Community: Khmer epigraphy

{1}   959 śaka nu vraḥ kamrateṅ ’añ śrī yogīśvarapandita sruk vnur kaṃdvāt viṣaya vyādhapura ’ācāryya sthāpaka vraḥ kamra
{2}   teṅ ’añ śivaliṅga ’āy vraḥ śrī narendragrāma jvan vraḥ kalaśa mvay hanira caṃdoṅ mukha vas pi rvvat vakam ṅan jya
{3}   ṅ 7 rūpyakaraṅka mvāy ṅan jyaṅ vyar liṅ 10 5 caṃnāṃ kalpaṇā sruk jāgrāma pramān ’moghapura śvetatandula thlva
{4}   ṅ 4 paryyaṅ mās mvāy sitacchatra mvāy doṅ mvāy mimvāy śaka nau ru kula nu śiṣya nu ’nak sañjak ta śrā
{5}   ddhā varddhe paripālana dharmma neḥ svey phala samabhāga nu vraḥ kamrateṅ ’añ śrī yogīśvarapaita vvaṃ ’āc ti pre ’na
{6}   k jāgrāma thve ṅār vvaṃ ’āc ti dār vnās cañcūla phoṅ leṅ oy caṃnāṃ kalpaṇā neḥ guḥ leṅ roḥh kalpaṇā vraḥ
{7}   kamrateṅ ’añ śrī yogīśvarapandita sruk jāgrāma man vraḥ pāda kamrateṅ kaṃtvan ’añ śrī sūryyavarmmade
{8}   va pre vāt saṅ gol pi oy nu khñuṃ noḥ phoṅ jā vraḥ dakṣiṇā sthāpaka tarāp bhūmi toy pūrvva cval stuk □ ṇ □
{9}   toy dakṣiṇa prasap śaṅkaraparvvata toy paścima cval kūpa toy uttara prasap travāṅ svāy ○

{31}   □ □ □ □ □ □ □ □ □ □ [kaṃ]steṅ vraḥ vryaṅ ta jmaḥ loñ dhes nu kaṃ[steṅ] ’aṃvil
{32}   □ □ □ □ □ □ □ □ □ □ □ □ □ □ □ □ □ □ □k bhūmi neḥh prasap vraḥ caṃnatt vraḥ kaṃmra
{33}   [teṅ] □ □ □ □ □ □ □ □ □ □ □ □ □ ga’āṅ laṃpoḥ ○ caṅvatt bhūmi neḥ ti pūrvva prasap ta sre
{34}   □ □ □ □ □ □ □ □ □ □ □ □ □ □ prasap ta sre kañjuḥ vraṅ pat=tāṅ=taiy ta noḥ ○ vāyavyo
{35}   [ttara] □ □ □ □ □ □ □ mahānasa ○ paścimavāyavya prasap ta sre ’nak vraḥ caṃnat nu
{36}   □ □ □ □ □ □ □ □t ○ ta paścima prasap ta sre ’nak vraḥ caṃnat sot ○ dakṣiṇa nai
{37}   □ □ □ [vraḥ] vña vraḥ caṃnat pat=tāṅ=taiy ta noḥ sot ○ ti ’āgneya ’arddhabhā
{38}   [ga] □ □ □ □ □ caṃnat kaṃsteṅ prac ○ neḥ gi vnāss bhūmi neḥ ’aṃvi ta gol īśāna
{39}   □ □ □ □ □ □ □ □y slik 100 80 8 ○ ’aṃiv ta gol īśāna lvoḥ ta gol vāyavya
{40}   □ □ □ □ □ □ □ vāyavya lvoḥ ta gol naiṛtiya prasap vraḥ vña slik 100 80 8
{41}   □ □ □ □ □ □ □ [nai]ṛtiya pat tāṅ taiy lvoḥ ta gol kantāl pvār ti ’āgneya
{42}   [thlai man oy] [bhū]mi neḥ vudi 1 padigaḥ 1 kuntikā 1 thnap 2 canlyāk ’ruṅ yau 3 kryav
{43}   □ □ □ □ □ □ □ □ga 2 gi [bhūmi] dakṣiṇa noḥh nai teṅ hyaṅ vasanta varṇṇa vraḥ vasa
{44}   [na nu loñ ne]y varṇṇa vraḥ chpār ○ ti ’ji ’nak si kaṃsteṅ vraḥ vryaṅ toy mātṛpa
{45}   [kṣa] □ □ □ □ □ha hetu mān saṃvandhi ○ man teṅ hyaṅ vasanta nu loñ ney vraḥ
{46}   □ □ □ □ □ [tā]c santāna pi śūnyamūla dau ○ vraḥ karuṇā prasāda ta vraḥ kamra
{47}   [teṅ] [’añ] [ga’āṅ] laṃpoḥ cās ○ [nau] vraḥ kaṃmrateṅ ’añ vyāpāra ta ph’van toy mātṛ[pakṣa]
{48}   □ □ □ □ □ [vraḥ] [ka]mrateṅ ’añ śrī rājendravarmma sañjakk vraḥ pāda kamrateṅ ’añ
{49}   [kaṃtvan stac] dau paramanirvvāṇapada hoṅ ta viṅ jā senāpatiy ta vraḥ pā
{50}   [da kamrateṅ ’añ] śrī udayādityavarmmadeva ○ gi ta viṅ dār prasāda bhūmi neḥ sot ○
{51}   [vraḥ śāsana pre] vraḥ kamrateṅ ’añ śrī rājendrapandita sabhāpati sruk ya
{52}   □ □ □ [nu vraḥ] [kamra]teṅ ’añ śrī rājendropakalpa vraḥ sabhā sruk varadā niyama
{53}   □ □ □ □ □ □ □ □ caṅvatt oy śapaṭa taṅtyaṅ sākṣi 10 6 vol ekavākya man
{54}   □ □ □ □ [teṅ hya]ṅ vasanta nu loñ ney vraḥ chpār syaṅ ta ’yat santāna ley vyat
{55}   [man bhūmi noḥ ti dār] roḥh vraḥ karuṇā jā prasāda ta vraḥ kamrateṅ ’añ vyāpā
{56}   [ra] [vnās bhūmi] [teṅ hya]ṅ vasanta ta diṅ thṅāy ’aṃvi ta pvār lvoḥ travāṅ vadarā slik 2 200 40 10
{57}   [bhūmi pantoy thṅāy] draṅ 100 mān nā 40 10 mān nā 5 mān nā 10 5 mān nā 5 mān nā thlās
{58}   □ □ □ ’ādityavara gi nu sthāpanā vraḥ kamrateṅ ’añ bhagavatī rūpa teṅ
{59}   [tva]n vraḥ kaṃmrateṅ ’añ ai ’āsana kamrateṅ jagat śrī jayakṣetra ○ jvan
{60}   [nu] bhūmi neḥ nu bhūmi ’āy cuṅ chdiṅ ta jā mṛtakadhana vāp vak vraḥ karuṇāprasā
{61}   data vraḥ kamrateṅ ’añ ○ jvan laṃvāṅ noḥ jā ’āśrama nu caṃnat noḥ ta jmaḥ rājendrapura
{62}   kalpanā caru liḥ 5 pratidina si □ □ trā velā phalguna ○ jvan vña neḥ phoṅ ta gāp paṃ
{63}   mre pratipakṣa ○ vvaṃ ’āc ti ’āyatta ta kula vraḥ kaṃmrateṅ ’añ nu ’nak ga’āṅ laṃpoḥ [nu]
{64}   khloñ nu ’nak ta khloñ viṣaya ta trvac vraḥ rājakāryya ’āy ○ ta paripālana caṃnyar
{65}   kula vraḥ kamateṅ ’añ janārddaṇa ta śuklapakṣa ○ kula vraḥ kamrateṅ ’a
{66}   ñ vraḥ ta śakti kṛṣṇapakṣa ○ daha ’yat santāna ta gi noḥ ta vyar ta ’āc pari
{67}   pālana nau ruv ’nak pvās ta mān dharmma ta ’āc thve caṃnāṃ neḥ roḥh kalpa
{68}   nā noḥ gi nā ’āyatta

{1}   964 śaka dvādaśī roc māgha vudhavāra nu vraḥ kamrateṅ
{2}   ’añ śrī kaṇṭhapandita sruk phalapriya oy sroṅ kamrateṅ ja
{3}   gat śrī jayakṣetra pi jvan dravya ta ’aṃpall neḥh ○ ’aṅgulīyaka
{4}   pvānn sme ṅan pāda mvāy khāl prāk mvāy ṅan liṅ tap
{5}   rūpyabhājana kralā vāra hanira mvāy ṅan jyaṅ piy svok la
{6}   ṅgau mvāy ṅan jyaṅ prām ○ kadāha mvāy ṅan jyaṅ prām □ □
{7}   ṅ laṅgau vyar sme ṅan jyaṅ mvāy ○ man khmi sthāpanā ’āsana kamrate
{8}   ṅ jagat dep thve caṃnāṃ kalpanā ta jā ’aṅga paṃre pratidina thvāy
{9}   dravya ta roḥh neḥh sot ta kamrateṅ jagat nu duñ bhūmi ○ go
{10}   bhīkṣa pīy sme ṅan pāda mvāy ○ khāl prāk mvāy ṅan liṅ tap ○
{11}   vaudi piy sme ṅan jyaṅ praṃ mvāy ○ padigaḥ vyar sme ṅan jyaṅ prām ○
{12}   bhājana pvānn sme ṅan jyaṅ pvānn ○ tamrya mvāy dopasdū vyar ○ thnap
{13}   thpir praṃ pīy ○ canlyāk jña yau vyar ○ raṅgarai yau vyar ○ tap hat
{14}   yau vyar ○ ’aṃval bhai vyar ○ marica liḥ piy ○ kravāñ liḥ praṃ vyal
{15}   ’vār vyar ○ man srāc thvāy dravya ta roḥh neḥh jā nai kaṃmrateṅ ja
{16}   gat dep dau duñ bhūmi nu gi ta ’nak thkval nu ’nak pralāy slā vraḥ jaṃnvan va
{17}   rṇṇa vraḥ kṣīra ○ bhūmi noḥ man duñ toy uttara sruk thkval bhāga vyar ○ bhā
{18}   ga mvāy toy pūrvva pralāy ruṅ ta diṅ thṅai śata vyar thlās vyar veṅ
{19}   pantoy thṅaiy ’aṃvi kantāl pralāy slik mvāy bhai pvānn thlās pvānn
{20}   bhāga mvāy toy paścima pralāy saṃ caṅvāt nu noḥ toy pūrvva ukk
{21}   ruṅ ta diṅ thṅaiy śata prām bhai vyar thlās tap praṃ mvāy veṅ panto
{22}   y thṅaiy ’aṃvi kantāl pralāy slik mvāy bhai piy thlās tap
{23}   praṃ piy ○ neḥ gi jmaḥh ’nak thkval nu ’nak pralāy slā ta na[u] thkval ta lakk gi
{24}   bhūmi noḥ nā yok dravya ta roḥh neḥh ○ loñ vraḥ pradhāna
{25}   sruk thkval ○ loñ □ sruk pralāy slā ○ vāp mūla ○ vāp ’ap ○ vāp eka ○ vāp y□ [○]
{26}   vāp vrau ○ vāp vis ○ vāp dhap ○ vāp dhaṃ ○ vāp saṃ ○ vāp śreṣṭha ○ vāp vai ○ vāp viñ ○
{27}   vāp vrahma ○ ’nak neḥ phoṅ syaṅ ta samayuga yok iss dravya noḥ phoṅ ta jā thlai
{28}   bhūmi ○ pek sapp kule ta gi bhāga didai ra srāc dep syaṅ ta śapatha nu vraḥ
{29}   śrīy vnek ni ta kamrateṅ jagat vaddhapratijñā roḥh neḥh nā bhūmi neḥh
{30}   man vraḥ kamrateṅ ’añ phalapriya duñ ta yeṅ nā nu sthāpanā ’āsana ka
{31}   mrateṅ jagat nu thve caṃnāṃ kalpanā ta jā ’aṅga paṃmre pratidina ta kamrateṅ jagat
{32}   pi parikalpa pre kule ta mūla gi ta paripālana pradvānn yeṅ vvaṃ kapata pi thve
{33}   ’apavāda tyaṅ ○ mān kamrateṅ phdai karoṃ toy kroy ta nu yok kulagaṇa
{34}   yeṅ cuñ leṅ kamrateṅ jagat yeṅ phtāṃ ta kulasantāna yeṅ toy
{35}   kroy leṅ [kaṃ] pi yok bhūmi neḥ cuñ leṅ kamrateṅ jagat ○ ta ’nau ta gi
{36}   bhūmi noḥ nā oy gi dravya ta roḥh neḥh dep saṅ gol ta gi ○ vraḥ kamrateṅ ’añ
{37}   vrāhmaṇa trivikrama rājapurohita ○ vraḥ kamrateṅ ’añ vrāhmaṇa yaśodhara [○]
{38}   mratāñ khloñ vrāhmaṇa nākadhvaja ○ vraḥ kamrateṅ ’añ vidyāśrama ’adhyāpa
{39}   ka ’āy kamrateṅ jagat śrī jayakṣetra ○ vraḥ kamrateṅ ’añ ’nak
{40}   ciḥ bhagavan ’aparāhna śuklapakṣa ○ vraḥ kamrateṅ ’añ śatagrāma bhagavan ’aparāhna
{41}   kṛṣṇapakṣa ○ vraḥ kamrateṅ ’añ travāṅ slā bhagavan pūrvvāhna śuklapakṣa ○ vraḥ ka
{42}   mrateṅ ’añ vanlāp upakalpa madhyāhna śuklapakṣa ○ vraḥ kamrateṅ ’a
{43}   ñ kumāravandha yajamāna śuklapakṣa ○ khloñ vala janārddana yajamāna kṛ
{44}   ṣṇapakṣa ○ vraḥ kamrateṅ ’añ purohita rājasiddhāya ○ vraḥ kamra
{45}   teṅ ’añ phsat ○ vraḥ kamrateṅ ’añ tarāñ upakalpa nā kamrateṅ
{46}   ’añ tapasvi ○ vraḥ kamrateṅ ’añ śreṣṭhapura varāśraya ○ vraḥ kamrateṅ
{47}   ’añ senā vrāhmaṇa sruk jlo ○ kaṃsteṅ stuk daṅdaṅ ○ khloñ vala bhagavan sruk vra
{48}   ḥ paryyaṅ ○ kaṃloñ ’nak ’āy kamrateṅ jagat ○ vraḥ kamrateṅ ’añ śrī gu
{49}   ṇapativarmma sruk ga’āṅ laṃpoḥ trvac vraḥ rājakāryya ○ vraḥ kamrateṅ ’añ hema
{50}   khloñ viṣaya ○ kaṃsteṅ travāṅ vlaṅ ○ khloñ vala thṅe ○ khloñ vala travāṅ vlaṅ ○
{51}   kaṃsteṅ vrai taṃpoṅ trvac vala ○ kaṃsteṅ thlvaṅ khloñ bhūtāśa ○ kaṃsteṅ vo panduk [○]
{52}   khloñ bhūtāśa vraḥ jaṃnvan ○ kaṃsteṅ kanlaḥ vrai khloñ mukha khnet ○ kaṃsteṅ bhāsmīśa khlo
{53}   ñ mukha rṇnoc ○ kaṃsteṅ jaroy vo trvac vala khnet ○ kaṃsteṅ jmok trvac vala rṇnoc ○
{54}   kaṃsteṅ nā teṃ pādamūla ○ kaṃsteṅ mat tarāñ vraḥ jaṃnvan ○ kaṃsteṅ vnaṃ cya vraḥ jaṃ
{55}   nvan ○ kaṃsteṅ khmaṅ rān vraḥ jaṃnvan ○ kaṃsteṅ khjaṅ vraḥ jaṃnvan ○ kaṃsteṅ trivikrama nā teṃ ○ kaṃste
{56}   ṅ mat vrai khloñ bhūtāśa vrai taṃvūṅ ○ kaṃsteṅ gnaṅ chmār khloñ bhūtāśa viṣaya ○ kaṃsteṅ lun
{57}   vraḥ jaṃnvan ○ mratāñ khloñ pos ’nel ○ pradhāna stuk khyoṅ vraḥ canmāt ○ pradhāna pra
{58}   lāy vraḥ jaṃnvan ○ pradhāna jeṅ chdiṅ vraḥ jaṃnvan ○ pradhāna yavapura vraḥ jaṃnvan ○ pradhāna
{59}   thkval nu ’nak pralāy slā sapakṣa nu kulapakṣagaṇa phoṅ samayuga nu ’nak ta roḥ
{60}   h neḥh hoṅ [○] srāc dep nāṃ vraḥ kamrateṅ ’añ śrī mahendrapandita sruk pūrvvāśrama
{61}   sabhāpati ○ vraḥ kamrateṅ ’añ vidyāśrama svat vraḥ dharmmaśāstra ○ vraḥ kamrateṅ ’añ vraḥ jrai ○
{62}   vraḥ kamrateṅ ’añ varadā ○ kaṃsteṅ ya nap sabhā sot ○ kaṃsteṅ mat ’le□ ○ khloñ va
{63}   la vraḥ jranyāṅ khloñ saṃtāp syaṅ ta vātt ti bhūmi no[ḥ] saṅ gol ta gi viśvadiśa prāṃ pi
{64}   toy ’āyāma vistāra ta mān ta pañjiya [○] dep vraḥ kamrateṅ ’añ phalapriya
{65}   yok ti ta gi bhūmi noḥ mok oy sroṅ kamrateṅ jagat sot jvan ta kamrate
{66}   ṅ jagat duk cval kaṃluṅ vraḥ kralā glāṅ pratipakṣa ○

{1}   oṃ namaś śivādibhyo gurubhyaḥ 964 śaka ’māvasyā ’āṣādha candravāra puṣyanakṣatra nu vraḥ kaṃmrateṅ ’añ śrī
{2}   guṇapativarmma sruk ga’āṅ laṃpoḥ duñ bhūmi lac lau taṃnaṃ ○ vrai ta diṅ ○ vrai rkā stuk ’vāy ○ stuk trape
{3}   k ○ vnur pruk ○ vrai vnaṅ ta khloñ jnvāl cas sīvā ta jmaḥ kaṃvaiy ’ṭā kanhyaṅ nu khloñ jnvāl kanmyaṅ ta ph’van ta jmah
{4}   vrahma nu ph’van ta jmaḥ dharmma ○ nu kanmvāy noḥ ta jmaḥ vrahma ○ sruk teṃ valvval ○ dravya nu duñ cancyān 1 ṅann
{5}   mās pāda 1 ○ khāl prak hanira 1 ṅann liṅ 6 ○ vaudi vīrapura 2 ṅann jyaṅ 10 4 ○ padigaḥ vīrapura 2 ṅann jyaṅ 10 3
{6}   phsaṃ ṅann tula 1 jyaṅ 7 ○ taṃmrya 1 ’seḥ 1 rdeṣ 1 thnap 4 ○ canlyak ’ruṅ 100 ○ srū 100 ○ caṅvāt bhūmi noḥ ti khloñ jnvāl
{7}   nu kule ○ khloñ jnvāl samayuga nu vraḥ kaṃmrateṅ śrī samaravīravarmma sruk stuk slut ta khloñ kandvāra bhṛtti pi oy
{8}   □ th[l]ai dravya noḥh ○ ’āgneya tarāp gol thmo nā kaṃdvāt phoṅ prasap nu bhūmi janeka nā sivā ○ pūrvva tarāp gol
{9}   [thmo pra]sap bhūmi vāṅ luṅ ○ īśāna tarāp gol thmo nā teṃ taṅko nu ceṅ prasap nu bhūmi sivā ○ ta kāll bhūmi
{10}   [kandā]l sre ○ ti uttara [tarāp] gol prasap bhūmi sivā ta kāll bhūmi kantāl sre sot ○ caṃnyar noḥh mok paścima
{11}   [tarāp] gol □ □ koh pān ge y□ □ □ □ □ □ □ṅ □aiy leṅ noḥ dau uttara tarāp gol stu
{12}   k [tra]pek caṃnyar noḥ dau uttara phoṅ tarāp gol □ □k dnal ○ vāyavya vnaṃ kraṅ khmāy ○ paścima
{13}   □ □ naiṛti □ □ kracāṅ ○ dakṣiṇa □ □ □ □ □ dakṣiṇa sot tarāp gol nā canpār jrai v□ □ □ □ □
{14}   □ □ pūrvva noḥh tarāp gol □ □ □ □ □ □ □ □ □ṅ prasap bhūmi sivā □ □ □ □ □ □ □ □ □ □
{15}   □ □ samayuga nā oy dravya ta roḥh noḥh pi duñ bhūmi noḥ ○ vraḥ kaṃmrateṅ □□□□□□□□
{16}   □□□□ñ svāy ryyāp pandita vraḥ kaṃmrateṅ ’añ yaśodharavrāhmaṇa □□□□□□□□
{17}   □□□ [kaṃ]mrateṅ ’añ vidyāśrama sva□□□□ ○ vraḥ kaṃmrateṅ ’añ □□□□□□□□□□
{18}   □□□ vraḥ sabhā nā do ○ mratāñ khloñ □□ ’leṅ ○ vraḥ kaṃmrateṅ ’añ śrī □□□□□□□□
{19}   □□□□ ’añ kaṃvaṅ vryaṅ kula vraḥ kaṃmrateṅ ’añ □□ ’āśrama vraḥ kaṃmrateṅ ’añ □□□□□□□□□□
{20}   □□□□ [pra]mān bhīmapura ○ vraḥ kaṃmrateṅ ’añ rudraloka □□□□□□□□□□□□□□□
{21}   □□□□ thnap muni kāra kaṃsteṅ □□□□□ kaṃsteṅ □□□□□□□□□
{22}   □□□ kaṃsteṅ cyaṃkrāṅ khloñ □□□□□□□□□□□□□□□□□□□
{23}   □□□ vrai vraḥ ’āla[kṣaṇa ?] □□□□□□□□□□□□□□□□□□□□□□□□□□□□□□□□□□□□□□□□□□□□
{24}   □□□ khloñ vala jrai □□□□□ mrate□□□□□□□□□□□□□
{25}   □□□□ khloñ vraḥ y□□□□□□ cañcan ○ khloñ vraḥ vṅya ○ kaṃsteṅ kaṃ□□□□□□□□□□
{26}   □□□□□□ khloñ □□□□ ○ kaṃsteṅ tpal ’aṃvil ○ kaṃsteṅ khtvāc khloñ □□□□□ steṅ □□
{27}   □□□□ vraḥ v.k ○ kaṃsteṅ r□rvvā□□□□ ○ mratāñ khloñ stuk krāñ vraḥ pandita □□□□□□□□
{28}   □ khloñ vala taṃ□□□ vraḥ smiṅ kaṃsteṅ □naṅ khloñ bhūtāśa smiṅ kaṃsteṅ khsāc so□□□□□ khloñ □
{29}   □□□□□□□□ ’añ teṅ tvan pek dak dmuk canlyāk ti khm. □□ṇa ta jmaḥ loñ kīrttidharmma □□□□□□ pradhāna □
{30}   □□□□□□□ kaṃsteṅ pralāy khloñ gmāl ta jmaḥ loñ muk ○ khloñ vala vraḥ vyo□□□□□□ putra vraḥ [kaṃ]
{31}   [mrateṅ] ’añ bhadrāśrama ○ kaṃsteṅ ga’āṅ ruṅ sruk ga’āṅ ruṅ ○ kaṃsteṅ madhyadeśa kanmv[āy]□□□mrateṅ
{32}   □□□□□□□□ khloñ viṣaya ○ khloñ vala thlvaṅ kanmvāy kaṃsteṅ thlvaṅ khloñ bhūtāśa ○ kaṃsteṅ □□□ khloñ va
{33}   [la] □□□□□□□□ loñ so ○ kaṃsteṅ cakripura kaṃsteṅ trvāc ’aṃpyal upādhyāya chmāc nā vraḥ rājakāryya ○ lo
{34}   [ñ] □□□□□□□ chmāṃ ’aṃmras ○ bhūmi neḥ ti vraḥ kaṃmrateṅ ’añ śrī guṇapativarmma duñ srāc dep saṅ gol
{35}   □ □ □ □ □ □ [kaṃ]mrateṅ jagat śrī jayakṣetra oy ta kaṃsteṅ ’so ta putra ta jmaḥ loñ hiraṇya ○ ri kula nā
{36}   □ □ □ [kaṃsteṅ] ’so iṣṭi pi pek dep mān bhūmi noḥ ukk ○ ta srasir saṃrāp prasir neḥ phoṅ ta kāla noḥ □
{37}   □ □ □ □ □ grāma vraḥ sabhā ta mān sruk maṅgalapura kadaḥ iss nu khloñ vala saṃvok samasira ○
{38}   □ □ □ □ □ □ □ □ ket ’āṣādha noḥh vṛhaspativāra dravya man kaṃsteṅ ’so ta jmaḥ loñ hiraṇya oy sot
{39}   [samayuga nu] khloñ jnvāl cās ta jmaḥ kaṃvaiy ’ṭā kanhyaṅ vaudi vīrapura mvāy khyaṅ 6 canlyāk yo 10 thlā
{40}   □ □ □ □ □ canlyāk yo 10 2 thnap 1 ○ oy thlās vraḥ sabhā ta saṅ gol ○ vraḥ kaṃmrateṅ ’añ pūrvvāśra
{41}   [mādhi]pati thnap 2 canlyāk yo 10 ○ vraḥ kaṃmrateṅ ’añ vidyāśrama thnap 1 canlyāk yo 5 ○ vraḥ kaṃmrateṅ
{42}   □ □ □ thnap 1 ullāra yo 2 ○ kaṃsteṅ ya nap vraḥ sabhā thnap 1 ullāra yo 1 ○ mratāñ khloñ mat chlaṅ
{43}   [khlo]ñ vala pūrvvāśrama thnap 1 [○] phsaṃ thlās vraḥ sabhā ta saṅ gol thnap 7 canlyāk yo 10 □ □ □ □ □ □
{44}   □ □ □ □ bhūmi vāṅ luṅ dai vraḥ kaṃmrateṅ ’añ śrī samaravīravarmma stuk slut oy ta vraḥ kamrateṅ
{45}   [’añ śrī guṇa]pativarmma ukk [○]

{1}   958 śaka trayodaśī ket ’āṣādha ta jā jyeṣṭha vuddhavāra ’anurādhanakṣatra gi nu kaṃsteṅ vraḥ vryaṅ mūla [cañ]
{2}   cañ vraḥ kralā l’vaṅ yugapāt nu mūla ta prām kaṃsteṅ vraḥ vryaṅ ○ mratāñ khloñ kumāravandha ta jmaḥ loñ
{3}   so ○ mratāñ khloñ caṃnat kantāl sre ta jmaḥ loñ ma ○ mratāñ jeṅ tyak ta jmaḥ loñ go ○ mratāñ khloñ
{5}   svāy ’aṅgañ ta jmaḥ loñ jā ○ mūla ta roḥh neḥh sre jaṃhvat praṃ vyal ’nau vāk toṅ tiṅ veṅ 200 20 ruṅ [200]
{5}   60 10 2 gi pi oy bhūmi ta roḥh neḥh ta vraḥ kaṃmrateṅ ’añ śrī guṇapativarmma man pāñjiya cval nā sru
{6}   k vraḥ vryaṅ phley mūla ta roḥh neḥh khcya vraḥ kaṃmrateṅ ’añ śrī guṇapativarmma paṅgaṃ thpvaṅ nivedana ○ mān
{7}   vraḥ karuṇā pre tāk pāñjiya pi las ’arddhabhāga dau sap mūla neḥ ○ kamluṅ man ti ’nak neḥ prārthaṇā pi
{8}   oy bhūmi noḥ guḥ dravya ti oy thlaiy ○ kaṃsteṅ vraḥ vryaṅ khāl prāk hanira 1 liṅ 9 vaudi vīrapura 1
{9}   padigaḥ vīrapura 1 ○ kaṃsteṅ thṅe ta ph’van kaṃsteṅ vraḥ vryaṅ thnap yo 1 mratāñ khloñ kumāravandha vaudi vīra
{10}   pura 1 padigaḥ vīrapura 1 ○ mratāñ ca[ṃ]nat kantāl sre vaudi vīrapura 1 padigaḥ vīrapura 1 bhājana 2 ○ mratāñ khloñ
{11}   jeṅ tyak vaudi vīrapura 1 padigaḥ vīrapura 1 ○ mratāñ khloñ svāy ’aṅgañ vaudi vīrapura 1 padigaḥ vīrapura 1 ullāra vlaḥ 1 ○
{12}   bhūmi neḥ ti duñ srāc ti jvan ta kamrateṅ jagat śrī jayakṣetra dep oy ta kvan ○ teṅ vīja teṅ gaṅ teṅ jīva
{13}   ta ’nau nā duñ bhūmi ta roḥh neḥh ○ vraḥ kaṃmrateṅ ’añ śrī nṛpendrāditya ○ steṅ stuk kandan trvāc
{14}   dvār ○ kaṃsteṅ mat tarāñ khloñ mukha pakṣa khnet ○ kaṃsteṅ vina khloñ mukha rṇnoc ○ kaṃsteṅ bhīṣanavāsa
{15}   kulapati vraḥ devyāśrama ○ kaṃsteṅ ya nap vraḥ sabhā nā do ○ khloñ vala stuk sno ta jmaḥ loñ □ □
{16}   sūjana ○ kaṃsteṅ vraḥ jranyāṅ cañcāñ kaṃsteṅ cāṃ vraḥ pāñjiya khnet sruk travāṅ saṅko ○ kaṃ
{17}   steṅ jaṃrau śilpi nā kaṃmrateṅ jagatt ○ mratāñ khloñ pralāy ta jmaḥ loñ mādhava ○ khloñ □
{18}   ka taṃmrvāc vraḥ rājakāryya ○ kaṃsteṅ daṃdāṃ sruk maṅgalapura ta jmaḥ loñ ’yak ○ kaṃsteṅ □ □ □ □ □ □ □ □
{19}   kaṃ’vāy dvāra khloñ kandvāra pakṣa khnet ○ loñ vnaṃ cya[r] taṃmrvāc vraḥ chpār khnet guru ta loñ □ □
{20}   kaṃsteṅ śrīvīra drapok ○ vraḥ sabhā ta saṅ gol ta bhūmi neḥ ○ vraḥ kaṃmrateṅ ’añ varada ○ kaṃsteṅ □ □
{21}   vraḥ sabhā nā do ○ khloñ vala pūrvvāśrama ○ mratāñ khloñ viṣahava ○ pradhāna sruk ta dau ukk kaṃsteṅ □
{22}   kol khloñ bhūtāśa ○ kaṃsteṅ ’aṃvil chvaṅ ta jmaḥ loñ so ○ kaṃsteṅ dhūlivarṣa ○ sre neḥ [ta]
{23}   kaṃsteṅ vraḥ vryaṅ daiy jaṃhvat 2 ruṅ 80 9 ○ mratāñ khloñ kantāl sre jaṃhvat 2 ruṅ 40 10 2 ○ mra[tāñ]
{24}   khloñ kumāravandha jaṃhvat 1 ruṅ 40 4 ○ mratāñ khloñ jeṅ tyak jaṃhvat 1 ruṅ 40 5 mratāñ khloñ svā
{25}   y ’aṅgañ jaṃhvat 1 ruṅ 40 3 ○ neḥ jeṅ sme veṅ 200 20 ○

{1}   □ □ □ □ □ □ □ □ □ □ □ □ □ □ □ □ [dhūli] vraḥ pāda dhūli je
{2}   [ṅ vraḥ kaṃmrateṅ ’añ stac nau ta] caturmukha vraḥ
{3}   □ □ □ □ □ □ □ □ □ □ □ □ □ □ ’añ vidyā□ □ □
{4}   □ □ □ □ □ □ □ □ □ □ □ □ guṇadoṣadarśśi ○ nau ’na
{5}   [k] □ □ □ □ □ □ □ candrapura phoṅ vvaṃ ’āc ti ’āyatta ta
{6}   □ □ □ □ □ □ □la phoṅ vvaṃ ’āc ti mān pidā po□
{7}   □ □ □ □ □ □ □ □ □ mān ’nak ta khmi jā śatru ta ’a□
{8}   □ □ □ □ □ □ □ □la thve pūjā kaṃmrateṅ jagat
{9}   □ □ □ □ □ □ □ vvaṃ thve toy vraḥ niyama ta □ □
{10}   □ □ □ □ □ □ □ [u]ttamasaha ○
{11}   □ □ □ □ □ □ □ man thvāy jā vraḥ dharmma kamra
{12}   □ □ □ □ □ □ □ □rjitāśrama nu upāya neḥ □ □ □
{13}   □ □ □ □ □ pu □ □ □ y □ □ □ □ □ □ □ □ □ □ □ □
{14}   □ □ □ ta □ □ □ □ □ □ □ □ □ □ □ □ □ □ □ □ vraḥ
{15}   □ □ □ □ pa □ □ □ □ □ □ □ □ □ □ □ □ □ □ □
{16}   □ □ □ □ □ □ □ □ □ □ □ □ □ □ □ □ □ □ □ □
{17}   □ □ □ □ □ □ □ gava □ □ □ □ □ □ □ □ □ □ □ □ □
{18}   □ □ □ □ □ □ □ ’añ □ □ □ □ □ □ □ □ □
{19}   □ □ □ □ □ □ □ □ □ ○ nau ’nak ta □ □ □ □ □ □ □ □ □
{20}   □ □ □ □ □ □ □ □ vraḥ candrāditya mān □ □ □
{21}   □ □ □ □ □ dvātriṃśanarakk ○ tarāp vr[aḥ]
{22}   □ □ □ □ □ □ □ □ □ □ □ □ i □ □ □ □ □ □ □

{A3}   1041 śaka pañcamī □ □ śrāvaṇa candravāra nu vraḥ pādakamrateṅ ’añ śrī sūyyavarmmadeva stac ’nau nā vraḥ kra
{A4}   lā [nu gi] vraḥ kamrateṅ ’añ vrāhmaṇa kamrateṅ ’añ rājakularājaputra mahāmantri senāpati vraḥ kamrateṅ ’a
{A5}   ñ guṇadoṣadarśi ta pvan ’nak sañjak khloñ glāṅ ta pvan ’naksañjak khloñ vraḥ laṃvāṅ phoṅ syaṅ ta gāl pi bhagavat pā
{A6}   da kamrateṅ ’añ ta guru śrī divākarapaṇḍita chlaṅ havirvvādavraḥ pāda kamrateṅ ’añ śrī sūryyavarmmadeva stac cuḥ le
{A7}   vraḥ □ □ □ □ □ □ □ □ □ □ □ □ □ □ □ □ □ □ lek vraḥ ’añjali pandvalpre sthāpanā praśasta neḥ ○ bhaga
{A8}   vat pāda kamrateṅ ’añ ta guru śrī divākarapaṇḍita sruk vnur dnaṅviṣaya sadyā varṇa karmmāntara triṇi uditodita
{A9}   □ □ va □ □ □ □ vayaḥ guḥ ryyan paryyan iss ’āgama phoṅ thve isstapaḥ phoṅ ○ lvaḥ ta rājya vraḥ pāda kamrateṅ ’añ śrī u
{A10}   dayādityavarmmadeva ta svey rājya nu 972 śaka pi sthāpanākamrateṅ ’añ suvarṇaliṅga □ □ □ □ □ □ □ □ □
{A11}   pi duk ’arcana bhagavat pāda kamrateṅ ’añ ta guru śrīdivākarapaṇḍita gi ta ’añjeñ ’arcana [vraḥ neḥ] ○ lvaḥ ta rājya vraḥ pāda
{A12}   kamrateṅ ’añ śrī harṣavarmmadeva bhagavat pāda kamrateṅ’añ ta guru śrī divākarapaṇḍita gi ti ’añjeñ [jā ’ācāryya]pra
{A13}   dhāna nā catvārī ○ lvaḥ ta rājya vraḥ pāda kamrateṅ ’añ śrījayavarmmadeva [ta] svey vraḥ dharmmarājya pi prās [tapaḥ thve]
{A14}   sarvvayogya ta jā vraḥ guru ta nu thve rājābhiṣekahoma [nu]vraḥ yajña phoṅ bhagavat pāda kamrateṅ ’añ ta guru śrī divāka
{A15}   rapaṇḍita gi ti ’añjeñ jā vraḥ guru thve rājābhiṣekahoma[nu]vraḥ yajña phoṅ oy nāma bhagavat pāda kamrateṅ ’añ ta
{A16}   guru śrī divākarapaṇḍita prasāda hemadolā pi jiḥ sitātapatranara ti pre ’nak chattradhāra [’nak] ta seṅ prasāda sarvvadra
{A17}   vya ta daṃnep=ra khāl mās vāna vat khlās pratigraha taṃryya’seḥ □ khñuṃ nu dāsī ’val ta bhagavat pāda kamrateṅ ’añ ta guru śrī di
{A18}   vākarapaṇḍita jvan sap devatākṣetra phoṅ thve yajña sthāpanājyak travāṅ oy dāna dravya ta daṃnep=ra khāl mās
{A19}   vat khlās pratigraha taṃryya ’seḥ khñuṃ ta vrāhmaṇa paṇḍitasap bhāga nu ’nak ta dīnānātha phoṅ ta gi man vraḥ pāda kamrate
{A20}   ṅ ’añ śrī jayavarmmadeva stac kṣetrādhigama [dau] tīrthā [tadaṃep=ra] dau kamrateṅ jagat śrī cāmpeśvara bhagavat pāda kamrate
{A21}   ṅ ’añ ta guru śrī divākarapaṇḍita gi ti ’añjeñ dau □ □ □ □ ta sapdevatākṣetra phoṅ ○ lvaḥ ta rājya vraḥ pāda kamra
{A22}   teṅ ’añ śrī dharaṇīndravarmmadeva ta jā vraḥ ’ryāṃ vraḥ pādakamrateṅ ’añ śrī jayavarmmadeva bhagavat pāda kamrateṅ ’a
{A23}   ñ ta guru śrī divākarapaṇḍita gi ta jā vraḥ guru thverājābhiṣekahoma[nu] vraḥ yajña phoṅ prasāda sarvvadravya ’val tabhagavat pā
{A24}   da kamrateṅ ’añ ta guru śrī divākarapaṇḍita jvan sapdevatākṣetra phoṅ thve yajña jyak travāṅ sthāpanā oy dā
{A25}   na dravya ta daṃnep=ra khāl mās vat khlās pratigraha taṃryya’seh khñuṃ ta vrāhmaṇa paṇḍita sap bhāga nu ’nak dīnānātha pho
{A26}   ṅ ○ lvaḥ ta 1035 śaka pi vraḥ pāda kamrateṅ ’añ śrīsūryyavarmmadeva ta jā vraḥ cau matṛpakṣa vraḥ pāda kamrateṅ ’añ
{A27}   śrī jayavarmmadeva nu vraḥ pāda kamrateṅ ’añ śrīdharaṇīndravarmmadeva svey vraḥ dharmmarājya ’añjeñ bhagavat pādakamra
{A28}   teṅ ’añ ta guru śrī divākarapaṇḍita jā vraḥ guru gi ta thverājābhiṣeka man vraḥ pāda kamrateṅ ’añ [ryyan] thve vraḥ dīkṣā ryya
{A29}   n iss siddhānta phoṅ ta daṃnep=ra vraḥ guhya thveśāstrotsava phoṅ oy dakṣiṇā roḥ ta □ □ □ □ □ □ □ □ s oy
{A30}   hemadolā pañcaśīra pi jiḥ oy māyūra kanakadaṇḍa vyarsitātapatra pvan □ □ □ □ □ □ □ □ □ tāṃ sarvva
{A31}   ratna ta gi pi duk ta daṃnep=ra makuṭa kundala karṇābharaṇakeyūra kaṅkana kaṇṭhī udaravandha □ □ □ □ □ □ □ □ ’aṅgulī
{A32}   yaka navaratna vāna vat khlās pratigraha cok chlyak khāl māsgraloṅ tai canhvay nu □ □ □ □ □ □ □ □ □ □ □ ta
{A33}   bhagavat pāda kamrateṅ ’añ samavarṇa ti tāk ’aṃvi ta vraḥkralā glāṅ sap thṅai syaṅ ’nak rājakāryya □ □ □ □ □ □ bhagava
{A34}   t pāda kamrateṅ ’añ gi ti ’añjeñ thve vraḥ koṭihoma vraḥlakṣahoma vraḥ □ □ □ homa vraḥ pitṛyajña vraḥ □ □ yajña
{A35}   sap saṃvatsara gi roḥ vraḥ śloka vraḥ pāda kamrateṅ ’añ śrīsūryyavarmmadeva ○ [Sanskrit stanza]
{A37}   oy vraḥ dāna sarvvadravya mās prāk ratna vāna vat khlāspratigraha sruk dāsadāsī taṃryya ’seḥ go kapilādi ’val ○ ma
{A38}   n bhagavat pāda kamrateṅ ’añ ta guru śrī divākarapaṇḍita thvekṣetrādhigama pi jvan dravya ta devatākṣetra phoṅ daṃnep=ra
{A39}   kamrateṅ jagat śrī bhadreśvara gi roḥh vraḥ śloka vraḥ pādakamrateṅ ’añ śrī sūryyavarmmadeva duk pi pre cār ta hemado
{A40}   lā phoṅ nu dravya ta roḥh noḥ phoṅ pi jvan ta devatākṣetraphoṅ sap ’anle ○ [Sanskrit stanza]
{A42}   bhagavat pāda kamrateṅ ’añ ta guru śrī divākarapaṇḍita jyakdanle ti hau śrīdivākarataṭāka ’nau kamrateṅ jagat śrī bha
{A43}   dreśvara saṅ ’āśrama duk dāsadāsī ta gi jvan srukmadhyamadeśa sruk taṅkāl nu caṃnat bhāganaya noḥ nu dāsadāsī srā □□ □ □
{A44}   thve caṃnāṃ kalpanā roḥ ta pāñjiya neḥ raṅko paryyaṅ vraḥvasana dyān dhūpa kriyā sraṅ rmmāṃ caṃryyāṅ smevya tūryya chmāpvṅya ’arca
{A45}   na pratidina ○
{A45}   nā kamrateṅ jagat śrī śikharīśvara □ □ □ □ □ □ daṅ bhagavatpāda kamrateṅ ’añ ta guru śrī divākarapa
{A46}   ṇḍita sthāpanā kamrateṅ ’añ ta rāṃ suvarṇapratimā □ □ □ □ □□ □ □ □ □ kanloṅ kamrateṅ ’añ jvan dravya □ □ □ □ □
{A47}   śambhugrāma bhavagrāma jyak danle sap sruk □ □ □ □ □ saṅ’āśrama duk dāsadāsī jvan dravya ta gi thve caṃnāṃ roḥ ta pāñjiya
{A48}   neḥ raṅko paryyaṅ vraḥ vasana dyan dhūpa kriyā sraṅ rmmāṃcaṃryyāṅ smevya tūryya chmāp vṅya ’arccana pratidina dravya tibhagava
{B1}   t pāda kamrateṅ ’añ ta guru śrī divākarapaṇḍita jvan ta kamrateṅjagat śrī śikharīśvara thniṃ suvarṇakośa makuṭa kundala keyūra
{B2}   kaṅkana kaṇṭhī udaravandha kāñcī nūpura pāduka ta tāṃsarvvaratna ta gi ti vraḥ pāda kamrateṅ ’añ śrī sūryyavarmmadeva oydāna nā thve
{B3}   vraḥ dīkṣā hemavitāna ti chlāk padma tāṃ sarvvaratna tās phdaivraḥ prāsāda kaṅsamaya jvan khāl mās ’aṅgulīyaka ratna vāna vat
{B4}   khlās pratigraha taṃryya ’seḥ daṅ juṃ sāy sitacchattra padigaḥdlaḥ kuntikā kadāha dlaḥ ’āṅ svok dop phnāṅ canlyak ’asaṅkhyā tās
{B5}   vraḥ prāsāda vraḥ prāṅgana phoṅ vraḥ thnal dau lvaḥ kralā tutsrū nu canlyak sap samvatsara ○ oy dakṣiṇā vraḥ kamrateṅ ’añ
{B6}   ’adhyāpaka vraḥ kamrateṅ ’añ ta siṅ pratipakṣa vraḥ sabhā khloñviṣaya puruṣādhikara puruṣa paṃre phoṅ strī paṃre phoṅ sap varṇa
{B7}   sap saṃvatsara ○ nā kamrateṅ jagat śivapura danden man s □ ī□ □ □ □ □ □ □ □ □ □ sruk caraṅ sruk tvaṅ jeṅ sruk khcoṃ jyak danle
{B8}   saṅ ’āśrama duk dāsadāsī ’val jvan sarvvadravya caṃnāṃ ti cāṃpratidina rmmāṃ camryyaṅ smevya tūryya raṅko paryyaṅ vraḥ vasanadyān dhūpa kri
{B9}   yā sraṅ catussneha vṅya nu ’arcana chmāp vṅya dravya ti jvankhāl mās ’aṅgulīyaka ratna vāna vat khlās pratigraha taṃryya ’seḥ daṅsitacchattra
{B10}   juṃ sāy padigaḥ dlaḥ kuntikā kadāha dlaḥ ’āṅ svok dop phnāṅcanlyāk ’asaṅkhyā tās vraḥ prāsāda vraḥ prāṅgana vraḥ thnal nu canlyāk○
{B11}   oy dakṣiṇā vraḥ kamrateṅ ’añ ’adhyāpaka vraḥ kamrateṅ ’añ tasiṅ pratipakṣa vraḥ sabhā khloñ viṣaya puruṣādhikara puruṣa
{B12}   paṃre strī paṃre phoṅ sap varṇa sap saṃvatsara ○ nākamrateṅ jagat śrī cāmpeśvara bhagavat pāda kamrateṅ ’añ ta guru śrīdivākarapaṇḍita
{B13}   jau bhūmi cat sruk saṅ ’āśrama duk dāsadāsī ta gi thvecaṃnāṃ roḥ ta pāñjiya ti cār praśasta ○ na kamrateṅ jagat īśvarapuraman ’aṃve
{B14}   kamrateṅ ’añ vraḥ guru ta rājya vraḥ pāda kamrateṅ ’añparamavīraloka ti vraḥ pāda kamrateṅ ’añ śrī sūryyavarmmadeva oy viṅ
{B15}   ta bhagavat pāda kamrateṅ ’añ ta guru śrī divākarapaṇḍita man’val bhūmi khñuṃ devatā noḥ ti pādamūla lak pi cāy ta ’anya □ □ □bhaga
{B16}   vat pāda kamrateṅ ’añ ta guru śrī divākarapaṇḍita loḥ iss viṅthve devasthāna nu śivapūjā devatā noḥ ru kāla kamrateṅ ’añ
{B17}   vraḥ guru viṅ ○ ri ’aṃpāl sruk nu kula kamrateṅ ’añ taparamaguru phoṅ ta mān doṣa daṃnep=ra sruk vrai slā kula kamrateṅ’añ □ □ □ □
{B18}   □ □ deva ○ sruk kantiṅ kula kamrateṅ ’añ ta guru kantiṅ tikamrateṅ phdai karoṃ jvan ta vraḥ dau bhagavat pāda kamrateṅ ’añ taguru śrī divā
{B19}   karapaṇḍita dval vraḥ karuṇā ta paramapavitra vraḥ pādakamrateṅ ’añ śrī sūryyavarmmadeva loḥ iss cuñ nu ’nak ta mān doṣa □ □□
{B20}   rṇa viṅ ru ti kroy ○ 1041 śaka gi nu vraḥ pāda kamrateṅ ’añ śrīsūryyavarmmadeva pandval pre śilpi rājakāryya eka do triṇī catvā
{B21}   ri nu ’nak viṣaya sadyā dau thve sruk vnur dnaṅ nu devasthānanoḥ pi leṅ ta santāna ti kroy coṅ prāsāda jyak danle □ □ □ □ n va
{B22}   n kaṃveṅ juṃ sruk pit □ □ □ ’aṃpeṅ ta □ □ □ □ phoṅ nu kuṭipada kralā rāṃ □ □ kaṃluṅ mattavāraṇa krau kaṃluṅ nup □ □ □ □ □phoṅ ○

{A3}   1041 śaka pañcamī □ □ śrāvaṇa candravāra nu vraḥ pādakamrateṅ ’añ śrī sūyyavarmmadeva stac ’nau nā vraḥ kra
{A4}   lā [nu gi] vraḥ kamrateṅ ’añ vrāhmaṇa kamrateṅ ’añ rājakularājaputra mahāmantri senāpati vraḥ kamrateṅ ’a
{A5}   ñ guṇadoṣadarśi ta pvan ’nak sañjak khloñ glāṅ ta pvan ’naksañjak khloñ vraḥ laṃvāṅ phoṅ syaṅ ta gāl pi bhagavat pā
{A6}   da kamrateṅ ’añ ta guru śrī divākarapaṇḍita chlaṅ havirvvādavraḥ pāda kamrateṅ ’añ śrī sūryyavarmmadeva stac cuḥ le
{A7}   vraḥ □ □ □ □ □ □ □ □ □ □ □ □ □ □ □ □ □ □ lek vraḥ ’añjali pandvalpre sthāpanā praśasta neḥ ○ bhaga
{A8}   vat pāda kamrateṅ ’añ ta guru śrī divākarapaṇḍita sruk vnur dnaṅviṣaya sadyā varṇa karmmāntara triṇi uditodita
{A9}   □ □ va □ □ □ □ vayaḥ guḥ ryyan paryyan iss ’āgama phoṅ thve isstapaḥ phoṅ ○ lvaḥ ta rājya vraḥ pāda kamrateṅ ’añ śrī u
{A10}   dayādityavarmmadeva ta svey rājya nu 972 śaka pi sthāpanākamrateṅ ’añ suvarṇaliṅga □ □ □ □ □ □ □ □ □
{A11}   pi duk ’arcana bhagavat pāda kamrateṅ ’añ ta guru śrīdivākarapaṇḍita gi ta ’añjeñ ’arcana [vraḥ neḥ] ○ lvaḥ ta rājya vraḥ pāda
{A12}   kamrateṅ ’añ śrī harṣavarmmadeva bhagavat pāda kamrateṅ’añ ta guru śrī divākarapaṇḍita gi ti ’añjeñ [jā ’ācāryya]pra
{A13}   dhāna nā catvārī ○ lvaḥ ta rājya vraḥ pāda kamrateṅ ’añ śrījayavarmmadeva [ta] svey vraḥ dharmmarājya pi prās [tapaḥ thve]
{A14}   sarvvayogya ta jā vraḥ guru ta nu thve rājābhiṣekahoma [nu]vraḥ yajña phoṅ bhagavat pāda kamrateṅ ’añ ta guru śrī divāka
{A15}   rapaṇḍita gi ti ’añjeñ jā vraḥ guru thve rājābhiṣekahoma[nu]vraḥ yajña phoṅ oy nāma bhagavat pāda kamrateṅ ’añ ta
{A16}   guru śrī divākarapaṇḍita prasāda hemadolā pi jiḥ sitātapatranara ti pre ’nak chattradhāra [’nak] ta seṅ prasāda sarvvadra
{A17}   vya ta daṃnep=ra khāl mās vāna vat khlās pratigraha taṃryya’seḥ □ khñuṃ nu dāsī ’val ta bhagavat pāda kamrateṅ ’añ ta guru śrī di
{A18}   vākarapaṇḍita jvan sap devatākṣetra phoṅ thve yajña sthāpanājyak travāṅ oy dāna dravya ta daṃnep=ra khāl mās
{A19}   vat khlās pratigraha taṃryya ’seḥ khñuṃ ta vrāhmaṇa paṇḍitasap bhāga nu ’nak ta dīnānātha phoṅ ta gi man vraḥ pāda kamrate
{A20}   ṅ ’añ śrī jayavarmmadeva stac kṣetrādhigama [dau] tīrthā [tadaṃep=ra] dau kamrateṅ jagat śrī cāmpeśvara bhagavat pāda kamrate
{A21}   ṅ ’añ ta guru śrī divākarapaṇḍita gi ti ’añjeñ dau □ □ □ □ ta sapdevatākṣetra phoṅ ○ lvaḥ ta rājya vraḥ pāda kamra
{A22}   teṅ ’añ śrī dharaṇīndravarmmadeva ta jā vraḥ ’ryāṃ vraḥ pādakamrateṅ ’añ śrī jayavarmmadeva bhagavat pāda kamrateṅ ’a
{A23}   ñ ta guru śrī divākarapaṇḍita gi ta jā vraḥ guru thverājābhiṣekahoma[nu] vraḥ yajña phoṅ prasāda sarvvadravya ’val tabhagavat pā
{A24}   da kamrateṅ ’añ ta guru śrī divākarapaṇḍita jvan sapdevatākṣetra phoṅ thve yajña jyak travāṅ sthāpanā oy dā
{A25}   na dravya ta daṃnep=ra khāl mās vat khlās pratigraha taṃryya’seh khñuṃ ta vrāhmaṇa paṇḍita sap bhāga nu ’nak dīnānātha pho
{A26}   ṅ ○ lvaḥ ta 1035 śaka pi vraḥ pāda kamrateṅ ’añ śrīsūryyavarmmadeva ta jā vraḥ cau matṛpakṣa vraḥ pāda kamrateṅ ’añ
{A27}   śrī jayavarmmadeva nu vraḥ pāda kamrateṅ ’añ śrīdharaṇīndravarmmadeva svey vraḥ dharmmarājya ’añjeñ bhagavat pādakamra
{A28}   teṅ ’añ ta guru śrī divākarapaṇḍita jā vraḥ guru gi ta thverājābhiṣeka man vraḥ pāda kamrateṅ ’añ [ryyan] thve vraḥ dīkṣā ryya
{A29}   n iss siddhānta phoṅ ta daṃnep=ra vraḥ guhya thveśāstrotsava phoṅ oy dakṣiṇā roḥ ta □ □ □ □ □ □ □ □ s oy
{A30}   hemadolā pañcaśīra pi jiḥ oy māyūra kanakadaṇḍa vyarsitātapatra pvan □ □ □ □ □ □ □ □ □ tāṃ sarvva
{A31}   ratna ta gi pi duk ta daṃnep=ra makuṭa kundala karṇābharaṇakeyūra kaṅkana kaṇṭhī udaravandha □ □ □ □ □ □ □ □ ’aṅgulī
{A32}   yaka navaratna vāna vat khlās pratigraha cok chlyak khāl māsgraloṅ tai canhvay nu □ □ □ □ □ □ □ □ □ □ □ ta
{A33}   bhagavat pāda kamrateṅ ’añ samavarṇa ti tāk ’aṃvi ta vraḥkralā glāṅ sap thṅai syaṅ ’nak rājakāryya □ □ □ □ □ □ bhagava
{A34}   t pāda kamrateṅ ’añ gi ti ’añjeñ thve vraḥ koṭihoma vraḥlakṣahoma vraḥ □ □ □ homa vraḥ pitṛyajña vraḥ □ □ yajña
{A35}   sap saṃvatsara gi roḥ vraḥ śloka vraḥ pāda kamrateṅ ’añ śrīsūryyavarmmadeva ○ [Sanskrit stanza]
{A37}   oy vraḥ dāna sarvvadravya mās prāk ratna vāna vat khlāspratigraha sruk dāsadāsī taṃryya ’seḥ go kapilādi ’val ○ ma
{A38}   n bhagavat pāda kamrateṅ ’añ ta guru śrī divākarapaṇḍita thvekṣetrādhigama pi jvan dravya ta devatākṣetra phoṅ daṃnep=ra
{A39}   kamrateṅ jagat śrī bhadreśvara gi roḥh vraḥ śloka vraḥ pādakamrateṅ ’añ śrī sūryyavarmmadeva duk pi pre cār ta hemado
{A40}   lā phoṅ nu dravya ta roḥh noḥ phoṅ pi jvan ta devatākṣetraphoṅ sap ’anle ○ [Sanskrit stanza]
{A42}   bhagavat pāda kamrateṅ ’añ ta guru śrī divākarapaṇḍita jyakdanle ti hau śrīdivākarataṭāka ’nau kamrateṅ jagat śrī bha
{A43}   dreśvara saṅ ’āśrama duk dāsadāsī ta gi jvan srukmadhyamadeśa sruk taṅkāl nu caṃnat bhāganaya noḥ nu dāsadāsī srā □□ □ □
{A44}   thve caṃnāṃ kalpanā roḥ ta pāñjiya neḥ raṅko paryyaṅ vraḥvasana dyān dhūpa kriyā sraṅ rmmāṃ caṃryyāṅ smevya tūryya chmāpvṅya ’arca
{A45}   na pratidina ○
{A45}   nā kamrateṅ jagat śrī śikharīśvara □ □ □ □ □ □ daṅ bhagavatpāda kamrateṅ ’añ ta guru śrī divākarapa
{A46}   ṇḍita sthāpanā kamrateṅ ’añ ta rāṃ suvarṇapratimā □ □ □ □ □□ □ □ □ □ kanloṅ kamrateṅ ’añ jvan dravya □ □ □ □ □
{A47}   śambhugrāma bhavagrāma jyak danle sap sruk □ □ □ □ □ saṅ’āśrama duk dāsadāsī jvan dravya ta gi thve caṃnāṃ roḥ ta pāñjiya
{A48}   neḥ raṅko paryyaṅ vraḥ vasana dyan dhūpa kriyā sraṅ rmmāṃcaṃryyāṅ smevya tūryya chmāp vṅya ’arccana pratidina dravya tibhagava
{B1}   t pāda kamrateṅ ’añ ta guru śrī divākarapaṇḍita jvan ta kamrateṅjagat śrī śikharīśvara thniṃ suvarṇakośa makuṭa kundala keyūra
{B2}   kaṅkana kaṇṭhī udaravandha kāñcī nūpura pāduka ta tāṃsarvvaratna ta gi ti vraḥ pāda kamrateṅ ’añ śrī sūryyavarmmadeva oydāna nā thve
{B3}   vraḥ dīkṣā hemavitāna ti chlāk padma tāṃ sarvvaratna tās phdaivraḥ prāsāda kaṅsamaya jvan khāl mās ’aṅgulīyaka ratna vāna vat
{B4}   khlās pratigraha taṃryya ’seḥ daṅ juṃ sāy sitacchattra padigaḥdlaḥ kuntikā kadāha dlaḥ ’āṅ svok dop phnāṅ canlyak ’asaṅkhyā tās
{B5}   vraḥ prāsāda vraḥ prāṅgana phoṅ vraḥ thnal dau lvaḥ kralā tutsrū nu canlyak sap samvatsara ○ oy dakṣiṇā vraḥ kamrateṅ ’añ
{B6}   ’adhyāpaka vraḥ kamrateṅ ’añ ta siṅ pratipakṣa vraḥ sabhā khloñviṣaya puruṣādhikara puruṣa paṃre phoṅ strī paṃre phoṅ sap varṇa
{B7}   sap saṃvatsara ○ nā kamrateṅ jagat śivapura danden man s □ ī□ □ □ □ □ □ □ □ □ □ sruk caraṅ sruk tvaṅ jeṅ sruk khcoṃ jyak danle
{B8}   saṅ ’āśrama duk dāsadāsī ’val jvan sarvvadravya caṃnāṃ ti cāṃpratidina rmmāṃ camryyaṅ smevya tūryya raṅko paryyaṅ vraḥ vasanadyān dhūpa kri
{B9}   yā sraṅ catussneha vṅya nu ’arcana chmāp vṅya dravya ti jvankhāl mās ’aṅgulīyaka ratna vāna vat khlās pratigraha taṃryya ’seḥ daṅsitacchattra
{B10}   juṃ sāy padigaḥ dlaḥ kuntikā kadāha dlaḥ ’āṅ svok dop phnāṅcanlyāk ’asaṅkhyā tās vraḥ prāsāda vraḥ prāṅgana vraḥ thnal nu canlyāk○
{B11}   oy dakṣiṇā vraḥ kamrateṅ ’añ ’adhyāpaka vraḥ kamrateṅ ’añ tasiṅ pratipakṣa vraḥ sabhā khloñ viṣaya puruṣādhikara puruṣa
{B12}   paṃre strī paṃre phoṅ sap varṇa sap saṃvatsara ○ nākamrateṅ jagat śrī cāmpeśvara bhagavat pāda kamrateṅ ’añ ta guru śrīdivākarapaṇḍita
{B13}   jau bhūmi cat sruk saṅ ’āśrama duk dāsadāsī ta gi thvecaṃnāṃ roḥ ta pāñjiya ti cār praśasta ○ na kamrateṅ jagat īśvarapuraman ’aṃve
{B14}   kamrateṅ ’añ vraḥ guru ta rājya vraḥ pāda kamrateṅ ’añparamavīraloka ti vraḥ pāda kamrateṅ ’añ śrī sūryyavarmmadeva oy viṅ
{B15}   ta bhagavat pāda kamrateṅ ’añ ta guru śrī divākarapaṇḍita man’val bhūmi khñuṃ devatā noḥ ti pādamūla lak pi cāy ta ’anya □ □ □bhaga
{B16}   vat pāda kamrateṅ ’añ ta guru śrī divākarapaṇḍita loḥ iss viṅthve devasthāna nu śivapūjā devatā noḥ ru kāla kamrateṅ ’añ
{B17}   vraḥ guru viṅ ○ ri ’aṃpāl sruk nu kula kamrateṅ ’añ taparamaguru phoṅ ta mān doṣa daṃnep=ra sruk vrai slā kula kamrateṅ’añ □ □ □ □
{B18}   □ □ deva ○ sruk kantiṅ kula kamrateṅ ’añ ta guru kantiṅ tikamrateṅ phdai karoṃ jvan ta vraḥ dau bhagavat pāda kamrateṅ ’añ taguru śrī divā
{B19}   karapaṇḍita dval vraḥ karuṇā ta paramapavitra vraḥ pādakamrateṅ ’añ śrī sūryyavarmmadeva loḥ iss cuñ nu ’nak ta mān doṣa □ □□
{B20}   rṇa viṅ ru ti kroy ○ 1041 śaka gi nu vraḥ pāda kamrateṅ ’añ śrīsūryyavarmmadeva pandval pre śilpi rājakāryya eka do triṇī catvā
{B21}   ri nu ’nak viṣaya sadyā dau thve sruk vnur dnaṅ nu devasthānanoḥ pi leṅ ta santāna ti kroy coṅ prāsāda jyak danle □ □ □ □ n va
{B22}   n kaṃveṅ juṃ sruk pit □ □ □ ’aṃpeṅ ta □ □ □ □ phoṅ nu kuṭipada kralā rāṃ □ □ kaṃluṅ mattavāraṇa krau kaṃluṅ nup □ □ □ □ □phoṅ ○