Language: བོད་ཡིག་

སྐར་ཅུང། Detail of Skar cung inscription by Hugh Richardson (Tibet Album). The top line beginning: ཡོངས་ཀྱྀས་ཀྱང་ཆོས་སློབ་ཅིང་ (line 37). University of Oxford no. 2001.59.17.40.1

[1] ༅། །འཕྲུལ་གྱྀ་ལྷ་བཙན་པོ་ཁྲི་ལྡེ་སོང་བརྩན་གྱི་རིང་ལ། །དམ་པའྀ་ཆོས་ཡུན་དུ་བརྟན་བར་གརྩིགས་བརྣན་པ། །

[4] ༅། །འཕྲུལ་གྱྀ་ལྷ་བཙན་པོ།མྱེས། ཁྲི་སྲོང་བརྩན་གྱི་རིང་ལ།་སངས་རྒྱས་ཀྱྀ་ཆོས་མཛད་དེ། ར་སའི་གཙུག་ལག་ཁང་ལས་སྩོགས་པ་བརྩྀགས་ཤིང་། །དཀོན་མཆོག་གསུམ་གྱྀ་རྟེན་བཙུགས་པ་དང་

[7] །མྱེས། ཁྲི་འདུ་སྲོང་གྀ་རིནག་ལ། བླིང་གྀ་ཁྲི་རྩེ་ལས་སྩོགས་པར། གཙུག་ལག་ཁང་བརྩྀགས་སྟེ། དཀོན་མཆོག་གསུམ་གྱྀ་རྟེན་བཙུགས་པ་དང་།

[10] །མྱེས། ཁྲི་ལྡེ་གཙུག་བརྟན་གྱྀ་རིང་ལ། །བྲག་མར་གྱྀ་ཀྭ་ཅུ་དང་མཆྀང་ཕུར་གཙུག་ལག་ཁང་བརྩྀགས་སྟེ། །དཀོན་མཆོག་གསུམ་གྱྀ་རྟེན་བཙུགས་པ་དང་།

[12] །ཡབ། ཁྲི་སྲོང་ལྡེ་བརྩན་གྱྀ་རིང་ལ། །བྲག་མར་གྱྀ་བསམ་ཡས་ལས་སྩོགས་པ། །དབུང་མཐར་གཙུག་ལག་ཁང་བརྩྀགས་སྟེ། །དཀོན་མཆོག་གསུམ་གྱྀ་རྟེན་བཙུགས་པ་དང་།

[15] ལྷ་བཙན་པོ། ཁྲི། ལྡེ་སྲོང་བརྩན་གྱྀ་རིང་ལ་ཡང་། །སྐར་ཅུང་གཙུག་ལག་ཁང་ལས་སྩོགས་པ་བརྩྀགས་སྟེ། །དཀོན་མཆོག་གསུམ་གྱྀ་རྟེན་བཙུགས་པ་ལས་སྩོགས་པ།

[18] གདུང་རབས་རྒྱུད་ཀྱྀས་། འདྀ་ལྷར་སངརྒྱས་ཀྱྀ་ཆོས་མཛད་པ་འདི། །ནམ་དུཡང་མ་ཞྀག་། མ་བཏང་ན་། ལེགས་པ་དཔགདུ་མྱེད་པར་འགྱུར་། །བཏང་སྟེ། ཞིག་གམ། མྱེད་པར་འགྱུར་ན། །སྡིགཔ་གྲངས་མྱེད་པར་འོང་བས།

[22] །ད་ཕྱྀན་ཆད་ནམ་ནམ་ཞ་ཞར། །འཕྲུལ་གྱྀ་ལྷ་བཙན་པོ། ཡབ། ཁྲི་སྲོང་ལྡེ་བརྩན་གྱྀ་རིང་ལ། །དཀོན་མཆོག་གསུམ་གྱྀ་རྟེན་བཙུགས་པ་དང། སངས་རྒྱས་ཀྱྀ་ཆོས་མཛད་པ་མྱྀ་གཏང་མ་ཞིག་པར་། །གདུང་རབས་རྒྱུད་ཀྱྀས་ཡི་དམ་བཅའོ་ཞེས་འབྱུང་བ་ལས་སྩོགས་པ། །བཙན་པོ་ཡབ་སྲས། །རྗེ་བློན་། ཀུན་ཀྱྀས་དབུ་སྙུང་དང་བྲོ་བོར་ཏེ། །གཙིགས་ཀྱྀ་ཡི་གེ་དང། རྡོ་རྀངས་ལ་བྲིས་པ་བཞིན་དུཡང་མཛད་དོ།

[28] །འདྀ་ལྟར། །ཡབ་མྱེས། གདུང་རབས་རྒྱུད་ཀྱྀས། །དཀོན་མཆོག་གསུམ་གྱྀ་རྟེན་བཙུགས་ཤྀང། སངས་རྒྱས་ཀྱྀ་ཆོས་མཛད་པ་འདི་། །གཅེས་སྤྲས་ཅྀ་ལ་ཡང། སྡྀག་གོ་ཞེའམ་། །མ་ལེགས་སོ་ཞེས་། མོདང་རྨྱི་ལྟས་ལས་སྩོགས་སྟེ། ཅྀའི་ཕྱིར་ཡང་རུང་སྟེ། མྱྀ་གཞིག་གོ། མྱྀ་སྤང་ངོ་། དེ་སྐད་ཅེས། ཆེ་ཆུང་སུས་གསོལད་ཀྱྀས་ཀྱང་། འདྀ་ལྟར་མི་མཛད་དོ།།

[33] བཙན་པོ་དབོན་སྲས། །ཀསུ་ཆུ་ངུར་བཞུགས་པ་ཡན་ཅད། ཆབ་སྲྀད་ཀྱི་མངའ་བདག་མཛད་པ་མན་ཆད་ཀྱང། དགེ་སློང་ལས། །དགེ་བའྀ་བཤེས་ཉེན་བསྐོས་སྟེ། ཆོས་ཐུགས་སུ་ཅྀ་ཆུད་ཆུད་དུ་བསླབ་ཅིང། །བོད་ཡོངས་ཀྱྀས་ཀྱང་ཆོས་སློབ་ཅིང་སྤྱད་པའྀ་སྒོ་མྱི་གཅད།

[37] ནམ་དུ་ཡང་བོད་ཡ་རབས་མན་ཅད། བོད་འབངས་ལས་ཐར་པར་གཟུད་པའྀ་སྒོ་མྱི་བགགཿཔར་། དད་པའྀ་རྣམས་ལས་ཐར་པར་བཙུད་དེ། །དེའི་ནང་ནས་ནུས་པ་ལས། །བཅོམ་ལྡན་འདས་ཀྱྀ་རིང་ལུགས་རྟག་དུ་བསྐོ་ཞྀང། །བཅོམ་ལྡན་འདས་ཀྱྀ་རིང་ལུགས་བྱེད་པའྀ་རྣམས་ཆོས་འཁོར་ནས་བྱའོ་ཅོག་གྀ་བཀའ་ལ་ཡང་བཏགས་སྟེ། །ཆོས་འཁོར་གྀ་ལས་དང་དབང་བྱེད་ཅྀང་། དགེ་བའྀ་བཤེས་ཉེན་བྱེད་པར་བསྐོའོ།

[43] རབ་དུ་བྱུང་བའྀ་རྣམས། །ངེད་ཡབ་སྲས་ཀྱྀས། མཆོད་གནས་སུ་གནང་བ་བཞྀན་དུབྱས་སྟེ། །བཙན་པོའི། ཕོ་བྲང་ན་དཀོན་མཆོག་གསུམ་གྱྀ་རྟེན་བཙུགས་ཤྀང་། མཆོད་པ་ཡང། །གུ་དུ་མྱྀ་བསྐར་ཞྀང་། མཆོད་གནས་སུ་བགྱྀའོ། །

བསམ་ཡས།

རྡོ་རིང་