Old Khmer

{1}   cār roh iṣṭi ket
{2}   930 śaka mvāy ket karttika candravāra nu kaṃsteṅ śrī kavīśvaravarmma sabhāpatithvāy vraḥ śivi
{3}   kā mvāy vat mās vyar sandāl mvāy suvarṇṇakalaśa mvāy khlas hanira caṃdoṅmukha vas mvā
{4}   y bhūmi travāṅ jmaḥ sajjanatatāka caṃnat jmaḥ udayāspada ○ khñuṃ ○ caṃnāṃ ○bhūmmi rājyaprasāda ○ ta dhūli
{5}   vraḥ pāda kamrateṅ ’añ śrī sūryyavarmmadeva dhūli vraḥ pāda kamrateṅ ’añ śrīsūryyavarmmadeva
{6}   □ □ □ □ nu vraḥ udakāñjali ’abhigamana ta devatākṣetra jvan taṅvāy neḥ dau ○ tadau śiva
{7}   pāda pūrvva ○ vraḥ śivikā mvāy ○ vat mās mvāy ṅan jyaṅ vyar ○ suvarṇṇakalaśaṅan jyaṅ mvāy ○
{8}   □ □ prāk mvāy ṅan tul mvāy ○ khlas hanira caṃdoṅ mukha vas mvāy ṅan jyaṅ prāṃ○ bhūmi rājaprasāda nu
{9}   [caṃnat] khloñ ’nak ○ nu khñuṃ gi vā mvāy tai vyar ○ gi ta vali vraḥ śivikā ○ nuraṅko thlvaṅ prām prati
{10}   saṃvatsara ○ travāṅ ’āy śivapāda mvāy [○] khñuṃ caṃnat [○]dmuk thniṃ [○]smevvraḥ candraśāla [○]paṃmre nu
{11}   □ □ □ □ prām ○ caṃnāṃ raṅko je mvāy pratidina ○ liḥ prām cuḥ ta vraḥ vīrāśrama○
{12}   sñak daṃnuk prām [○] saṃlo vnek prām ○ paṃprā khāl mimvāy sñak noḥ ○ ’nakmvāy
{13}   gi ta pradhāna ta gi kalpanā ○ gi neḥ nā āyattva daṃnep=ra gi caṃnatt gi ta’aṅgās vraḥ paṃ
{14}   nvas ryyan ta vraḥ vīrāśrama ○ lo nāgapātra mvāy ○ lo jaroy siṅha vyar ○ nu
{15}   □ □ upāya noḥ daṃnep=ra mayūrachātra ○ neḥ dau śivapāda ○ ta dau liṅgapuravat
{16}   mās mvāy ṅan jyaṅ vyar ta dau ○ ta dau ta kanloṅ kamrateṅ ’añ ’aṅve danle ○
{17}   □ □ □ vātala dramvaṅ mvāy ṅan jyaṅ mvāy liṅ tapp praṃ piy ○ gi roḥh vraḥ varaśā
{18}   pa nau ’nak ta paripālana dharmma neḥ pi oy kalpanā ○ svey vimāna nu santānaiss kalpa ke
{19}   [t] [ley] ○ nau ta lapp kalpanā neḥ dau ta naraka yāvat vraḥ candrāditya mān ley ○nau ruv
{20}   ’ācāryya ta ti kamrateṅ phdai [karoṃ]ta yo □ □ □ □ □ □ leṅ phoṅ ○ noḥ gi nā ka
{21}   mrateṅ phdai karoṃ pradvan □ □ dharmma neḥ □ □ □ □ □ □ □ laja ○

{1}   . . . pandval ta sabhā . . . .
{2}   . . . ta oy viṅ ○ man vā noḥ cat vyavahāra pi rat . . . .
{3}   oy ta paṃnvas ta jmaḥh ○ pre cāp vā noḥ □ □ □ □ vraḥ śāsana □ □ □ □
{4}   pre cār
{5}   937 ekādaśī roc mārgaśira vrahaspativāra nu dhūli vraḥ pāda [dhūli jeṅ kamrateṅkaṃtvan ’añ śrī]
{6}   sūryyavarmmadeva pandval ta vraḥ kaṃmrateṅ ’añ śrī kavīśvarapaṇḍita . . .
{7}   . . .
{8}   . . . vraḥ śilāstambha . . . {9-10} . . . vraḥ kamrateṅ ’añ śrī kavīśvarapaṇḍita . . .(11 à 46 : illisible)
{47}   . . . kamrateṅ jagat ○ ta vraḥ ’anrāy liḥ prām
{48}   . . . vraḥ sabhā nagara nu vraḥ sabhā śivapāda nu pratihāra pā[la]
{49}   □ □ □ □ oy vraḥ karuṇāprasāda ta ’añ ○ ’añ oy ta kvan ’nak khloñ ’añ
{50}   □ □ paripālana nu caṃnāṃ neḥ

{1}   vāviṅśottaraśaṣṭiśata śaka ○ ’ajñā vraḥ kamratāṅ ’añ parigraha bhūmi ta vraḥ
{2}   kaṃmrateṅ ’añ śrī śivapāda pūrvva vañ hareṅ dakṣiṇa lantau □ □ □ □
{3}   paścima thmo vṛk uttara tarañ taṅnot gi ta tel prativaddha ai vraḥ
{4}   kaṃmrateṅ ’añ ta daṃnep=ra ge dharmmika poñ myaṅ poñ bhuvanāditya gi tamok
{5}   sanme nnī nu vraḥ kaṃmrateṅ ’añ śrī vijayeśvara gi ta paṃre ta vraḥ kaṃmrateṅ’añ
{6}   śrī śivapāda ge tapoviśeṣa ’aṃvi ihaloka lvāh paraloka ge ta pvās ’āy siddhi
{7}   ṛddhi oy dayā kīrtti ai ’abhayagana nattva gi ta ’āśraya ’aṃpāl gana pradāna ’āy tanā
{8}   vraḥ kaṃmrateṅ ’añ śrī śivapāda phoṅ daṃne[p=ra] kñuṃ thmur krapi rdd[e]ḥdvak daṃriṅ karo[ṃ] vrai chdiṅ
{9}   canhvar rlaṃ sre vnur caṃnya thmur stuk piṅ phoṅ ’adhīna ’āy ta ge paṃnvās ’casta
{10}   thve pūjā vraḥ kaṃmrateṅ ’añ tel ge ta sak gi ge ta lvāc gi ge ta lope gi ge gi
{11}   ta nu pi niraya yāvat sūryyāscandrasya tāvat naraka dukhitaḥ ge laṅlyaṅ kaṃluṅnira
{12}   ya nu gotra phoṅ siddhir ’astu

{4}   □96 śaka pañcamī ket vaiśākha candradivasavāra ’ājñā vraḥ kaṃmratāṅ ’añ tapaṃnvās
{5}   kulapa[ti] pre thve pūjā vraḥ kaṃmratāṅ ’añ ru liṅgapurvvā s[th]āpanāsuvarṇṇaliṅga
{6}   sthāpanā naivedya prastha 5 mudgā prastha 2 thmo □ □ □ □ □ oy chvātt bhū
{7}   mi oy pūrvva prasap liṅgapura dakṣiṇa prasap tpal ’aṃvil paścima prasap □ □ □[uttara]
{8}   prasap katakkagrāma pre coṅ it thve kalpanā phoṅ ta vraḥ kaṃmratāṅ ’añ pre ru
{9}   liṅgapurvva ukk neḥ gi roḥh dharmmādharmma ○ ta [g]ap=pi ’nak phoṅ □s ta □ □viṅ □
{10}   dṛss ta thve pūjā □ □ □ □ □ □ □ □ □ □ □ □ □ □ □ □ □ □ □ □
{11}   nā ’āy □ □ de □ □ □ □ □ □ □ □ □ □ □ □ □ panaiḥ □ □ □
{12}   nyā viśeṣān=rak □ □ □ □ □ □ □ □ □ □ □ □ □ □ □ □ □

{1}   xx7 śakka ta gi ’aṣṭamī roc ’ā
{2}   [śvayu]jya vuddhavāra [.] nu vraḥ saṃtac stac
{3}   [pa]ṅga[ṃ]ta kanloṅ kaṃmrateṅ ’añ bhīmāla
{4}   ya mān vraḥ śāsana ruv khñuṃ vraḥ ta [n]au nā va
{5}   rgga nu jaṃrās phoṅṅ ’āy teṃ [.] gi ta jā pi
{6}   khloñ mukha hau pi pre ta gi vraḥ rājakāryya
{7}   gus [.] daha mān ta ratt ta lvan ta slap vvaṃ jā pi
{8}   dār panlas ley nau ’aṃpāll ’āy teṃ [.]
{9}   gi ta jā pi pre ta rājakāryya gus [.] khloñ
{10}   vnaṃ khloñ kāryya guṇadoṣa[da]rśikula
{11}   pati rakṣā ’nak vraḥ [.] leṅ ṛddhi [.] vvaṃ jā pi
{12}   oy pi ’nak vādhā vvaṃ jā pīde thve pū
{13}   jā vraḥ [.] leṅ ṛddhi ○

{E1}   vraḥ jaṃ[nvan] [vraḥ kamra]
{E2}   teṅ ’añ ’a – – – – – – – – –
{E3}   vṛtti ta gi sruk ca – – – –
{E4}   pramān malyāṅ vṛtti ta tap=ra
{E5}   cnāṃ mvay krapās bhār 10 canlyā
{E6}   k yau 10 kjo yau 2 lṅo tloṅ
{E7}   10 santek tlvaṅ 10 tvau tlvaṅ 3 ra
{E8}   ṅko tlvaṅ 10 kalmvan tul 1 gmuṃ ’antva
{E9}   ṅ 2 kandel 4 saṃpur lveṅ vnā
{E10}   s 40 kralyak slik 2 slāp slik
{E11}   k 2 kañj – – – 3 rmmet
{W1}   knar bhadasannāha ti
{W2}   jvan ta vraḥ kamrateṅ
{W3}   ’añ ’anle 4 ta cāṃ knar
{W4}   ’aṅgarakṣa nu prīti vṛtti
{W5}   ta tap=ra cnāṃ mvay ’aṃpyal
{W6}   slik 2 paṃrai 100 sru slik 2
{W7}   raṅko 100 kandel slik 1 sña
{W8}   k srāl pi pac slik 4
{W9}   kaṃpor ceṅ 110 dravya
{W10}   ta dai ti ruva ta prayoja
{W11}   na ta vraḥ kamrateṅ ’a
{W12}   ñ ckop yathāśakti ru
{W13}   va ta tel paṃnvas kloñ
{W14}   – – – – – – – – – – – – – – – – – – – – – – – – – – – – – dā //

{S12}   ….. 815 śaka pañ[ca]mi roc ’āṣādha vyar ’antvaṅ dikk srac=ti
{S13}   ’addharātra ’āy vnek ’ādityavāra uttarabhadranakṣatra nu dhūli jeṅ vraḥ kamra
{S14}   teṅ śrī yaśovarmmadeva ta svey vraḥ rājya ta gi 811
{S15}   śaka sthāpanā vraḥ kamrateṅ ’añ śrīndravarmmeśvara ○ vraḥ jaṃnvan ’anakpaṃre
{S16}   toy knett taṃrvac tai kaṃpit | rmmāṃ tai laṃvan | tai ’asura | tai pāk | caṃryyā
{S17}   ṅ tai manoharā śrī | tai ’aṅgaṃ | tai pkāv | tai chlac | tai man | tai
{S18}   mālikā | tai padma | tai sumalla | tai subhāk | tai laṃvār 1 tai kan’ū | tai
{S19}   kliṅ | tai candan | tai kansun | tai nan | tai draṅāl | ta kañcan | tai pnvar | tai
{S20}   vin | tai van | tai kantāñ | tai manoharikā | tmoṅ tai krau | tai kānti | tai
{S21}   sundarī | sī śaśī | chmap cheṅ tai kamala | tmiṅ kinnara tai padma | tailakṣmīrāja | tai sān | tmiṅ
{S22}   vīṇa tai svasti | tai ’amara | tai chat | tmiṅ lāv tai īśāna | tmiṅ chko tai utpala |
{S23}   caṃryyāṅ stuti tai padmā | tai dharaṇī | ○ kloñ sruk sī ’gat | varī sī can cān |pamek
{S24}   sī siddhivara | cmāṃ pjuḥ sī siddhivara | pīle sī tmyaṅ | cmāṃ mās prak sīkandhū | ’ābhaṣa gvāl
{S25}   kanhiṃ | tai ’ādhya | tai kanteṅ | smañ gvāl saṃ’ap | mālākāra gvāl kan’as |
{S26}   gvāl kañcū | tai kan=hyaṅ | tai tkep | ’muḥ dik sroṅ gvāl kandhap | gvāl vīra |chattra
{S27}   dhāra sī kañjā | sī kanteṅ | gvāl kanteṅ | lmāṃ vraḥ pitai sī krau | caṃryyāṅśikha
{S28}   rā gvāl tgap | gvāl kaṃsar | gandharvva sī ptal | gvāl kaṃpit |
{S29}   chmāṃ vraḥ vleṅ sī kaṃpit | cmāṃ kanloṅ sī kamalabhāva | pratihāra sī taṅker| pamos gvāl kaṃpit | mahā
{S30}   nasa sī laṃṅāc | sī kaṃbhān | sī caṃhek | sī kanloñ | pattrakāra sī pandan | sītaṅkū |
{S31}   sī kandhap | lap cnāṅ | tai srac ta vraḥ | cmāṃ dvār sī kāntivala | tūryya sī cpoṅ|
{S32}   sī kaṃvraḥ | sī kñuṃ | gvāl kan’as | gvāl panlas | vannarā sī kañcū | cmāṃ śālāgvāl kaṃpa
{S33}   s | rmes raṅko lap kañcū | lap ’aṃdeṅ | lap ’aṃdeṅ sot | lap kan’as | ma
{S34}   hāvrīhī tai kaṃpit | sī rat saṃ’ap | lap kan=ru | tai kañcū | tai kaṃvī | sī pau ka
{S35}   cñī | sī rat caṃ’āl | lap kanteṅ | tai saṃ’ap | tai saṃ’ap sot | tai ka
{S36}   ñcū | tai saṃ’ap sot | cmāṃ hajaya tai kanlak | tai rat ’gat | tai kañjoṅ |
{S37}   tai tkep | dmuk varṣā tai vraḥ dharmma | tai pau vraḥ diśūnya | sī ratindubhāva | tai rat
{S38}   kneṅ | lap śrīratna | tai subhadra | tai rat saṃ’ap | tai kanti | tai kañjuṅ | tai ka
{S39}   nleṅ | tai krau | tai saṅkāv | tai kan=ru | sī rat ’anrok | lap kanrau | tai kanhar|
{S40}   tai tleṃ | tai kandhī | tai kaṃvrau | tai pau | sī rat kañ=yeṅ| tai kaṃpit | tai pau
{S41}   panheṃ | tai rat jvik | tai ksai | sī rat kansat | tai kaṃpus | tai rat umā |
{S42}   tai kaṃpaṅ | tai kandhuṃ | sī pau kanloñ | lap śrīratna | tai kanlap | tai pau
{S43}   panlas | sī rat kaṃpit | gvāl mavanāditya | tai vraḥ kalpa | tai ’gat |
{S44}   tai pau | sī rat kanteṅ | tai kañjuṅ | cmāṃ cpār dvaṅ kañcan | sī rat rucibhāva |
{S45}   sī tmyaṅ | tai kaṃvaḥ | tai pau paras | gvāl prāṇa | tai kaṃpaṅ | tai kanrau | sīkante
{S46}   ṅ | tai kan=’aṃ | tai kap=kep| tai pau paṅ=hāṅ| tai rat srac ta vraḥ | taikansoṃ |
{S47}   tai ’anāda | tai pau | cmāṃ tpal gho kandai | sī candradāsa | lap kanleṅ | lapcneṃ | ’nak paṃ
{S48}   re kloñ vnaṃ sī caṃdak vraḥ | sī kansoṃ | tai kandhap | tai kan=’ak | lapcak=cok|
{S49}   tai knak | tai rat pnos | gvāl krau | ’nak paṃre paṃnvas ———- śaśī | gvā
{S50}   l vrahey | tai sūlāṃ | gvāl jvay | —————————————— | gvāl
{S51}   jāṃ | tai crāy | gho thvāy | cralo [’nak paṃre] ————————————-rat □□
{S52}   y | sī kaṃvis | gvāl kaṃpit ——————————— | gvāl
{S53}   —- sot | tai vra————————————– gvāl
{N4}   ….. ’nak paṃre toy rṇnocca rmmāṃ tai cpoṅ |
{N5}   tai kan=hyaṅ | tai smaṅ pai |Dancers: tai Cpoṅ, tai Kanhyaṅ, tai Smaṅ Pai.camryyāṅ tai devalakṣmī | tai māy eḥ | tai tna
{N6}   k | tai dharaṇī | tai smaṅ | tai śrī | tai śramā | tai san | tai samanta | tai va
{N7}   ra | tai matiḥ | tai can | tai soko ’a | tai rāja | tai pāliyā | tai kañ=yas|
{N8}   tai hiraṇ | tai soko ’a sot| tai kalkī | tai kaṃpat | tmoṅ tai ’aṃdeṅ |
{N9}   tai pansaṃ | tai kroñ | chmap cheṅ tai chgat | gandharvva tai pnos | tmiṅkinnara tai ratnavā
{N10}   sa | tai vrahmaṇī | tai suvaṇna | tmiṅ vīṇa tai yvān | tai jagat | tai yuṅ | tmiṅ lā
{N11}   v tai raṃṅas | tmiṅ trisari tai kañcan | caṃryyāṅ stutī tai ṅāk | ○ kloñ
{N12}   sruk sī śrī | varī sī somakara | pamek sī cke kanloṅ | cmāṃ pjuḥ sī can=cā
{N13}   n | pīle sī kaṃvaṅ | cmāṃ mās prak sī tgap | ’ābhāṣa sī saṃ’ap | tai ’aṃdeṅ |tai ca
{N14}   turikā | smañ gvāl saṃ’ap | mālakāra gvāl kaṃpañ | gvāl kan=sat| gvāl śrī
{N15}   puran | tai kanteṅ | ’muḥ dik sroṅ sī sraṅe | gvāl kaṃpit | chattradhāra sīkanloñ |
{N16}   sī ’adit | sī padmaruci | lmāṃ vraḥ pitai sī kandhap | caṃryyāṅ śikharā gvālsaṃ’ap | gvāl
{N17}   ’aṃdeṅ | gandharvva sī kñuṃ | cmāṃ vraḥ vleṅ sī kaṃvrau | cmāṃ kanloṅ sīśrī | pratihāra sī jñā
{N18}   nadhara | pamos gvāl kaṃpañ | mahānasa sī prāṇa | sī cke duḥkha | sī manaḥ| sī śrī | pattra
{N19}   kāra sī panlas | sī kañjoṅ | sī kaṃpit | tai tmāy | tai panlas | cmāṃ dvār sī caṃ
{N20}   lau | turyyasī cap=pi hau | sī vnac | gvāl saṃ’ap | gvāl kanleṅ | gvāl kan=sip|vannarā sī kañcū | cmāṃ śālā gvāl kanteṅ | rmes raṅko lap kanleṅ | lap krau | lap
{N22}   kaṃpat | lap suketa | mahāvrīhi tai kañjai | sī rat cpoṅ | tai ksai | lap paṃ
{N23}   ryyak | tai pau kaṃpas | sī rat kaṃpit | tai kan’in | tai rat ’anāyaka | tai paṃna
{N24}   ṅ | sī pau saṃ’ap | tai panlas | tai panheṃ | tai ’aṃdeṅ | sī rat kan=sip| cmāṃha
{N25}   jaya tai kan’as| tai kañ=yeṅ | tai pau kañjāṃ | tai kañjoṅ | sī pau tke | lap
{N26}   kan’aṃ | dmuk varṣā tai kmau | tai kaṃvuṅ | sī rat kanloñ | tai kaṃpas | sī rat
{N27}   kañcañ | tai krau | sī rat kaṃpañ | tai kanteṅ | tai kan=hyaṅ| sī pau | tai kbuṅ |
{N28}   tai candra | sī pau śrī | tai pandan | sī rat panlas | tai kaṃphāc | sī rat kaṃpañ| tai
{N29}   kan=ru | tai pau | tai rat kmau | tai kan’añ | tai pau knāñ | tai rat kanteṅ | taikali
{N30}   ha | tai pau laṅgāy | tai pratvat | tai pnos | tai kanren | sī rat kañ=yeṅ| gvā
{N31}   l kañjen | tai kañjū | tai pau kan=hyaṅ| sī rat īśāna | tai saṃ’ap |
{N32}   tai kan’on | sī pau ’antis | sī rat śrī | tai veda | tai jvik | tai kañjā |
{N33}   tai pandan | sī rat kañcū | lap tleṃ | tai saṃ’ap | cmāṃ cpar dvaṅ t’oṅ 1
{N34}   sī kaṃvai | tai kanteṅ | lap kaṃvar | tai kan=sun| tai kan=ru | lap
{N35}   kesara | tai k’ek | tai numan ’añ | tai kantī | tai pau vrahey | tai
{N36}   kantrī | gvāl tgap | tai taṅkū | tai kaṃpun | cmāṃ tpal sī sneha | ’nak paṃre
{N37}   paṃnvas smiṅ ghoda yaṅ | gvāl ghoṅ | lap panlas | tai joṅ | gvāl
{N38}   ñoṅ | gvāl kañjes | gho kaṃpvañ | lap vvaṃ ’añ cinta | gvāl sarac |
{N39}   cralo ’nak paṃre gvāl kaṃpat | sī pitaradāsa | gvāl pandan | sī jvāda |
{N40}   gho kansip | tai saṃ’ap | sī pau | sī rat | ○ piṇda sī 20 105 tai 60 7
{N41}   gvāl 20 lap 10 2 sī rat 10 3 tai rat 3 sī pau 6 tai pau 7 psaṃ 60 2 ○

{1}   neḥ ti karoṃ phlū naraka
{2}   neḥ ta vyar ti [le] phlū svargga
{3}   vraḥ yama
{4}   vraḥ dharmma □ □ □ vraḥ citragupta
{5}   ’avīci ○ ’anak=ta mān saṅvey pi syaṅ ’aras nu pāpakarmma nau
{6}   kriminicaya ○ ’anak=ta nindā devatā vraḥ vleṅ ○ guru ○ vrāhmaṇa ○ mahājñāna ○’anak=ta pradau dharmma ○ ’anak ta śivabhakti ○ ’ame ○ vapā ○ suhṛt ○
{7}   vaitaraṇīnadī ○ ’anak=ta dīdai rūva paṃnāṃ kutsita vuddhi ○ vañ ’anak ○ taskara○ dhūrtta ○ ’anak ta paṃpat rasa ○
{8}   kūṭaśalmalī ○ ’anak=ta proḥ ta vanyat ○ ta rīta ra ○ sākṣī ’anṛta □ □
{9}   yugmaparvvata ○ ’anak=ta ’adeṅ vadha vandha ○ cak=ni ○ ’adeṅ pīdā para thveduḥkha para nu ’aras ○
{10}   nirucchvāsa ○ ’anak=ta mūḍha ○ pracanda ○ paṃpat viśvāsa ○ saṃlāp strī □□vāla
{11}   ucchvāsa ○ ’anak=ta ’aras nu ’anyāya ○ ’anak=ta tha’uñ doṣa ’anak ○ cya māṅsata ’aprokṣita
{12}   dravattrapu ○ ’anak=ta jraṃ ’anak ○ yok bhūmi ’anak ○ yok padaḥ paṅgvaysthāna ’anak
{13}   taptalākṣāmaya ○ ’anak=ta tut padaḥ ’anak ○ tut vrai ○ oy viṣa ta ’anak
{14}   ’asthibhaṅga ○ ’anak=ta kap [ch]par padaḥ travāṅ ’añcan ’antvaṅ sabhāsthānaphoṅ ’anak=ta paṃpat tirtta ’anak ○ vidharmma
{15}   krakaccheda ○ ’anak=ta luvdha ta ’āmiṣa
{16}   pūyapūrṇahrada ○ ’anak ta lvac madya ○ paradāra ○ dau ta bhāryyā guru
{17}   ’asṛkpūrṇahrada ○ ’anak=ta lvac sac ○ lvac bhāryyā ’anak ○ yok bhāryyā guru ○kaṃñva ñi ta guru
{18}   medohrada ○ ’anak ta lobha ○ taṃnāṃ ta lobha ’anak ta mān svabhāvavikāra ○
{19}   tīkṣṇāyastunda ○ ’anak ta yok maha ti ’anak vvaṃ oy ○ lvac pāy ○
{20}   ’aṅgāranicaya ○ ’anak ta tut sruk nagara ○ karol vraḥ go ○ ’anak ta mūtrapurīṣotsarga ta devasthāna ○
{21}   ’amvarīṣa ○ bhrūṇahā kat=ni ta paradāra dau ta bhāryyā suhṛt ○
{22}   kumbhīpāka ○ ’anak=ti kamrateṅ phdai karoṃ pre ta kāryya pi kra ra ○ lvacdravya guru ○ ’aras nu ’adharmakarmma ○ lvac dravya nai ’anak=ta dīna ○ nai ’anak tarac ○ nai śrotiya ○
{23}   tālavṛkṣavana ○ ’anak ta kat jhe ta vvaṃ gap=pi kat ○ kat jhe ta devasthāna ○lmak devasthāna ○
{24}   kṣuradhāraparvvata ○ ’anak ta lvac tamrya ’aseḥ yāna ○ pāduka ○ cap tavāhmaṇa nu jeṅ ○ ’avajña ta paṇḍita cap ta yajñopakaraṇa phoṅ nu jeṅ ○
{25}   s□ □ □ □ ’anak ta thve santāpa ’anak ○ nindā para ○ lvac chatra ○ upanat ○
{26}   sūcimukha ○ ’anak ta thve □ □ ’anak ta vram □ □srama ’apa dau ○
{27}   kālasūtra ○ ’anak ta thve bheda parihāra kamrateṅ phdai karoṃ ○ lobha tadravya ○
{28}   mahāpadma ○ ’anak ta yok vṅya ta □ □ □ □ □ □ □ □ □ □
{29}   padma ○ ’anak ta lvac vṅya ○ peḥ vṅya ta śivārāma ○ duk jey sin ○
{30}   sañjivana ○ mahāpātaki phoṅ ○ □ □ □ □ □ mahāpātaki phoṅ ○ {31-32} (Illisible).
{33}   śita ○ ’anak ta lvac maha nu kār raṃṅā phoṅ ○
{34}   sāndratamaḥ ○ ’anak ta lvac canluḥ ○ aśauca ’anṛta ○
{35}   mahāraurava ○ □ □ □ □ □ □ □ □ □ □ □ □ □ □ □ □ □ □ □ □ □
{36}   raurava ○ ’anak ta patita ○ ’anak ta ’aras nu paṃroḥh ○ hāra dāna ta reḥ ta hoc ○vvaṃ pros ṛṇa ’anak ○

{1}   taṅvāy kamrateṅ ’añ paṇḍita
{2}   saṃtac vraḥ pāda kamrateṅ ’añ paramaviṣṇuloka nā stac nau vnaṃ śivapāda pipañcuḥ vala
{3}   vraḥ kamrateṅ ’añ śrī vīrasiṅhavarmma (3 bis) kamrateṅ ’añ ta mūla śrī varddha
{4}   kamrateṅ ’añ dhanañjaya
{5}   vraḥ kamrateṅ ’añ guṇadoṣa ta pvana
{6}   vraḥ kamrateṅ ’añ śrī jayendravarmma ldau
{7}   vraḥ kamrateṅ ’añ śrī vīrendrādhipativarmma chok vakula
{8}   ’anak sañjak kalās pryak ti hau vraḥ kamrateṅ ’añ śrī vīrāyudhavarmma
{9}   ’anak sañjak pat gnaṅ ti hau vraḥ kamrateṅ ’añ śrī jayāyudhavarmma
{10}   vraḥ kamrateṅ ’añ śrī mahīpatīndravarmma canlattai
{11}   ’anak sañjak vidyāgrāma ti hau vraḥ kamrateṅ ’añ śrī raṇavīravarmma
{12}   ’anak sañjak vīrajaya ti hau vraḥ kamrateṅ ’añ śrī rājasiṅhavarmma
{13}   ’anak sañjak ’aso vṅya phlāñ ti hau vraḥ kamrateṅ ’añ śrī vīrendrādhipativarmma
{14}   ’anak sañjak ’anak ciḥ ti hau vraḥ kamrateṅ ’añ śrī narapatīndravarmma
{15}   ’anak sañjak vni satra ti hau vraḥ kamrateṅ ’añ śrī śūrādhipativarmma
{16}   kamrateṅ ’añ dhanañjaya
{17}   vraḥ kamrateṅ ’añ paramaviṣṇuloka
{18}   (Blank).
{19}   kamrateṅ ’añ ta mūla śrī varddhana (19 bis) (Blank).
{20}   ’anak sañjak ’aso lṅgis ti hau vraḥ kamrateṅ ’añ śrī rājendravarmma
{21}   rājahota
{22}   vraḥ vleṅ
{23}   ’anak sañjak travāṅ svāy ti hau vraḥ kamrateṅ ’añ śrī pṛthivīnarendra
{24}   ’anak sañjak kavīśvara ti hau vraḥ kamrateṅ ’añ mahāsenāpati śrīvīrendravarmma
{25}   vraḥ kamrateṅ ’añ śrī . . . varmma
{26}   vraḥ kamrateṅ ’añ śrī jayasiṅhavarmma kamluṅ vrai nāṃ vala lvo
{27}   neḥ syāṃ kut
{28}   ’anak sañjak rājyakāryya bhāga pamañ jeṅ jhāla ta nāṃ syāṃ kak

{1}   vraḥ buddha kamrateṅ ’añ dharmmadarṣi ○ vraḥ mahābodhi kuraba
{2}   bṛkṣa [○] vraḥ bodhisattva jā vraḥ indra paṃre ta vraḥ buddha kamra
{3}   teṅ ’añ nu pañcāṅgikatūryya phoṅ ta dibya ○
{4}   dhammapratisthā kamrateṅ ’añ śrī nṛpatīndrabarddhana ○