K.383 Special text on Stele Práḥ Vihãr
{A23} ○ pakṣa khnet sruk ī
{A24} śvaragrāma jaṃnau . ’ava
{A25} dhi bhūmi toy pūrvva pra
{A26} sap bhūmi śambhugrāma .
{A27} ’āgneya prasap bhū
{A28} mi vrai raṃtval . dakṣi
{A29} ṇa prasap bhūmi vrai
{A30} raṃtval sot . naiṛ
{A31} ti prasap bhūmi □ □
{A32} □ □ □ □ □ □ □
{A33} □ □ □ □ uttara
{A34} □ □ □ n vrai □
{A35} □ □ □ □ □ □ □
{A36} prasap bhūmi neḥ phoṅ sya
{A37} ṅ nā mān gol si
{A38} māvadhi [.]
{A39} □ □ □ □ □ □ □
{A40} □ □ □ □ □ □ □
{A41} teṅ sugandha
{A42} teṅ surendra
{A43} loñ vīra
{A44} loñ dhani
{A45} teṅ prasta
{A46} loñ suk
{A47} teṅ subhadra
{A48} teṅ cau
{A49} teṅ dhī
{A50} loñ praṅ {A51-7} . . . . .
{B23} teṅ □ □
{B24} loñ sthira
{B25} teṅ vrau
{B26} teṅ bhavānī
{B27} loñ kavi
{B28} teṅ cān
{B29} teṅ devakī
{B30} teṅ vraḥ {B31-7} . . . . . . .
{B38} teṅ sarasvatī
{B39} teṅ dhau
{B40} teṅ sunaga
{B41} teṅ ti □
{B42} loñ vara thṅe
{B43} loñ rāy
{B44} teṅ kantāl
{B45} teṅ sthirabhāgya
{B46} loñ sthirapunya
{B47} teṅ dhān
{B48} loñ śacī
{B49} loñ śrīmāna
{B50} teṅ reda
{B51} teṅ śakunī
{B52} teṅ utpala
{B53} teṅ mādhavī
{B54} teṅ bhek
{B55} teṅ □ □
{B56} □ □ sthirabhakti
{B57} □ □ □ □ □
{C23} loñ vṛk
{C24} teṅ navaśrī
{C25} teṅ vrau
{C26} teṅ roṅ
{C27} loñ □ □
{C28} teṅ s□ □
{C29} teṅ □ □
{C30} loñ hṛdaya
{C31} loñ ghṛta
{C32} teṅ □ □
{C33} teṅ śreṣṭha □ □
{C34} teṅ jīva
{C35} teṅ □ □
{C36} teṅ bhāgya
{C37} loñ suhala
{C38} loñ saṃpūraṇa
{C39} teṅ subhadrā
{C40} teṅ sumitrā
{C41} teṅ ratna
{C42} teṅ ren
{C43} loñ śrī
{C44} loñ vyāsa
{C45} loñ vāṅ
{C46} loñ teṃ raṃtval
{C47} loñ dic
{C48} ’me loñ vut
{C49} loñ vut
{C50} loñ □ □
{C51} loñ vrau
{C52} loñ teṃ ullara
{C53} teṅ dip
{C54} loñ vṛk
{C55} teṅ vañ
{C56} teṅ dhan
{C57} teṅ kṛṣṇā
{D23} teṅ cau
{D24} □ □ □ □
{D25} teṅ śrī
{D26} loñ mūla
{D27} teṅ vaṅ
{D28} teṅ snaṃ
{D29} teṅ cṛs
{D30} teṅ sān
{D31} teṅ vi
{D32} teṅ rāy
{D33} teṅ bhāgya
{D34} teṅ dhān
{D35} loñ □ □
{D36} teṅ □ □
{D37} loñ □ □
{D38} teṅ nava
{D39} teṅ yuvatī
{D40} loñ jeṅ tyak [.]
{D41} ○ pakṣa rṇoc sruk
{D42} śambhugrāma jaṃnau ’a
{D43} vadhi bhūmi toy pūrvva
{D44} prasap bhūmi vrai □ □
{D45} ’āgneya prasap bhū
{D46} mi dharmma □ □ □ . dakṣi
{D47} ṇa prasap bhūmi □ □
{D48} grāma . naiṛti prasap
{D49} bhūmi vrai raṃtval . paścima
{D50} vāyavya prasap bhū
{D51} mi īśvaragrāma . uttara
{D52} īśāna prasap bhūmi vrai
{D53} krvas . prasap bhūmi neḥ
{D54} phoṅ syaṅ nā mān
{D55} gol simāvadhi .
{D56} teṅ □ □ □ ṅ
{D57} teṅ so
{E23} loñ juṃ vara
{E24} □ □ cau
{E25} □ □ □ □ □ □ □
{E26} □ □ □
{E27} teṅ □ □
{E28} loñ □ □
{E29} teṅ cāñ
{E30} loñ s □ □
{E31} teṅ vasanta
{E32} teṅ sthira
{E33} loñ s □ □
{E34} teṅ □ □ i
{E35} teṅ □ ti
{E36} teṅ □ □ □
{E37} teṅ □ □ □
{E38} loñ □ □ □ □ □
{E39} loñ vau
{E40} teṅ vrau
{E41} teṅ ṅā
{E42} teṅ i □ □
{E43} loñ vāp
{E44} teṅ umā
{E45} loñ dham
{E46} teṅ vāṅ
{E47} loñ kavi
{E48} loñ vis
{E49} teṅ dhan
{E50} loñ ghu
{E51} loñ □ □ □
{E52} teṅ myaṅ
{E53} loñ mūla
{E54} loñ dham
{E55} loñ lut
{E56} teṅ so
{E57} loñ □ □ □
{F23} loñ □ □ □
{F24} loñ □ □ □
{F25} teṅ vrau
{F26} teṅ □ □ □
{F27} □ □ □ □ □ □ □
{F28} teṅ ṅe
{F29} teṅ vīja
{F30} □ □ □ □ □ □ □
{F31} teṅ □ □ □
{F32} teṅ □ □ □
{F33} teṅ ṅe
{F34} loñ saṃ □
{F35} loñ vrahma
{F36} tai kanprat
{F37} si vraḥ tru □ ñ [.]
{F38} ○ ’avadhi bhūmi sruk
{F39} k bhavahrāma to
{F40} y pūrvva prasap bhū
{F41} mi sruk vilopa
{F42} □ l vilopa bhā
{F43} ga mvāy . ’āgneya
{F44} prasap bhūmi dharmma
{F45} □ □ . dakṣiṇa prasap
{F46} bhūmi chok . naiṛrti
{F47} prasap bhūmi cho
{F48} □ □ sot . paści
{F49} ma prasap bhūmi caṃna
{F50} t kmek . vāyavya
{F51} prasap bhūmi travā
{F52} ṅ caruḥ . uttara is
{F53} teṅ landeṅ dau
{F54} prasap bhūmi viṅ .
{F55} īśāna prasap bhū
{F56} mi suvarṇa harlam
{F57} □ □ □ □ □ □ prasap
{G23} bhūmi neḥ phoṅ
{G24} syaṅ nā mān go
{G25} l simāvadhi .
{G26} teṅ vrai kandiṅ
{G27} loñ vrau
{G28} teṅ tamvāṅ ju
{G29} teṅ myaṅ
{G30} teṅ śrī
{G31} loñ so
{G32} teṅ □ □
{G33} loñ gandha
{G34} teṅ umā
{G35} teṅ vrau
{G36} teṅ □ □
{G37} loñ su □ □
{G38} teṅ ro
{G39} teṅ □ □
{G40} teṅ □ □
{G41} teṅ lo
{G42} teṅ dhān
{G43} teṅ so
{G44} loñ □ āti □
{G45} teṅ dep
{G46} teṅ phkāy
{G47} loñ drākṣi
{G48} teṅ saṃ . teṅ su □
{G49} loñ pā . teṅ naṃ
{G50} si vāra khci . tai māgha
{G51} si māgha . si sundhar
{G52} si kansak . tai kante
{G53} n . si kañcan . tai
{G54} thyak . tai khmau . si svā
{G55} ṅ . tai ’me □ □ . tai □ □ .
{G56} si kansaṃ . tai □ □
{G57} □ □ □ □ □ □ □ □ □ □ □
{c1} □ □ □ □ □ □ ’nak □ □ □
{c2} syaṅ paripālana caṃ
{c3} nyar □ □ □ pratiṣṭhā □ □ . ’nak
{c4} noḥ svey svarggāpavargga . ri ta cicā
{c5} y śilastambha neḥ ’nak noḥ dau
{c6} ta dvātriṃśanaraka tarāp vraḥ candrā
{c7} ditya mān ley ○
{d1} □ □ □ □ śaka
{d2} □ □ □ □ ket puṣya □ □ □
{d3} nakṣatra □ □ mvāy ’antva
{d4} ṅ dik mvāy vinādika pi thmā □ □ □
{d5} ālaya gi nu vraḥ pāda kamrate
{d6} ṅ ’añ śrī sūryyavarmmadeva pa
{d7} ndval [pre] dhūli jeṅ kamra
{d8} teṅ ’añ śrī divākarapaṇḍita
{d9} □ □ □ sarvadravya □ □ dakṣi
{d10} ṇa [.]
{d11} ○ 1043 śaka
{d12} navami ket māgha vudhavāra
{d13} gi nu dhūli jeṅ kamrateṅ
{d14} ’añ śrī divākarapaṇḍita
{d15} jauv bhūmi ’anle mvāy hau
{d16} □ □ □ karol cyaḥ saṅ go
{d17} l juṃ duk jmah rudrālaya
{d18} jvan ta kamrateṅ jagat
{d19} śivaliṅga vnur dnaṅ □ □
{d20} ’anle mvāy bhūmi teṃ thkū
{d21} jaṃnauv saṅ gol juṃ duk
{d22} jmaḥ pañcayajña jvan ta kamrate
{d23} ṅ jagat śivaliṅga dnur dnaṅ [.]
K.382 Stele of Práḥ Vihãr
{A1} [pa]ndval ta vraḥ [k]aṃ[ste]ṅ [pha]lapriya ri śi □ □ □ □
{A2} □ □ □ □ neḥ man ta steṅ śivaśakti □ □ □ □ □ □
{B1} □ k ’nau yaśodharagiri vraḥ dai man mān śivājñā pi pre
{B2} yok noḥ pi dau sthāpanā ’anrāy nā kamrateṅ jagat śrī śi
{C1} kharīśvara pre thve śāpā śivājñā ○ 969 śaka daśamī ket vai[śākha vṛha]
{C2} [spa]tivāra nu vraḥ kamrateṅ ’añ śrī □ □ i □ □ [paṅgaṃ] { D1} [thpvaṅ] nivedana □ □śivājñā noḥ gi pi mān vraḥ karuṇā vraḥ pāda { D2} [kamrateṅ kaṃtvan ’añ śrīsū]ryyavar[mma]deva [ta] roh neh ○
K.381 Door jamb of Práḥ Vihãr
{1} 946 . . . . . . . . . . . . . . . . . . . .
{2} teṅ ’añ vraḥ . . . . . . . . . . . . . . . . . vraḥ
{3} kamrateṅ ’añ nu bhū[mi] □ □ □ □ □ □ □ □ □ □ □ □ ’nak ta cicāy noḥ dau
{4} naraka ri ta varddhe dau svargga || raṃlik dau ta vraḥ kamrateṅ ’añ nau ’ampall khñuṃman ’nak o
{5} y pandap [ta] gi mān nu vastu ta yukti phoṅ siddhi ta vraḥ kamrateṅ ’añ pre duk ta rikta
{6} praśasta nau roḥh kalpanā vraḥ kamrateṅ ’añ ti vraḥ pre thve roḥ iṣṭi vraḥ kamra
{7} teṅ ’añ || 948 śaka nu vraḥ kamrateṅ ’añ tapasvīndrapandita jvan dravya caṃnāṃkalpanā
{8} saṅkrānta ta kamrateṅ jagat śrī śikhareśvara gobhikṣa 6 vat ṅan jyaṅ vyar liṅ 10 kaṅkana4 □ □ □
{9} samāhara ta gi svok kadāha vraḥ go krapi tamrya sruk bhūmi khñuṃ neḥ naitapasvīndrā[śrama]
K.380E/3 Door jamb of Práḥ Vihãr
{56} 960 śaka ṣaṣṭhi ket mārggaśira nu mān vraḥ karuṇā ta paramapavitrapandval vraḥ kamrateṅ ’añ śrī vāgindrapandita sruk
{57} vāgindra man mān ’nak hau vraḥ kamrateṅ ’añ rudrā pre cuñ pandval ta’aṃcas ’nak nu pradhāna phoṅ phle vraḥ ’āśrama ’āy
{58} prasān vrai rmmyat thyeṅ kāñcanapura kuruṅ tanmer ’āy vraḥmattavāraṇa man kamrateṅ jagat śrī bhadreśvara liṅgapura ti vrah
{59} pāda kamrateṅ kaṃtvan ’añ śrī sūryyavarmmadeva sādhya nu vraḥtapovīryya gi pi mok rājya ’āy śrī śikharīśvara piy gi vraḥ
{60} tejaḥ prādurbhāva pratyakṣa pi loka mel pre ’nak vraḥ ’āśrama phoṅ didaira syaṅ ta udyoga bhakti ta ka
{61} mrateṅ jagat śrī śikharīśvara pre thve roḥh caṃnār ta vraḥ śilāstambha prekaṃ pi mān ta sandeha man kaṃmrateṅ kaṃ
{62} tvan ’añ nu pragalbha ta santāna ’nak pās khmau ley gi pi vvaṃ pragalbhaman santāna ’nak pās khmau syaṅ ta sāha
{63} sika sapp vraḥ rājya lvoḥ ta vraḥ kaṃsteṅ pās khmau daiy neḥ gi ruv tikamrateṅ kaṃtvan ’añ pre nirṇaya
{64} dau hoṅ tyaṅ caṃnyar dau pi kamrateṅ phdai karoṃ nu pre tr[v]ac upāya’nak pās khmau pi nu rāl nu ’nak vraḥ ’āśrama gi pi
{65} kamrateṅ kaṃtvan ’añ vvaṃ iṣṭi pi śatagrahaṇa ta ’nak pās khmau leycaṃnyar dau tyaṅ nu mān santāna ’nak pās khmau
{66} ta nu sañjak pi nu paṅgaṃ thpvaṅ nivedana man neḥ ’nak vraḥ ’āśramatel ti santāna dai gi ta paripālana pre phtāṃ ta santāna didai ra pre cu
{67} ñ thvāy saṃnvat ukk man vraḥ pāda kamrateṅ kaṃtvan ’añ śrīsūryyavarmmadeva ta mān vraḥ santāna prakṛta vraḥ āśrama nu caṃnāṃ kalpa
{68} [nā] □ □ □ gi ta vvaṃ iṣṭi pi ’āyatta ta ’nak pās khmau ley ○
K.380W/3 Door jamb of Práḥ Vihãr
{31} 960 śaka ’amāvasyā vaiśākha nu vraḥ kamrateṅ ’añ śrī pṛthivīndrapanditavraḥ
{32} sabhāpati [nā] eka sruk kuti ruṅ samayuga pi pandval vraḥ śāsana takaṃsteṅ śrī samarendrādhipativarmma sruk ’avadhyapura
{33} tamrvac vraḥ rājakāryya nā kamrateṅ jagat śrī śikharīśvara pi pre cār tavraḥ śilāstambha nā kamrateṅ jagatt ○
K.380W/4 Door jamb of Práḥ Vihãr
{34} 971 śaka pañcamī roc caitra [nu vraḥ] [kamrate]ṅ ’añ śrīgaṇitendrapandita hor sruk □ vi □ □ □ □ vraḥ kamra[teṅ]
{35} ’añ vyāpāra sruk ’avadhyapura nu □ □ □ □ □ □ □ □ □ □ □ □ kanmyaṅ nukaṃsteṅ ’añ □ □ □ □ □ □ □ □ □ □ [pā]ñjiy
{36} pi jvan khñuṃ ta jmaḥ tai kansa tai thṅe tai □ □ □ □ □ □ □ □ □ □ □ □ takamrateṅ jagat śrī śikharīśvara □ □ □ □ □ □ mvāy
{37} ri kule ta paripālana vvaṃ ’āc ti cicāy . . . . . . . . . mvāy
K.380E/1 Door jamb of Práḥ Vihãr
{1} 960 śaka saptamī roc srāvaṇa nu vraḥ pā
{2} da kamrateṅ kaṃtvan ’añ śrī sūryyavarmmadeva stac vraḥ kralā seva ’āynagara śrī yaśodharapura pi pandval ta vraḥ
{3} kamrateṅ ’añ śrī rājapativarmma ta cau vraḥ kamrateṅ ’añ śrīrājapativarmma ta ’cas sruk ’avadhyapura ○ man [kamra]
{4} teṅ jagat śrī bhadreśvara liṅgapura mok punarbhāva ’āy śrī śikharīśvara piygi vraḥ tejaḥ ta yal pratyakṣa
{5} prādurbhava riy ’nak ’āśrama ’āy prasān vrai rmmyat thyeṅ kāñcanapurakuruṅ tanmer ta nai vraḥ santāna vraḥ [pāda]
{6} kamrateṅ kaṃtvan ’añ śrī sūryyavarmmadeva [pre] saṃ mūla nu kamrateṅjagat śrī śikharīśvara pre hau [khloñ]
{7} ’aṃcās ’nak nu pradhāna sapp sruk noḥ pre nāṃ kulavṛndopāya nu ’nakśapata ’āy nā kamrateṅ jagat śrī śi
{8} kharīśvara leṅ syaṅ ta bhakti ta kamrateṅ jagat sanme ni nu pādamūla phoṅudyoga paripālana kamra[teṅ jagat sa]
{9} rvvaprakāra leṅ sampūraṇa velā mān ’nak ta khmāṅ=ni sāhasika phoṅ pikhmi ’akrānta □ □ □ □n kamrateṅ jagat nu dra
{10} vyopāya phoṅ daha ti tyaṅ dai loḥ daha ti ’nak dau □ □ □ □ leṅ syaṅ □ □ □□ dai □ ndr □ □ □ □ □ □
{11} leṅ chpāṅ kar kamrateṅ jagat nu dravyopāya k □ □ □ □ □ □ □ phoṅ □ □ □□ ṇa □ □ □ nu rājakāryya □ □
{12} □ ṅ phoṅ daṃnep=ra gi cār cām ta ti kamrateṅ phdai karom □ □ □ pre’nak vraḥ jaṃnvan śrī śikharīśvara thve sre ’nak
{13} ’āśrama nā dau thve mvāy ’anle nu ’nak vraḥ jaṃnvan ’āy śrī śikharīśvara□ □ □ □ □ nā karuṇā vraḥ śāsana
{14} vraḥ pāda kamrateṅ kaṃtvan ’añ śrī sūryyavarmmadeva ta gi upakalpakamrateṅ jagat liṅgapura pre ’nak [’ā]
{15} śrama noḥ oy leṅ grap vvaṃ ’āc ti vvaṃ mān pamre thve kalpaṇā □ □ □ □□ □ nā ’nak viṣaya nīlaka
{16} ntha phoṅ hau kulagaṇa noḥ phoṅ pre syaṅ ta mok śapata bhaktiy takamrateṅ jagat śrī śikharīśvara leṅ
{17} sarvvaprakāra ○ nā bhāga vīra nu rājakṣatra nu phduk v □ □ □ vrai saṃlāñ□ □ □ □ □ khvass nu nāgacāra khlā hau iss
{18} ’nak noḥ nu gaṇa noḥ phoṅ oy śapata leṅ nu bhaktiy ta kamrateṅ jagat śrīśikharīśvara pre syaṅ ta sanme ni
{19} nu ’nak vraḥ jaṃnvan phoṅ nu ’nak ’avadhyapura t[a] thve kalpaṇā [cāṃ]caṃnāṃ ta kamrateṅ jagat śrī śikharīśvara ○ nā bhāga
{20} vīravarmma ta yal man ñyāṅ udyoga cāp □ □ □ kamrateṅ jagat pi nāṃkulavṛndopāya phoṅ mokk śapata bhaktiy ta
{21} kamrateṅ jagat ○ toy bhāga jeṅ vnaṃ man sukarmmā velā nu kamrateṅjagat pi nāṃ iss kulasantāna phoṅ mok śapata
{22} bhaktiy ta kamrateṅ jagat roḥh vaddha neḥh ukk nau ruv kule smiṅ nu’nak phoṅ ’āy pramān jeṅ vnaṃ ta sa
{23} mīpa phoṅ pre syaṅ ta śapatta teṃ bhaktiy ta kamraten jagat leṅ mvāyroḥ vaddha nu sukarmmā ukk ○ ruv bhāga thpal
{24} saṃlāñ man thpal saṃlāñ vvaṃ udyoga bhaktiy ta kamrateṅ jagat hau isskulopāya noḥ phoṅ
{25} mok śapatta bhaktiy ta kamrateṅ jagat ukk ○ riy phalapriyasantāna ti śrīśikharīśvara gi pi pre oy śa
{26} pata ’nak roḥh neḥ phoṅ nā vaddha nu ta prāṃ ta roḥh neḥ cār ta vraḥśilāstambha nā kamrateṅ jagatt duk ta vraḥ rikta ’a
{27} y kanloṅ ○ pre ’nak ta roḥh neḥh phoṅ phtāṃ ta kulasantāna ta nu māndau vnek ni pre syaṅ ta udyoga bhaktiy ta
{28} kamrateṅ jagat śrī śikharīśvara roḥh vaddha neḥh leṅ sarvvaprakāra ○
K.380W/2 Door jamb of Práḥ Vihãr
{11} 959 śaka ’amāvasyā māgha ta jā puṣya dhaniṣṭhanakṣatra madhyāh[n]a nu vraḥkamrateṅ ’añ śrī rājapativarmma cau vraḥ
{12} kamrateṅ ’añ śrī rājapativarmma ta ’cas sruk ’avadhyapura paṅgaṃ thpvaṅ nivedanata vraḥ pāda kamrateṅ kaṃtvan
{13} ’añ śrī sūryyavarmmadeva ruv gi bhaktiy śrī sukarmmā kaṃsteṅ nā man jā tem ta gikarmma durggama phoṅ nā kamra
{14} teṅ jagat śrī śikharīśvara nu kamrateṅ jagat śrī vṛddheśvara nu man udyoga cāṃpāñjīy kāla vraḥ śivatejaḥ ka
{15} mrateṅ jagat śrī śikhareśvara ta yal pratyakṣa prādurbhāva ta nu jā vraḥyaśasthirāvāsana nu man gi ta mān santāna ta cāṃ li
{16} khita kamvuvaṅśa nu ’aṅga vraḥ rājakāryya likhita kīrtī kamrateṅ phdai karoṃdaṃnep=ra gi vraḥ pāda śrutavarmmadeva lvoḥ ta vraḥ kī
{17} rtti vraḥ pāda kamrateṅ kaṃtvan ’añ śrī sūryyavarmmadeva ta rājakula vraḥ pādakamrateṅ ’añ śrīndravarmmadeva ta stac
{18} dau īśvaraloka nu kaṃmrateṅ ’añ śrī vīralakṣmī mahādevī ’āy vrac vraḥ sruk rājakulavraḥ pāda śrī
{19} harṣavarmmadeva ta stac dau rudraloka nu vraḥ pāda śrīśānavarmmadevata stac dauparamarudraloka nu man gi ta
{20} laṃtāp vraḥ likhita pi duk ta vraḥ rikta pi duk nā kamrateṅ jagat śrī śikharīśvara nukamrateṅ jagat śrī vṛddhe
{21} śvara nu ta ti duk ’āy kanloṅ nu man śapata teṃ bhaktiy mvāy vaddha nu vraḥkamrateṅ ’añ śrī rājapativarmma gi
{22} pi vraḥ pāda kamrateṅ kaṃtvan ’añ śrī sūryyavarmmadeva karuṇā pandval vraḥ varata śrī sukarmmā kaṃsteṅoy prasāda rājadra
{23} ya nu sruk vibheda mṛtakadhana mratāñ śrī pṛthivīnarendra kaṃn[u]ṅ kaṃsteṅ śrīmahīdharavarmma vraḥ sruk ta śrī suka
{24} rmmā kaṃsteṅ pandval pre cār ta vraḥ śilāstambha nā kamrateṅ jagat śrī śikharīśvarapre cār ta śilāpraśasta pi duk ta sruk
{25} vibheda man vraḥ pāda kamrateṅ kaṃtvan ’añ śrī sūryya[varmma]deva oy vraḥkaruṇāprasāda ta śrī sukarmmā kaṃsteṅnu ku
{26} lasantāna śrī sukarmmā kaṃsteṅta ti duk ta sruk vibheda ta jmaḥ kurukṣetra īlū || ○[2½ lines in Sanskrit]]
{29} riy kulasantāna vāp mau vibheda ta ’nak kaṃsteṅ śrī mahīdharavarmma vraḥ sruk tivraḥ kamrateṅ ’añ śrī rāja
{30} pativarmma paṅgaṃ thpvaṅ nivedana man vraḥ karuṇā pandval pre rlek bhūmi raṅgolpi oy nā ’aṅgvay snoṅ sruk vibhe
{31} da pandval pre dau jā varṇṇāśrama
K.383 The Stelæ of Phnoṃ Sandak and Práḥ Vihãr
{A3} 1041 śaka pañcamī □ □ śrāvaṇa candravāra nu vraḥ pādakamrateṅ ’añ śrī sūyyavarmmadeva stac ’nau nā vraḥ kra
{A4} lā [nu gi] vraḥ kamrateṅ ’añ vrāhmaṇa kamrateṅ ’añ rājakularājaputra mahāmantri senāpati vraḥ kamrateṅ ’a
{A5} ñ guṇadoṣadarśi ta pvan ’nak sañjak khloñ glāṅ ta pvan ’naksañjak khloñ vraḥ laṃvāṅ phoṅ syaṅ ta gāl pi bhagavat pā
{A6} da kamrateṅ ’añ ta guru śrī divākarapaṇḍita chlaṅ havirvvādavraḥ pāda kamrateṅ ’añ śrī sūryyavarmmadeva stac cuḥ le
{A7} vraḥ □ □ □ □ □ □ □ □ □ □ □ □ □ □ □ □ □ □ lek vraḥ ’añjali pandvalpre sthāpanā praśasta neḥ ○ bhaga
{A8} vat pāda kamrateṅ ’añ ta guru śrī divākarapaṇḍita sruk vnur dnaṅviṣaya sadyā varṇa karmmāntara triṇi uditodita
{A9} □ □ va □ □ □ □ vayaḥ guḥ ryyan paryyan iss ’āgama phoṅ thve isstapaḥ phoṅ ○ lvaḥ ta rājya vraḥ pāda kamrateṅ ’añ śrī u
{A10} dayādityavarmmadeva ta svey rājya nu 972 śaka pi sthāpanākamrateṅ ’añ suvarṇaliṅga □ □ □ □ □ □ □ □ □
{A11} pi duk ’arcana bhagavat pāda kamrateṅ ’añ ta guru śrīdivākarapaṇḍita gi ta ’añjeñ ’arcana [vraḥ neḥ] ○ lvaḥ ta rājya vraḥ pāda
{A12} kamrateṅ ’añ śrī harṣavarmmadeva bhagavat pāda kamrateṅ’añ ta guru śrī divākarapaṇḍita gi ti ’añjeñ [jā ’ācāryya]pra
{A13} dhāna nā catvārī ○ lvaḥ ta rājya vraḥ pāda kamrateṅ ’añ śrījayavarmmadeva [ta] svey vraḥ dharmmarājya pi prās [tapaḥ thve]
{A14} sarvvayogya ta jā vraḥ guru ta nu thve rājābhiṣekahoma [nu]vraḥ yajña phoṅ bhagavat pāda kamrateṅ ’añ ta guru śrī divāka
{A15} rapaṇḍita gi ti ’añjeñ jā vraḥ guru thve rājābhiṣekahoma[nu]vraḥ yajña phoṅ oy nāma bhagavat pāda kamrateṅ ’añ ta
{A16} guru śrī divākarapaṇḍita prasāda hemadolā pi jiḥ sitātapatranara ti pre ’nak chattradhāra [’nak] ta seṅ prasāda sarvvadra
{A17} vya ta daṃnep=ra khāl mās vāna vat khlās pratigraha taṃryya’seḥ □ khñuṃ nu dāsī ’val ta bhagavat pāda kamrateṅ ’añ ta guru śrī di
{A18} vākarapaṇḍita jvan sap devatākṣetra phoṅ thve yajña sthāpanājyak travāṅ oy dāna dravya ta daṃnep=ra khāl mās
{A19} vat khlās pratigraha taṃryya ’seḥ khñuṃ ta vrāhmaṇa paṇḍitasap bhāga nu ’nak ta dīnānātha phoṅ ta gi man vraḥ pāda kamrate
{A20} ṅ ’añ śrī jayavarmmadeva stac kṣetrādhigama [dau] tīrthā [tadaṃep=ra] dau kamrateṅ jagat śrī cāmpeśvara bhagavat pāda kamrate
{A21} ṅ ’añ ta guru śrī divākarapaṇḍita gi ti ’añjeñ dau □ □ □ □ ta sapdevatākṣetra phoṅ ○ lvaḥ ta rājya vraḥ pāda kamra
{A22} teṅ ’añ śrī dharaṇīndravarmmadeva ta jā vraḥ ’ryāṃ vraḥ pādakamrateṅ ’añ śrī jayavarmmadeva bhagavat pāda kamrateṅ ’a
{A23} ñ ta guru śrī divākarapaṇḍita gi ta jā vraḥ guru thverājābhiṣekahoma[nu] vraḥ yajña phoṅ prasāda sarvvadravya ’val tabhagavat pā
{A24} da kamrateṅ ’añ ta guru śrī divākarapaṇḍita jvan sapdevatākṣetra phoṅ thve yajña jyak travāṅ sthāpanā oy dā
{A25} na dravya ta daṃnep=ra khāl mās vat khlās pratigraha taṃryya’seh khñuṃ ta vrāhmaṇa paṇḍita sap bhāga nu ’nak dīnānātha pho
{A26} ṅ ○ lvaḥ ta 1035 śaka pi vraḥ pāda kamrateṅ ’añ śrīsūryyavarmmadeva ta jā vraḥ cau matṛpakṣa vraḥ pāda kamrateṅ ’añ
{A27} śrī jayavarmmadeva nu vraḥ pāda kamrateṅ ’añ śrīdharaṇīndravarmmadeva svey vraḥ dharmmarājya ’añjeñ bhagavat pādakamra
{A28} teṅ ’añ ta guru śrī divākarapaṇḍita jā vraḥ guru gi ta thverājābhiṣeka man vraḥ pāda kamrateṅ ’añ [ryyan] thve vraḥ dīkṣā ryya
{A29} n iss siddhānta phoṅ ta daṃnep=ra vraḥ guhya thveśāstrotsava phoṅ oy dakṣiṇā roḥ ta □ □ □ □ □ □ □ □ s oy
{A30} hemadolā pañcaśīra pi jiḥ oy māyūra kanakadaṇḍa vyarsitātapatra pvan □ □ □ □ □ □ □ □ □ tāṃ sarvva
{A31} ratna ta gi pi duk ta daṃnep=ra makuṭa kundala karṇābharaṇakeyūra kaṅkana kaṇṭhī udaravandha □ □ □ □ □ □ □ □ ’aṅgulī
{A32} yaka navaratna vāna vat khlās pratigraha cok chlyak khāl māsgraloṅ tai canhvay nu □ □ □ □ □ □ □ □ □ □ □ ta
{A33} bhagavat pāda kamrateṅ ’añ samavarṇa ti tāk ’aṃvi ta vraḥkralā glāṅ sap thṅai syaṅ ’nak rājakāryya □ □ □ □ □ □ bhagava
{A34} t pāda kamrateṅ ’añ gi ti ’añjeñ thve vraḥ koṭihoma vraḥlakṣahoma vraḥ □ □ □ homa vraḥ pitṛyajña vraḥ □ □ yajña
{A35} sap saṃvatsara gi roḥ vraḥ śloka vraḥ pāda kamrateṅ ’añ śrīsūryyavarmmadeva ○ [Sanskrit stanza]
{A37} oy vraḥ dāna sarvvadravya mās prāk ratna vāna vat khlāspratigraha sruk dāsadāsī taṃryya ’seḥ go kapilādi ’val ○ ma
{A38} n bhagavat pāda kamrateṅ ’añ ta guru śrī divākarapaṇḍita thvekṣetrādhigama pi jvan dravya ta devatākṣetra phoṅ daṃnep=ra
{A39} kamrateṅ jagat śrī bhadreśvara gi roḥh vraḥ śloka vraḥ pādakamrateṅ ’añ śrī sūryyavarmmadeva duk pi pre cār ta hemado
{A40} lā phoṅ nu dravya ta roḥh noḥ phoṅ pi jvan ta devatākṣetraphoṅ sap ’anle ○ [Sanskrit stanza]
{A42} bhagavat pāda kamrateṅ ’añ ta guru śrī divākarapaṇḍita jyakdanle ti hau śrīdivākarataṭāka ’nau kamrateṅ jagat śrī bha
{A43} dreśvara saṅ ’āśrama duk dāsadāsī ta gi jvan srukmadhyamadeśa sruk taṅkāl nu caṃnat bhāganaya noḥ nu dāsadāsī srā □□ □ □
{A44} thve caṃnāṃ kalpanā roḥ ta pāñjiya neḥ raṅko paryyaṅ vraḥvasana dyān dhūpa kriyā sraṅ rmmāṃ caṃryyāṅ smevya tūryya chmāpvṅya ’arca
{A45} na pratidina ○
{A45} nā kamrateṅ jagat śrī śikharīśvara □ □ □ □ □ □ daṅ bhagavatpāda kamrateṅ ’añ ta guru śrī divākarapa
{A46} ṇḍita sthāpanā kamrateṅ ’añ ta rāṃ suvarṇapratimā □ □ □ □ □□ □ □ □ □ kanloṅ kamrateṅ ’añ jvan dravya □ □ □ □ □
{A47} śambhugrāma bhavagrāma jyak danle sap sruk □ □ □ □ □ saṅ’āśrama duk dāsadāsī jvan dravya ta gi thve caṃnāṃ roḥ ta pāñjiya
{A48} neḥ raṅko paryyaṅ vraḥ vasana dyan dhūpa kriyā sraṅ rmmāṃcaṃryyāṅ smevya tūryya chmāp vṅya ’arccana pratidina dravya tibhagava
{B1} t pāda kamrateṅ ’añ ta guru śrī divākarapaṇḍita jvan ta kamrateṅjagat śrī śikharīśvara thniṃ suvarṇakośa makuṭa kundala keyūra
{B2} kaṅkana kaṇṭhī udaravandha kāñcī nūpura pāduka ta tāṃsarvvaratna ta gi ti vraḥ pāda kamrateṅ ’añ śrī sūryyavarmmadeva oydāna nā thve
{B3} vraḥ dīkṣā hemavitāna ti chlāk padma tāṃ sarvvaratna tās phdaivraḥ prāsāda kaṅsamaya jvan khāl mās ’aṅgulīyaka ratna vāna vat
{B4} khlās pratigraha taṃryya ’seḥ daṅ juṃ sāy sitacchattra padigaḥdlaḥ kuntikā kadāha dlaḥ ’āṅ svok dop phnāṅ canlyak ’asaṅkhyā tās
{B5} vraḥ prāsāda vraḥ prāṅgana phoṅ vraḥ thnal dau lvaḥ kralā tutsrū nu canlyak sap samvatsara ○ oy dakṣiṇā vraḥ kamrateṅ ’añ
{B6} ’adhyāpaka vraḥ kamrateṅ ’añ ta siṅ pratipakṣa vraḥ sabhā khloñviṣaya puruṣādhikara puruṣa paṃre phoṅ strī paṃre phoṅ sap varṇa
{B7} sap saṃvatsara ○ nā kamrateṅ jagat śivapura danden man s □ ī□ □ □ □ □ □ □ □ □ □ sruk caraṅ sruk tvaṅ jeṅ sruk khcoṃ jyak danle
{B8} saṅ ’āśrama duk dāsadāsī ’val jvan sarvvadravya caṃnāṃ ti cāṃpratidina rmmāṃ camryyaṅ smevya tūryya raṅko paryyaṅ vraḥ vasanadyān dhūpa kri
{B9} yā sraṅ catussneha vṅya nu ’arcana chmāp vṅya dravya ti jvankhāl mās ’aṅgulīyaka ratna vāna vat khlās pratigraha taṃryya ’seḥ daṅsitacchattra
{B10} juṃ sāy padigaḥ dlaḥ kuntikā kadāha dlaḥ ’āṅ svok dop phnāṅcanlyāk ’asaṅkhyā tās vraḥ prāsāda vraḥ prāṅgana vraḥ thnal nu canlyāk○
{B11} oy dakṣiṇā vraḥ kamrateṅ ’añ ’adhyāpaka vraḥ kamrateṅ ’añ tasiṅ pratipakṣa vraḥ sabhā khloñ viṣaya puruṣādhikara puruṣa
{B12} paṃre strī paṃre phoṅ sap varṇa sap saṃvatsara ○ nākamrateṅ jagat śrī cāmpeśvara bhagavat pāda kamrateṅ ’añ ta guru śrīdivākarapaṇḍita
{B13} jau bhūmi cat sruk saṅ ’āśrama duk dāsadāsī ta gi thvecaṃnāṃ roḥ ta pāñjiya ti cār praśasta ○ na kamrateṅ jagat īśvarapuraman ’aṃve
{B14} kamrateṅ ’añ vraḥ guru ta rājya vraḥ pāda kamrateṅ ’añparamavīraloka ti vraḥ pāda kamrateṅ ’añ śrī sūryyavarmmadeva oy viṅ
{B15} ta bhagavat pāda kamrateṅ ’añ ta guru śrī divākarapaṇḍita man’val bhūmi khñuṃ devatā noḥ ti pādamūla lak pi cāy ta ’anya □ □ □bhaga
{B16} vat pāda kamrateṅ ’añ ta guru śrī divākarapaṇḍita loḥ iss viṅthve devasthāna nu śivapūjā devatā noḥ ru kāla kamrateṅ ’añ
{B17} vraḥ guru viṅ ○ ri ’aṃpāl sruk nu kula kamrateṅ ’añ taparamaguru phoṅ ta mān doṣa daṃnep=ra sruk vrai slā kula kamrateṅ’añ □ □ □ □
{B18} □ □ deva ○ sruk kantiṅ kula kamrateṅ ’añ ta guru kantiṅ tikamrateṅ phdai karoṃ jvan ta vraḥ dau bhagavat pāda kamrateṅ ’añ taguru śrī divā
{B19} karapaṇḍita dval vraḥ karuṇā ta paramapavitra vraḥ pādakamrateṅ ’añ śrī sūryyavarmmadeva loḥ iss cuñ nu ’nak ta mān doṣa □ □□
{B20} rṇa viṅ ru ti kroy ○ 1041 śaka gi nu vraḥ pāda kamrateṅ ’añ śrīsūryyavarmmadeva pandval pre śilpi rājakāryya eka do triṇī catvā
{B21} ri nu ’nak viṣaya sadyā dau thve sruk vnur dnaṅ nu devasthānanoḥ pi leṅ ta santāna ti kroy coṅ prāsāda jyak danle □ □ □ □ n va
{B22} n kaṃveṅ juṃ sruk pit □ □ □ ’aṃpeṅ ta □ □ □ □ phoṅ nu kuṭipada kralā rāṃ □ □ kaṃluṅ mattavāraṇa krau kaṃluṅ nup □ □ □ □ □phoṅ ○
K.194 The Stelæ of Phnoṃ Sandak and Práḥ Vihãr
{A3} 1041 śaka pañcamī □ □ śrāvaṇa candravāra nu vraḥ pādakamrateṅ ’añ śrī sūyyavarmmadeva stac ’nau nā vraḥ kra
{A4} lā [nu gi] vraḥ kamrateṅ ’añ vrāhmaṇa kamrateṅ ’añ rājakularājaputra mahāmantri senāpati vraḥ kamrateṅ ’a
{A5} ñ guṇadoṣadarśi ta pvan ’nak sañjak khloñ glāṅ ta pvan ’naksañjak khloñ vraḥ laṃvāṅ phoṅ syaṅ ta gāl pi bhagavat pā
{A6} da kamrateṅ ’añ ta guru śrī divākarapaṇḍita chlaṅ havirvvādavraḥ pāda kamrateṅ ’añ śrī sūryyavarmmadeva stac cuḥ le
{A7} vraḥ □ □ □ □ □ □ □ □ □ □ □ □ □ □ □ □ □ □ lek vraḥ ’añjali pandvalpre sthāpanā praśasta neḥ ○ bhaga
{A8} vat pāda kamrateṅ ’añ ta guru śrī divākarapaṇḍita sruk vnur dnaṅviṣaya sadyā varṇa karmmāntara triṇi uditodita
{A9} □ □ va □ □ □ □ vayaḥ guḥ ryyan paryyan iss ’āgama phoṅ thve isstapaḥ phoṅ ○ lvaḥ ta rājya vraḥ pāda kamrateṅ ’añ śrī u
{A10} dayādityavarmmadeva ta svey rājya nu 972 śaka pi sthāpanākamrateṅ ’añ suvarṇaliṅga □ □ □ □ □ □ □ □ □
{A11} pi duk ’arcana bhagavat pāda kamrateṅ ’añ ta guru śrīdivākarapaṇḍita gi ta ’añjeñ ’arcana [vraḥ neḥ] ○ lvaḥ ta rājya vraḥ pāda
{A12} kamrateṅ ’añ śrī harṣavarmmadeva bhagavat pāda kamrateṅ’añ ta guru śrī divākarapaṇḍita gi ti ’añjeñ [jā ’ācāryya]pra
{A13} dhāna nā catvārī ○ lvaḥ ta rājya vraḥ pāda kamrateṅ ’añ śrījayavarmmadeva [ta] svey vraḥ dharmmarājya pi prās [tapaḥ thve]
{A14} sarvvayogya ta jā vraḥ guru ta nu thve rājābhiṣekahoma [nu]vraḥ yajña phoṅ bhagavat pāda kamrateṅ ’añ ta guru śrī divāka
{A15} rapaṇḍita gi ti ’añjeñ jā vraḥ guru thve rājābhiṣekahoma[nu]vraḥ yajña phoṅ oy nāma bhagavat pāda kamrateṅ ’añ ta
{A16} guru śrī divākarapaṇḍita prasāda hemadolā pi jiḥ sitātapatranara ti pre ’nak chattradhāra [’nak] ta seṅ prasāda sarvvadra
{A17} vya ta daṃnep=ra khāl mās vāna vat khlās pratigraha taṃryya’seḥ □ khñuṃ nu dāsī ’val ta bhagavat pāda kamrateṅ ’añ ta guru śrī di
{A18} vākarapaṇḍita jvan sap devatākṣetra phoṅ thve yajña sthāpanājyak travāṅ oy dāna dravya ta daṃnep=ra khāl mās
{A19} vat khlās pratigraha taṃryya ’seḥ khñuṃ ta vrāhmaṇa paṇḍitasap bhāga nu ’nak ta dīnānātha phoṅ ta gi man vraḥ pāda kamrate
{A20} ṅ ’añ śrī jayavarmmadeva stac kṣetrādhigama [dau] tīrthā [tadaṃep=ra] dau kamrateṅ jagat śrī cāmpeśvara bhagavat pāda kamrate
{A21} ṅ ’añ ta guru śrī divākarapaṇḍita gi ti ’añjeñ dau □ □ □ □ ta sapdevatākṣetra phoṅ ○ lvaḥ ta rājya vraḥ pāda kamra
{A22} teṅ ’añ śrī dharaṇīndravarmmadeva ta jā vraḥ ’ryāṃ vraḥ pādakamrateṅ ’añ śrī jayavarmmadeva bhagavat pāda kamrateṅ ’a
{A23} ñ ta guru śrī divākarapaṇḍita gi ta jā vraḥ guru thverājābhiṣekahoma[nu] vraḥ yajña phoṅ prasāda sarvvadravya ’val tabhagavat pā
{A24} da kamrateṅ ’añ ta guru śrī divākarapaṇḍita jvan sapdevatākṣetra phoṅ thve yajña jyak travāṅ sthāpanā oy dā
{A25} na dravya ta daṃnep=ra khāl mās vat khlās pratigraha taṃryya’seh khñuṃ ta vrāhmaṇa paṇḍita sap bhāga nu ’nak dīnānātha pho
{A26} ṅ ○ lvaḥ ta 1035 śaka pi vraḥ pāda kamrateṅ ’añ śrīsūryyavarmmadeva ta jā vraḥ cau matṛpakṣa vraḥ pāda kamrateṅ ’añ
{A27} śrī jayavarmmadeva nu vraḥ pāda kamrateṅ ’añ śrīdharaṇīndravarmmadeva svey vraḥ dharmmarājya ’añjeñ bhagavat pādakamra
{A28} teṅ ’añ ta guru śrī divākarapaṇḍita jā vraḥ guru gi ta thverājābhiṣeka man vraḥ pāda kamrateṅ ’añ [ryyan] thve vraḥ dīkṣā ryya
{A29} n iss siddhānta phoṅ ta daṃnep=ra vraḥ guhya thveśāstrotsava phoṅ oy dakṣiṇā roḥ ta □ □ □ □ □ □ □ □ s oy
{A30} hemadolā pañcaśīra pi jiḥ oy māyūra kanakadaṇḍa vyarsitātapatra pvan □ □ □ □ □ □ □ □ □ tāṃ sarvva
{A31} ratna ta gi pi duk ta daṃnep=ra makuṭa kundala karṇābharaṇakeyūra kaṅkana kaṇṭhī udaravandha □ □ □ □ □ □ □ □ ’aṅgulī
{A32} yaka navaratna vāna vat khlās pratigraha cok chlyak khāl māsgraloṅ tai canhvay nu □ □ □ □ □ □ □ □ □ □ □ ta
{A33} bhagavat pāda kamrateṅ ’añ samavarṇa ti tāk ’aṃvi ta vraḥkralā glāṅ sap thṅai syaṅ ’nak rājakāryya □ □ □ □ □ □ bhagava
{A34} t pāda kamrateṅ ’añ gi ti ’añjeñ thve vraḥ koṭihoma vraḥlakṣahoma vraḥ □ □ □ homa vraḥ pitṛyajña vraḥ □ □ yajña
{A35} sap saṃvatsara gi roḥ vraḥ śloka vraḥ pāda kamrateṅ ’añ śrīsūryyavarmmadeva ○ [Sanskrit stanza]
{A37} oy vraḥ dāna sarvvadravya mās prāk ratna vāna vat khlāspratigraha sruk dāsadāsī taṃryya ’seḥ go kapilādi ’val ○ ma
{A38} n bhagavat pāda kamrateṅ ’añ ta guru śrī divākarapaṇḍita thvekṣetrādhigama pi jvan dravya ta devatākṣetra phoṅ daṃnep=ra
{A39} kamrateṅ jagat śrī bhadreśvara gi roḥh vraḥ śloka vraḥ pādakamrateṅ ’añ śrī sūryyavarmmadeva duk pi pre cār ta hemado
{A40} lā phoṅ nu dravya ta roḥh noḥ phoṅ pi jvan ta devatākṣetraphoṅ sap ’anle ○ [Sanskrit stanza]
{A42} bhagavat pāda kamrateṅ ’añ ta guru śrī divākarapaṇḍita jyakdanle ti hau śrīdivākarataṭāka ’nau kamrateṅ jagat śrī bha
{A43} dreśvara saṅ ’āśrama duk dāsadāsī ta gi jvan srukmadhyamadeśa sruk taṅkāl nu caṃnat bhāganaya noḥ nu dāsadāsī srā □□ □ □
{A44} thve caṃnāṃ kalpanā roḥ ta pāñjiya neḥ raṅko paryyaṅ vraḥvasana dyān dhūpa kriyā sraṅ rmmāṃ caṃryyāṅ smevya tūryya chmāpvṅya ’arca
{A45} na pratidina ○
{A45} nā kamrateṅ jagat śrī śikharīśvara □ □ □ □ □ □ daṅ bhagavatpāda kamrateṅ ’añ ta guru śrī divākarapa
{A46} ṇḍita sthāpanā kamrateṅ ’añ ta rāṃ suvarṇapratimā □ □ □ □ □□ □ □ □ □ kanloṅ kamrateṅ ’añ jvan dravya □ □ □ □ □
{A47} śambhugrāma bhavagrāma jyak danle sap sruk □ □ □ □ □ saṅ’āśrama duk dāsadāsī jvan dravya ta gi thve caṃnāṃ roḥ ta pāñjiya
{A48} neḥ raṅko paryyaṅ vraḥ vasana dyan dhūpa kriyā sraṅ rmmāṃcaṃryyāṅ smevya tūryya chmāp vṅya ’arccana pratidina dravya tibhagava
{B1} t pāda kamrateṅ ’añ ta guru śrī divākarapaṇḍita jvan ta kamrateṅjagat śrī śikharīśvara thniṃ suvarṇakośa makuṭa kundala keyūra
{B2} kaṅkana kaṇṭhī udaravandha kāñcī nūpura pāduka ta tāṃsarvvaratna ta gi ti vraḥ pāda kamrateṅ ’añ śrī sūryyavarmmadeva oydāna nā thve
{B3} vraḥ dīkṣā hemavitāna ti chlāk padma tāṃ sarvvaratna tās phdaivraḥ prāsāda kaṅsamaya jvan khāl mās ’aṅgulīyaka ratna vāna vat
{B4} khlās pratigraha taṃryya ’seḥ daṅ juṃ sāy sitacchattra padigaḥdlaḥ kuntikā kadāha dlaḥ ’āṅ svok dop phnāṅ canlyak ’asaṅkhyā tās
{B5} vraḥ prāsāda vraḥ prāṅgana phoṅ vraḥ thnal dau lvaḥ kralā tutsrū nu canlyak sap samvatsara ○ oy dakṣiṇā vraḥ kamrateṅ ’añ
{B6} ’adhyāpaka vraḥ kamrateṅ ’añ ta siṅ pratipakṣa vraḥ sabhā khloñviṣaya puruṣādhikara puruṣa paṃre phoṅ strī paṃre phoṅ sap varṇa
{B7} sap saṃvatsara ○ nā kamrateṅ jagat śivapura danden man s □ ī□ □ □ □ □ □ □ □ □ □ sruk caraṅ sruk tvaṅ jeṅ sruk khcoṃ jyak danle
{B8} saṅ ’āśrama duk dāsadāsī ’val jvan sarvvadravya caṃnāṃ ti cāṃpratidina rmmāṃ camryyaṅ smevya tūryya raṅko paryyaṅ vraḥ vasanadyān dhūpa kri
{B9} yā sraṅ catussneha vṅya nu ’arcana chmāp vṅya dravya ti jvankhāl mās ’aṅgulīyaka ratna vāna vat khlās pratigraha taṃryya ’seḥ daṅsitacchattra
{B10} juṃ sāy padigaḥ dlaḥ kuntikā kadāha dlaḥ ’āṅ svok dop phnāṅcanlyāk ’asaṅkhyā tās vraḥ prāsāda vraḥ prāṅgana vraḥ thnal nu canlyāk○
{B11} oy dakṣiṇā vraḥ kamrateṅ ’añ ’adhyāpaka vraḥ kamrateṅ ’añ tasiṅ pratipakṣa vraḥ sabhā khloñ viṣaya puruṣādhikara puruṣa
{B12} paṃre strī paṃre phoṅ sap varṇa sap saṃvatsara ○ nākamrateṅ jagat śrī cāmpeśvara bhagavat pāda kamrateṅ ’añ ta guru śrīdivākarapaṇḍita
{B13} jau bhūmi cat sruk saṅ ’āśrama duk dāsadāsī ta gi thvecaṃnāṃ roḥ ta pāñjiya ti cār praśasta ○ na kamrateṅ jagat īśvarapuraman ’aṃve
{B14} kamrateṅ ’añ vraḥ guru ta rājya vraḥ pāda kamrateṅ ’añparamavīraloka ti vraḥ pāda kamrateṅ ’añ śrī sūryyavarmmadeva oy viṅ
{B15} ta bhagavat pāda kamrateṅ ’añ ta guru śrī divākarapaṇḍita man’val bhūmi khñuṃ devatā noḥ ti pādamūla lak pi cāy ta ’anya □ □ □bhaga
{B16} vat pāda kamrateṅ ’añ ta guru śrī divākarapaṇḍita loḥ iss viṅthve devasthāna nu śivapūjā devatā noḥ ru kāla kamrateṅ ’añ
{B17} vraḥ guru viṅ ○ ri ’aṃpāl sruk nu kula kamrateṅ ’añ taparamaguru phoṅ ta mān doṣa daṃnep=ra sruk vrai slā kula kamrateṅ’añ □ □ □ □
{B18} □ □ deva ○ sruk kantiṅ kula kamrateṅ ’añ ta guru kantiṅ tikamrateṅ phdai karoṃ jvan ta vraḥ dau bhagavat pāda kamrateṅ ’añ taguru śrī divā
{B19} karapaṇḍita dval vraḥ karuṇā ta paramapavitra vraḥ pādakamrateṅ ’añ śrī sūryyavarmmadeva loḥ iss cuñ nu ’nak ta mān doṣa □ □□
{B20} rṇa viṅ ru ti kroy ○ 1041 śaka gi nu vraḥ pāda kamrateṅ ’añ śrīsūryyavarmmadeva pandval pre śilpi rājakāryya eka do triṇī catvā
{B21} ri nu ’nak viṣaya sadyā dau thve sruk vnur dnaṅ nu devasthānanoḥ pi leṅ ta santāna ti kroy coṅ prāsāda jyak danle □ □ □ □ n va
{B22} n kaṃveṅ juṃ sruk pit □ □ □ ’aṃpeṅ ta □ □ □ □ phoṅ nu kuṭipada kralā rāṃ □ □ kaṃluṅ mattavāraṇa krau kaṃluṅ nup □ □ □ □ □phoṅ ○