K.125

{1}   923 śaka nu vāp dirgha hor oy saṃnvat [ta] vraḥ ’ālakṣana man karuṇā ti trā
{2}   ta praśasta nā vraḥ kaṃmrateṅ ’añ candiya ○ neḥ gi roḥh saṃnvat ○ ’añ khñuṃpaṃcyaṃ dirgha
{3}   hor kaṃmrateṅ jagat śaṃmbhupura oy saṃnvat pi paṅgaṃ thpvaṅ nivedana ta dhūlivraḥ pāda dhū
{4}   li jeṅ vraḥ kaṃmrateṅ ’añ ta paramapavitra nu kṛtajñabhaktiy ○ gi roḥh kīṃluṅṅ vraḥ
{5}   praśasta ’anau nā kaṃmrateṅ jagat śaṃmbhupura kaṃsteṅ śrī ’ānantyaśiva kaṃsteṅṅśrījayo
{6}   nnatha kaṃsteṅ śrī dhūtarāśi kaṃsteṅśrī bhagavan ukṛṣṇa ○ neḥ syaṅ rājakula vraḥpāda
{7}   parameśvara dau paṃmre cap janma ta kaṃmrateṅ jagat śaṃmbhupura ○ neḥkaṃmrateṅ ’añ ta pva
{8}   n gi vraḥ janani kaṃmrateṅ ’añ ○ kaṃsteṅ śrī ’ānantyaśiva nu kaṃsteṅ śrī janonnathasthāpa
{9}   nā kanlo[ṅ] kaṃmrateṅ ’añ pūrvvapaścima ○ cat sruk duk khñuṃ praśasta ta santāna’añ khñuṃ paṃcyaṃ
{10}   pre paṃmre ta kaṃmrateṅ jagat nu kanlo[ṅ] kaṃmrateṅ ’añ ta vyar ○ chloñ śrīnivāsana ta
{11}   kvan prasā kaṃsteṅ śrī ’ānantyaśiva duk vraḥ kośa ta kaṃmrateṅ jagat jvan khñuṃkalpanā
{12}   yajña liḥ vyar tvaṅ snel mvāy vraḥ gandha mvāy tanlāpp dik sroṅ noṅ vyar vṅya snāpta
{13}   vraḥ pranā[l]a mvāy bhājana jhe māgha mvāy kalpavṛkṣa mahānavamīy mvāy ○ neḥ
{14}   ti praśasta ta santāna ’añ khñuṃ paṃcyaṃ gi ta pre khñuṃ neḥ pradvān oy kalpanāneḥ lvoḥ
{15}   ta ’añ khñuṃ paṃcyaṃm oy kalpanā ta roḥh neḥh lvoḥ iluv grap ley ○ kaṃsteṅṅ
{16}   śrī bhagava ukṛṣṇa sthāpanā vraḥ kammrateṅ ’añ vāyavya sthāpanā vraḥ kaṃmrateṅ’añ
{17}   chdiṅ taṃmrek unila kaṃmrateṅ jagat gaṅgoṅ ○ kaṃsteṅ śrī dhūtarāśi sthāpanā vraḥkaṃmra
{18}   teṅ ’añ ta rāja ’āy sralāy cuṅ duk vraḥ caru ’āy sralāy teṃ ○ neḥ gi roḥh ka
{19}   lpanā kaṃmrateṅ ’añ ta pvān ta kaṃmrateṅ jagat śaṃmbhupura nuv devatā pramānśaṃmbhupura pho
{20}   ṅṅ ○ man ’añ khñuṃ paṃcyaṃ khñuṃ teṃ kaṃmrateṅ kaṃtvan ’añ gi pi dval vraḥkarunā ta paramapavitra ○
{21}   ’añ khñuṃ paṃcyaṃ mān vraḥ karunā ta paramapavitra ta gi rāj[y]a vraḥ pāda stacdau śivapada ti pre o
{22}   y thṅāy ta kaṃmrateṅ jagat śaṃmbhupura nuv devatā pramān śaṃmbhupura phoṅṅ ○gi pi dval vraḥ
{23}   karunā ta paramapavitra leṅṅ noḥ gi ta jā siddhi piy santāna ’añ khñuṃ paṃcyaṃ volpradvā
{24}   n leṅ lvoḥ sthirāvasāna ○