloñ vala khloñ
{C16}   gap sopakāra oy
{C17}   pi nu saṃ tai kanrun
{C18}   gho thgāp
{C19}   khñuṃ rṇnoc
{C20}   tai thṅe kvan 2
{C21}   tai thmās
{C22}   ti duñ nu krapi ta
{C23}   loñ jrai sirasā
{C24}   tai dharmma gho duṃ□
{C25}   gho □ñ□ya ○
{D1}   nā gol ta pāt ta gi oy
{D2}   saṃnvat vraḥ pre hau
{D3}   ’nak niḥsandeha saṅ gol oy viṅ ta □ □
{D4}   □ □ □ □ □
{D5}   sre gmuṃ ti jauv nu [kra]
{D6}   pi[ta]
{D7}   ’nak sañjak ta ’aṅgva
{D8}   y nā cār praśasta
{D9}   vrāhmaṇācāryya ’val
{D10}   chvat bhūmi vrai raṃ
{D11}   tyaṅ □ □ □ □ □ sruk (12-16 : ruiné)
{D17}   steṅ □ □ □ puruṣapradhā
{D18}   na □ □ □ śreṣṭha
{D19}   pura ’val ta ’a
{D20}   ṅgvay nā vrāhmaṇā
{D21}   cāryya oy vara[śā]
{D22}   pa

{3}   ○ neḥ gi roh prabhāva vraḥ liṅga neḥ ta mān ○ ri ’nak ta
{4}   ñyāṅ paṃre is khe pramvāy guḥ ’nak noḥ lvaḥ
{5}   ta siddhi man khmi ta lokadvaya ○ maha pi nu thā le
{6}   y ta ’nak ta ñyāṅ paṃre nu ’aṅveṅ pi nu vvaṃ lvaḥ ta
{7}   prayojana phoṅ ta lokadvaya ○ kamrate
{8}   teṅ ’añ yogī ta pvās ta nehḥ phye phlu purvvo
{9}   ttara tīrthodyāna puṣpārāma neḥ syaṅ dharmma kamra
{10}   teṅ ’añ didai ra ti ’añ parikalpa ’añjeñ pari
{11}   pālana ○ sre guhā ○ tai nārikela ○ si takkarā ○
{12}   pamre ta vraḥ liṅga neḥ nu vraḥ vleṅ ○ vyañjana
{13}   ta jā tem thleṅ ’aṃvi ta ’āśrama ti khloñ
{14}   vala dharmmāvāsa nu kula phoṅ oy dakṣiṇā
{15}   jā dharmma ’nak ta oy dakṣiṇā ○ ri ’nak ta cicāy
{16}   praśasta neḥ dār rājabhaya ta nānāpra
{17}   kāra sapta kaṃnet ○ ri ta paripālana svey vibhava ○

{1}   [jaṃnvan] [kamrate]ṅ ’añ śaṅkarapa[ṇ]ḍ[ita] □ □ □ □
{2}   □ □ □ □ □
{3}   [kamrate]ṅjagat liṅgapura vudi prāk 1
{4}   [kunda]la mās nuk 1
{5}   [ka]nloṅ kamrateṅ ’añ ’aṅve danle
{6}   [ku]ndala mās nuk 1
{7}   graloṅ tai 1 ○ vat 1
{8}   svok ○ kadāha
{9}   kamrateṅ jagat sakavrāhmaṇa
{10}   vudi prāk 1
{11}   vat 1
{12}   kundala mās nuk 1
{13}   vāhurakṣa ti tāṃ ratna ta gi daṃnep=ra padmarāga
{14}   cancyan
{15}   mās snāp vraḥ jaṅgha liṅ 5
{16}   kaṅkana tāṃ padmarāga ta gi liṅ 2
{17}   kamrateṅ jagat suvarṇaliṅga
{18}   khlās 2
{19}   kamrateṅ ’añ nārāyaṇa
{20}   khlās 1
{21}   kamrateṅ jagat chnal 1
{22}   vudi prāk 1
{23}   puṣpabhājana 1 sphaṭikaliṅga ta gi
{24}   kamrateṅ jagat śrī vrahmarakṣa ’āy rudrā
{25}   khlās garop 1
{26}   kośa prāk 1
{27}   kamrateṅ jagat śrī cāmpeśvara
{28}   ’āyoga prāk 1 ○ khlās 1
{29}   kamrateṅ jagat liṅgaparvvata
{30}   khāl prāk 1
{31}   kamrateṅ jagat dviradapura
{32}   khlās 1
{33}   vat 1
{34}   khāl 1
{35}   śivikā 1 vraḥ stac ta gi
{36}   kanloṅ kamrateṅ ’añ
{37}   cancyan 3
{38}   kamrateṅ jagat saptadevakula
{39}   cancyan 7
{40}   kamrateṅ jagat vnaṃ ruṅ hemakundala nuk 1 ○ dhanuśa
{41}   ra prāk 1 ○ kravil prāk 1 ○ cancyan 2 ○ khāl prāk 1
{42}   padigaḥ 1
{43}   kamrateṅ jagat malayaparvvata khāl prāk 1
{44}   cancyan 1
{45}   kamrateṅ jagat śivapāda paścima cancyan 1 padigaḥ 1

{Left fragment1} na kantai □ □ □ □ {Left fragment2} ṅ | kon ku pau si {Left fragment3} lā □ □□ □ □ □ □ □ □ {Right fragment1} oy dāna ta vraḥ svāmi puṇya {Right fragment2} ghoda vāvrau | ta kantai {Right fragment3} ’aras | tmur canmat dneṃ 1 {Right fragment4} ra māla |

{5}   ’aṃnoy ge kloñ vau ’añ ’ame poñ nirjjita
{6}   siṅha ta vraḥ kamratāṅ ’añ śrīmadāmrāta ti oy
{7}   ta poñ candravindu kñuṃ vā □ □ □ □ □ □ | vā vari | vā raṃ □ □
{8}   pa | vā kaṃvraḥ | vā ’nas | vā su□nanda | vā vari | vā vra
{9}   □ □ṅ | vā mukhamātra | vā jmeṅ | vā sāhv | vā □ □ □ □
{10}   □ □ | vā ’anāhv | vā □p | vā □ndra paṅ □ nnā 2 10 1
{11}   [ku] mal ta mān | kon 1 ku lā kaṃ kon 2 ku vāṅ ku layā
{12}   □ | kon 2 ku tralā svāl | kon 1 ku vakāhv | kon 1
{13}   ku kvan | kon | ku jatu | kon 2 ku slā vrai |
{14}   kon 2 ku sunāga | kon 2 ku uṅvai | kon 1
{15}   ku voñ | kon 1 ku mālā □ | kon 1 ku ’me □
{16}   vrai | ku māṅ sopacita | ku hannā vai | kon
{17}   sre travaṅ rhvaṅ sanre 1 sre bhāskaravin pāda 1
{18}   sre man mratāñ [ya]jamāna oy +

{1}   viṅśottaraṣaṭśata śakaparigraha □ □ □ □ □ □ □ □ □ □ □
{2}   □ □ □ □ □ [ha]stanakṣatra vrahaspati[dinavāra] mratāñ
{3}   upatyasvāmi oy vraḥ kamratāṅ ’añ śrī vacasvīśvara
{4}   doṅ gi kñuṃ phoṅṅ ai ta poñ sarvvadatta kon mratāñ
{5}   poñ sarvvadatta oy nu poñ śivarāmapāla □ □ i
{6}   vraḥ ta mān □ □ . . . . . . . . . . .